01/12/2025
من حالات العيادة ...
مريضة عندها 75 سنه بتشتكي من قيء مستمر من أسبوعين للأسف مش بيقف بأي علاج، مع غثيان شديد وأحساس بالترجيع، تشويش بالرؤية (شايفه هالات صفرا قدام عنيها)، هبوط عام في جسمها كله ووجع في صدرها .. لفت كتير عند الدكاترة والترجيع والغثيان والدوخه مش بتروح !!
- عملت منظار علي الجهاز الهضمي العلوي ( المعدة والمريء والأثنى عشر )، من أسبوع تقريبا بحكم أن سنها كبير وممكن يكون سبب الترجيع والغثيان والدوخة هو سرطان المعدة او المريء او أنسداد قنوات المرارة ولكن الحمد لله كله طلع سليم تماما .. في تقرير المنظار سليم.
- كان معاها تحاليل كتير جدا منها ..
صورة دم كاملة ، وظائف كبد وكلي كاملة ، سكر عشوائي وتراكمي ، نسبة الصفرا في الدم كلي ومباشر ، سونار علي البطن والحوض وبرضوا كلوا سليم ..
0 طبعا التحاليل والأشعة والمنظار مهمين جدا لأستبعاد أسباب الترجيع والغثيان والدوخة الشديدة دي ). لكن كله سليم وطبيعي جدا ومفيش تفسير للشكوي !!
- التاريخ المرضي بتاعها والعلاج اللي بتاخدة ..
علاج السكر (انسولين)، علاج الضغط (كوفارسيل)، علاج قصور الشريان التاجي (ميتاكارديا)، علاج السيولة (اسبرين)، علاج ضعف عضلة القلب والرفرفة الأذنيية (كاردوكسين اللي هو بديل اللانوكسين)، علاج مدر للبول (تورسيرتك). دوا الدهون (أتور) وطبعا مع علاجات كتير للمعدة والترجيع وفيتامينات كتير ..
كده الرؤية بدأت توضح شويتين .. ( ويارب ميكنش اللي في بالي ).!!
- أطلعي يا حجه كده ع الشيزلونج نكشف علي حضرتك - طبعا قولتلها كده علي استحياء لأن الحجه جاية تعبانه جدا بتموت فعليا عندي في العيادة، وانا بدأت اقلق لتفيس فعلا في العيادة من التعب والمجهود والترجيع بعد ما طلعت من الحمام عندي، وانا بدعي ربنا يسترها علينا انا وهي اصلا، بصي هنكشف عليكي بسرعة ونحطك علي المونيتور كده ( بالمناسبة دي عندي مونيتور العناية في العيادة ) وبالمرة نعمل رسم قلب كمحاولة اخيرة لمعرفة التشخيص بعد العلاج والشكوى اللي مبترحش دي ..
- ردت بنتها عادي يا دكتور هي كانت محجوزة في العناية قبل كده مرتين في اول السنادي
يلا ع البركة ..
- كشفت علي صدرها وبطنها ورجليها لقيت كله تمام وزى الفل - ما انتى عتوت اهو يا حجه اومال ايه بقي _ نحط علي المونيتور ونعمل رسم قلب وهنا كانت المفأجاة .. او المصيبة !!
قولت لبنتها هاتي دوا القلب بتاعها كده .. لما جابته قولت للمريضه انتى بتبطلي دوا القلب دا خميس وجمعه ؟! قالتللي لاء بأخده كل يوم كنت زمان ببطله بس نسيت شكل الادوية وباخده كل يوم # # # #
Sagging of ST segment in limb and chest leads due to digitalis -
toxicity
Cardioxin, lanoxin used to ttt of Congestive heart failure with AF -
- Digitalis or Lanoxin toxicity induced by hypokalemia, diuretics and overuses
المختصر بالعربي والترجمة ..
- سبب الترجيع المستعصي للادوية والمستمر هو دوا القلب عامل تسمم بالمادة الفعالة للدوا لانها كانت بتاخد العلاج كل يوم بانتظام مش بتفوت يوم ، والعلاج دا لازم يتبطل يومين في الاسبوع اللي هما الخميس والجمعه فهي نسيت تبطله، واللي زود الطين بله ان المريضة كانت بتاخد علاج مدر للبول يعني بينزل الميه عشان جسمها بيورم ولكن دوا الميه مع علاج القلب لو متبطلش خميس وجمعه بيعمل تسمم وبيزود حدوث التسمم بالعلاج بسبب نقص البوتاسيوم في الدم ..
كله ده ظهر في رسم القلب .. كما هو موضح بالصور !!
- أخيرا عرفنا سبب الترجيع والقيئ المستمر مع الغثيان والهبوط والدوخة ووجع العضلات بفضل الله تعالى علينا، قولتلها توقف العلاج بتاع القلب والميه بس وتكمل علي باقي العلاج، وتعمل التحاليل دي فورا في اقرب وقت .. نسبة البوتاسيوم في الدم ونسبة اللانوكسين في الدم وانزيمات قلب.
- المريضة ارتاحت نفسيا لما عرفت سبب الترجيع والدوخة والهبوط والزغلله اللي في عنيها بسبب دوا القلب اللي كان لازم يتبطل خميس وجمعة وهي فعلا بقالها شهر او شهر ونص بتاخده باستمرار لانها بقيت بتنسى وقاعدة لوحدها ..
دمتم سالمين بكل خير وصحة وعافيه 🌹💙
عيادة
إستشاري الباطنه والسكر والكبد والجهاز الهضمي _ كلية الطب جامعة عين شمس
العيادة : بيلا - كفر الشيخ شارع المحكمه امام صيدلية د. رضا شاور بجوار أسواق أبو غريب.
للحجز والاستعلام :
01023315120
01119602095
