02/12/2025
حصريا لجريدة كاريزما! مقالة شهر ديسيمر ٢٠٢٥
شكرا للأستاذ وائل لطف الله رئيس تحرير الجريدة، اللي هو مش بس رئيس تحرير و كاتب موهوب! لأ فنان و لطالما سعدت و شرفت بدعوتي لأكون واحد من كتابها بصورة منتظمة!
سر البقاء شباب طول العمر!
(حكاية تيلومير Telomere × جائزة نوبل)
المشهد البشري… وصدمة المرآة
من يومين كنت واقف قدّام المراية بعد شفتين في المستشفى، وتعب يوم طويل محفور على وشي.
وقفت، وبصّيت في عينيّ, مش كطبيب, كبني آدم.
سألت نفسي السؤال اللي يمكن أي حد فوق الأربعين بدأ يحسّه:
“هو ليه في ناس عندها سبعين شكلها أربعين؟!
وناس عندها أربعين شكلها سبعين؟!”
هل دي وراثة؟ حظ؟ جمال ربّاني؟
ولا!
وراه علم؟ علم تقيل؟ علم حاصل على نوبل.
وهنا بدأت الرحلة.
رحلة البحث عن “لماذا نكبر؟ وكيف نتوقف عن الكبر؟”
وهنا بقى ظهر بطل القصة:
التيلومير Telomere !
🔬 التيلومير "غطاء رباط الجزمة الجيني"
لو فتحت أي خلية من خلاياك—هتلاقي الكروموسومات ملفوفة بشريط حماية صغير في آخرها.
الشريط ده اسمه:
Telomere (التيلومير)
عامل بالظبط زي غطا بلاستيك في آخر رباط الجزمة:
يحمّي… يشد… يحفظ الشكل… ويمنع الخيوط تتفك.
التيلومير يقصر = تكبر بسرعة
يتآكل بسرعة = مش عايش صح
يتقطّع خالص = الخلية تموت
واللي اكتشف ده كله مش إحساس… ولا طب بديل…
ده علم نوبل 2009 على يد الدكتورة:
إليزابيث بلاكبيرن – Elizabeth Blackburn
المرأة اللي قلبت مفهوم الشيخوخة رأسًا على عقب.
وقالت:
“العمر مش عدد سنين… العمر عدد تيلوميرات.”
وإن الجسم عنده إنزيم اسمه Telomerase (التيلوميريز)
لو فعّلته… يرجع يقصّر لك العُمر البيولوجي 10 – 20 سنة!
أيوه… نفس الجسم اللي ربنا خلقه قادر “يصلّح شبابه بنفسه”. "فيجدد كالنسر شبابك"
⚙️ التيلوميريز Telomerase … إنزيم الحياة
إنزيم التيلوميريز هو العامل السرّي اللي يخلي الراجل اللي عنده ٧٥ سنة يجري في إيكاريا في اليونان…
والست المسنة داخلة عال ١٠٠ سنة اللي في أوكيناوا اليابان تزرع رز وهي بتضحك…
والراهب في سردينيا الإيطالي يعيش ٩٨ سنة بدون أمراض مزمنة.
ليه؟
لأن التيلوميريز:
• يصلّح نهاية الكروموسوم
• يمنع تآكل الخلايا
• يقلّل الالتهاب
• يقلل الشيخوخة الخلوية
• ويعيد “الشباب الداخلي” زي ما كان
العلم بيقول:
“مش جيناتنا اللي بتحدد عمرنا…
اختياراتنا اليومية هي اللي بتطوّل أو لو مش عايز صحي تقصر و تقطع و تهربد و تعجز التيلومير.”
🧬 لماذا نقصّر التيلومير؟
العلم اكتشف إن التيلومير يقصر بسبب:
• التوتر المزمن
• السهر
• السكر
• الزيوت النباتية المحرّقة (الـ Hateful Eight)
• الأكل الصناعي
• السمنة
• الالتهاب
• الوحدة
• غياب الحركة
• ضعف النوم
• تراكم الخلايا الميتة داخل الجسم
يعني؟ إن التيلومير…
مش بيقصر “لوحده” بسرعة لأ لأسباب كتير بسرعات متفاوتة!
و إحنا اللي بإيدينا نحدد سرعة العملية ديه! طبعا في حدود الممكن مش هنعيش ٢٠٠ سنة في أفضل حالات التيلومير يعني! المهم طول عمر صحتك مش بس طول العمر و بس! يعني عايش قد إيه بدون أمراض و مش معتمد على حبوب و حقت و أقراص و عايشين في المستشفيات آخر كام عقد في حياتنا!
🌿 كيف نصير أصغر… علميًا؟ (روشتة نوبل × تكتوكاية)
الدكتورة بلاكبيرن حطّت خريطة طريق واضحة لزيادة طول التيلومير.
وأنا هنا أعرضها… لكن بطريقتنا.
١) إدارة التوتر – Stress Management
التوتر حرفيًا “مقصّ تيلوميرات”.
والهدوء “لزق جيني”.
التنفس… الصلاة… الطبيعة… الامتنان…
كلها ترفع كفاءة إنزيم التيلوميريز Telomerase
٢) النوم العميق – Deep Sleep
٧–٨ ساعات = إصلاح DNA + إطالة تيلومير.
السهر = موت خلايا صامت.
٣) الحركة اليومية – Walking & Exercise
المشي السريع ٣٠ دقيقة = شباب جيني متجدد.
أعلى تيلوميرات شوفتها في حياتي؟
ناس بتمشي… مش ناس في الجيم.
٤) الصيام – Fasting
الصيام = أوتوفاجي = تنظيف الخلايا = إطالة تيلومير.
والعلم ده بتاع د. أوشومي يوشينوري… نوبل 2016.
٥) العلاقات الدافئة – Warm Relationships
الوحدة تقصّر التيلومير.
الحضن يطوّله.
الأوكسيتوسين هدية ربانية ضد الشيخوخة.
٦) أكل ربّنا – Real Food
خضار… توت… زيت زيتون… سمك… بيض… مكسرات…
دا كله مضاد أكسدة طبيعي يبني التيلومير من جديد و يجدد شبابه!
٧) تجنب الزيوت النباتية الشريرة – Hateful 8
دي بتقصّر التيلومير بصمت:
ذرة، صويا، كانولا، عباد الشمس، بذرة القطن، بذرة العنب… إلخ.
🧪 المكملات اللي فعلاً تشتغل؟!
مش دعاية… ده العلم:
• أستراغالوس Astragalus Root / TA-65 – أقوى منبّه للتيلوميريز
• أوميجا 3 – يقلل الالتهاب
• فيتامين D – نقصه يقصّر التيلومير
• كركمين – مضاد أكسدة ملكي
• شاي أخضر EGCG – حماية DNA
• CoQ10 – إصلاح الميتوكوندريا
• ريسفيراترول – ينشّط السرتوينز Sirtuins
• ماغنيسيوم = نوم + تهدئة
كل ده مدروس في الافات الأبحاث المحترمة
🔥 الفقرة الأخيرة: خلاصة تكتوكاية بقى!
يا صديقي… نحن لا نكبر بسرعة زايدة لأن السنين تمشي…
نحن نكبر بسرعة زايدة لأننا:
• نأكل ما لا يصلح لأكل
• ننام ضد الساعة البيولوجية
• نعيش مرهقين
• نقطع العلاقات علشان الشاشات
• نطفّي الميتوكوندريا
• ونسيب التيلومير محتاس لغاية لما بقى بيقصر و يتآكل بسرعة جنونية
الشباب مش كريم…ولا سيروم…ولا إعلان.
الشباب… نظام تشغيل.
شيفرة.
Lifestyle.
طريقة تفكير.
أكل ربنا…
مش أكل فرانكنشتاين.
والجميل إنك تقدر تبدأ النهارده
وطول ما التيلومير حي يرزق و لسه في نفس
فاضل فيك شباب
بس مستنى حد يصحيّه و يرم عظامه حتى لو كانت رميم!
د. باسم أيوب
محامي التيلومير
