https://www.facebook.com/2292584414324921/

Dr. Nervana Adel, 5 ش عبد الحميد ابو هيف/ميدان المحكمة, Cairo (2026)

07/08/2019

- عندك مسئوليات كتير و مشغول باستمرار، و ده بيخليك تحس بالإجهاد بس مش لاقي وقت ترتاح
- بتلاقي صعوبة في إنك تقوم من السرير كل يوم الصبح و بتتحايل على المنبه يسيبك تنام شوية
- شغلك متعب و مليان توتر، و ساعات بتسأل نفسك "هو أنا بعمل في نفسي كده ليه؟"
- حاسس انك مقصر مع أهلك و الناس اللي بتحبهم بسبب انك مشغول و مش قادر تخصص لهم وقت كفاية
- صحتك فيها شوية مشاكل، و نفسك تظبط أكلك و تلعب شوية رياضة ، بس مش عارف تبدأ منين

في دوامة الحياة، كلنا بنحاول نجري أسرع عشان نوصل أسرع
لكن حتى لو كنا بنجري في سباق، لازم نعرف امتى نقف و نرتاح عشان نقدر نكمل

علي فكرة ...
- يومك اللي فيه 24 ساعة بس ده ممكن تعمل فيه حاجات كتير أوي , و بعد ما تخلصها ممكن برضو تلاقي وقت لنفسك و هواياتك و للناس اللي بتحبهم
- ممكن جدا تصحي من نومك كل يوم مرتاح و كلك نشاط , و جاهز تبتدي يومك بكل حيوية
- شغلك كمان ممكن يبقي مساحة لتحقيق ذاتك , و الضغط اللي فيه ممكن يبقي منافسة تحمسك انك تكبر و خبرتك تزيد
- و برضو الأكل ممكن يبقي متعة يومية بتقدمها لنفسك , و في نفس الوقت يبقي حاجة بتفيد جسمك و بتمده بالطاقة و الغذا اللي بيحتاجه
- و الرياضة ممكن تبقي حاجة مسلية جدا , مش مجرد روتين مفروض عليك عشان صحتك و بس

لو عايز تعرف ازاي ممكن تعمل كل ده و اكتر , اتصل على رقم ٠١٢٠٧٩١٤٧١٦ و احجز ميعاد مع الدكتورة نرفانا عادل عشان تجرب ال Health Coaching و اسأل علي "برنامج ال90 يوم"

طب و الHealth Coaching ده بقى عبارة عن ايه ؟
ده تخصص جديد بيجمع بين الخبرات الطبية و الارشاد النفسي. يعني لو عندك أهداف معينة تخص صحتك حابب توصلها و مش عارف تعمل كده لوحدك، احنا ممكن نساعدك و نمشي معاك خطوة بخطوة لغاية ما توصل للأهداف دي
أو كمان لو عندك أي مشاكل صحية مزمنة و مش عارف تسيطر عليها، احنا برضو ممكن نساعدك و نعلمك ازاي تتحكم فيها و تتعايش معاها

عشان مفيش أي حاجة في الدنيا... أهم من صحتك :)

27/07/2019

" أصله بقاله فترة نفسيته تعبانة و محدش عارف يتعامل معاه ازاي !"
ده لسان حال معظم الناس اللي عندها حد قريب منها بيعاني من أزمة نفسية ، بيبقوا فعلا نفسهم يساعدوه يبقي أحسن ، بس بيكونوا محتارين يتصرفوا معاه ازاي ، يا تري يضغطوا عليه عشان مصلحته ولا كده ممكن يتعب أكتر ، ولو سابوه ف حاله - زي ما هوغالبا بيطلب منهم - فعلا هيرتاح ولا هيحس انه وحيد و يتعب زيادة ... حاجة تلخبط فعلا !!!
لو انت واحد من الناس دول ، كمل قراية و ركز معانا شوية ...🤔
الأبحاث و الدراسات بتقول ان من أهم الحاجات اللي بيحتاجها أي واحد بيمر بأزمة أو مشكلة نفسية هي الsupport system، اللي هما الناس اللي بيسندوه و يساعدوه لغاية ما يعدي الأزمة، و دول غالبا بيكونوا الناس القريبين منه، اللي يعرفوه كويس و في نفس الوقت يهمهم أمره، زي الأهل أو الأصدقاء المقربين.
في ناس محظوظة بيلاقوا في أهلهم أو أصحابهم support بجد، لأنهم بيكونوا بشكل ما علي دراية باللي المفروض يتعمل أو يتقال ، حسب الموقف أو المشكلة ، نتيجة الخبرة أو الدراسة، أو حتى الفطرة السليمة و تجاربهم في الحياة...
لكن للأسف في معظم الحالات، أصحاب المشكلة مش بيلاقوا في الناس اللي حواليهم الدعم اللي هما محتاجينه، و ده بيكون ليه أسباب كتير:
- زي مثلا إنهم مشغولين جدا و مش مدركين قد إيه الشخص ده محتاج لوقتهم و دعمهم، فبالتالي مش بيهتموا بالموضوع بالقدر الكافي
- أو ببساطة معندهمش وعي بطبيعة المشاكل و الضغوط النفسية و كيفية التعامل معاها، و ساعتها ممكن حتي يكونوا بيزودوا المشكلة بكلام أو تصرفات نابعة من نية كويسة و اهتمام، لكن بيكون ليها نتايج مدمرة، في حين إن صاحب المشكلة أصلا على آخره و مش ناقص😢
- أو ممكن يكونوا هما نفسهم عندهم مشاكل و محتاجين حد يدعمهم، و سواء كانوا مدركين ده في وقتها ولا لأ، هما مش بيقدروا يسندوا حد لأنهم معندهمش الطاقة أو القدرة الكافية انهم يعملوا كده
- وفي كمان احتمال أخير و لو إنه ساعات بيتفهم غلط، إن الناس اللي صاحب المشكلة بيعتبرهم مقربين يكون احساسه بيهم من طرف واحد، يعني هو قريب منهم و بيهتم بيهم، لكن هما ببساطة مايفرقش معاهم كتير الشخص ده عامل ايه ولا ايه اللي بيحصل في حياته، و دي بتحصل غالبا في الصداقات الجديدة أو اللي مرتبطة بمكان، زي الشغل أو الدراسة أو السكن...
المهم إن صاحب المشكلة في كل الحالات بيحس بالخذلان أو الخيانة لو ملقيش الدعم اللي هو محتاجه، و ده بيزود المشكلة أكتر و بيخليه يحس بالوحدة و ممكن كمان ينزوي و يبعد عن الناس عشان يحمي نفسه - حسب ما هو فاهم - من احساس الخذلان من الناس اللي بيحبهم
طيب و الحل...... ؟!
- لو انت صاحب المشكلة، أحب أقولك إن إحساسك بالخذلان لو ملقتش دعم من اللي حواليك ده شيئ عادي و متوقع جدا ، بس انت كمان بلاش تقف عند الحتة دي و تتقوقع على نفسك و خلاص ، الناس اللي حواليك غالبا حابين يساعدوك بس مش عارفين
- عشان كده مهم تروح لحد محترف يساعدك لغاية ما تعدي الأزمة، ده كمان ممكن يساعدك تفهم اللي حواليك ليه مش بيساعدوك ، و ساعتها ممكن يتكلم معاهم و يفهمهم ازاي يتعاملوا معاك صح في الفترة دي، أو على الأقل هيوجهك ازاي تطلب منهم المساعدة بالشكل اللي انت محتاجه
- أما بقى لو انت عايز تساعد حد قريب منك بيمر بمشكلة، أحب أقولك لو سمحت بلاش تحكم علي الموقف من خلال وجهة نظرك انت و تتعامل علي الأساس ده ... لو فعلا عايز تساعد صح لازم تسمع من صاحب المشكلة كويس و تحاول تحط نفسك مكانه ، و بعدها تفكر و يا ريت كمان لو تدور و تقرأ شوية عن الموضوع و بعدها تتكلم معاه أو تنصحه 🤓
- لكن الأهم من كده إنك تعرف حدودك كويس و تعرف اللي قدامك بيها، يعني لو لقيت إن المشكلة أكبر منك و ممكن تتعبك انت شخصيا، اعتذر بهدوء من صاحب المشكلة و فهمه إنك مش بتتخلي عنه لكن دي حدود قدراتك، و هو بعد كده لما يفوق من المشكلة غالبا هيقدر ده و يفهمه... وحتى لو ده محصلش ، على أي حال متسيبش نفسك تتأذي - لأن مسئوليتك الأولى هي تجاه نفسك، و لو تعبت محدش هاينفعك
- في نفس الوقت برضومهم جدا انك لو قررت تبعد ، بلاش تنسحب من الصورة فجأة و بدون مبررات، ده ممكن يعمل شرخ كبير في علاقتكم، و زود على كده احساسك بالذنب إنك اتخليت عن شخص بتحبه ف وقت هو كان محتاجلك
عموما في كل الحالات الاستعانة بأهل الخبرة مطلوب، لأنه ببساطة بيوفر وقت و مجهود كتير جدا، و المشكلة طول ما الواحد جواها عمره ما بيعرف يقدر حجمها صح، عشان كده في ناس شغلتها انها تسمع و تبص على المشكلة من بره و توجه صح ناحية الحل المناسب ، لأن كل إنسان معرض إنه يقع أو يتعب و ساعتها بيحتاج حد ياخد بإيده عشان يرجع تاني يقف على رجليه... المهم إن المساعدة تتقدم صح و في الوقت الصح ... 👍
لو تحب تشترك في البرنامج الخاص بالدعم النفسي ، ابعتلنا اسمك و رقم تليفونك في رسالة علي الصفحة و احنا هنكلمك عشان نقولك كل التفاصيل :)

24/07/2019

" الست بعد ال 50 بتبقي عاملة زي رجل الأعمال اللي أشهر افلاسه ! "
مع ان الجملة قاسية شوية ، بس فعلا ده الاحساس اللي بيجي لمعظم الستات في الفترة دي (اللي هي بعد انقطاع الدورة الشهرية)
طيب يا تري ايه اللي بيخلي حاجة طبيعية زي دي ، حاجة بتحصل لكل الستات ، تبقي حاجة قاسية و مرعبة كده ، لدرجة ان مهما علي مستوي الثقافة و مستوي التعليم عند الست برضو مش بتفرق كتير ، كلهم بيخافوا من الفترة دي و بيعملولها حساب ؟!
لو سنك بين 40 - 50 سنة ، غالبا هتكوني بتشتكي من بعض الأعراض زي :
- احساس بشوية تغييرات في جسمك ، وزنك ابتدا يزيد مع ان أكلك زي ما هو ، بتتخني في مناطق غير اللي كنتي بتتخني فيها في العادي ، بتحسي ان جسمك زي ما يكون وارم أو بيخزن ميه ، وشك ابتدا شكله يتغير ، ...
- مودك بقي ملخبط بزيادة ، بتتعصبي بسرعة ، حاجات كتير مبقتش بتبسطك زي الأول ، خلقك بقي ضيق ، علي طول متوترة و قلقانة ، ...
- لو متجوزة ممكن تحسي ان انجذابك لجوزك و للعلاقة الحميمية بقي أقل من الأول ، و ده ممكن يسبب مشاكل بينكم أو يخلي عندك احساس بالذنب من ناحيته
- من أشهر المشاكل اللي بتعاني منها الستات في الفترة دي هي مشكلة معروفة ب "الهبات السخنة" ، و كأن الترموستات بتاع جسمك باظ ، شوية برد و شوية حر ، و كل ما الموضوع ده زاد ، كل ما القريفة و الزهق زادوا طبعا
- في ستات كتير برضو ، و خصوصا لو عندهم أولاد كبار ، بيحسوا انهم خلاص كبروا ، و زي ما يكون دورهم في الحياة و تربية الأولاد خلص خلاص و مبقاش حد محتاجهم زي الأول ، و ده ممكن يدخلهم في دور اكتئاب
- بس في بقي ستات تانية بتحاول في الأول تنطش و تكابر ، و كأن مفيش أي حاجة بتحصل ، و ممكن كمان تحاول تاخد شوية أعشاب أو فيتامينات ، كمحاولة منها انها تأخر الموضوع شوية ... بس طبعا ده مبيحلش المشكلة و ممكن كمان يزودها ، ساعتها بقي يا اما بينهاروا و يحاولوا يستخبوا و ينعزلوا من كسوفهم ، أو بالعكس ، يقضوها شكوي و تذمر طول الوقت ، و ده برضو بيخلي الناس تبعد عنهم عشان زهقوا منهم!
هو الموضوع كله في الأساس شوية تغيير في الهرمونات ، و ده بيعمل شوية لخبطة في الجسم لغاية ما يتعود علي الوضع الجديد ، بالظبط زي اللي بيحصل في مرحلة البلوغ عند المراهقين ... نفس اللخبطة بسبب التغييرات اللي بتحصل في الجسم ، و معاها القلق و التوتر و النفسية الملخبطة لحد ما الأمور تستقر
و دول شوية نصايح هيساعدوكي تعدي المرحلة دي بأقل خساير ممكنة :
- أول حاجة لازم نتابع مع دكتور عشان الهرمونات ، في دلوقتي علاجات كتير بتساعد في تخفيف الأعراض بتاعة الفترة دي ، بس ماينفعش تتاخد غير بمتابعة مع دكتور و تحاليل تتعمل كل فترة
- من أهم الحاجات اللي ممكن تساعدك كمان هي الرياضة ، أي نوع من الرياضة حتي لو شوية مشي بس يكون بانتظام ... الرياضة بتنشط الدورة الدموية ، و بتحسن المزاج ، و كمان هتساعدك عشان وزنك مايزيدش
- كمان برضو مهم تاخدي بالك من أكلك عشان معدل الحرق في الفترة دي بيكون أقل من العادي ، يعني حتي لو مزودتيش في الأكل ممكن برضو تتخني ... حاولي تزودي من أكل الخضار و الفاكهة و المكسرات (نية من غير تحميص) ، ده هيخلي صحتك عموما أحسن و هتبقي قللتي سعرات من غير ما تجوعي نفسك
- ممكن كمان تجربي أي هواية جديدة ، زي الموسيقي أو القراية أو الرسم ، أو أي حاجة مسلية و مفيدة تشغلي بيها وقتك ... ده هيساعدك عشان تطلعي الطاقة اللي جواكي ، و مش هيخلي عندك فراغ للقلق و التوتر
- و أهم حاجة انك تحاولي تتقبلي نفسك و التغييرات اللي بتحصلك ، لأنها مش نهاية الحياة بالنسبالك ... بالعكس ، دي السنين الجاية من عمرك هي اللي بيقولوا عليها السنين الذهبية

اكتبيلنا في كومنت و قوليلنا ايه أكتر حاجة بتخوفك من "الحياة بعد ال50" ؟!

22/07/2019

" العمر بيخلص و الشغل مش بيخلص ! "
هي الجملة ممكن تتاخد بأكتر من معني ، زي مثلا ان الحياة فيها حاجات كتير مهم تتعاش ، و ان الشباب اللي لسه في أول حياتهم مش لازم يضيعوا عمرهم في الشغل ...
بس يا تري فعلا اللي بيقضي معظم وقته في الشغل يبقي بيضيع عمره ، ما هو في ناس بتحب شغلها أوي و بتبقي مبسوطة بيه حتي لو كان متعب ... لكن الحقيقة ان دول النسبة القليلة من الناس ، يعني العادي انك لما تسأل أي حد عن شغله يقولك ما هو مفيش شغل مافيهوش مشاكل و ان الواحد لازم يشقي عشان لقمة العيش
طيب الفرق ده جاي منين ، يعني ليه في ناس بتتعب في شغلها و هي راضية و مبسوطة ، و ناس تانية شايفة الموضوع عادي ، و في كمان ناس حاسة ان عمرها بيضيع في الشغل ؟!
لو حاسس ان شغلك بيضغط عليك و بتسأل نفسك يا تري الموضوع مستاهل كل اللي أنا بعمله في نفسي ده ، ركز معانا كده ف اللي جاي :
- من أكبر المشاكل اللي بتواجه الناس في شغلها هي عدم التقدير ، احساس ان تعبك مش متقدر كفاية ، أو مش متقدر خالص ... و التقدير ده ليه أشكال كتير ، تقدير مادي (مرتب مناسب ، مكافات و حوافز ، زيادة سنوية ) ، و تقدير معنوي ( من رؤسائك و زمايلك و العملاء و حتي ممكن من عيلتك و صحابك )
- في كمان مشكلة تانية هي احساس بالقلق من المستقبل ، يعني تبقي حاسس انك مش بتاخد خبرات جديدة ولا بتتعلم حاجة ، حاسس انك مش بتكبر في مكانك ده و كل الأيام بقت شبه بعضها ، مفيش أي تحديات ولا أهداف مطلوب منك تحققها ... ده بيجيب احساس بالملل و كمان بيخليك تخاف من بكرا
- و ممكن برضو يبقي العكس تماما ، يبقي شغلك كله تحديات و مطلوب منك أهداف كتير تحققها في وقت قصير ، و طبعا بتضغط علي نفسك عشان تحققها ، وأحيانا كمان مش بتقدر تخلص كل حاجة ، و ساعتها مديرك يضغط عليك عشان تخلص اللي مطلوب منك ، و تحتاج مثلا انك تاخد الشغل تخلصه في البيت أو تقضي وقت اضافي في الشغل عشان تخلص ، و ده طبعا متاخد من وقت الراحة بتاعك ، و مع الوقت صحتك بتتعب ، و هلم جرا ...
- ضيف علي كده انك ممكن تكون مش حابب الشغلانة ولا طايقها ، بس مضطر تفضل فيها لأن مرتبها كويس ، أو لأن عليك التزامات و خايف متلاقيش فرصة شغل تانية ، أو خايف لو سبتها تبقي عاطل و تعاني من الفراغ ، أو أي أسباب تانية تخليك محبوس في شغلانة انت مش بتحبها
- لو واخد قرار انك تفضل في شغلك علي عيوبه ، أكيد بتحاول تلاقي طريقة للتأقلم مع الوضع ده ، حاجة تطلع فيها همك أو قلقلك بخصوص الشغل ، في ناس بتدخن ، و ناس بتفش غلها في الأكل ، و ناس بتبقي عصبية طول الوقت خصوصا في البيت ، يعني أي حاجة يطلعوا فيها غلبهم ...
طب ايه ، هتفضل جاي علي نفسك و مستحمل الوضع ده كتير ؟!
في خطوات ممكن تمشي عليها عشان توصل لحل يريحك بخصوص الشغل :
- أول حاجة لازم تقعد مع نفسك قعدة كده اسمها " قعدة اعادة التقييم " ، يعني تجيب ورقة و قلم كده و تكتب ، ايه المشاكل اللي بتواجهك في الشغل ، و ايه أسبابها ، طب هل المشاكل دي ليها حلول ولا لأ ... حط التفاصيل كلها علي الورقة قدامك عشان تفتكر انت فعلا وضعك ايه في الشغل ، لأن غالبا و انت بتدور الحكاية في دماغك مش بتشوف الصورة صح
- ممكن بعد شهر مثلا تعمل ورقة تانية و تقارن ، هل الدنيا لسه زي ما هي ولا في تغييير ، و التغيير ده للأحسن ولا للأسوأ ، و التغيير ده ايه أسبابه ، و ايه اللي ممكن تعمله عشان الوضع يبقي أحسن
- أيا كانت طبيعة شغلك لازم تحاول تعمل توازن ما بين شغلك و حياتك الشخصية ، يعني أكيد لو خدت بالك من صحتك ، و قضيت وقت كفاية مع الناس اللي بتحبهم ، و فضيت مساحة شخصية لنفسك و لهواياتك ، طبيعي ان ادائك في الشغل هيبقي أحسن
- حاول تخلي الشغل مساحة مريحة بالنسبالك ، يعني حاول تظبط مكتبك ، الكرسي اللي بتقعد عليه ، ممكن تحط عبارات مشجعة تبقي قدامك و انت بتشتغل ، حاول كمان تبقي اجتماعي مع زمايلك (بس بحدود) ، ممكن كمان تتناقشوا مع بعض في الحاجات اللي ممكن تساعد الكل عشان بيئة الشغل تبقي مريحة
- مهم جدا انك تبقي عارف كويس ايه هي مهام الوظيفة بتاعتك بالتحديد ، عشان متبقاش انت بتتعب و حد تاني هو اللي بيتقدر علي التعب ده ... جميل جدا ان الناس في الشغل تساعد و تشيل بعض ، بس خد بالك عشان متبقاش انت بس اللي بتشيل
- حاول كمان تدور علي حاجات تنمي بيها نفسك عشان تزود قدراتك و خبرتك ، زي دورات تدريبية ، كتب تقراها ، ناس عندهم خبرة تتناقش معاهم ... بلاش تستسلم للروتين و الملل لأن ده ممكن يموت فيك أي احساس بالحماسة و الشغف
- خليك دايما متابع و عينك علي الفرص المتاحة ، حتي لو انت مرتاح في شغلك أو مش ناوي تسيبه ، مهم انك تعرف ايه الجديد اللي بيحصل في سوق العمل عشان كمان تعرف حقوقك ... و لو يوم قررت تاخد الخطوة و تمشي لأي سبب ، متلاقيش نفسك في الشارع
- و اخيرا لو عندك حلم أو فكرة شغل كان نفسك تنفذها بس الظروف منعتك ، طلعها تاني و فكر فيها علي مهلك ، حاول كده ترسم و تخطط و تشوف ايه امكانية تنفيذها دلوقتي ، حتي لو بشكل مصغر جنب الوظيفة ، و ممكن تتناقش فيها مع حد عنده خبرة في المجال ده عشان تعرف أكتر ، و لو فعلا اخدت القرار بس مش عارف تبدأ منين ، ممكن تروح لحد متخصص عشان يساعدك تبتدي ... المهم انك ماتسيبش الفكرة تموت
اكتبلنا في كومنت عن أكبر مشكلة بتواجهك في الشغل ؟

20/07/2019

" واحد من كل خمسة أشخاص يعاني من متلازمة القولون العصبي "
هو فعلا واحد من أكتر الأمراض المنتشرة و المشهورة ، بس 20 % من الناس ، ده رقم فعلا كبير ... و الغريبة ان كل الأبحاث و الدراسات اللي اتعملت علي الموضوع ده ولا طلعت بأسباب محددة ولا علاج محدد ، كلها أعراض مختلفة و ليها شوية علاجات
لو انت واحد من ال 20 % دول ، غالبا عندك شوية من الأعراض دي :
- بيجيلك كتبر وجع في البطن ، و ساعات ممكن يسمع في الضهر أو الجنب ، مع انتفاخ و أحيانا غازات ، اسهال متكرر أو امساك مزمن ، ...
- في أكلات معينة بتتعبك بزيادة ، خصوصا الأكل التقيل و الوجبات السريعة ، بيحصلك بعدها عصر هضم ، و بتحتاج تاخد أدوية عشان تهضم
- لو بقالك مدة طويلة ممكن يكون حصلك نقص في المعادن أو الفيتامينات ، لأن سوء الهضم بيأثر علي امتصاص العناصر دي
- ممكن تكون رحت لدكتور و كشفت و عملت تحاليل ، بس كل اللي خدته شوية مسكنات أو مضادات التهاب ، و ممكن برضو أدوية ملينة ، و الدكتور قالك تعايش مع الوضع و خد العلاج و حاول تبعد عن التوتر
- بمناسبة التوتر ، غالبا حياتك فيها شوية مشاكل و بتتعصب كتير ، ما هو أكيد الموضوع ليه علاقة بالعصبية ما دام اسمه "قولون عصبي" ... و أكيد برضو لما بتتعصب بتتعب زيادة ، شيئ منطقي !
- ممكن بقي تكون مقضيها منك لنفسك ، في كام دوا بتستريح عليهم علي طول شايلهم معاك ، و بتحاول متلخبطش في الأكل علي قد ما تقدر ، بس مع كده برضو بتتعب كتير
طيب و الحل ، هنفضل كده تحت رحمة هذا القولون ، يتحكم فينا ناكل ايه و نعمل ايه و نتحرك علي مزاجه ؟!
في شوية نصايح ممكن تريحك كتير :
- أول حاجة لازم نظبط الأكل شوية ، حتي لو لفترة لحد ما القولون يهدا ، يعني بلاش دهون كتير في الأكل ، ولا توابل كتير ... حاول تتجنب الأصناف اللي بتتعبك لمدة اسبوعين أو تلاتة
- بعد كده هيكون قولونك هدي شوية ، ابتدي زودله خضار و فاكهة ، و أشرب ميه كتير ، عشان تظبط حركة الامعاء من جديد
- مهم جدا في الفترة دي انك لو متعود تاخد أدوية للقولون أو ملينات ، تحاول تقللها بالتدريج ، لغاية ما تبطلها خالص ... انت نفسك لو ظبطت أكلك مش هتبقي محتاجها زي الأول
- من الحاجات اللي هتساعدك كتير هي الرياضات الخفيفة ، حتي لو شوية مشي كل يوم بس بانتظام ... المشي بالذات من الحاجات اللي بتريح القولون جدا
- الأهم من كل ده حاول تغير مفهومك عن المشاكل ، حاول تواجهها و تحلها ، و لو في وضع معين بيتعبك حاول تغيره ، أو علي الأكل اتكلم عن مشاكلك مع حد بتثق فيه ، بدل ما تكتمها جواك و بعدين يرجع القولون يتعصب عليك !!!

شاركنا في كومنت و قولنا ايه أكتر أكلة بتتعبلك القولون ؟!

16/07/2019

السعادة عمرها ما بتيجي جاهزة كده مرة واحدة ، لكن بتتكون بناء علي تصرفاتنا كل يوم 😀

15/07/2019

الشفاء مش معناه ان الضرر يبقي كأنه محصلش ، لكن معناه ان الضرر خلاص مبقاش بيتحكم في حياتنا 💪

Dr. Nervana Adel

07/08/2019

27/07/2019

24/07/2019

22/07/2019

20/07/2019

16/07/2019

15/07/2019

Address

Telephone

Website

Alerts

Contact The Practice

Shortcuts

Share

Category