17/04/2022
الحدود غير المعلنة ملهاش لازمة..
2️⃣ الخطوة الثانية: استخدم كلام واضح ومباشر لوضع حدودك.
بعد ما كتبنا (وثيقة الحدود) فى الخطوة الأولى، انت محتاج فى الخطوة التانية تستخدم صوتك اللى ربنا رزقك بيه و تعلن لأمك ايه المناسب ليك وايه اللى مش مناسب.
وبكرر تانى الحدود غير المعلنة ملهاش لازمة..
هتستخدم فى الخطوة دى جمل واضحة ومباشرة " جمل توكيدية " مفيهاش لوم او شرح انت بتطلب ده ليه ... او انك تبرر.
محتاج انك توضح القواعد الجديدة لأمك ولما تتعدى حدودك او تحس انك مش مرتاح ترجع تعلن القواعد دى مراراً وتكراراً...
✅ وتبقى مستعد لمقاومتها الشديدة لكسر الحدود دى.. لحد ما تحترم حدودك.. “
✅ الحقوق تؤخذ ولا تعطى!
يعنى انت محتاج تمد ايدك وتاخد حقك فى الإحترام ومتقعدش ايدك على خدك!!!
دى بعض الجمل التعبيرية الواضحة والمباشرة اللى ممكن تستخدمها فى وضع حدودك:
الجمل دى بتبدأ بكلمات زي :
• مبقاش عندى استعداد ل. . .
• أنا على استعداد ل . . .
• مبقاش مناسب ليا . . .
• مش مقبول إنك …
• محتاجة منك . .
💠مثال :
• "ماما ، مبقاش عندي استعداد إنى اسمع شكوتك عن بابا، ممكن تتكلمى عن ده مع اى شخص تانى غيري.
• "مش مقبول إنك تنتقدى ولادى ، جوزى … إلخ…".
• "محتاجة منك انك تبطلى تعلقي على شكل جسمي ، لبسي….".
• مبقاش مناسب ليا انك تفتشي فى تليفونى".
• مش مقبول انك تقوليلي ألفاظ مبحبهاش .. تشتمينى!
✅ انت مش محتاج انك تعتذر أو تشرح أو تبرر أو حتى تدافع عن نفسك. الطلب يكون واضح وعلى قد النقط اللى محتاج توضح انها مقبولة او مش مقبولة .. وتعرف ان ده محتاج شجاعة وثبات على موقفك مش مرة واحدة ده طول ما انت عايش!
نوره حسن
أخصائية نفسية إكلينيكية
مقالات هى لهدف التوعية وليس التشخيص.
You're not crazy, It's your mother
