02/12/2025
حاسس إنك تعبان من غير سبب؟
يمكن المشكلة في مشاعرك اللي مش واخدة حقها
في الأيام الأخيرة، ناس كتير بتحس بثقل غريب في قلبها وعقلها. حد يقول:
حاسس إني مش قادر أركز
مش قادر أرتاح
مش فاهم ليه
الحقيقة إن ده مش بس مزاج وحش. ده ممكن يكون إرهاق نفسي من كبت المشاعر.
إيه هو كبت المشاعر؟
محاولة إخفاء أو منع المشاعر السلبية بدل التعبير عنها.
ودا بيزود الحمل النفسي ويخلي الجسم والعقل في حالة توتر مستمر.
يعني ببساطة: دماغك وجسمك شايلين مشاعرك من غير ما تطلعها ، وده بيخلي كل حاجة بسيطة تبان أكبر من حجمها، النوم متقطع، والجسم متوتر من غير سبب واضح.
الأبحاث العلمية أكدت إن الناس اللي بيكبتوا مشاعرهم طول الوقت بيكونوا أكثر عرضة للقلق، للتفكير المفرط، وحتى لإرهاق جسدي زي الصداع أو نوم متقطع. ومش كده بس ده بيخلي إحساسك بالفراغ الداخلي يزداد، والميل للعزلة يحسسك إنك مش موجود.
وفى لحظة عادية جدا ممكن نلاقي الشخص دا انفجر ودا مش لانوا تافه دا لان غالبا الموقف التافه دا صحى عندوا مشاعر هو راكنها بقالوا كتير في اللاوعى ،مشاعر مؤلمة بالنسبالوا هو مقدرش انوا يواجهها ويتعامل معاها وقت المشكلة فقرر انوا يخفيها .
والأغرب ان أغلب الناس مش واخدة بالها إن ده منتشر دلوقتي بسبب :
ضغط الحياة والمسؤوليات اليومية
التوقعات المجتمعية العالية
الاستخدام المكثف للموبايل والسوشيال ميديا
الشعور بأن التعب ضعف وممنوع التعبير عنه
وغيرها من الاسباب والضغوطات اللي بتوقعهم في اهمال نفسهم ومشاعرهم وافكارهم وحياتهم.
لكن فيه خطوات بسيطة ممكن تهدي عقلك وتخفف من الالم دا :
1. تنفس هادي 10 دقائق يوميًا يساعد المخ على تهدئة الجهاز العصبي
2. استراحة قصيرة كل ساعتين لتخفيف التوتر
3. سجل شعورك : اسم المشاعر اللي حاسس بيها علشان تفهمها وتتعامل معاها
4. وضع حدود واضحة قول “مش هقدر دلوقتي” بدون شعور بالذنب
5. 20 دقيقة بلا موبايل في نهاية يومك على الاقل لترتيب أفكارك وتهدئة أعصابك
كلها خطوات بسيطة مرنة لو ادينا نفسنا فرصة هنقدر ننفذها تدريجيا
واللي اعمق من الخطوات دي هو اننا نعرف ازاي نتعامل مع مشاعرنا صح من غير ما نكبتها او نركنها ودي هندردش فيها سوا مرة تانية .
وخليك فاكر :
انت مش لوحدك، وإدراكك للمشكلة هو أول خطوة للتغيير ، والتغيير قرار (قرارك انت وبس).
دُمتم بخير.
