30/10/2025
إزاي أمسك دموعي قدام أي حد بيقول كلام سلبي علي طفلي "و أنا عارفة أنه صح في كل كلمة".
لما فرد من أفراد الأسرة، أصدقاء العائله، الجيران أو مدرسة طفلي بيقولوا كلام سلبي عن تطور طفلي، سلوكه أو أي تعليق يضايق و بيبقي قصدهم خير. ساعات ببقي مش متقبلة كلامهم، تقيل علي قلبي، بحس إن نفسي اقولهم ملكوش دعوة بيه و بطفلي، أنا و هو فينا "العبر" سيبونا في حالنا.
أوقات لما التعليقات السلبية بتكتر بقدر أمشي و أسيب المكان، و أوقات بقدر أتكلم و أعبر عن نفسي.
ساعات كتير صوتنا بيخونا "غصه حلق" و بيبقي مش مناسب أمشي، في الحالة ديه ممكن أعمل شوية حاجات تخلي شكلي "متماسك" و دموع حزني محدش يشوفها:
١- أركز علي التنفس: أخد شهيق، أكتم الشهيق و أعد ١٠في سري، و بعدين زفير.
٢- ابربش بعيني كتير و أحاول أبص من أقصي اليمين لاقصي الشمال بعيني.
٣- أريح عضلات وشي، لأنها في الحزن بتبقي متقلصه و مشدودة.
٤- أشرب مايه، رشفات صغيره كتير، شرب المايه بيقلل رد الفعل العاطفي emotional reaction.
٥- أكل لبان (سماره) أو سكر نبات بيحسن جداً لو أنا بيجيلي غصه حلق.
٦- أحاول افتكر موقف بيضحك عشان اتلهي عن حزني.
٧- ممكن اضغط علي اي حاجه طريه في محيط زي مخده ، خدادية، stress ball. الحاجات الطريه لما بضغط عليها بتقلل الغضب و بتقدر تخليني اتحكم في انفعالاتك.
٨- في علاقه ما بين النفسيه و الصوابع...في الموقف ده مهم اعمل مساج خفيف لصوباع صوابع هتلاقي نفسك هديت .
محاولة التماسك و أنا قدام الناس محتاجه تدريب جامد. و كل ما أدرب نفسي هقدر أتحكم في مشاعري و دموعي، و شويه شويه هقدر أتحاور بموضوعية عشان أحسن من تطور و سلوك طفلي.
يوم سعيد علينا كلنا.
#يومسعيدعليناكلنا
