31/12/2025
أدوية التخسيس المجهولة…
مش بتخسّس جسمك…
بتسكّته.
خليني أتكلم معاكم بصراحة
الست اللي بتجرب دواء تخسيس مجهول
مش مهملة
ولا بتضحك على نفسها.
هي غالبًا:
• تعبانة
• مجرّبة دايت كتير
• وزنها واقف
• وجسمها مش راضي يتعاون
فلما حد يقولها:
“كبسولة سحريه… تنزّلك الوزن من غير تعب”
طبيعي تصدّق.
بس هنا المشكلة الحقيقية 👇
إيه يعني دواء تخسيس مجهول؟
يعني حاجة:
• مالهاش تركيبة واضحة
• مش مسجّلة
• ومفيش حد مسؤول عنها
• بس بتتباع تحت مسمى “آمن” و“طبيعي”
وفي العيادة…
بشوف حالات كتير دفعت التمن بعد ماجربت حاجات كتير .
وجزء من الي بيحصل لحالات حقيقية
• ضربات قلب سريعة
• ضغط بيعلى فجأة
• إرهاق في الكبد والكُلى
• لخبطة هرمونات عند السيدات
• فقدان شهية مرضي
• نقص فيتامينات
• وتعب عام مش مفهوم سببه
طيب ليه الوزن بينزل بسرعة؟
مش لأن الجسم اتحسّن.
لكن لأن:
• في مواد بتسحب مياه من الجسم
• أو مثبطات شهية قوية بتضغط على الجهاز العصبي
• أو مواد شبه الأمفيتامين تدي إحساس كاذب بالنشاط
الجسم ما اتحسّنش…
الجسم اتضغط.
وعشان كده
أغلب اللي بيحصل بعد التوقف:
• الوزن يرجع
• أحيانًا أكتر
• ومعاه تعب وإجهاد أكبر
التخسيس مش سباق
وأي نزول سريع وغير مفهوم
غالبًا وراه حساب هتدفعه من صحتك.
الحل الآمن الوحيد؟
الحل انك :
• تفهم جسمك
• تعرف ليه بيخزّن مش بيحرق
• تهدّيه الأول من الالتهابات
• وبعدها تشتغل على الأكل والحركة صح
من غير حرمان
من غير ضغط
ومن غير مخاطرة
افتكر دايمًا:
أي حاجة بتوعدك بنزول وزن
من غير مجهود
غالبًا مش بتساعدك…
غالبًا بتستغل تعبك.
