19/11/2025
✍️✍️أسباب نزول مياه الجنين؟
👈 اتخبطتي – وقعتي على بطنك – حادثة.
👈 الالتهابات المهبلية – التهابات مجرى البول، عشان كدا لازم كل شوية في المتابعة نعمل تحليل بول ومسحة.
👈 عنق الرحم ضعيف قصير بيفتح لوحده فكيس المياه يلمس المهبل ويفتح.
👈 المياه نفسها تبقي كتير تضغط على عنق الرحم.
✍️✍️ امتي أخاف أن يحصلي كدا؟
👈 وزنك قليل.
👈بتدخني.
👈 التهابات مزمنة.
👈 لو حصل ولادة مبكرة أو نزل عليكي مياه قبل كدا.
👈 عنق الرحم قصير أو اتعرض قبل كدا للخياطة.
✍️✍️ المشكلة دي ممكن تتكرر؟
👈بنسبة 14% أيوه.
✍️✍️ اعمل ايه عشان متحصلش؟
👈 قبل الحمل نعمل تحليل بول ومسحة مهبلية.
👈 بطلي تدخين
👈 عالجي أي التهابات واكشفي لو في حرقان في البول.
✍️✍️ طب ازاي اتأكد أن دي مية البيبي مش التهابات أو افرازات مائية؟
👈 مية البيبي بتبقي شفافة ملهاش لون أو ريحة، ومش هتقف كأن وقع عليكي ميه بالظبط هتنزل على رجليكي وهدومك وكل ما تتحركي أو تعملي شوية مجهود هتلاقي مياه نزلت.
👈 أما الافرازات المائية بتبقى بلل مرة واحدة.
👈 افرازات الالتهابات ليها لون اصفر أو ابيض أو اخضر ومعاها ريحه أو هرش.
أول ما يحصل جرى على الدكتورة للفحص ولازم فحص عشان نشوف عنق الرحم مفتوح ولا مقفول وتعمل سونار عشان نشوف كمية المياه حولين البيبي.
✍️✍️ طيب والعلاقة الزوجية؟
👈 ممنوعة تماما في الوقت العصيب دا مش وقته هتدخلي عدوى للبيبي.
✍️✍️ طب ايه خطورة نزول الميه على الجنين؟
👈 يتولد بدرى غير إن كيس المياه اللي كان بيحميه اتفتح ممكن يدخله عدوى التهاب رئوي أو يحصل مشاكل في التنفس.
✍️✍️ الحل أولد ولا استني شوية عشان الحضانة؟
👈 هي معادلة حسب كمية المياه اللي باقية حولين الجنين وباقي كام أسبوع على الولادة لو قبل 32 أسبوع هيكون صعب لازم تولدى.
👈 بعد 34 أسبوع هيكون أحسن كتير ومفيش مشاكل.
✍️✍️ العلاج لو الطفل هيفضل؟
👈 الدكتورة بتديكي حاجتين مضاد حيوي عشان نمنع أي عدوى.
👈 كورس حقنة الرئة على مدار 48 ساعة مهم جدًا وبيقلل مدة الحجز في الحضانة.
✍️✍️ ولو المياه نزلت بعد الأسبوع ال 37 وانتي على وش ولادة تولدى طبيعي ولا نستعجل ونولدك قيصري؟
القرار دا يتوقف على 3 حاجات
👈 عنق الرحم مفتوح كام سم الولادة قربت ولا لاء؟
👈 كمية المياه الباقية تكفي ولا متكفيش؟
👈 حالة البيبي هيستحمل يستني لحد ما يجي الطلق؟
لو في مشكلة أو محتاجة متابعة متتردديش تزوري
بمستشفي الساحل التعليمي
نحن خبرة 37 عامًا في مجال
واطمني على نفسك
