04/01/2023
قالولنا واحنا صغيرين لو عاوز تطول ألعب عقلة كتير!!
جملة اتقالت كتير واتنقلت من مكان لمكان وانتشرت واحنا مش عارفين ايه علاقة العقلة بالطول!!
-وفي ناس جابت معاها نتيجة وطولت فعلا بعد العقلة.. أيعقل!!
الموضوع من البداية متوقف على جزء صغير كدة في عظام الفخد واسمه بالظبط (Growth plate) الجزء ده بيتحول لعظام في وقت معين من سن ١٨ للبنات أو ممكن حتى سن ٢١ للولاد، وأول مابيتحول لعظام بيتسمى (close growth plate) يعنى بمعنى أدق لما بتتحول لعظام انت كدة وصلت للطول اللي مش هتطول بعده ولاعظامك هتزيد في الطول.
-طب ايه علاقة العقلة بالموضوع ده وازاي ناس طولت!!
العقلة أو التمارين بوجه عام بتساعدك على علاج تقوسات الضهر اللي ممكن عند أغلبنا ومبتكنش ملحوظة وبالتالي جسمك هيتفرد وتلاقي فرق كام Cm في طولك بس مالهمش علاقة انك طولت🤚 انت جسمك اتفرد من تقوسات الضهر بس، أما بالنسبة لطول جسمك فهو متوقف فقط لاغير على Growth plate.
