What are the opening hours?

Monday 4pm - 10pm Tuesday 4pm - 10pm Wednesday 4pm - 10pm Thursday 4pm - 10pm Saturday 4pm - 10pm Sunday 4pm - 10pm

https://www.facebook.com/175041812912117/

Psy Shimaa AlGohary, Medical complex in my city, Cairo (2026)

28/03/2026

لو بتربي "ولد".. خديه على جنب النهاردة، واديله مبلغ زيادة فوق مصروفه المعتاد، وقوليله في ودنه: "الزيادة دي عشان تجيب بيها حاجة حلوة لماما، أو تفاجئ بيها أختك بهدية بسيطة".
الهدف هنا مش مجرد فلوس زيادة، الهدف إننا نزرع في وجدانه من صغره معنى "المسؤولية". عشان لما يكبر ويسمع آية (للذكر مثل حظ الأنثيين)، ما يفهمش إن النصيب الزيادة ده "امتياز" عشان هو أحلى ولا أطعم ولا أحق وبسمسم أكتر!
الزيادة دي مش عشان عيشته هو ترتاح أكتر.. لازم يفهم إن الزيادة دي تكليف، وأمانة في رقبته لازم تترد في صورة:
رجولة في التعامل.
نُبل وكرم في العطاء.
شهامة في الاحتواء.
وتقدير لكل ست في محيطه تخصه.
علّميه إن "الرجولة" مش في الأخذ والاستئثار، الرجولة في القدرة على الرعاية والاحتواء. وإن الزيادة اللي ربنا قسمها له، هي في الحقيقة "ممر" للرحمة والمحبة يوصل لأهل بيته.
اغرسوا فيهم "النفس الكريمة" واليد المعطاءة من صغرهم، عشان لما يكبروا يبنوا بيوت قايمة على المودة والأمان، مش على الأنانية وحب الذات.
#دشيماءالجوهري
#التربية
#الرجولة
#القوامة

27/03/2026

يا جماعة.. هي "ماما" دي مابتفصلش؟
أنا بقترح نغير اسم "ماما" لـ "المحرك اللي مابينامش"! 🏃‍♀️💨
عارفة شعورك وأنتي صاحية من النوم، وقبل ما تفتحي عينك تلاقي سؤال وجودي من ابنك: "ماما، هو الحوت بياكل شيبسي؟".. أو بنتك جاية تقولك "ماما، الكوتشي ضاع" (وهو في رجليها أصلاً)! 😂
التربية مش بس مذاكرة وتمارين.. التربية هي إنك تحافظي على "ثباتك الانفعالي" وأنتي شايفة علبة الصلصة مرسوم بيها لوحة فنية على السجادة الجديدة، وبدل ما تصوتي، بتطلعي الموبايل تصوري عشان "الذكريات"! 📱📸
يا ريت كل أم هنا تفضفض معانا شوية وتضحكنا:
إيه أغرب كارثة عملها ولادك النهاردة؟ 🤦‍♀️
وإيه أكتر كلمة "حلوة" قالوها خلتك تنسي كل التعب ده؟ ❤️
#دشيماءالجوهري

26/03/2026

الطفل مش "غنايم حرب".. والنفقة مش "ثمن" الأبوة!
من قلب الكومنتات والرسائل اللي بتجيلي، شفت وجع يهد جبال:
أب مقتدر بيحارب ابنه (طفل توحد) في لقمته وعلاجه عشان ينتقم من الأم.. ده "إفلاس إنساني" قبل ما يكون مادي.
أم متعنتة بتحرم أب "سند وحنين" من ضنا بكلمة (سم في الأكل) أو (خوف على حضانة).. دي "جريمة صامتة" بتقتل انتماء الطفل.
يا سادة..
لما الأب يتحول لـ (خزنة فلوس) بس.. ولما الأم تتحول لـ (سجانة) لمشاعر ولادها.. إحنا مش بنربي أطفال، إحنا بنزرع (شجر من غير جذور) هيقع مع أول ريح في الدنيا.
سؤالي لكل أب وأم منفصلين:
لو ابنكم كبر النهاردة وسألكم: "كنتم بتنتقموا من بعض.. ولا كنتم بتحموني؟".. هتجاوبوا بإيه؟

# drshimaaalgohary

25/03/2026

أصعب شعور في أي علاقة… إنك تبذل من قلبك، ومحدش يحس.
تتعب، تحتوي، تهتم، وتراعي…
وفي الآخر تلاقي وجودك عادي، وتعبك عادي، وكأنك ما عملتش حاجة.
قلة التقدير مش وجع بسيط،
دي حاجة بتطفي الحماس واحدة واحدة،
وبتخلي القلب يبرد،
والشخص اللي كان بيدي من روحه يبدأ يسكت، ويبعد، ويستنزف من جواه.
المشكلة إن الإنسان ممكن يستحمل ضغط،
ويستحمل خلاف،
ويستحمل تعب…
لكن صعب جدًا يستحمل إحساس إنه مش متشاف،
وإن كل اللي بيعمله مالوش قيمة عند اللي قدامه.
وساعتها الانسحاب ما بيكونش قسوة،
الانسحاب أوقات بيكون احترام للنفس،
لأن الاستمرار في مكان مفيهوش تقدير،
معناه إنك كل يوم بتخسر جزء منك.
وفي الحقيقة،
قلة التقدير مع الوقت ما بتخليش الشخص يبعد وبس…
دي ممكن تخليه يكره العلاقة نفسها،
ويكره الإحساس اللي كان بيحاول يحافظ عليه.
عشان كده،
اللي ما يقدّرش وجودك،
ما تستناش منه يفهم قيمتك بعد ما تتكسر.
امشِ بهدوء…
لأن اللي بيتعب بصدق، يستحق يتشاف ويتقدّر.
#دشيماءالجوهري

#العلاقات

24/03/2026

مشكلتي مع فيلم "السلم والثعبان ٢" بتبدأ من "المحتوى" وبتنتهي عند "الاستهانة بالبيت".
أولاً.. المشاهد دي ما تليقش إنها تكون موجودة بأي صورة على شاشة، خاصةً وإن المراهقين والأطفال وعيهم بيتشكل باللي بيشوفوه، وممكن يصدقوا إن دي صورة الحياة الطبيعية أو المقبولة.
لكن الأزمة الأكبر عندي هي "تسطيح البيوت". الفيلم قدّم أزمة الجواز والفتور وكأن الانفصال قرار "خفيف" بين اتنين عندهم رفاهية التجربة والرجوع وقت ما يحبوا. لكن الحقيقة إن البيت لما بيتهز، الأطفال هما اللي بيدفعوا التمن.
الطفل مش لازم يعيط في مشهد صريح عشان نقول إنه اتأثر؛ الأثر بيبان في خوف، ارتباك، وفقدان أمان بيعيش معاه العمر كله. الجواز مش "كيميا وانبهار" بس، الجواز مسؤولية ونضج والتزام.
فيه فرق كبير بين شخص ينفع "يتحب"، وشخص ينفع يتبني معاه "عمر". البيوت مش رفاهية، والأطفال مش تفاصيل على الهامش، وأي معالجة فنية بتهون من وجع التفكك الأسري هي معالجة ناقصة ومؤذية.. مهما كان شكلها جذاب.
#دشيماءالجوهري

#الزواج
#الأسرة
#الأطفال

23/03/2026

ما توصلش اللي معاك لمرحلة إنها تزهق وتمشي… وبعدها تقول هي السبب
في علاقات كتير بتبوظ مش لأن الطرف التاني كان عايز يمشي من البداية،
لكن لأنه حاول كتير، استحمل كتير، وسكت على حاجات كتير…
لحد ما وصل لمرحلة تعب فيها فعلًا.
المشكلة بقى إن بعض الناس، بعد ما يضغطوا، ويجرحوا، ويكرروا نفس الغلط،
أول ما الطرف التاني يبعد، يقلبوا الترابيزة ويقولوا:
“هي اللي سابت”
“هي اللي بعدت”
“هي السبب”
مع إن الحقيقة غير كده تمامًا.
الحقيقة إن في فرق كبير بين حد مشي فجأة،
وحد اتدفع للمشي بعد محاولات كتير فشلت.
ما ينفعش تفضل تقلل، وتوجع، وتهمل، وتستهين بمشاعر اللي قدامك،
وبعدين لما يوصل لآخره ويمشي،
تطلع نفسك الضحية وتتهمه هو.
اللي بيتعب من كتر الأذى مش بيكون هو السبب،
السبب الحقيقي هو اللي خلق بيئة مرهقة،
وخلّى العلاقة حمل بدل ما تكون سكن.
والأصعب من ده،
لما الشخص الغلطان ما يكتفيش بأذاه،
لكن كمان يبقى بجح في التبرير،
ويفضل متمسك بفكرة إنه صح مهما عمل،
ويرفض يشوف أثر تصرفاته على الطرف التاني.
الاعتراف بالغلط مش ضعف،
بالعكس… ده نضج.
إنما إنك تجرح، وتضغط، وتخسر،
وبعد كده تلوم اللي اتوجع،
فده مش حب… ده هروب من المسؤولية.
في الآخر،
اللي بيمشي بعد تعب طويل ما بيتلامش،
لأن فيه فرق بين اللي خان،
واللي حاول يحافظ لآخر نفس، لكن خلاص ما بقاش قادر يكمل.
ما تبقاش صاحب الفعل الغلط،
وبعدها تلبس التهمة للي اتأذى.
لأن اللي بيوجع غيره لحد ما يمشي،
ما ينفعش يقول: أنا المظلوم.
#دشيماءالجوهري
#العلاقات

22/03/2026

مش كل أم كانت رحلتها سهلة…
في أمهات شالوا دورين، وكانوا الأم والأب، والسند والرحمة، والحضن والأمان.
وفي أمهات فضّلوا يدعوا من قلبهم، ويتمنوا طفل يملأ حياتهم.
شكرًا لكل أم تعبت، وصبرت، وخافت، وضحّت، وفضلت واقفة عشان ولادها.
وشكرًا لكل أم قلبها كان مليان دعاء، وربنا جبر خاطرها
الأمومة مش بس دور…
الأمومة نعمة كبيرة، ورحمة من ربنا، وقلب بيحب من غير شروط.
الحمد لله على نعمة الأم،
والحمد لله على كل أم كانت سبب في حياة، وأمان، ودعوة حلوة طالعة من القلب.
#دشيماءالجوهري
#الأم
#الأمومة

#شكراً_امي

21/03/2026

مش كل حضن بيكون أمان… أوقات بيكون تهديد.
في ناس أول ما حد يقرب منهم أو يحاول يحتويهم، جسمهم يتوتر ونفسهم يضيق، وكأن القرب خطر مش راحة.
وده غالبًا بيكون مرتبط بتجارب قديمة خلت الجهاز العصبي يربط القرب بالأذى أو الضغط، فبدل ما الحضن يطمن… بيشغّل استنفار داخلي ورغبة في الهروب.
الطرف التاني ساعتها ممكن يحس بالرفض أو البرود، لكن الحقيقة إن اللي بيحصل مش قسوة… قد ما هو خوف قديم بيتحرك مع كل قرب.
في ناس اتربت على الجفاء، وناس اتأذت من القرب، فبقوا بيبعدوا عشان يعرفوا يحموا نفسهم.
لكن كمان في ناس قدرت تكسر الدائرة، وتتعلم إن الأمان ممكن يبقى موجود، وإن الاحتواء مش ضعف.
مش كل اللي بيهرب من الحضن بيكره…
أوقات بيكون بس لسه بيتعلم إن القرب مش دايمًا وجع.
#دشيماءالجوهري
#العلاقات

#الاحتواء

20/03/2026

في عيد الأم… مش كل الناس بتحتفل، في ناس بتدعي… وفي ناس بتبكي في صمت.
عيد الأم مش مجرد مناسبة عابرة، ولا يوم بنكتب فيه كلمتين وخلاص…
عيد الأم بييجي كل سنة ويحرك جوانا مشاعر كتير جدًا،
حب، امتنان، حنين، وأوقات وجع ما بيتقالش.
لأن الأم مش شخص عادي في حياة أولادها.
الأم هي السند، وهي الحضن، وهي الأمان اللي بنرجع له مهما كبرنا.
هي اللي كانت بتشيل من غير ما تشتكي،
وتخاف من غير ما تبين،
وتدي من قلبها من غير ما تنتظر مقابل.
الأم كانت وطن صغير ساكن جوانا…
ولو الدنيا كلها اتغيرت، فضل وجودها في القلب ثابت ما بيتبدلش.
وعشان كده، في عيد الأم، فيه ناس محظوظة إن أمهاتهم لسه منورين حياتهم،
وفيه ناس العيد بالنسبالهم مش فرحة كاملة…
لأن أمهم رحلت،
وسابت مكانها حنين ما بيتعوضش،
وفراغ كبير،
وذكريات بتيجي فجأة وتكسر القلب من غير استئذان.
فيه ناس في اليوم ده ما بيعرفوش يقولوا غير:
يارب ارحم أمي.
الكلمة اللي يمكن بتبقى أصدق من أي هدية، وأعمق من أي احتفال.
لأن الأم لما بتمشي، ما بتغيبش فعلًا…
هي بس بتتحول لذكرى ساكنة في كل التفاصيل،
في الدعاء،
في صوتها اللي لسه عايش في الذاكرة،
في ريحتها في البيت،
في الحنان اللي ما حدش عرف يعوضه بعدها.
وعيد الأم مش بس للأمهات اللي موجودين وسطنا،
هو كمان للأمهات اللي سبقونا لعند ربنا،
اللي تعبوا، وربّوا، وضحّوا، وسابوا جوانا أثر عمره ما هيروح.
ربنا يرحم كل أم رحلت،
ويغفر لها،
ويجعل كل تعبها، وكل خوف خافته، وكل لحظة حب عاشتها عشان ولادها في ميزان حسناتها.
اللهم ارحم أمهاتنا الأموات،
واغفر لهن،
وأنر قبورهن،
واجعل لهن من نعيم الجنة نصيبًا،
واجمعنا بهن على خير في دار لا فراق فيها ولا وجع.
وفي نفس الوقت…
ربنا يحفظ كل أم موجودة،
ويبارك في عمرها،
ويقدرنا على برّها، وتقديرها، ورد جزء صغير من اللي قدمته لينا.
لأن الأم مش محتاجة يوم واحد في السنة عشان نحبها،
لكن يمكن اليوم ده يذكرنا نقول لها الكلام اللي بنأجله،
ونديها الحب اللي تستحقه،
ونعترف بفضلها قبل ما يبقى كل اللي فاضل منها هو الذكرى.
في عيد الأم…
اللهم احفظ أمهاتنا الأحياء،
وارحم أمهاتنا الأموات،
واكتب لكل قلب مشتاق الصبر والسكينة والرضا.
#دشيماءالجوهري

#أمي

19/03/2026

العيد مش بس فرحة…
العيد فرصة نرجّع نفسنا لنفسنا…
ونسامح، ونهدى، ونبدأ من جديد
كل عام وانتم بخير♥️
#دشيماءالجوهري

#طبطبة

#مشاعر

#راحة
#هدوء

18/03/2026

في ناس شكلها عايشة…
بس من جوهها خلصت من زمان.
الست اللي بتضحك طول اليوم…
وتقول "أنا كويسة"…
وهي أصلًا
مش فاكرة آخر مرة حسّت إنها كويسة بجد.
شايلة بيت…
وشايلة مسؤوليات…
وشايلة ناس…
بس محدش شايلها.
بتسند الكل…
ولما تيجي على نفسها
مفيش حد يقولها:
"تعالي… أنا معاكِ."
والراجل…
اللي الكل شايفه قوي…
وإنه "راجل ويستحمل"…
بس محدش شايف
قد إيه هو مرهق…
مرهق من التفكير…
من الخوف…
من المسؤولية…
من إحساس إنه لازم يفضل واقف
حتى وهو مش قادر يقف.
الاتنين عايشين نفس الوجع…
بس كل واحد بطريقته.
واحدة بتكتم لحد ما تتخنق…
وواحد بيسكت لحد ما يبعد.
المشكلة مش في التعب…
المشكلة إن مفيش مساحة نقول فيها:
"أنا تعبت."
من غير ما يتقال لنا:
"كلنا تعبانين."
أو
"استحمل شوية."
إحنا مش محتاجين نصايح على قد ما محتاجين:
حد يسمع…
حد يحس…
حد يطبطب من غير ما يحكم.
لأن الحقيقة اللي محدش بيقولها:
في بيوت شكلها هادي…
بس جواها ناس بتنهار كل يوم في صمت.
وفي ناس عايشة سوا…
بس كل واحد فيهم
حاسس إنه لوحده.
وأسوأ إحساس ممكن يمر على إنسان…
مش التعب…
إنه يبقى تعبان…
ومفيش حد واخد باله.
وسؤالي ليكوا 👇
إنت بتتعب في صمت…
ولا عندك حد تقدر تقول له "أنا مش بخير"؟
#دشيماءالجوهري

#العلاقات
#الستات
#الرجالة

16/03/2026

"لما أب يقول: أنا ما ربيتهمش علشان أصرف عليهم…
يبقى السؤال الحقيقي:
هو أنت كنت أب إمتى أصلاً؟"
اتكلمنا قبل كده عن الأب اللي بيحارب عشان يشوف بنته…
الأب اللي بيتبهدل ويجري ورا حقه في حضن طفلته.
لكن الحقيقة إن في صورة تانية محدش بيحب يتكلم عنها…
صورة أب ولاده بيروحوله بإيديهم…
وهو اللي يبعد.
أب يقدر يشوف ولاده في أي وقت…
بس هو اللي مش عايز.
أب لما يتسأل:
"ليه ما بتصرفش على ولادك؟"
يرد بمنتهى البساطة:
"أنا ما ربيتهمش علشان أصرف عليهم."
طيب اسمح لي أسألك سؤال واضح:
هو أنت جايب الحق ده منين؟
لا الشرع قال كده…
ولا القانون قال كده…
ولا حتى الإنسانية تقبل بكده.
في الشرع، نفقة الأبناء واجب على الأب…
سواء كانوا عايشين معاه
أو عايشين مع أمهم.
حتى لو حصل طلاق…
حتى لو في خلافات…
حتى لو الأب مش شايف أولاده.
النفقة مش مكافأة على التربية…
النفقة مسؤولية الأبوة نفسها.
والقانون كمان واضح وصريح:
الأب ملزم بالإنفاق على أولاده
لأنهم أولاده…
مش لأنهم عايشين معاه.
الأبوة مش كلمة…
ولا اسم في شهادة الميلاد.
الأبوة موقف.
مسؤولية.
وجود.
لأن الطفل ممكن يتحمل غياب أبوه…
لكن صعب جدًا يتحمل فكرة
إن أبوه اختار يتخلى عنه.
الخلاف بينك وبين أمهم…
ما ينفعش أبدًا يتحول لعقوبة لأولادك.
لأن الطفل
مالوش أي ذنب
في معارك الكبار.
#دشيماءالجوهري
#الأبوة

Psy Shimaa AlGohary

28/03/2026

27/03/2026

26/03/2026

25/03/2026

24/03/2026

23/03/2026

22/03/2026

21/03/2026

20/03/2026

19/03/2026

18/03/2026

16/03/2026

Address

Opening Hours

Website

Alerts

Shortcuts

Share

Category

Monday	4pm - 10pm
Tuesday	4pm - 10pm
Wednesday	4pm - 10pm
Thursday	4pm - 10pm
Saturday	4pm - 10pm
Sunday	4pm - 10pm