د .عاطف خلف Dr. Atef khalaf لتعديل السلوك والارشاد النفسى والتخاطب

09/12/2025

07/12/2025

ما فيش حاجه اسمها نسيان لاي خبره او عاطفه او تجربه بيمر بيها الانسان و لا بتروح ولا بتتنسي مهما حصل ..
و بتظهر في اي شكل من الاشكال زي اوقات الغضب او الاحلام او فلتات اللسان او في تصرفاتنا اليوميه ..
كل الحكايه اننا بنحط تراكمات على تراكمات مع مواقف الحياه اليوميه فالذكريات بتروح للمخزن البعيد و بنعتقد انها اتنست أو اختفت ..
لكن الاكيد انها بتفضل موجوده و مش بتتنسي ولا بجلسات ولا بأدويه ولا مع مرور الايام وبتفضل في المخزن العقلى .
تحياتى 🌹
د . عاطف خلف 🌿

06/12/2025

تدخلك في حياه طفلك والتصاقك به طول الوقت ..
وحل مشاكله الصغيره والكبيره طول الوقت ..
وتقديم الحمايه الزايده طول الوقت ..
وعدم اعطائه المساحه الكافيه من الحريه والانطلاق ..
علموه الاتكاليه والتراخي وعدم الاعتماد على النفس وعدم الرغبه في التفكير ولا بذل المجهود العقلي والجسدي .
تحياتي 🌹
دكتور عاطف خلف 🌿

29/11/2025

الدفاع الاعمى عن ابنها خلاها تقتل زميلته فى المدرسه ..

طالب فى اولى اعدادي خلي زميلته ماشية فى حوش المدرسة ويشنكلها يقلبها وتقع على وجهها ..
البنت قامت تتخانق مع زميلها ،
ولما روحت البيت اشتكت لباباها فوعدها انه يكلم المديرة ،
و الولد كمان راح اشتكى لمامته ، تقوم مامت الولد رابحة عند المدرسة بعربيتها
وتنتظر البنت تخرج وتروح هاجمة عليها بالعربيه باقصي سرعة وخبطتها طيرتها من على الارض ..
مش بس كده دى تعمدت تعدي من فوق راسها وتلف وترجع عشان تشوف البنت وهى بتنتفض فى الارض سايحة فى دمها والروح بتخرج منها وجسدها بيترعش ارتعاشة الموت ..

طول عمري بتكلم عن الدبه اللي قتلت صاحبها بسبب حبها الاعمى له ، لكن الجديد ان الدبه المره دي انسان " ام "
و قتلت طفله زميله ابنها فى المدرسه .. التصرف مش طبيعى وبيعبر عن كلاكيع وعقد وبتخرب اطفالنا و بيدفع تمنها كمان المحيطين بيهم ..

ربنا يرحم الطفله ويصبر اهلها ..
الكل محتاج الحكمه اباء وامهات .. لتربيه اولادهم واننا
مندافعش عن ولادنا دفاع اعمى من غير ما نعرف الحقيقه الاول لان احتمال كبير ابنك هو اللي يطلع غلطان ويحتاج للتأديب او العلاج ..
وحتى لو كان مش غلطان استحاله يكون رد الفعل هو الانتقام من زمايله وقتلهم يا اباء و امهات ..

يومكم جميل 🌹🌹🌿
د. عاطف خلف 🌿

17/11/2025

بدأت المحاضره التمهيديه للاباء والامهات فى كورس تعديل سلوك للطفل والمراهق ( المستوى الاول ) وهنبدأ اول محاضره فى الكورس يوم الخميس القادم ، والاشتراك متاح للجميع 🌹
وهنبدأ من الخميس ٢٠ / ١١ من الساعه ٩:٣٠ ص الى ١٢:٣٠ ظ

❤️ الكورس قوى جدا و مخصص للاباء والامهات و طلبة الكليات والخريجين من جميع التخصصات ولكل المهتمين بالطفل والمجال النفسي و التربوى ..

✌️ هدف الكورس اننا نتعلم و نعرف اكتر عن اولادنا وصناعة مستقيل افضل ليهم وتعرف التكوين النفسي للطفل واحتياجاته واسباب كل سلوك بيصدر منه وطريقة تفكير المراهقين و تدريبك على تعديل السلوكيات الخطآ حسب علم النفس الحديث ..

معادنا هيكون كل يوم خميس فى نفس التوقيت لمدة ٨ محاضرات وتدريبات .

✍️ محتوى اليوم : محاضره + بريك + محاضره بإجمالى ٣ ساعات لليوم و التدريب يوم واحد فقط فى الاسبوع .. بالقاعه المكيفه .
و الحضور متاح للجميييع ولا يشترط مؤهل دراسى معين .

💚 محتويات الكورس لفائدتك وفائدة اولادك و شغلك👇

‏👈 التكوين و التطور النفسي و العقلى و الجنسي و اللغوى عند الاطفال
‏👈 لماذا يغض اطفالنا وبستخدموا العنف والشتائم ، وطرق علاجه
👈 اسباب ضعف الثقه بالنفس عند الطفل والمراهق وطرق العلاج وتقويه الثقه بالنفس
‏👈 لماذا تظهر الغيره عند الاطفال وطرق علاجها
‏👈 الطفل المنطوى والخجول بزياده هنعرف الاسباب والعلاج
‏👈 مشكله التبول اللا ارادى اللى بتواجه بيوت كتير ، ايه اسبابه وطرق علاجه
‏👈 ازاى بتظهر الاضطرابات الجنسيه عند الاطفال والمراهقين و ايه اشكالها وازاى نعلاجها
‏👈 مرض الكذب الموجود كثير عند الطفل والمراهق والكبار وانواعه و اسبابه و ازاى نعالجه .
‏👈 ايه معنى التخريب عند الاطفال ، و ليه بيخرب الطفل ، وطرق علاج المشكله .
‏👈 هتكلم كمان عن مرض السرقه عند الاطفال والمراهقين واسبابه وطرق العلاج
‏👈هتكلم عن مرض التهتهه ( التلعثم ) اللى محير المتخصصين والاباء والامهات ، هتكلم عن اسبابه و ازاى نعالجه بشكل علمى .
👈 الفزع الليلى وقلق النوم عند الطفل والمراهق والكبار واسبابه وعلاجه.
‏👈 هنتعرف على صفات المراهق فى المرحله دى و ازاى بيفكر والتغيرات النفسيه والسلوكيه و ازاى بيفكر .
👈 وهتكلم عن القلق و التوتر عند اولادنا فى المراهقه
‏👈 السيكوباتيه و العدوانيه فى مرحلة المراهقه و ازاى بتتكون و اشكالها وازاى نعالجها .
‏👈الشعور بالوحده النفسيه عند المراهق وتتصرف ازاى لو ابنك المراهق عنده شعور بالوحده النفسيه و ازاى تساعده يتخلص منها ويعالجها قبل ماتقضى عليه ..
👈 طرق التعامل السوي والسليم بشكل عام مع اولادنا فى مرحلة المراهقه

❤️ والمجموعه اللى هتبدأ هتكون متميزه ومختلفه ❤️

🎁 و هيحصلوا على امتيازات كتير 🥰👍 تعالوا اقولكم على الامتيازات :-

👈 اولا : كل متدرب هيحصل على شهاده مجانيه معتمده من المؤسسه تفيد اجتيارك الدبلومه 🎁
👈 ثانيا : كل متدرب هيحصل على كتاب ( محاضرات فى علم نفس النمو والتربيه 🥰
👈 ثالثا : كل متدرب هيحصل على #هديه فى اول محاضره 🥰🎁
👈 رابعا : هيكون فى #هديه وهتكون مفاجأه فى نهاية الكورس للجمييع 🎁❤️
👈 خامسا : فرصة تدريب و عمل بالمؤسسه للمتميزين بالكورس 🌹

🌿 الاستفسار واتس على الرقم ٠١٢٠٢٠٣٧٩٨٨ وهتجيلك تفاصيل اكتر .. او فون على ٠١٢٨٤٤٩٥٧١٠ ـ ٠١٠٩٠٨١١٠٩٣ .

الاشتراك متاح للجميع وبدون شروط : اباء ، امهات ، اخصائيين اجتماعيين ، اخصائيين نفسيين ، مدرسين ، مشرفين الحضانات ، وكل المهتمين بالمجال ..

العنوان : ٤ شارع ترعة التوفيقيه ، عزبة النخل
CDF continuous development foundation مؤسسة التطوير المستمر للتنمية
*** مواعيد العمل يوميآ من ١٠ ص الى ١٠ م ماعدا الجمعة

واتمنى التوفيق للجميع 🌹
تحياتي د . عاطف خلف 🌿🌿🌿

26/10/2025

تقصير تانى و اب و ام مش فاضيين تانى و اهمال تاااانى واطفال بتموت تانى و وجع قلب تانى 😥💔
اب و ام سابوا أطفالهم في الشقة لوحدهم ( طفل عنده ٩ سنين، والتاني ٥ سنين ) وساكنين فى الدور العاشر ..

الطفلين بيلعبوا مع بعض ، واحد منهم فتح الشباك ووقع والتانى حاول يمسكه فطبيعى جدا مقدرش فوقع وراه ..
😥💔
مبقتش عارف اقول ايه ومهما قولت عليهم مهملين ومقصرين وانهم نزلوا وسابوا اولادهم فى الشقه لوحدهم ، مش هيكون أد كسرة قلوبهم وحزنهم على ولادهم اللى راحوا منهم وربنا يصبرهم ..

لكن هفضل انصح دايمًا واقول متسبوش اولادكم لوحدهم في الشقة لاى سبب ، لاى سبب ، لاى سبب 😔
صدقونى انا بشوف و بسمع كوارث يوميا وناس بتقولى ان شاء الله مش هيحصل حاجه !!؟؟
اهو حصل وبيحصل ..
ياجماعه الأطفال تفكيرهم بسيط ومش بيحسبوا نتايج الجرى واللعب بتلقائيه هيوديهم على فين ..
الاطفال وتربيتهم محتاجه اهتمام و تركيز معاهم ،
بلاش استهتار ..
لازم حد منكم يكون موجو فى البيت ويراعيهم ،
لو بتحبوا اولادكم بجد حافظوا عليهم 😔
مافيش اى حاجه تستاهل انكم تسيبوا اودكم لوحدهم فى البيت مهما كانت مهمه ..
ربنا يعطى الحكمه لكل اب وام فى التصرفات والاهتمام و الرعايه اللازمه لاولادهم .
د . علطف خلف 🌿 🌿 🌿

23/10/2025

اهم و اخطر ٣ اسباب بتهلك نفسية الطفل والمراهق وتزود معدل الجريمه والانتقام والعنف عنده :
اول سبب هو الجوازه الغلط من اتنين عتدهم مشاكل نفسيه وافكار غلط عن الجواز اصلا ولا واحد فيهم يعرف حاجه عن احتياجات الاخر ، وغير مؤهلين لتكوين اسره وبيت ولا معنى اطفال وتربيه ،

وهنا الطفل يعيش فى بيت عنيف وعصبى طول الوقت مع الخلافات المستمره قدام اولادهم واللى بتؤدى احيانآ للتطاول بالالفاظ والايد او الطلاق ، وطبعا كله بيتم قدام الطفل ..

و تانى سبب هو غياب الام عن البيت واولادها تماما أو لساعات طويله كل يوم ومافيش اهتمام ولا رعايه حقيقيه ،

و تالت سبب هو غياب دور الاب اللى بطبيعة الحال طول اليوم برا البيت وميعرفش حاجه عن عياله من بداية لنهاية اليوم بدون اهتمام ولا متابعه ..

وفى الحادثه دى التلات اسباب موجودين فى اسرة الولد الجانى .. والنهايه بقت الطلاق ز مافيش اب ولا ام
و فى رأيي اعتقد ان الجانى اختار ولد غالبا مش بيحبه وممكن تكون بتتوفر فيه مواصفات ( الاسره المستقره ) يعنى عايش مع ام و اب وبيت ومبسوط ،،
وده سبب كافى يخليه يقارن بين حياته وحياة طفل زيه ،
و يكرهه و ويغير منه و يفكر ينتقم ويخرج كل مشاعر الرفض للواقع ، والعدوانيه اللى جواه تجاه امه اللى سابته خالص هو واخته ،

و ابوه المشغول والغايب طول الوقت .. لحد ماوصل بيه الحال انه يقتله ويقطعه ويحطه فى اكياس ،، و يطبخ حته من جسمه و ياكلها ..
و كمان شال حته فى التلاجه علشان لما يفتكر مشاعر الانتقام دى تانى يسويها ويكمل اكل ..

ايه ده !!؟؟ ايه العنف والعدوان والكراهيه دى !؟؟
واتعملت واتكونت فى كام سنه ؟

الجريمه دى بتفكرنى بالجرايم اليوميه الصغيره اللى بيعملها الطفل واحنا مش بنهتم بيها ، احيانآ الحكايه بتبدأ كده ..
زي الفتنه على زمايله ، او انه يسرق من زميله او البيت ، او يضرب زمايله من غير سبب ، او قتل القطط والكلاب او ضربهم وتعذيبهم ، او الكذب اليومى الكتير اللى بيكذبه المراهق علي بابا وماما ، او ترك المنزل ، او التهديد بالانتحار ..
وغيرها من السلوكيات اللى وراها رسايل مخفيه محتاجه اهتمام وتركيز وتغيير وعلاج ..
الفرق فى الحادثه دى ان مستوى العنف والشراسه والعدوان زاد مع زيادة الاسباب و ادمان الالعاب العنيفه على الانترنت وعدم وجود متابعه ولا رقابه على التعامل مع الموبايل ، وعدم وجود الاب والام ولا الحب والدعم والاهتمام اليومى الطبيعى ..
🌿 وفى ختام كلامى ارجوكم التركيز والاهتمام مع ابنائكم و تقديم الحب باستمرار و الرفق بيهم ..
تحياتى د . عاطف خلف 🌿🌿🌿

15/10/2025

البيئه الحاضنه للطفل هى المؤثر الاول والمسئول الاساسي عن سلوكه وتغذية عقله وتعليمه ومهاراته والكفاءه العقليه وحصاد النتائج .
د . عاطف خلف 🌿🌿🌿

13/10/2025

حالات كتير الفتره ده من نفس النوع والاعراض ( تاخر لغوى مع شقاوه ) وطبعا كله جاى بروشتات ادويه كتييير ،،،
وكل يوم حالات بنفس الشكل وتتشابه فى الاعراض ...

و كالعاده اسهل حاجه : ابنك يامدام متشخص فرط حركه ، ADHD ولازم نتعمله اشعه مقطعيه على المخ ورنين مغناطيسي ، ورسم مخ وتحاليل كامله ، عشان مركز الاشعات يشتغل و معمل التحاليل يشتغل .. و و و

و اطفال زى الفل تدفع التمن و اتبهدلت ادويه تهد رجاله مش اطفال صغيره ..و المهم ماما ترتاح والطفل يتهد ويسكت ..

اولا 👈 تأخر الكلام والشقاوه مش تخصص المخ والاعصاب ولا اخصائي الاطفال اصلا ولا علاجهم ادويه اساسااااا

ثانيا 👈 بطلى تشخصى ابنك فرط حركه من نفسك وتروحى للدكاتره بتشخيصك انتى ، لان اخصائي الاطفال او المخ والاعصاب هيديله الادويه المريحه بالنسبالك انتى لان دى الشكوى بتاعتك انتى ..

ثالثا 👈 الادويه مش هتعالج الشقاوه ولا هتخلي ابنك يفهم ولا يتكلم .

رابعا 👈 ليه اشعه مقطعيه ورسم مخ ورنين وتحاليل لطفل طبيعى متاخر فى الكلام عن عمره شويه او مش بيتعلم بسرعه او شقى شويه وعلاجه برنامج وارشادات للبيئه المحيطه بالطفل و جلسات متخصصه لحالته !!؟؟

🌿🌿 شوية تفكير من فضلكم قبل التهور ده 🌿🌿

شكرا ليكم : و للاستشارات ت : ٠١٢٠٢٠٣٧٩٨٨
٠١٠٩٠٨١١٠٩٣ * ٠١٢٨٤٤٩٥٧١٠
🌿🌿 تحياتى : دكتور عاطف خلف 🌿 🌿 🌿

12/10/2025

فى فرق كبير بين طفل عنده ٥ سنين ودرجات اختبار الذكاء بتاعته طلعت قليله لكن هو مبدأش اى تعليم اكاديمى لسه ،،

و بين طفل تانى عنده ٥ سنين و درجاته قليله فى اختبار الذكاء لكن بدأ من فتره يتعلم اكاديمى و مش قادر يفهم بسهوله او يحفظ كويس ..
🌿 ركزى فى الكلام و تابعى ابنك كويس ..
🌿 تحياتى 🌿 @أبرز المعجبين
د . عاطف خلف 🌿🌿🌿
للاستشارات ت : ٠١٢٠٢٠٣٧٩٨٨
٠١٠٩٠٨١١٠٩٣ * ٠١٢٨٤٤٩٥٧١٠

28/09/2025

التوتر المستمر والقلق بيخلي الوزن يزيد ، وهيخليك تاكل كتير بدون داعى وبالاخص و قت الضيق و الزعل أو الزهق ..
ويخلى الكبد يفرز سكر زيادة وكأنك واكل رز وسكر من غير ما تاكل اصلا ..
عشان كده إدارة التوتر والقلق علاج مهم ليك ولجسمك مش رفاهية ،،،
انت محتاج تظبط الجانب النفسي مع الاكل و هتلاقى فرق كبير فى نفسيتك وجسمك .
د . عاطف خلف 🌿

24/09/2025

هو انتوا بتكونوا فين لما اولادكم ببقرروا الانتحار وكمان بيقدروا ينفذوا ده وينهوا حياتهم بالشكل البشع ده .. !!؟

كل كام يوم وجع و اكتر من حاله انتحار او اختفاء ووجع قلب ودمار اسره وعائله ومجتمع ودموع .. انتوا ليه كده لييييه ؟؟؟؟؟؟؟!
👈 شويه الاب مشغول و يقولى مش فاضي اقعد مع عيالى ..
ده هروب و مافيش حاجه اسمها كده انت مسئول عن اسرتك ( زوجتك وابنك وبنتك وبيتك ) وسلامهم النفسى وحياتهم وروحياتهم واشباعهم ..
والمفروض ان ده هدفكم من والزواج اصلا زوجه وبيت واولاد ولا ايه ؟ !!!
لكن مافيش حاجه اسمها انا مهمتى اجيب فلوس وبس !!!
👈 و انت عارف انك بتفضى نفسك لما بتحب تفضى نفسك وانا وانت عارفين كده كويييييس اوى ...

وشويه الام مشغوله ونزلت تشتغل وبترجع اخر اليوم علشان تحقق طموحها او تساعد فى الماديات .. ده مش دورك يامدام حضرتك ام ،،

وياترى اولادكم بيكونوا فين ؟؟ بنتك وابنك بيكونوا فين ؟
و لو مراهقين بالأخص بيكونوا متلغيطين و جعانين اهتمام واحتواء وفهم وحب ، ومحتاج اب يسمعه ويعرف تفاصيل يومه تفصيله تفصيله و الكبيره والصغيره ، ويجاوب اسئلته ويهتم بصداقته و تقضى وقت معاه وتشارك افكاره ومشاعره واهتماماته بكل انواعها المهمه والتافهه ..

😔 الموضوع خطير ياجماعه وصادم وبيتكرر كتير ،،
و الكلام و الرساله دى إنذار لكل اب و ام تراجعوا نفسكم وعلاقتكم باولادكم وبناتكم قبل فوات الاوان ،، 😔

لما ولد يسيب رساله مبحبش ابويا وميمشيش فى جنازتى !!
و ولد تانى يقول قسوة ابويا هى السبب !!
وبنت تكتب انا معرفش اهلى خلفونى ليه طالما مش فاضيين ليا ولا اكنى عايشه معاهم !!
واللى سابت رساله قبل موتها انا محدش بيحبنى ولا عايزنى !!!
واللى سابت لاهلها ورقه بتقول مش بحبكم لانكم بتكرهوا بعض وبتكرهونى وتعبت منكم !! واكتر واكتر .....

وكل اللى مات كان متألم اكتر منكم .. ياترى كل ده معناه ايه ؟ ها ؟ ومين المسئول ؟؟؟
كل ده معناه ايه ياماما و بابا ؟؟

👈 ياجماعه جوع البطن اهون من جوع الاهتمام و المشاعر والتركيز معاهم والحوار والمشاركه ،،
👈 جوع الاهتمام ..
وجوع الحب ..
وجوع المشاعر ..
والجوع من وجود الاب بعد مواعيد شغله ..
والجوع للدفئ الاسرى والمحبه والحوار مع اولادمم
وجوع لوجود للام المشغوله باولادها نفسهم مش اهتمام باحتياجاتهم اليوميه ومذاكرتهم وبس ..
والجوع لوجود ربنا فى البيت كل يوم والصلاه اليوميه مع بعض .

يشبعوا احسن بدل ما يصاحبوا المخدرات ، والسجاير ، و النت ، والعلاقات المشبوهه ، والالحاد ، والقمار ، والشارع ، وافكار الانتحار ، والاحباط ، واليأس ، والاحساس بالوحده ، وتناقض المشاعر ...

👈👈 كل يوم وكل جلسه نفسيه او اسريه بقول بحزم وبكرر اوعى تخلى ابنك يسقطلك من حساباته لانك هتندم واولادكم هيضيعوا بسببكم ..

وساعتها الندم ومش هيفيد و لا الشغل ولا الفلوس ولا اصحابك ولا كل مشغولياتكم ولا ولا اى حاجه ..

✍️ يا كل أب من فضلك :
ابنك محتاج اهتمامك ( حضورك وكلامك وحوارك وحزمك وحبك و خروجكم سوا ولعبكم سوا و استماعك واهتمامك ومشاركتك 🙏

✍️ يا كل ام من فضلك :
بنتك وبيتك هى مهمتك الاولى و مش دورك الاساسى تشتغلى وتكملى احتياجاتكم الماديه ،
ولو لزم الامر يكون لساعات محدوده مش طول اليوم برا البيت و سايبه اولادك ،، وجودك وتركيزك واهتمامك بيهم اهم من اشباع الاحتياجات الماديه.. 🙏

🌿🌿🌿🌿🌿🌿🌿

👈 انتم المسئولين و خليكم فاكرين ان على أد الحب والاهتمام اللى اولادكم منتظرينه منكم ومش بيلاقيه ،،،، على أد التحول السلبى اللى بيحصلهم و التعب والالم اللى بيمارسوها على نفسهم أو علي المحيطين ..

اتمنى الاستفاده للجميع ..
والمشاركه والاهتمام ..
و السلامه لكل اولادنا والحكمه للجميع ..
بقلمى ✍️ د . عاطف خلف 🌿
دكتوراه علم النفس السلوكى