07/05/2023
كبسولة 💊 السبت ❤️ ☠️
كل واحد فينا طلع الدنيا لقى اهل مختارهمش مكان مختاروش مستوى مادي واجتماعي وثقافي ملوش ايد فيهم مضطر يتقبل ويرضى ويكبر على كده. فيه مننا اللي كبر صاغ سليم قادر يواجه وطاقته كلها خير وعطاء وفيه مننا اللي الفترة دي كسرته مليون حته وعمال يلملم حتت قلبه المكسور لحد دلوقتي. انا بقى انهارده جايه اقولك خلاص عيطت وصوتت وسمعتنا صوتك ولطمت على وشك كتير حلو. اسمع مني بقى من انهارده انت المسؤول عن حياتك يا بيه محيطك المسموم طاقتك السلبية اللي عتقت لما ريحتها طلعت صحابك اللي يجيبوا الفقر اللي موراهمش غير قلنا وقالوا كل ده انت المسؤول عنه. انفض عن نفسك التراب ده بقى ولم حتتك المكسورة ولزقها صح قرب من ربك على قد ما تقدر. وانسف حمامك القديم بص فالمراية كده وقول انا استاهل أنجح استاهل السعادة استاهل السلام النفسي انا مش قليل محدش يقدر ييجي عليا محدش يقدر يضرني من هنا ورايح. رتب اوراقك من اول وجديد غير أفكارك كلها عفنت مبقتش تنفع ونظام هذا ما وجدنا عليه اباؤنا واجدادنا ده تحطه فالتلاجة وتقفل عليه. اتنفس صح ولم الناس الصح حواليك جاور السعيد تسعد. هتفضل لحد امتى تاخد عدوك بالحضن وتضرب فصاحبك. اللي يسم فودنك مرة فكر فكلمته كويس وطبقها على اللي قدامك لقيته سليم اديله براءة واحكم على اللي سممك بالإعدام انطره من حياتك للأبد. محدش يقدر يهينك ولا يلعب فحياتك الا بأمرك. داوي الجرح وبعدين اقفل عليه بنضافة للأبد واتقبل نفسك الجديدة وخليك ممتن للقديم اللي لولاه مكنتش هتنضج ولا تنجح ولا تفتح عينك عالدنيا. ولما ربنا ينجيك من غم وحفرة متوقعش نفسك فيها تاني. ✌️ وخليك دايما فاكر ان التعبان اللي لدعك مرة عمره ما هيبقى حمامة سلام ☮.
خليك فاكر انا مش احسن منك انا هنا عشان اساعدك 👌
#دكتورة نرمين عز 💁♀️
