د. طلعت حكيم - Dr. Talaat Hakim

03/01/2026

📌 عن الخصوصية.. وعن إن "مش كل حاجة تتحكي أو تتقال لأن مش كل إللي حواليك سالكين"!
في زمن السوشيال ميديا، بقينا بنصور الأكل قبل ما ناكله، وبنحكي أسرارنا قبل ما نفكر فيها أصلاً. بقى السهل الممتنع إنك تفتح "ستوري" وتحكي قصة حياتك.. بس الحقيقة إن في حاجات لو طلعت للعلن، بتبوظ.
ليه لازم تفرمل وتخلي ليك "مساحة خاصة"؟ 🔐
لأن ببساطة: مش كل الناس بتفرحلك.. ومش كل الناس عندها "نفس سوية" تستحمل تشوفك مبسوط أو علاقتك مستقرة، أيوه دي الحقيقة بلا رتوش أو مجاملات.
في ناس ممكن "تستكتر" عليك الضحكة اللي في الصورة، فما بالك لو عرفوا تفاصيل بيتك، نقط ضعفك، أو حتى نجاحك؟
الخصوصية مش رفاهية.. الخصوصية "مساحة أمانك النفسي"، ورقة وقلم وأقولك على إللي فيها ومن واقع تجارب ناس حواليا أو حالات من العيادة النفسية، بص معايا:
1️⃣ كلام الناس بيسمّم العلاقات: لما علاقتك تبقى "ملعب مفتوح" للكل، هتلاقي ألف رأي بيدخل في النص. حد يشجعك غلط، حد يسخنك على شريكك، وفجأة تلاقي المشاكل زادت من غير سبب واضح!
2️⃣ الضغط النفسي (البريستيج): لما بتنشر كل حاجة حلوة، بتخلق لنفسك سجن. لو حصل خلاف بسيط، بتبدأ تخاف تقول عشان "صورتنا قدام الناس"، فتضطر تعيش في تمثيلية مرهقة للأعصاب.
أمثلة بنشوفها كل يوم: - واحدة تلقح كلام في ستوري وهي مخنوقة، وبعد يومين تتصالح، بس الناس بتفضل فاكرة "الخناقة" بس!
أو بنت تحكي تفاصيل خطوبتها، وأول ما يحصل فسخ، تلاقي الناس بتتابع "المسلسل" بفضول يوجع القلب مش بجدعنة.
3️⃣ هتقولي بقى بالذمة دكتور جامعة بيتكلم عن الحسد؟ بص يا سيدي، أنا مش بعتقد في الحسد، لكن بعتقد في "الاستكتار" وده ألعن! الاستكتار بيخلي ناس تخطط تبوظ عيشتك أو يقفوا قدام باب رزقك ويقولوا عليك كلام محصلش. صدقني ده حصل معايا شخصياً. الفكرة إنك بتكون متوقع الناس تكون "سالكة" بس ده مش حقيقي.. ومن هنا خلي ليك سر، واللي عنده فكرة غلط عنك سيبه، قول له "أيوه أنا السيء في رواية ميتين أهلك" وريح دماغك.
🎯 الخلاصة:
مش لازم تبقى غامض، بس خليك "واعي". مش كل حد يستحق يعرف "الزتونة".
صنف صحابك ومتحطش "الشكشوكة" كلها في طبق واحد. خلي في دايرة ضيقة جداً هي اللي تعرف تفاصيلك، وتكون ناس بتحبك بجد.. مش مجرد "رقم" على الفيسبوك أو الانستجرام ومتحرقش أعصابك ع الفاضي.

في النهاية..
حافظ على خصوصيتك عشان ترتاح. داري على شمعتك مش بس عشان تقيد، لا.. عشان مفيش "نفس" وحشة تطفيها.
لأن في حاجات لما بتتقال بتبوظ.. وفي جزم كتير في حياتك أنت مش هتشوفهم صح غير لما "تقلعهم".
#الخصوصية #علاقات

31/12/2025

كل سنة وأنتم طيبين وبكل خير وسعادة يارب 🌹

28/12/2025

المعاناة البشرية أكبر من أن تستطيع مدرسة علاجية واحدة التصدي لها، فلا مفر من النهج التكاملي في ممارسة العلاج النفسي.

20/12/2025

14/12/2025

https://vt.tiktok.com/ZSPUehxaS/

10/12/2025

التصحيح بالنسبة للدكتور هو حكم على إنسان ومستقبله بمنتهى الضمير لأن ببساطة هيتحاسب لو غلط سواء هنا في الأرض أو عند الله سبحانه وتعالى .. ولكن رغم كدا ورغم التصحيح بروح العدالة والقانون مع بعض الحالات لكن البوست دا هنتكلم فيه عن حالات جاية تسقط ايوه زي ما شفتها كدا الطالب بيقولك سقطني .. عشان خاطر ربنا سقطني وحياة ولادك سقطني .. ودول أنماط كتيرة تعالوا نتكلم عنها في البوست ودا ونختصرهم لثلاثة :
1- طالب مش مذاكر وبيفترض أن الدكتور لا يقرأ وبالتالي يؤلف ويخرج وينتج إجابة .. ودا تلاقيه عنده شوية اجابات كوميدية ومستفزة وأنت بتصحح طبعاً .. تلاقيه مٌصر مثلاً أن من ضمن اعراض الوسواس القهري أن المريض بيعمل حمام على نفسه .. متعرفش ليه قال كدا بس عدم المذاكرة بيعمل اكتر من كدا .. !
2- طالب متوتر جدا .. ودا تلاقيه ماشي كويس أول سطر بس بعد شوية تلاقيه عمل مصيبة في الإجابة كارثة لا تغتفر .. زي واحد فعلا مقدم لك تورتاية ورش عليها تراب .. ليه حبيبي متعرفش .. يا ابني حرام عليك تحس مفيش فايدة أن هبوظ اجابتي وأثبت لك أني مش فاهم ولا حافظ.
3- طالب مستفز ودا تلاقيه كاتب لك في بداية الإجابة اعذار زي مثلا نعي أنه توفي إلى رحمة الله اليوم أبي وأنا جاي الامتحان ومتعشم فيك يا دكتور .. أو سايب أمي في المستشفى ومتعشم فيك يا دكتور .. أو بنت خالتي عملت حادثة وأنا متعشم فيك يا دكتور .. وعلى كل حال إللي زي دا يستاهل عقاب أكتر من السقوط لو جاوب وحش .. بس أنا راضي ذمتكم واحد أبوه مات في نفس يوم الامتحان جاي يهبب ايه في الامتحان .. !
عموما ربنا ميرضاش بالظلم .. وأنا بشتم في سري وبحاول اصحح بما يرضي الله .. ولو يستاهل الصفر .. فالصفر نصيبه .. وربنا يوفقه .. ويارب تنجح يا تتح ... !

01/12/2025

الفرق بين الناجح والفاشل؟
ممكن نختصرها في كلمة واحدة فقط هي: "وضوح الهدف"

شفت إزاي إن كلمة واحدة بس ممكن تقلب ميزان حياتك كله؟ لأن الموضوع مش مجرد خطة، الموضوع عقلية وتركيز.

تعالى نشوف الفرق، في صفات مش هتلاقيها إلا في صاحب الهدف الواضح:

1- صعب يكون مؤذي أو يعطل غيره.
2- صعب يضلل حد في معلومة أو يكون مش أمين.
3- صعب يكون متصلب أو مش مرن في طريقه.
4- صعب ما يتمنّاش الخير للكل ويسعى للوصول.
5- صعب ما يوصلش في النهاية، أو يكون مش راضي عن نفسه.

وجود الهدف يعني التطور، التقدم، والتركيز المطلق. لما هدفك يكون واضح، مش بتشوف في طريقك غير نفسك و"الجون"، وعمر الشوطة ما هتيجي في العارضة.

الهدف الحقيقي يبني شخصيتك قبل ما يبني مستقبلك.

19/11/2025

📢📢📢
انتباه انتباه انتباه

عرض لفترة محدودة، ولن يتكرر وحتى نهاية نوفمبر 2025 فقط.

البرامج التدريبية المسجلة الشحن مجانا داخل القاهرة الكبرى بالشهادات والفلاشة 32 جيجا، والمادة العلمية كاملة بالإضافة إلى نسخة هدية من كتاب الهستيريا بين الطب والتحليل النفسي

👈 البرنامج الأول: الأساليب الحديثة في تشخيص وعلاج الادمان 👉
👈 البرنامج الثاني: العلاج النفسي الجنسي 👉
👈 البرنامج الثالث: فنيات القياس والتشخيص بالاختبارات الاسقاطية👉

البرامج من تقديم :
ا.م.د. طلعت حكيم
أستاذ (م) علم النفس الإكلينيكي والعلاج النفسي كلية الآداب جامعة عين شمس
دكتوراه جامعة عين شمس - جامعة بواتييه (فرنسا)

14/11/2025

13/11/2025

ثلاث خطوات مهمة للتعافي من ال Situationship :

تعبت ..
جبت اخرك ..
واستهلكت اعصابك ومشاعرك بما فيه الكفاية، نيجي بقى للحل إزاي تدافع عن حدودك وتسترد قيمتك؟

البوست دا تكملة بوست سابقة ناقشت فيه ما أسميته بمرقعة العلاقات Situationship .. المرة اللي فاتت اتفقنا إن أول خطوة للعلاج هي القرار القاطع: يا إما وضوح حقيقي، يا إما إنهاء كامل. لكن الحقيقة، الجزء الأصعب بيبدأ بعد القرار ده لأنه أصلا صعب تنفيذه، مهو مكنش حد غلب، كان كله عمل البلوك النفسي وتعافى تماماً والموضوع يخلص وخلاص.

ورقة وقلم ونشرحها واحدة واحدة بنفس الطريقة المبسطة زي البوست إللي فات، وطبعا الحمد لله ناس كتير تفاعلت معاه، واتقالي كتير جداً أنه كان سبب في تنوير عقول كتيرة مكنتش فاهمة اضرار وألم العلاقات المتعبة والمنهكة جداً دي .. ويلا بينا نسترد توازننا النفسي:

1. الحدود ثم الحدود، ومتخافش ولا تتهز .. في "مرقعة العلاقات"، حدودك دايماً مهزوزة ومُتجاوزة: مفيش وقت واضح للكلام، مفيش التزام في الوعود، ومفيش اسم أصلاً للعلاقة، وبالتالي لازم تطلع من العلاقة بطلب الوضوح، دا حقك على فكرة.

وبالتالي لازم تعمل حدود سوية واضحة، لو العلاقة انتهت، لازم بلوك فعلي، مش مجرد "مكالمة أخيرة"، بلوك يعني بلوك، كفاية إنهاك لنفسك أو ضغط عليك طول الوقت ..

أما بقى لو قررت تكمل بعد الوضوح، أي رجوع للميوعة والـ "مرقعة" يعتبر إشارة إن الحدود اتكسرت ولازم تأخذ موقف.

خليك فاكر اللي بيحبك وبيقدّرك، بجد هيحترم حدودك. اللي بيخاف من القرب، هيستغل أي ثغرة في حدودك عشان يرجعك للخندق بتاعه.

2. تحرر من متلازمة "يمكن يتغير": على فكرة دا أكبر فخ في الـ Situationship هو إنك بتتعلق بـ "إمكانيات" الطرف التاني مش "واقعه". أنت بتحب النسخة اللي تتمنى يكون عليها، مش النسخة اللي بتعاملك بـ "فتافيت اهتمام ومشاعر".

الدراسات بتقول أن الناس إللي عندها تعلق تجنبي Avoidant Attachment، بيفضّل الـ Situationship تحديداً لأنه بيوفر له حاجز داخلي يحميه من أي التزام أو قرب عاطفي حقيقي.

هي بتحسسه بالتحكم والأمان، وبيشوف إن مطالبك بالوضوح هي تهديد لاستقلاليته!

وبالتالي لما تحب تنهي علاقة غير ناضجة أو غير مفهومة بالشكل دا ركّز على ما بيتقدم لك فعلاً من الطرف الثاني، ركز في تفاصيله الصغيرة، على فكرة السقطات البسيطة تعكس مصائب كتير، يعني مثلا بيصلي ويصوم ولكن سرق مرة او اتنين في الشغل قدامك، أو مكنش أمين مع حد طلب أمانته بشكل كافي، ظلم حد ضعيف من جيرانه، استقوى على طفل صغير .. طبعا دا على سبيل المثال، شوف الإنسان دا في واقعه عامل ايه دا مهم جدا.

على فكرة فيه فرق كبير بين #التوقعات و #الوقائع، و #الافتراضات و #الحقائق، خليك في الأصل إللي قدامك لان الصورة اللي بتحلم بيها عمرها ما هتنفعك للاسف .. بالعكس هتكون انت اول واحد يتكسر على دماغه بروازها.

3. فرق كبير أوي بين شريك حياتك وشخص لسد الفراغ

العلاقة الصحية لازم تقوم على: الوضوح، الأمان العاطفي، والالتزام المتبادل، على فكرة الحب مش تضحية .. الحب التزام ليك وعليك وياريت نبطل هري في التضحية، ولازم تكون ضهري وسندي، مفيش سند وضهر من غير وضوح والتزام متبادل وشعور بالأمان والطمأنينة والمودة والرحمة.

ودا يفهمنا بشكل واضح أن الـ "Situationship" قائمة على: الضبابية، القلق، وسد الفراغ العاطفي المؤقت من غير تحمل مسئولية، وبالتالي يفضل الشخص طول الفترة في حالة من حالات اليويو .. رايح جاي .. طالع نازل .. ومش عارف حل لنفسه ولا للي معاه.

والخلاصة:
عشان تطلع من الدوامة، لازم تبدأ تحل المشكلة الأصلية اللي خلتك توافق على الـ "مرقعة" أساساً، وهي: تقديرك لنفسك.

مهم جدا تستثمر طاقتك في بناء نفسك كشخص كافي، وعلى فكرة المصيبة أن في أوقات كتير شخص يقع في العلاقة المضطربة دي مع أنه ناجح جدا، بس للاسف في احتياج عاطفي مش مسدود والنفس بتأمر بكل دا بقى .. مهو نفسه يحب ويتحب ودا حق مشروع، ولكن مش معناه أنك تيجي على نفسك وتقبل بعلاقة مهزأة.

دور على شغفك، على أصدقائك الداعمين اللي واقفين معاك بجد، عن نجاحاتك الصغيرة.

لأنك لما تكون كفاية لنفسك، مش هتقبل بعد كدا بـ "فتافيت" علاقة مش بتقدم لك غير القلق والتعب، والاكتئاب، والحزن، وحفلات النكد المسائية اللي طبعا اللي بيكون في ال عارفها كويس.

م الاخر .. قيمتك تستاهل علاقة في النور، واضحة، وآمنة. وقلت لك البوست اللي فات متخونش نفسك انت اكبر من كدا بكتير، وربنا يطبطب على قلبك باللي يستاهل يكون معاك.

حاسس أنك خلصت الموضوع أو هتقدر لوحدك ؟

عموماً .. لو البوست لمسك، أو حاسس انه مهم لحد، فالشير متاح جدا جدا، خلينا نكون سبب في بعض في مساعدة ناس كتير جداً، مكسور قلوبها من ال Situationship.

11/11/2025

راكب ومسافر مرسى مطروح وأوشكت على الوصول .. بس فوجئت أن حد أخد جورنال النهاردة بتاعي من جانبي وخلع وطبعا مشفتوش .. المشكلة اني كدا كدا كنت هرمي الجورنال دا بمجرد وصولي لاني بكل بساطة قريته وفقد أهميته.. وربما لو كان قال لي كنت ابتسمت له واديته له عن طيب خاطر ..
وبصراحة دا بالضبط اللي بيحصل مع ناس كتير ساعات بتستعجل في طلب رزقها .. تجري جري وحوش وصراع على المناصب وخناقات مع الزملاء ونكد وقلة أدب .. الخ .. مع أنه في الاخر كل دا هيترمي بالفعل وهيفضل عملك.. كل شيء بيمر عليك في حياتك عامل زي الجورنال كدا فترة مؤقتة مجرد ما تنتهي بحلوة ومرها تفضل بس الذكريات .. المهم انك تسعى تعيش كل فترة تستمتع بيها تتعلم منها .. ومتبقاش لص خايب .. خليك حريف .. وإن عشقت اعشق قمر .. وإن فشلت لا تفقد امل.. ولا تسرق فالتميز كلمة يسمع عنها كثيرون وقليلا من تذوقوها... !

#الجورنال #الدكتور