21/12/2019
معلومات سريعة عن نزيف الأنف👃 في الاطفال؟
ازاي نوقف نزيف أنف الاطفال؟
١. اول حاجه تعمليها إنك تهدي الطفل وتطمنيه وتخليه ميعيطش لأن البكاء بيزود النزيف و اكيد ده مش هيحصل إلا لو إنتي كمان هاديه يعني متاخديهوش فحضنك وتقعدوا تعيطوا😭 لانها هتبقي ليله كبيره سعادتك.
٢. خلي الطفل ينفخ الدم من الأنف (بهدوء) عشان ينظف الأنف من الدم ومش لازم كل الدم يتم تنظيفه، مجرد تفضي الأنف👃 قدر المستطاع، وبلاش تاخدي الواد عالحوض وتقعدي تغسلي فمناخيره لحد متبوش .
٣. الطفل يقعد ويميل الرأس للامام بشكل بسيط بحيث يكون مائل للامام ولكن راسه تكون اعلي من مستوي صدره، الوضع ده بيخلي ضغط الدم منخفض في اوردة الأنف فبيقلل النزيف و وبيمنع الطفل من ابتلاع الدم ال ممكن يرجعه بعد كده.
٤. الضغط علي الجزء الغضروفي من الأنف (الجزء الطري الموجود اسفل الجزء العظمي) والضغط ده يكون عالناحيتين معا يعني بتقفلي مناخير الطفل وتقوليله يتنفس من الفم الضغط ده بيكون من ١٠ ل ١٥ دقيقة⏰، وتجنب النظرات الاستكشافيه😂 يعني متقعديش كل شويه تفكي الضغط وتشوفي وقف ولا لسه.
٥. كمادات مثلجه❄️ علي عظام الأنف والجبهه والرقبة خصوصا الجانب البينزف اكتر، وطبعا التلج يكون ملفوف فقماش مش علي الجلد علطول.
٦. فكي اي كوفيه او رباط علي رقبه الطفل لانه بيزود النزف.
٧. اذا توقف النزيف تنظيف الأنف بماء فاتر بدون نفخ الأنف و الطفل ميحاولش ينظف مناخيره عالاقل ساعه بعد توقف النزيف.
٨. ممكن تحطيله نقط أنف وتكرري العملية دي لو لم يتوقف النزيف من اول مره.
٩. حافظي ان اضافر الطفل تكون قصيره 💅 دائما عشان ميجرحش نفسه ويتكرر النزيف.
افتكري ان اغلب حالات النزيف المتكرر من الأنف بتكون بسيطه ويتوقف النزيف بسهوله ولكن لازم يتم تحديد و تشخيص سبب النزيف لأن ايضا هناك احتمالات اخري قليله وغير بسيطه.
دمتم أصحاء
عيادة مديـنة نصــر ٠١١١٣٣٤٨٩٢٨
عيادة حدائق القـبة ٠١٠٦٠٥٦٨٥٦٤
