03/11/2025
🩺💬 الضغط العالي مش دايمًا معناه إنك مريض ضغط!
في حالات كتير بيجيلي فيها سيدات في العيادة،
تكون جاية متوترة…
زعلانة شوية من جوزها 💔،
والولاد مضايقينها في المذاكرة 📚،
وعندها صداع ووشها محمّر وبتقوللي:
"أنا حاسة ضغطي عالي يا دكتور."
ولما أقيس فعلاً ألاقي الضغط مرتفع.
بس هنا لازم نوقف ونفهم حاجة مهمة جدًا 👇
⚠️ ارتفاع الضغط في العيادة مش معناه إنك بقيت مريض ضغط مزمن!
يعني إيه الكلام ده؟
يعني الضغط مش بيتشخص من قراءة واحدة عند الدكتور.
لأن في مواقف كتير ممكن ترفع الضغط مؤقتًا:
زعل أو توتر 😔
قلة نوم 💤
مجهود أو خناق مع الأولاد 😅
أو حتى القلق من وجودك قدام الدكتور ! (وده بيحصل أكتر مما تتخيل).
الدكتور لما يلاقي الضغط عالي في الزيارة الأولى،
مش المفروض على طول يقولك:
“خدي علاج ضغط مدى الحياة.”
لكن الطبيعي — والصح —
إننا نتابع الضغط في البيت في أوقات مختلفة ⏰
على مدار أيام أو أسابيع،
وفي كل مرة نكتب القراءة،
وساعتها نقدر نحكم صح:
هل الضغط فعلاً ثابت عالي؟ ولا بس كان طالع من الموقف؟
🩺 لو طلع فعلاً عالي في أكتر من وقت ومن غير سبب واضح →
يبقى محتاج متابعة وعلاج منتظم.
لكن لو الضغط بيرجع طبيعي لما تكوني هادية ومش متوترة ❤️
يبقى ده مش "ضغط مزمن"،
ده كان ضغط لحظي بسبب الموقف نفسه.
🎯 الخلاصة:
قبل ما تتخضي أو تبدأي علاج،
خدي نفس عميق، واعملي قياسات في البيت بهدوء،
وساعتها القرار يبقى مبني على واقع مش لحظة انفعال.
