28/11/2025
اكتر شكوي لأمهات الاطفال من سن سنة و نص ل ٣-٤ سنين
كائن صغنن كيوت مش باين من الارض بس يوم ما يقلب و يدخل في tantrum بنزعل و نجيب ناس تزعل 😄🙆♀️
نتجاهلهم و اللا نديهم اهتمام ؟
ننفذ اللي هما عايزينه عشان ميأذوش نفسهم و اللا نصر علي رأينا عشان ميتدلعوش ؟
مهم بس نعرف ان طبيعي في السن ده هما لسة معندهمش self regulation مش عارفين يتحكموا في مشاعرهم ولا قادرين يعبروا عنها بطريقة واضحة عشان كدة فبيعبروا بالطريقة الوحيدة اللي يعرفوها.
🌟 طيب مفروض نتصرف إزاي أول ما يبدأوا نوبة الغضب ؟
👈التجاهل :
بس مش معناه تجاهل تام للطفل و مشاعره لإن ده هيعصبه اكتر و هيحبطه، ما تمشيش و تسيبيه و هو في قمة غضبه لأنك كدة بتوصلي له إنك رافضاه هو شخصيا، إحنا بنتجاهل الفعل نفسه مش الطفل يعني رمي نفسه علي الأرض و بيعيط قربي منه طبطبي علي ضهره بالراحة و إنتي ساكتة و بعدين ابدإي كلميه رفض او زود فيها خلاص اقعدي جنبه ساكتة .
👈التشتيت:
بعمل حركة خطيرة مع ابني اني بقرب من ودنه و اقول اي كلام بجد اي حاجة بس ده بيعمل لعقله تشتيت عن نوبة الغضب اللي هو فيها فبيفصل اسهل و اوقات بينسي و يضحك.
- في نفس الوقت خللي دايما معاكي وسائل تشتيت له زي كتاب بيحبه لعبة بيحبها شيليها بعيد عن عينه اول ما يبدا يدخل في النوبة حاولي تلهيه بيها.
👈validate_and_redirect:
بعد ما يخلص خديه في حضنك و ضحكيه, و ابدإي علميه إن الطريقة ده مش هتوصله للي عايزه و إنك مش بتقدري تفهميه و هو بيعيط و يصوت بالشكل ده و كل ما يكبر ساعديه أكتر ببدايل يعبر بيها عن مشاعره بطريقة صح
👈الروتين:
من اكتر الاسباب اللي بتخللي الأطفال تدخل في نوبة غضب هي تغيير الروتين، الجوع، قلة النوم فعشان تتجنبي النوبات ده علي اد ما تقدري دايما اتاكدي إن طفلك مرتاح و شبعان و نايم كويس قبل الخروج.
✔️ مهم جدا تأمين المكان حوالين الطفل عشان ميأذيش نفسه و لو بيخبط راسه في الارض حطي ايدك تحت راسه او حطي له مخدة.
✔️ ما ندخليش معاه في مساومات زي لو سكت هجيبلك كذا او اننا هننفذيله اللي عايزه لو سكت.
✔️ ما نزعقش ابدا لو عايزين نعلم بيبي ازاي يتحكم في انفعلاته يبقي لازم نتحكم احنا في نفسنا الاول 💛
كلنا اتحطينا في الموقف ده قبل كدة فمتقلقيش و خليكي هادية و لو برة متتأثريش بضغط نظرات الناس و تتعصبي
لإن كل ما كنتي اهدي كل ما ده هيسرع في انتهاء نوبة الغضب اسرع عند طفلك
