Psyc Mohamed Atef

05/11/2025

مهم نعرف ان مش كل حاجة لازم نعيشها بنفسنا علشان نتعلمها بالعكس احنا كمان بنتعلم بالملاحظة والتقليد.

و يوضح دا تجربة “الدمية بوبو” الشهيرة الي أثبتت إن الأطفال اللي شافوا الكبار بيتصرفوا بعنف بقوا هما كمان بيتصرفوا بعنف.
وده يوضح تأثير القدوة والإعلام والتنشئة الاجتماعية وتاثر الابناءبما يشاهدونه من افعال الاباء.

ودا يؤكد ان السلوك مش مجرد رد فعل…
ده كمان نموذج بيتشاف ويتنقل من جيل لجيل علشان كدا وجب الانتباه من الاباء لتصرفاتهم أمام الأبناء.

01/11/2025

الاشتراط الإجرائي
سكنر كان شايف إن السلوك مش بيتأثر بس بالمثير، لكن كمان بالعواقب اللي بتيجي بعده.”

يعني لو تصرفك بيكافئك → هتكرره
ولو بيجيبلك عقاب → هتتجنبه

مثلاً: طفل كل مرة يرتب سريره بياخد حلاوة → هيكرر السلوك.
لكن لو اتعاقب لما يغلط → هيقلل السلوك ده.

وده بقا اللي اسمه الاشتراط الإجرائي
والي اصبح الأساس في تعديل السلوك والعلاج السلوكي الحديث.

31/10/2025

في بدايات القرن العشرين، ظهرت المدرسة السلوكية كنوع من الثورة ضد التحليل النفسي.
جون واتسون، مؤسسها، كان شايف إن النفس البشرية لازم تُدرس زي أي علم تاني،
يعني بالملاحظة والتجربة مش بالتأمل أو التحليل الداخلي.

السلوكيين قالوا:
"احنا مش هنقيس دواخل الإنسان… لكن هنقيس سلوكه، لأنه هو اللي بنشوفه ونقدر نتحكم فيه."

فبقت المعادلة عندهم بسيطة جدًا
مثير »---» استجابة
وده الأساس اللي بُني عليه علم النفس السلوكي كله

30/10/2025

فرويد كان شايف إن اللي بنشوفه من شخصيتنا هو "قمة جبل الجليد"،
لكن تحت السطح في مساحة ضخمة اسمها اللاوعي — وهي اللي بتتحكم فعلاً في مشاعرنا وتصرفاتنا من غير ما نحس.

اللاوعي بيخزن الحاجات اللي اتكبتت زمان، من ذكريات وأفكار ومشاعر، واللي ممكن تظهر فجأة في الأحلام أو الزلات الكلامية أو حتى في نوبات الغضب.

علشان كده في المدرسة التحليلية الهدفه إننا "نغوص تحت السطح" ونفهم إيه اللي بيحرّكنا من جوه…
لأن اللي مش واعي بيه، هو اللي ممكن يتحكم فيك.

29/10/2025

العقل بيعمل حاجة ذكية جدًا لما بيتعرض لضغط نفسي أو قلق…
بيستخدم "حيل لا شعورية" اسمها آليات الدفاع النفسي علشان يحمينا من التوتر أو الصراع الداخلي بين رغباتنا ومبادئنا.
بس المشكلة إن الدفاعات دي ساعات بتحمينا مؤقتًا، لكنها لو زادت ممكن تبعدنا عن الواقع.

أشهر الدفاعات مثلًا:
الكبت: دفن الأفكار المؤلمة في اللاوعي علشان مانحسهاش.
الإسقاط: لما أنكر مشاعري وأنسبها لغيري، زي اللي بيغير وبيقول: "هي اللي بتحبني!"
التبرير: أعمل تصرف غلط وبعدين أبرره عشان أحس إنّي مش مذنب.
الإنكار: أرفض أصدق إن في مشكلة من الأساس.
الإزاحة: أغضب من مديري بس أروح أزعق في البيت.

اللي بيخلّي الإنسان متوازن مش إنه ما يستخدمش الدفاعات، لكن إنه يبقى واعي بيها وما يسيبهاش تسيطر على سلوكه.

28/10/2025

في بداية القرن العشرين، سيجموند فرويد مؤسس التحليل النفسي كان شايف إن شخصية الإنسان مش حاجة بسيطة، وإنها بتتكوّن من ثلاث مكونات أساسية وكل مكوّن ليه دوره وتأثيره في سلوكنا وتصرفاتنا

المكونات دي هي [ الهو ، الأنا ، والأنا الأعلى ] وفرويد كان بيشبههم كأنهم قوى أو أنظمة جوا نفس الإنسان دايمًا بيتفاعلو ويتصارعو مع بعض

★ أولاً : الهوا (Id)
الهو دا عبارة عن أقدم وأول جزء في شخصيتنا من ساعة ما بنتولد، وده المسؤول عن الغرائز والرغبات الفطرية اللي جوانا، زي الجوع، العطش، الج'نس، والرغبة في اللذة عمومًا
الهو مش بيفكر في الصح أو الغلط ولا في القوانين ولا الأعراف، هو عايز الحاجة دلوقتي حالًا من غير تأجيل، يعني بيمشي بمبدأ "اللذة" بس
مثلاً لو طفل جعان، مش هيستنى لما الظروف تبقى مناسبة، هو هيعيط عشان ياكل فورًا
دا غير إن الهو كمان بيشتغل بطريقة لا شعورية، يعني مش بنحس بيه بشكل مباشر

★ ثانيًا : الأنا (Ego)
الأنا بيظهر بعد ما الطفل يبدأ يتعامل مع العالم الخارجي و يفهم إن مش كل حاجة هتيجي وقت ما هو عايز
الأنا هنا بيشتغل كأنه وسيط بين رغبات الهو وقيود الواقع، و كمان بيشتغل بمبدأ الواقع
يعني بيحاول يحقق رغبات الهو بس بطريقة مناسبة ومقبولة أو على الأقل في وقتها الصح
الأنا يعتبر الجزء الواعي اللي بيفكر ويخطط وبيسأل نفسه " إزاي أحقق ده من غير ما أتعرض لمشاكل أو عقاب ؟ "
يعني مثلاً : لو الهوا بيقول "أنا عايز الكيكة دي دلوقتي حالاً "
الأنا ممكن يقول "استنى لما نشتريها أو نستأذن"

★ ثالثًا : الأنا الأعلى (Superego)
الأنا الأعلى هو صوت الضمير أو الجزء الأخلاقي اللي بيتكون من القيم والمبادئ اللي بنتعلمها من أهلنا والمجتمع والدين، هو اللي بيقولنا إيه الصح وإيه الغلط، وبيحاول يخلي الأنا تلتزم بالمثل العليا حتى لو ده معناه إننا نضحّي ببعض رغباتنا
بس مشكلت الأنا الأعلى إنه ساعات بيكون مثالي زيادة عن اللزوم و ده ممكن يخلي الشخص يحس بالذنب أو التأنيب

★ فرويد بقى كان شايف إن الأجزاء دي دايمًا في حالة تفاعل وصراع مستمر
الهو بيدفعنا ناحية اللذة والإشباع الفوري، الأنا بيحاول يحقق الرغبات دي لكن بالمنطق و بما يتناسب مع الواقع، و الأنا الأعلى بيحط حدود وقوانين أخلاقية، والشخصية السليمة هي اللي بتقدر توازن بين التلات قوى دول
لكن لو حصل خلل في التوازن ده، ممكن تظهر مشاكل نفسية أو سلوكيات غير سوية

★ يعني ممكن نقول مثلاً إن شخصية الإنسان عند فرويد شبه المركب، الهوا يعتبر المحرك اللي بيدفعها لقدام، الأنا هو القبطان اللي بيحدد الطريق، والأنا الأعلى هي الخريطة اللي بتحاول تقول للقبطان يمشي في المسار الصح ولو أي واحد فيهم مسك الدفة لوحده، المركب ممكن تغرق
مثلًا لو الهوا هو المسيطر، الشخص ممكن يبقى مندفع وأناني وعايز كل حاجة بسرعة من غير ما يهمه القوانين أو الناس، ولو الأنا الأعلى هو المسيطر الشخص ممكن يبقى متشدد على نفسه و دايمًا حاسس بالذنب أو التأنيب
أما لو الأنا ضعيف ومش قادر يوازن بينهم، الشخص ممكن يعيش في صراع داخلي مستمر

فرويد بقى استخدم النموذج ده علشان يفسّر كتير من السلوكيات البشرية، وقال إن فهمنا للتفاعل بين الهو والأنا والأنا الأعلى هو المفتاح لفهم الشخصية وحل مشاكلها، ورغم إن نظريته اتعرضت لانتقادات لاكن لسه النموذج ده بيعتبر من أشهر وأهم النماذج اللي بتشرح طبيعة النفس البشرية

24/10/2025

🧠✨ الوسواس القهري مش دلع ولا ضعف شخصية.

في ناس دماغها بتعلّق في فكرة معينة، وتفضل تزنّ عليها لحد ما تعمل حاجة عشان ترتاح.
زي اللي بيغسل إيده ٢٠ مرة، أو اللي لازم يتأكد من الباب كل شوية... مش لأنه بيحب كده، لكن عشان القلق بيخنقه لو ماعملش كده.
هو عارف إن اللي بيعمله مش منطقي، بس إحساس الخطر بيبقى أقوى من المنطق.

الحلو إن العلاج موجود والمساعدة مش عيب أبدًا.

بدل ما نقول "ده موسوس"،
خلينا نقول "ده محتاج دعم وفَهم." ❤️

21/10/2025

15/10/2025

الخوف من الفقد مش ضعف، ولا هو شي غريب…
ده شعور طبيعي جدًا، ووراه قصص قديمة جوانا، من أيام كنا صغيرين وماكنّاش بنفهم ليه اللي بنحبهم ممكن يبعدوا فجأة، أو يسكتوا من غير سبب.

العقل بيحاول يحمينا، فبيفضل يقظ على طول، خايف نخسر، خايف نسيب، خايف نتساب…
بس لما الخوف يسيطر، بننسى نعيش اللحظة، وننسى نحب من غير ما نحسب كل خطوة.

في علم النفس بيقولوا إننا بنتعلّق بالناس بنفس الطريقة اللي تعلّقنا بيها بأهلنا وإحنا أطفال.
يعني لو كنا حاسين بالأمان زمان، بنعرف نحب ونثق بسهولة.
ولو كنا اتعودنا على الرحيل، بنبقى دايمًا حاسين إن في حد هيبعد، حتى لو كل حاجة تمام.

المشكلة إن الخوف ده ممكن يخلينا نخسر نفسنا قبل ما نخسر حد تاني.
الحل؟
إننا نحب، ونتعلّق، ونعيش، بس من غير ما ننسى إن اللي مكتوب لينا مش هيضيع.
وإن السلام جُوانا، مش برة في الناس.

خاف على قلبك، بس ما تخليش الخوف يقف بينك وبين الحياة

02/10/2025

لها تأثير سلبي على الابناء