05/07/2023
أهلاً بيكم
النهارده أول حلقة من سلسلة الصحة الجنسية
فكرت كتير أبدأ منين ولقيت إن أحسن حاجة نبدأ من المعلومات الأساسية اللي ممكن نستخدمها في الكلام مع أطفالنا
وهنبدأ بالكلام عن الأعضاء التناسلية للأنثى إيه هي وإيه وظيفتها.
باختصار الجهاز التناسلي للأنثى وظيفته الأساسية إنها تقدر تحمل وتخلف طفل وده التكاثر اللي بتعمله كل الكائنات الحية علشان تحافظ على استمرار النوع وميحصلش انقراض
باختصار الجهاز تلتناسلي للأنثى بيطلع بويضة شهرياً عن طريق المبيض وتتنقل لقناة فالوب وهناك تتخصب بحيوان منوي ويتكون جنين يتنقل للرحم ويستقر هناك وينمو لحد الولادة وبعد كده الثدي وظيفته الأساسية إن الطفل ده يتغذى عن طريق الرضاعة
ويلا بينا نتكلم في التفاصيل:
# إيه هي أجزاء الجهاز التناسلي للأنثى؟
عندنا أعضاء داخلية وأعضاء خارجية
١- الأعضاء الداخلية:
ودي موجودة في الحوض
(أخر جزء تحت في البطن قبل بداية الرجلين على طول)
• المهبل (va**na):
بتوصل بين بره الجسم ولحد عنق الرحم ودي اللي بتستقبل العضو الذكري أثناء العلاقة الجنسية وفي نفس الوقت هي الطريق اللي بينزل فيه الطفل أثناء الولادة
• الرحم (uterus/womb):
شبه الكمترى ومفرغ من جوه وده مكان نمو الطفل أثناء الحمل
بيتقسم لجزئين: جسم الرحم وده الجزء الأساسي اللي بيقدر يتمدد علشان الطفل ينمو جواه وعنق الرحم (وده أخر جزء تحت من الرحم) وبيوصل بين جسم الرحم والمهبل ومن خلاله بتدخل الحيوانات المنوية للرحم ومنه لقناة فالوب علشان هناك تخصب البويضة
• قناتي فالوب/ الأنابيب (fallopian tubes):
ودي أنابيب ضيقة متوصلة من ناحية بتجويف الرحم
بتستقبل البويضة والحيوان المنوي وفيها بيحصل التخصيب (اتحاد الحيوان المنوي بالبويضة) والبويضة المخصبة دي تتنقل للرحم خلال الأنبوبة علشان تتزرع في بطانة الرحم ويحصل الحمل
٢- الأعضاء الخارجية:
موضحة في الصورة تحت (من صفحة Love Matters الحب ثقافة )
الفرج أو الجزء الخارجي المحيط بالمهبل (v***a) و الثدي ممكن يعتبر من الأعضاء التناسلية الخارجية
- الجزء الخارجي من المهبل (v***a) بيتكون من:
• الشفرتين (l***a):
موجودين على اليمين والشمال، كل شفرة بتتكون من جزء خارجي (l***a majora) بيكون عليها شعر من بره وجزء تاني أصغر جواه (l***a minora) وده مفيهوش شعر
• العانة (mons p***s): جزء بارز فوق الشفرتين وفيه شعر العانة.
• فتحة التبول وفتحة المهبل (الاتنين موجودين جوه بين الشفرتين)
• البظر (cl****is): موجود في الجزء العلوي من الشفرتين وده زي العضو الذكري في الراجل بس أصغر بكتير (بيتملي بالدم زيه أثناء الإثارة الجنسية) وده جزء حساس جداً ومهم جداً للإستمتاع أثناء العلاقة الجنسية
• غدد بارثولين (Bartholin's glands):
دول غدتين موجودين واحدة على كل ناحية من فتحة المهبل وفيه غدد غيرهم بيطلع منهم افرازات أثناء الإثارة الجنسية وهدفهم الرئيسي يسهلوا دخول العضو الذكري في المهبل (مزلق طبيعي)
#ازاي الجهاز التناسلي بيشتغل علشان يحقق وظيفته الأساسية(الحمل والإنجاب)؟
عن طريق مجموعة هرمونات بتطلع من المخ والمبيضين وبتشتغل في تناغم مع بعض علشان تطلع بويضة شهرياً (التبويض) تتنقل لقناة فالوب (الأنبوبة) وهناك لو اتحدت مع حيوان منوي وحصل إخصاب، البويضة المخصبة دي تتنقل للرحم وهنا الهرمونات دي تبدأ تشتغل مع بعض في تناغم برضه علشان تهيأ الظروف للجنين ده إنه ينمو وتوقف التبويض خلال فترة الحمل
# إيه هي الهرمونات دي؟
عندنا خمس هرمونات رئيسية بتتحكم في الدورة الشهرية وتنظم عملية التبويض
- ٣ منهم بيطلعوا من المخ وهم:
• هرمون GnRH:
وده هرمون بيطلع من حتة في المخ اسمها تحت المهاد (hypothalamus) وبيتحكم في افراز هرمونات FSH, LH اللي بيطلعوا من الجزء الأمامي من الغدة النخامية (pituitary) في المخ
• هرمون FSH:
بيطلع من الغدة النخامية في المخ ويمشي في الدم يروح للمبيض وهناك وظيفته إن البويضة اللي لسه مش ناضجة تكبر وتنضج جوه الحويصلة بتاعتها
• هرمون LH:
برضه بيطلع من الجزء الأمامي في الغدة النخامية في المخ ويمشي في الدم يروح المبيض وهناك يخلي البويضة اللي نضجت دي تطلع من الحويصلة بتاعتها ويحصل التبويض والحويصلة دي تتحول لحاجة اسمها الجسم الأصفر
- ٢ بيطلعوا من المبيض:
• هرمون الاستروچين (estrogen):
بيطلع من البويضة اللي بتكبر (تنضج) ومن الجسم الأصفر ولما توصل كمية الهرمون ده لمرحلة معينة (البويضة بقيت ناضجة) يقلل هرمونات المخ GnRH, FSH, LH فيمنع إنهم يكبروا بويضات تانية في نفس الوقت
وكمان بيزود نمو خلايا بطانة الرحم استعداداً لمرحلة زرع الجنين فيها
• هرمون البروچستيرون (Progesteron):
بيطلع من الجسم الأصفر (بقايا حويصلة البويضة) علشان يخلي بطانة الرحم أقوى وسميكة أكتر وفيها دم بيغذيها أكتر علشان تستعد لاستقبال الجنين وكمان بيجهز الثدي لمرحلة الرضاعة
ويفضل يزيد أثناء الحمل فيقلل هرمونات المخ GnRH, FSH, LH علشان يمنع التبويض خلال الحمل
** خلال الدورة الشهرية بيطلع بويضات كتير (في حدود ٢٠) واحدة منهم بتكبر وتنضج وبتفرز استروچين كتير يقلل هرمون FSH فتمنع بقية البويضات إنها تكبر في نفس الوقت
أتمنى يكون الكلام بسيط وواضح
لو حاجة مش واضحة أكون سعيد بأسئلتكم
شير علشان نوصل الوعي لأكبر عدد ممكن
دُمتن بصحة وعافية 🌹
د. مينا نادي
أخصائي التوليد وأمراض النساء
