22/03/2026
#عيدـالأم مش لازم يكون احتفال لكل الناس،
أحيانًا بيكون وقت مؤلم…لقلوب كبرت بدري،
واتعلمت تعيش من غير حضن.
مش كل أم تستحق لقب “أم”.
فيه فرق كبير بين واحدة خَلّفت…
وواحدة ربّت. وواحدة بتقوم بمهمة ثقيلة عليها..
فى فرق بين اللي كانت حضن… واللي كانت سبب في الجرح.
في #عيدـالأم، الناس بتحتفل بالحب غير المشروط،
لكن كمان في ناس فى اليوم ده بتفتكر وجع قديم عاشوه
كلمة قاسية، إهمال، مقارنة، أو شعور دايم إنهم مش كفاية.
مش كل أم كانت أمان،
ومش كل حضن كان دفا.
وفيه أطفال كبروا…
من غير ما يحسوا إنهم كانوا أطفال أصلًا.
واللي عاش التجربة دي،
هو مش قليل… ولا ناقص… ولا صعب يتحب.
لكن هو مكنش عنده اللى يعطيه الحب اللى
من حَقه ..
هو بس اتربى في مكان ماكانش بيعرف يدي حب
بشكل صحي.
فى #عيدـالأم محتاجين نراجع قناعتنا عن فكرة إن كل “أم” مُقدسة، ونلبسها قداسة، وننسى إنها في النهاية إنسانة ممكن
تكون مجروحة، مضطربة، أو حتى مؤذية وهي فاكرة
إنها “بتربي”.
والجنة تحت أقدامها
حقيقى مش كل أم ملاك…
ومش كل أم تستحق التقديس.
فكرة إن الأم “دايمًا صح”
وإن برّها معناه تتحمل أي أذى…
فكرة محتاجة تتراجع.
الأم »»»» إنسانة…
ممكن تكون سوية، وممكن تكون مؤذية.
في عيد الأم، في ناس بتحتفل،
وفي ناس بتتصالح مع الحقيقة الصعبة:
وهى " اللي المفروض يكون أمانهم …كان سبب وجعهم".
وجع إنك تكون محروم من أمك… وهي عايشة معاك،
تشوفها… بس ما تلاقيش عندها
حضن،
ولا دعم،
ولا قبول،
ولا تعاطف،
ولا حب،
الأم غير السوية ممكن تكسرك من غير ما تلمسك:
بكلمة تهد ثقتك،
بمقارنة تسرق فرحتك،
بحب مشروط يخليك طول الوقت حاسس إنك مش كفاية.
وتكبر وإنت شايل ده جواك:
خوف، شك، احتياج للحب،
إحساس إنك لازم تتعب علشان تستحق الحب،
إحساس مُخزى إنك مش متشاف،
ف تكبر وإنت:
بتشك في نفسك، حاسس بالعار منها
بتخاف تغلط، بتخاف تواجه ،
بتدور على رضا أي حد،
أو مش عارف تحس بالأمان حتى مع أقرب الناس.
وده مش ضعف منك…
ده أثر تربية وجعتك أكتر ما حضنتك.
الوجع ده حقيقي…
لكنه مش ذنبك .....
أنت ما كنتش صعب…
ولا تقيل …
ولا محتاج أكتر من اللازم. .
أنت بس كنت طفل محتاج حب… في مكان ماعرفش يديه.
عشان كده خلينا نقول الحقيقة بوضوح:
تحمّل الأذى مش برّ…
والسكوت مش احترام…
والتقديس الأعمى مش فضيلة.
من حقك تحط حدود تحميك عند الأذى،
من حقك تبعد نفسيا لو القرب بيأذيك،
ومن حقك تشوف الحقيقة زي ما هي…
من غير تجميل.
وده مش قسوة…
ده بداية شفاء.
لكل أم كانت فعلًا أم… شكرًا 🤍
ولكل حد بيحاول يتحرر من وجع قديم…
إنت مش غلط،
وإنت مش قليل،
وإنت تستحق حب آمن… حتى لو هتدّيه لنفسك الأول.
ولكل قلب اتوجع من أم غير سوية…
أنت تستحق حب أنضف من كده بكتير. 🤍
#عالمـالعلاقات
#الشخصيةـالنرجسبة #النرجسى #الامـالنرجسبة
#عالمـالعلاقات
