Dr. Christine Emeil - Parenting coach

18/11/2025

ارجوكم ..
علموا اولادكم وبناتكم بلاش ت..نمر علي اصحابهم ،كل يوم بسمع اخبار محزنة عن اطفال بتحاول تد..مر نفسها بسبب كلام اصحابها عليها.

هنقولهم ان كلنا حلوين ومميزين ، هنقولهم كلامهم اللي بيكون جارح لاصحابهم ممكن يسبب ليهم في اذي وجرح عميق مش بينسوه طول حياتهم وكمان بيلجأوا انهم يأذوا نفسهم .

هنقولهم ان حتي لو شايفين حد اققل منهم يكتفوا بالرأي ده جوه نفسهم لكن مش يبوحوا بيه لزمايلهم ، لحد ما يدركوا معني ضبط النفس.

هنقولهم ان في فروق فردية وكل حد جاي من بيت غير التاني ، في منهم اللي محتاج الكلمه الحلوه لأنه مش بيسمعها في بيته ،بلاش تكملوا عليهم وتوصموهم بأسماء وصفات اصعب من سنهم .

18/11/2025

17/11/2025

كانت البدايات المفرحة بالنسبالي 🙏🤗

من احلي واكتر الريڤيوهات الجميله اللي جاتلي ولمستني فعلا 🥰🥰🥰🥰

11/11/2025

👏👏👏

04/11/2025

اتيكيت وأطفال. Don't Mix 🤗

بس الموضوع كان رائع والأطفال كانت متفاعلة 🥰

03/11/2025

قرأت بوست عن الحلقة دي ،عملت بحث عنها حلقة قويه جداً، الموضوع أشبه وأصعب من ادمان المخدرات
ربنا يرحم ويحمي أولادنا وشبابنا........
كريم السيد عامل حلقة مع شباب ادمنوا الألعاب الإلكترونية وخسروا فيها فلوس ومنهم شاب بيحكي حياته تغيرت من صاحب شركة أجهزة كمبيوتر إلى بواب بيمسح السلم

بداية الأربع شباب ذكروا قدر المال اللي خسروه .. منهم اثنين كل واحد خسر 3 مليون وواحد خسر 2 مليون

💥 قصة منتصر اللي كان يملك محل سايبر وكانت طموحة أنه يكون عنده شركة أجهزة كمبيوتر يستورد ويبيع، وبالفعل حقق حلمه وعمل شركة كمبيوتر وبقى يستورد ويبيع بعد ما اخد قرض من البنك من خلال والدته بقيمة ١٧٠ ألف وقدر يكسب ويحقق مبيعات ب ٦٠٠ ألف وبقى مشهور في بلده بتجارته

💥 بداية السراب والشغف تجاه المجهول:
بيقول منتصر أنه في أول مرة فتح لعبه وهو قاعد في السايبر بيلعب شحن حاجة بسيطة وجد نفسه كسب 5000 وبعدين فجأة كسب 15000 في خلال ثلاث ساعات فكان مذهول إزاي اللعبة دي بتكسب فلوس كده بدون مجهود بمجرد رقم بسيط شحنه!!!

ففكر ... لاقى نفسه أنه لو دخل اللعبة دي هيكسب أكثر من أنه يتعب ويشتغل في الأجهزة ويصلحها فبدأ يدخل يلعب فيها ومرة يكسب ومرة يخسر وبقى عنده شغف غير طبيعي تجاه تحقيق مكاسب تعويضا عن الخسارة اللي بتحصله

💥 سلوكيات مدمن الألعاب الإلكترونية "القمار" :

تكلم منتصر عن السلوكيات اللي كان بيعملها فقال
👈🏻 الكذب واختراع القصص للخروج من المأزق فقال:
كنت برن على الرجل بتاع شحن فوري في وقت متأخر من الليل بشكل هستيري علشان يشحن لي بالف جنية واقوله معلش أصل في حاجة مهمة لازم تحولهم دلوقتي

👈🏻 فكرت إني ابيع الأجهزة اللي في المحل واشحن اللعبة علشان احقق مكسب الخسارة اللي حصلت لي، وبالفعل بعت بعض أجهزة المحل ودخلت لعبت كانت اضغط ضغطته واحدة قيمتها 1000 جنية ودخلت مستوى الضغطة بـ 2000 جنية
يعني عشر ضغطات برقم 0000
وفجأة كسبت 250.000 جنية فرحت والعيال في السايبر بتلعب فرحت وده جذبهم أنهم يلعبوا علشان يكسبوا

خدت الفلوس اللي كسبتها سددت الديون لبتاع فوري، ورحت جبت اجهزه تاني، وباقي معي 120.000 شحنتهم ولعبت بهم خسرتهم

رجعت ... عملت عروض على أجهزة المحل تاني وبعتها كلها 600 جنية للجهاز علشان اجمع فلوس العب بها، وجمعت 70.000 ولعبت بهم وخسرت وكسبت وفجأة كسبت 600.000 ألف وهنا قررت اقفل المحل واطلع ألعب من البيت قفلت على نفسي وبقيت ألعب واكسب واخسر.

👈🏻 النصب والاستيلاء على أموال الآخرين
ذكر منتصر بداية التفكير المخادع والحيل اللي بيستخدمها مدمن الألعاب الإلكترونية "القمار" علشان يأخد فلوس من الناس ويدخل عالم القمار لعله يجني منه ما قد خسره فقال:

🔸 القصة الأولى: صديق له كان رجع من الكويت، وجد المحل فاضي مفيهوش اجهزة، سأله انت بتصفي محلك ولا إيه!!؟ قال منتصر لاااا أنا بجدد المحل
قالي طيب أشاركك فيه .. فقلت له ماشي أخدت منه 150.000

اخدت الفلوس وطلعت البيت وشحنت بـ 50.000 علشان ألعب بهم وعملت خطة، قلت له أنا مسافر إسكندرية علشان شغل، وهو بيكلمني في التليفون شغلت صوت قطار من النت علشان يبان إني في القطار، وقفلت على نفسي في البيت وقعدت ألعب وخسرت الفلوس كلها
كلمت بتاع الفوري شحن لي بـ 4000 ولعبت وكسبت 200.000 قلت كده الحمد لله جبت فلوس الأجهزة بتاعت شريكي الـ 150.000 وفلوس الفوري 4000
هلعب بالباقي .. لعبت وخسرت الفلوس كلهااا

🔸 القصة الثانية: قال كلم أصحابه وقالهم في كونتر جاي من بره أجهزة بـ250.000 وعايز حد يدخل شريك معي، فدخل حد معه وخد منه 150.000 دخل لعب بهم خسرهم

🔸 القصة الثالثة: ذكر أن صاحبه كان بيلعب معه وأصيب بحالة اكتئاب من الخسارة اللي بتحصلهم، فقاله نجيب قرض من البنك، اخد قرض من البنك بقيمة 50.000 وقرروا يسافروا يلعبوا من محافظة تانية غير بتاعتهم
دخلوا السايبر لعبوا وفي نص ساعة خسروا الـ 50.000 بيبص جانبه صاحبه اختفى "سابني ومشي بعد الخسارة بحاول أكلمه مش بيرد عليا"

👤 بقيت تائه ومش عارف أعمل ايه هدفع اول 150 ألف ولا ثاني 150 ألف ولا 50 فلوس القرض، ولا فلوس أجهزة المحل بتاعتي .. هجيب كل ده منين ‼️

🔸القصة الثالثة: بيقول منتصر أنه كلم صديق له شغال مدرس عرض عليه أنه يدخل شريك معه في المحل، قاله اشتري أنت الأجهزة واديني 70.000 وأمضى لي على وصل أمانة
وتبقى شريك بالنص في المحل كله والمكسب
وتمت الشراكة بينهم بنجاح، وخدت الـ 70 ألف لعبت بهم وخسرتهم، فقررت ابيع المحل نفسه، وفي مرة صاحبه كان مسافر محافظة تانية علشان يودي زوجته للدكتور، وهنا بعت كل الأجهزة اللي في المحل وهو مسافر
وبعد ما بعت جميع الأجهزة بالكامل خدت الفلوس ولعبت بها وخسرتها كلها.

🔸 قصة الزوجة والابناء:
قررت هنا إني اصارح زوجتي باللي حصل، وهي كانت حاسة إني في حاجة غلط وكنت بخبي عليها، فقالت لي خد خاتم بيعه وسد الديون وبقيت اخد من دهبها وأبيع والعفش وابيع... وكنت بلعب واخسر

فقررت اوديها عند أهلها وأمشي من البلد .. ومشيت نزلت على القاهرة

🔸 خسارة شقته على أمل جني أرباح:
بيقول منتصر نزل القاهرة باقي نايم في الشارع ومرة في القهوة ومرة في المسجد، وفي مرة اخوه كلمه، قاله انت عملت إيه في البلد مش عارف أخرج للشارع من الناس

قاله منتصر .. خلاص دي مشكلة ولاقيت الحل أنا محتاج ابيع الشقة علشان هخلص مصلحة واسدد للناس فلوسها، وبالفعل تم بيع الشقة بـ350.000 وحول له الفلوس
وخدت الفلوس شحنت ولعبت .. وخسرهم كلهم، وكان معي تليفون بعته ب70جنية وجبت بهم اكل
وكان داخل شهر رمضان قعدته في الشارع أكل في الموائد والمساجد والناس اللي بتوزع أكل لغاية ما في مرة في المسجد تعرفت على واحد قالي عايزين حد كويس زيك كده يشتغل بواب عمارة ....!!

🔸 القصة الرابعة: صاحب العقارات
بيقول منتصر اشتغل بواب في العمارة بتاعت الرجل وجاب أولاده وزوجته يقعدوا معه
وبعد فترة الرجل وثق فيه فكان بيخليه يلم ايجارات العمارة
راح جمع ايجار أول عمارة 21.000 وراح السايبر يلعب شحن وخسرهم
افتكر العمارة الثانية راح جمع منها الايجار وراح السايبر شحن وكسب
جاب الإيجارات اللي خسرها ومعهم مكسب 10.000 جنية كده دخلوا حسابه

بيقول كان في جمعية خيرية بيجمع منها فلوس تبرعات خد منهم 7000 يوصلهم للرجل صاحب العمارتين والجمعية

قال دخل يلعب بـ 10000 بتوعه خسرهم .. افتكر أن في جيبه 7000 بتوع الجميعة الخيرية لعب بهم وخسرهم والرجل نسي يسأله عليهم

وثاني شهر راح جمع الإيجارات ودخل لعب بهم وخسرهم
وكل ما يكلمه صاحب العمارة يقوله فين الإيجارات يقوله لسه ملمتش

وفي مرة واحد معدي قاله يا حاج انا بعتلك الايجار مع منتصر الاسبوع اللي فات وصلك !! وهنا ... أنا اتكشفت

💥 بداية التعافي والعودة للحياة
قال منتصر: لما اكتشف صاحب العمارات إني اخدت الفلوس وسألني عملت إيه بهم!!
كذبت وقلت أمي في المشفى وهتعمل عملية..
قالي مفيش مشكلة هروح لها زيارة معك ولو محتاج اعملها اللي عايزاه
وهنا دخل الشيخ بتاع المسجد قاله إنه بعت له فلوس الـ7000 معي
قالي صاحب العمارات يعني انت كده بتكذب !! أنا هحبسك
قلت له أنا موافق اتحبس بس ارجع مراتي البلد واجي لك

قالي هات رقم أهل مراتك .. وكلمهم قالهم إني نصبت عليهم وهيحبسني وتعالوا خدوا بنتكم

وقالي أنت بتعمل ايه بالفلوس دي ... قلت له بلعب بها قمار على النت
ابنه كان واقف معنا .. قاله ده بيلعب لعبة اخطر من مدمنين المخدرات

قلت له أنا عايز ابطل ومش عارف !!
صاحب العمارات ساعدني .. وكلم مصحة ودخلني اتعالج ست شهور، كنت أنا المدمن الوحيد الغريب وسط مدمنين المخدرات

خرجت وأنا بتعافى لكن نفسيا تعبان من اللي عملته في حياتي
أنا مريت بظروف كثير وحشة حطيت نفسي فيها
مكنش بيكون معي فلوس ولا عارف أكل اولادي
لدرجة ضربت ابني مرة علشان بيأكل بسرعة من الجوع، فضربته علشان الأكل ميخلصش بسرعة...
كنت بقولهم أنا رايح أجيب لكم أكل وبمشي في الشارع لغاية ما يناموا وارجع علشان مش معي أجيب لهم أكل

📌 وأنا بسجل الحلقة دي علشان الناس تعرف إن في ادمان أخطر من المخدرات وتكون توعيه للناس

وعلشان اللي عرفني يشوفني ويعرف أنا عملت
ايه بالفلوس أنا الفلوس مش معي وهربان بها أنا مشيت من البلد من 2018

وعلشان الناس تراقب أولادهم ويشوفوا كل جنية بياخدوه بيعملوا به إيه ويشوفوا الالعاب اللي بيلعبوها
ومحدش يقع في نفس المصير اللي رحت فيه
لأن في ناس بتبيع عفش البيت وتخسر
عربيتها .. وكل حاجة مقابل اللعبة دي

📌 ونفس الكلام ردده الثلاث شباب اللي كانوا في الحلقة أن اللعبة دي أخرها ناس بتنتحر من الاكتئاب وناس بتخسر كل ما تملك،
وإن لو اتعرض عليهم يبيع عضو من جسمه كان هيبيعه مقابل فلوس علشان يكمل اللعبة دي فهي أخطر من المخدرات ... وهي .. إدمان الألعاب الإلكترونية اللي منتشر بين الشباب حالياً وكل اللي بيدخله بيخرج منه خسران.

03/11/2025

Proud 😍👏

وَقَفَ الخَلقُ يَنظُرونَ جَميعاً كَيفَ أَبني قَواعِدَ المَجدِ وحدى

03/11/2025

حاجات بتكسر شخصية الطفل من غير ما نحس
التربية مش بس أكل وشُرب ومدرسة ولبس وواجبات…التربية يعني نربي قلب وعقل وشخصية يعني نساعد الطفل يبقى إنسان واثق من نفسه، متصالح مع ذاته، يعرف يعبر عن مشاعره ويتعامل مع الحياة بثبات.
بس الحقيقة إن في حاجات صغيرة بنعملها كل يوم — من غير قصد — بتكسر جواه حاجات كبيرة .......تعالوا نشوف أهم الحاجات دي

💡 الصوت العالي والعصبية
الطفل في أول ٦ سنين بيكوّن إحساسه بالأمان من صوتنا ونظرتنا له.
لما نزعق أو نصرخ، مش بيتعلم النظام… بيتعلم الخوف.الصوت العالي بيقول له “أنا خطر”، فبيفقد إحساسه بالأمان والثقة في نفسه

💡 المقارنة بالناس التانية
في مرحلة المدرسة (من ٦ لـ١٢ سنة) الطفل بيبدأ يقارن نفسه بغيره طبيعي،
فلما إحنا نزود المقارنة بكلمات زي:
"بص ابن خالتك شاطر إزاي؟" أو "شوفي صحبتك مؤدبة أكتر منك"بنرسّخ جواه إحساس بالدونية.
المقارنة مش بتخلّيه يتحفّز، بالعكس بتخليه يحس إنه مش كفاية أبدًا

💡 السخرية والاستهزاء
لما الطفل يحكي حاجة ونضحك عليه، أو نقول له “إنت فاكر نفسك كبير؟”
هو مش بينسى الكلمة دي.الطفل في سن ٧ لـ١٠ سنين بيبني صورة نفسه من نظرتنا ليه،
فلما نسخر منه، بيتعلم يسكت بدل ما يعبّر… ويخاف من رأيه

💡 الضرب والإهانة
الضرب بيكسر مش بيعلّم.
الطفل اللي بيتضرب أو بيتشتم بيترجم ده على إنه “أنا وحش” مش “أنا غلطت”.
وبيتعلم إن القوة يعني القسوة، وإن الحب له شروط

قلة الحنية والاحتواء
من أول يوم في عمره، الطفل بيحتاج الحضن أكتر من أي حاجة تانية.
الحنية هي اللي بتبني جواه "القاعدة الآمنة" اللي بيقف عليها لما يكبر.الكلمة الطيبة واللمسة الحنونة بتطمنه وبتقول له: "إنت محبوب من غير شروط"

💡 الأوامر الكتير والنقد المستمر
“اقعد… متتكلمش… اعمل كده… غلط!”
الطفل في سن المراهقة (من ١٠ لـ١٥ سنة) بيحتاج مساحة يكتشف نفسه،فلما نغرقه أوامر ونقد، بيبدأ يفقد الشغف ويخاف يغلط.بدل ما يتعلم المسؤولية، بيتعلم التمرد أو الانسحاب

💡 التحكم المبالغ فيه
لما مانخليش الطفل يختار لبسه أو أكله أو حتى لعبته،هو بيكبر من غير ما يعرف ياخد قرار.
الاختيار البسيط في الطفولة هو تدريب على الاستقلال لما يكبر

💡 تجاهل المشاعر
“ما تعيطش، خليك راجل”،
“ما تزعلش، الموضوع تافه”.
كل مرة بنلغي مشاعره، هو بيتعلم يخبّيها…
بس المشاعر اللي بتتخبّى مش بتموت، بتتحوّل لجوا.ودي بذرة القلق والاكتئاب لما يكبر

نعمل إيه عشان نحافظ على شخصيته؟
نتكلم بهدوء بدل ما نزعق.
نمدحه على مجهوده مش بس على النتيجة.
نديه مساحة يجرب ويغلط ويتعلم.
نسمعه كأنه شخص مهم ورأيه يستاهل.
نعلمه يعبّر عن نفسه ومشاعره، ونكون دايمًا الحضن اللي يرجع له.

الطفل اللي بيتربى على الحب والاحترام بيطلع قوي، متوازن، وقادر يتعامل مع مواقف الحياة

02/11/2025

يعتمد الأطفال على والديهم للإحساس بشيء من الطمأنينة والأمان. “ومن المهم أن نتذكر أنهم الركاب في هذه المحنة ونحن من نقود العربة. وعليه، وإن شعرنا بالقلق فيجب ألا يتسرب هذا الشعور إليهم، فيعيق شعورهم بالأمان أثناء رحلتهم”.

صباح الخير 🌹

30/10/2025

🤗🤗

29/10/2025

🩵 زمان محدش كان بيفهمنا...

كنا بنكبر ونمرّ بتغيّرات غريبة، ومحدش كان بيشرح لنا إيه اللي بيحصل!
فكنا نحس بالكسوف، والارتباك، ومش فاهمين إحنا ليه بنتغيّر كده...

دلوقتي دورنا كأهالي إننا نوجّه أولادنا بالوعي الصح والمناسب لسنّهم،
ونعرّفهم إن التغيّرات اللي بتحصل في الجسم طبيعية جدًا،
بس المهم يعرفوها من مصادر موثوقة وبطريقة بسيطة وآمنة.

💬 علشان كده عملنا ندوة مع مجموعة مميزه مخصوص لطلاب تالته ابتدائي
اتكلمنا عن التغيّرات اللي بتحصل في جسم البنت،
وكان الكلام جديد ومفاجئ ليهم شوية،
لكن ضروري يعرفوا منه ولو جزء بسيط يناسب سنّهم 💗

الوعي مش رفاهية… الوعي حماية وثقة وأمان 🌸

29/10/2025

نفكر نفسنا
👇👇👇👇👇