27/03/2026
جاتلي وهي منهارة…
بتعيط وبتقول: "أنا مش عارفة أبص لنفسي في المراية… هو كل شوية يقولي إنتي اتغيرتي… جسمك بقى مش زي الأول…"
ست عدّت بتجربة من أقسى وأعظم التجارب في نفس الوقت…
الحمل والولادة
جسمها اتغير؟ آه
نفسيتها اتأثرت؟ أكيد
نومها اتلخبط؟ طبيعي
حياتها كلها اتقلبت؟ 100%
بس اللي مش طبيعي…
إنها تتحاسب على ده
أو حد يقلل منها بسببه
هي ما ضعفتش…
هي قوتها ظهرت في شكل تاني
في stretch marks
في تعب
في إرهاق
بس كمان في روح أم بتدي بدون مقابل
قولتلها:
"إنتي مش محتاجة ترجعي زي الأول… إنتي محتاجة تبقي نسخة أحسن من نفسك… بس بهدوء… ومن غير جلد ذات"
وبدأنا سوا خطوة خطوة
الأول: اشتغلنا على نفسيتها
فهمتها إن اللي بتمر بيه طبيعي جدًا بعد الولادة
وإن جسمها محتاج وقت مش ضغط
تاني حاجة: ظبطنا أكلها
مش دايت قاسي
لكن نظام يساعدها ترجع طاقتها ويحسن مزاجها قبل شكلها
تالت حاجة: حركة بسيطة
مفيش جيم قاسي
بدأنا بحاجات خفيفة تناسب حالتها وتخليها تحس إنها بتتحسن
وأهم حاجة: اشتغلنا على كلامها مع نفسها
بدل ما تقول "أنا وحشة"
بدأت تقول "أنا بتعافى"
مع الوقت…
مش بس جسمها اللي اتغير
دي ثقتها بنفسها رجعت… وابتسامتها كمان
لو إنتي حاسة إنك تايهة بعد الولادة
أنا هنا أساعدك ترجعي لنفسك واحدة واحدة… بدون ضغط
د ياسمين حسن اخصائي التغذية العلاجية والرياضيين وصيدلانية
#أمومة
