02/12/2025
جالي شاب عنده ٢٣ سنة بقالو سنة بيشتكي من نغزة قوية جداً بتجي له بشكل مفاجئ تحت صدره الشمال لدرجة إنها بتخليه يدوخ من شدة الوجع.
كشف بسببها أكتر من مرة و عند أكتر من تخصص : قلب - صدر - باطنة ، و في كل مرة يتكتب له مسكنات و أدوية معدة و مهدئات و كلها بدون أي جدوى.
آخر مرة جت له النغزة دي من أسبوعين وهو في شغله و كانت قوية جداً لدرجة إنه أغمى عليه و صحابه شالوه وجريوا بيه على أقرب مستشفى.
الدكتور في الطواريء قالهم إن دي اشتباه جلطة قلبية و لازم يدخل قسطرة حالاً !! ودي تكلفتها كذا و لو احتاج دعامة هتدفعوا كذا ( مبالغ خرافية)
المهم أصحاب الشاب لما لقوا الموضوع كبير كده كلموا أهله و طبعاً جم على ملا وشهم و المستشفى اتقلبت و كلهم قالوا للدكتور : إعمل المطلوب يا دكتور و أي مصاريف إحنا جاهزين لها.
دخل الولد القسطرة ؛ و بعد ١٠ دقايق خرج الدكتور قالهم : مبروك شرايين الولد سليمة !!
رد أهل الولد : طيب الحمد لله يا دكتور ، يعني مفيش جلطة ؟
رد الدكتور : لا اطلاقا .. ده شرايينه أحسن من شراييني أنا شخصيا ً.
بدأت الفوقة تيجي لأهل الولد و بدأوا يستوعبوا إن في فيلم كبير اتعمل عليهم الهدف منه واضح طبعاً.
إزاي جلطة ولازم قسطرة حالاً و احتمال دعامات في شاب عنده ٢٣ سنة ماعندوش أي أمراض مزمنة و لا عمره دخن و لا حط سيجارة في بؤه ؟ و إزاي بعد القسطرة ماعندوش أي حاجة ؟!!
و من سوء حظ المستشفى ؛ خال الولد ده طبيب و برضو جه على ملا وشه بعد ما الولد عمل القسطرة و سألهم إزاي شكيتوا إن في جلطة رغم إن رسم القلب سليم و رغم إن إنزيمات القلب و التروبونين ما ارتفعوش ؟
السيناريو بدأ ياخد منحى تاني و أهل الولد ثاروا من شدة الغضب و بدأت الأصوات تعلى و اتهامات لإدارة المستشفى بالنصب و الاحتيال و اعتراض على دفع تكاليف المستشفى و الشرطة جت و حاجة كده يعني في منتهى العبثية.
المهم .. الليلة اتلمت و أهل الولد خدوا ابنهم و روحوا وسط إحساس إنهم اتضحك عليهم.
بعد ٣ أيام الولد جالو النغزة تاني ؛ والدته اتصلت بالعيادة عندي و جولي في نفس اليوم.
حكوا لي القصة اللي مروا بيها و أنا امتنعت عن التعليق لاني لاقيتهم فاهمين بما فيه الكفاية.
سمعت من الولد شكوته و لاقيتها بتتلخص في الاتي :- نغزة قوية في الصدر معاها تسارع في ضربات القلب و ضيق في التنفس و إحساس بالهبوط و رغبة في القيء و شحوب في الوجه و أحياناً إغماء.
اعتقد المتابعين ليا بيقولوا دلوقتي في نفس واحد : مش ده العصب الحائر يا دكتور ؟؟
أيييييوة بالظبط كده ، و ده اللي أنا قلته لأهل الولد : اشتباه وجود اضطرابات في العصب الحائر.
طلبت من الولد اختبار المنضدة المائلة و الفحص طلع إيجابي و تأكد إصابة الشاب باضطرابات العصب الحائر و هو السبب في كل الأعراض اللي بتحصله من وقت للتاني.
كتبت له العلاج اللازم و الحمد لله بيتحسن و الأزمة ما تكررتش إلى الآن.
الشاهد …
قسطرة لشاب ٢٣ سنة !؟ الله يسامحكم
