09/09/2016
ماما انا جبت ورقة السابلايز...
* روح اديها لبابا يا حبيبي
¤ بابااااااااا انا جبت ورقة السبلايز من المدرسة
© ورقة ايه يا ضنايا؟؟
¤ السبلااااااايز...
© يعني ايه يا ضنايا و غلاوتك مش فاهم
* يعني ورقة طلبات المدرسة يا محمد..
© هي بقي اسمها سبلايز!!! الله يرحم ابوك و امك كانوا بياكلوا الاستيكة ام ريحة....وريني
¤ عايز اول ورقة و اللا التانية و اللا التالتة؟
© هااااار اسوح!!! هما 3 ورقات
¤ اه يا بابا
© هاتهم كلهم شكلوا يوم كاروهات....
© ايووووووه بخاف انا من جملة dear parents دي بعرف ان وراها بلاوي.... خير..... عايزين ايه من الدير نيلة بيرنت؟؟ كليته؟؟؟ طحاله؟؟؟ اؤمروا؟؟؟
- بلاستيك بوكس " 39* 39 سم " ده ايه التباتة دي؟؟؟!!!
- بلاستيك ابرون؟؟؟
علي...علي....بص اجري اسأل ماما يعني ايه ابرون بس اعمل كإنك انت اللي مش عارفها.. اوعي تقولها بابا بيسألك سامع يا علولة يا حبيبي ؟؟
¤ مامااااااا بابا بيقولك يعني ايه ابرون مش عارفها؟؟
© اه يا كلب
* يعني مريلة بتتلبس لما يلونوا
© تعالي يا زفت انت مش عارف ابرون يعني ايه؟!!! ادي آخرة المدارس الانترناشونال!!!!
خلينا نكمل العريضة اللي مبعوتة دي...
- سبورة بيضا صغيرة " لييييييه هو احنا اللي هنشتري السبابير كمان ما ناقص نشتري الطباشير!!!! "
¤ طباشير ايه يا بابا دي وايت بورد!!!!
© سوري يا خويا....نسيت...
- 5 اقلام للزفت وايت بورد.... اومال هما اللي هيشتروهم....ده حتي ميصحش!!!!
- 10 فايلات " 5 زرق و 5 بينك "
- الوان خشب تخينة و الوان خشب رفيعة و الوان مياه و الوان جواش " لييييييييه هما فاكرينك ليوناردو دافينشي " مش عايزين نشتري بوية من جوتن بالمرة!!!!
- علبة صلصال ماركة play dough!!! هو حتي اللعب و اللغوصة احنا اللي هندفعها!!!!
- 5 بينسيل شاربار " ما يقولوا 5 برايات " هي الناس دي مالها متأنعرة علينا ليه يا دعاء؟!!! انتي مزعلاهم في حاجة؟؟
- 5 اساتيك و مقصين و 3 اسكتشات رسم و علبة اقلام رصاص ماركةfaber Castell !!!! ده انا مجبتهمش الا في اعدادي هندسة؟!!!
-3 باكيتات مناديل عادية و 3 باكيتات ديتول " دي باكيته الديتول ب 50 جنية يا كفار.... يعني حبة المناديل دي دخلالها في ورقة بمتين عفريت ينططوكوا "
- 30 name tag
- معجون سنان و فرشاة سنان و فرشاة شعر و ملابس اكسترا...
يا دعاء نسيوا يكتبوا شبشب و بيجاما ما تنسيش تبعتيهم مع علي اول يوم عشان شكلها مدرسة داخلي...
- فرش الوان تخينة
- فوم بجليتر..
- معقم لليدين " ديتول" نهار مش معدي.. مش لسه جايبين وايبس ب 200 جنية فوق!!!!
- 20 ورقة بيضا " A4"
- 40 ورقة ملونة " A4"
- جلاد شفاف... بصي هما مش كاتبين عايزين اد ايه يا دعاء فا هنجيب 20 متر يدوب كده....نبقي جبنا بزيادة و اللي يتبقي نفصًل بيه فساتين!!
- 3 شنط بسوستة؟!!! ليه و عشان ايه طيب؟!!
- بوستر كولورز!!!
- كونستركشن سكيتش!!!!
دعاء انا آخر طلبين مش فاهمهم بس شكلهم خلاص هيدخلوا الواد هندسة....شكلهم قرروا خلاص فا اسأليهم بس القاهرة و اللا عين شمس عشان منبقاش زي الاطرش في الزفة بس مش اكتر...
دعاااااااااء دعاااااااااااء...تعالي لو سمحتي
بصي انا قدامي حاجة من اتنين يا ادفع فلوس المدرسة يا فلوس الصبلايز دي....يا اما نطلعه من ام المدرسة دي خالص و افتحله بالفلوس دي مكتبة كده قد سمير و علي و هناكل من وراها الشهد....
شوفي كده و ردي عليا و ياريت البطاطس اللي بتحمريها دي تفرديها علي ورق الصبلايز بدل ورق المناديل اهو يبقي استفدنا من وشه بحاجة.....
و ابقي كلمي المدرسة اسأليهم عايزين كليتي و اللا مسامحين فيها..اوعي تنسي....
بقلم صديقتنا سارة الذهبي
