08/04/2024
منقول عن احد الزملاء
بنوتة زي القمر ما شاء الله عليها عندها ١١ سنة، لبقة وما تعرفش تضحك عليها بكلمتين خااااالص
نزلت تلعب رمضان اللي فات بلعبة الأطفال المفضلة في الوقت ده "الصواريخ".
تحك الصاروخ من دول في جنب العلبة وترميه، يقوم مفرقع، وتفرح هي واختها التوأم وأصحابهم. واحد من الصواريخ ما فرقعش لما اترمى على الأرض، وطيت جابته ببراءة الأطفال وقربته لوشها عشان تشوف ما فرقعش ليه، قام مفرقع في عينها اليمين 😓.
طبعا بكاء وهستيريا، وجري على استقبال مستشفى.
انفجار بماقولة العين، يتبعه التهاب صديدي حاد.
أنا فاكر لما فحصتها وكنا داخلين العمليات بلغت أهلها إن هدفنا إن الالتهاب الصديدي ما يوصلش للمخ وممكن نفرغ العين، ولكم أن تتخيلوا منظر الأهل....
الحمد لله، بعد أربع عمليات، في خلال شهور طويلة، العين رجعت تشوف رؤية ممتازة بالنسبة للوضع اللي كانت عليه، وما بقاش ملحوظ فيها آثار الإصابة إلا لو دققت. وده على فكرة مش اللي عادة بيحصل، بس ده فضل ربنا عليها وعلى أهلها.
خلال الشهور الطويلة ده البنت غابت عن مدرستها وحبست نفسها في البيت فترة عشان مش حابة حد يشوف شكلها، في زياراتها ليا في المتابعات الواحد حس قد إيه إحنا غرقانين في نعم ربنا ومش حاسين. أبسط حاجة، حاول تقنع طفلة زي ده بإنها تصبر على اللي حصل لها وحاول ترد عليها لما تسأل ليه ربنا عمل في عيني كدة؟ اشمعنا أنا مش أختي التوأم؟ ماهي حتى شبهي 🤐
أنا في الشهر الكريم (وإحنا لسة ما دخلناش في العيد) شوفت ٤ حالات إصابات عنيفة ها تسيب أثر دائم في العين لأصحابها وهما من مختلف الأعمار منهم اتنين كبار كانوا معديين جنب عيال بتلعب 🤦🏻♂️
وأنا طبيب عيون واحد وشوفتهم في عيادتي، مش واقف في استقبال مستشفى مثلا، وإلا كان الرقم ها يكون أضعاف مضاعفة.
طب نعمل إيه؟
رجاء
كل واحد يبدأ بنفسه واللي حواليه
* الحاجات ده ما تدخلش بيتك
* تنصح كل معارفك
* تبلغ عن أي بائع للمصايب ده (ما تقولش ده حاجة تافهة ومش ها يتحركوا، واحد من المصابين قال لي إنه راح عمل محضر، تاني يوم القسم نزل حملة لم كل الطرابيزات اللي كانوا بيبيعوا عليها المفرقعات ده 💪، لسة بأقول هيييييييه، قال لي تالت يوم العيال نزلت تبيع تاني في نفس الأماكن 😜). تخيل بقى لو كلنا بلغنا وكنا إيجابيين 🤔، الحملات مش ها تقف إن شاء الله.
* ننصح شيوخ الجوامع يحذروا من المصايب ده على المنابر في خطبة العيد.
* مدرسي المدارس كذلك.
* أي حد مؤثر نقدر نوصل له نحاول نبلغه.
ربنا يجعل النصيحة ده عمل صالح ربنا يتقبله في الأيام المباركة ده، ويكون دفع ضرر عن إنسان وربنا يغفر لنا بسببه.
منقول
