Teddy bear, kids care

25/10/2019

27/05/2019

معلومة علي الماشي

27/05/2019

هنتكلم في البوست ده عن موضوع مهم جدا لكل ام جديده ⬅️⬅️الرضاعة الطبيعية
دي اكتر الأسئلة الي ممكن تيجي في بال اي ام جديدة عن الرضاعة الطبيعية و معظم المشاكل الي ممكن تواجهها و الإجابة عليها

❓س: ما هي فوائد الرضاعة الطبيعية للأمهات؟
• تخسيس الوزن: لان الرضاعة الطبيعية بتزود عملية الحرق في الجسم
• تقليل مخاطر سرطان الث*ي أو سرطان الرحم وكمان هشاشة العظام بعد انقطاع الطمث.
❓س: كم مرة رضاعة في اليوم؟
عدد المرات ما بين ٨ إلى ١٢ مرة يوميا ده لان لبن الرضاعة الطبيعية أسهل وأسرع فطبيعي الطفل يجوع أسرع و مع الشهر الثالث، ممكن تقل عدد المرات لتتراوح ما بين ٦ إلى ٨ مرات
❓س: اد ايه مدة كل مرة رضاعة؟
•مدة الرضاعة عموما لحديثي الولادة حوالي ٢٠ دقيقة لكل ث*ي ولكن تختلف المدة من أم لأخرى حسب مجموعة عوامل هي كمية اللبن وسرعة ضخ اللبن وسرعة تدفق اللبن وقدرة الرضيع على إلصاق فمه بالحلمة
❓س: ازاي أعرف أن ابني يشبع من الرضاعة؟
• راقبي وزنه مع الطبيب. فالرضع لازم يزيدوا في الوزن أسبوعيا.
• دايما الطفل لما بيشبع بينام
❓س: ابني بيرضع وقت قليل اوي و ينام و مش بيكمل رضاعة !!
ده بيكون تأثير هرمونات الرضاعة المهدئة عليه و في الحالة دي لازم نصحيه عشان يكمل و ينام شبعان
❓س : ابني عنده استعداد يفضّل يرضع طول اليوم هل ده طبيعي ؟
اه طبيعي في اول ٣ شهور تخيلي كده انك مطلوب منك تضاعفي وزنك ف مده لا تزيد عن ٦ شهور فبديهي عقلك هيكون شغله الشاغل انه يأكل و ينام و ينام و يأكل و بس
❓س: انا لبني خفيف و ابني مش بيشبع و بيعيط علي طول !
خلينا متفقين ان مفيش حاجة اصلا اسمها لبني خفيف .. اللبن بيكون معظمه ميه في اول الوضع و في نهايه الرضعه بيبدأ اللبن التقيل الي بدوره بيشبع الطفل
تاني حاجة في مليون سبب يخلي الطفل يعيط غير انه جعان
❓س: ابني بعد كل رضعة بيرجع معني كده انه مش بيستفيد باللبن الي بيرضعه؟
معظم الاطفال بيبقي عندهم ارتجاع لغايه سن ٣ ل ٦ شهور و في اطفال بيطول معاهم اكتر من كده شويه ،، الفيصل في الموضوع ده هو وزن الطفل طالما وزنه بيزيد بالمعدل الطبيعي يبقي خلاص الي بيرجعه ده زايد عن احتياجه
الصورة بتوضح اغلب الوضعيات الي ممكن الام ترضع بيها ابنها

27/05/2019

ممنوعات قبل سن سنة

06/01/2019

شائعات و مفاهيم غلط تخص الرضاعة الطبيعية
احنا اكيد متفقين ان الرضاعة الطبيعية لا غني عنها و ان ليها فوائد كتير للام و الطفل
البوست ده مخصص للمفاهيم الغلط المنتشرة حول الرضاعة الطبيعية و منها::
❌الرضاعة بتزودالوزن للام ::
✅الحقيقه ان العكس تماما هو الي بيحصل لان الرضاعة بتساعد الجسم انه يحرق سعرات حرارية اكتر بتوصل من ٣٠٠ ل ٥٠٠ سعر حراري ف اليوم
❌الرضاعة الطبيعية متنفعش في حالات القئ او الإسهال للرضيع ::
✅ الحقيقه ان افضل شئ يمكن ان يتناوله الطفل الرضيع عند تعرضه لقئ او إسهال هو حليب الام و بالعكس دي من اهم فوائد الرضاعة الطبيعية واى اعتقاد ان حليب الام لايصلح فى حالات القئ والاسهال وانه يزيد من حدتهم هو اعتقاد خاطئ لااساس له من الصحة .
❌لبن الام مش كفايه و الاحسن ندخل معاه صناعي ::
✅الحقيقة ان لبن الام كافي جدا بكل مكوناته خلال الست اشهر الأولي من عمر الطفل و بعدها نبدأ ندخل اطعمة اخري لكن مش لبن صناعي مع الطبيعي
❌الام الحامل لازم تفطم ابنها لان لبنها يصبح فاسد ::
✅مفيش إثبات علمي للكلام ده فَلَو الام قادره تقدر تكمل رضاعة مفيش مشكله طبية ولا علي الام ولا الطفل.
❌الطفل الي بيرضع و هو نايم ودنه بتلتهب::
✅الكلام ده مع الرضاعة الطبيعية مش صح لان نسب التهاب الأذن للأطفال ف الرضاعة الطبيعية اقل جدا من الرضاعة الصناعي .
❌الام الي بترضع متقدرش تصوم ::
✅الحقيقة ان الإفطار رخصة فعلا في حالة الرضاعة ده لو الام مش هتقدر تصوم او حست ان في ضرر عليها او علي طفلها من الصيام لكن الفطار مش اجباري
❌الام لو جاله برد او كحة لازم توقف رضاعة ::
✅لا طبعا مش صح لكن تكمل رضاعة عادي و تبعد نفسها او تلبس ماسك بس عشان الطفل ميتعديش مش اكتر من كده
❌الام الي عاملة عمليه في ث*يها مينفعش ترضع::
✅كمان ده كلام مش صح لكن طالما التحاليل الدورية بتثبت زوال سبب العمليه و ان مفيش اي خلايا سرطانية ترضع عادي جدا ..

ده كان معظم الكلام الغلط الي بتسمعه اي ام جديده عن الرضاعة الطبيعية
و اكيد الأمومة مش سهلة بس مستاهله

18/11/2018

👇👇

**لتقويه مناعه الاطفال**👶👶

*نبتدى بالأكل:-📋

**الجوافه والبرتقال والليمون والكيوي .مليانين فيتامين c
**الموز :- مليان ماغنيسيوم ب
**الطماطم:- .فيها(ليكوبين) ودي ماده مضاده للاكسده وبتساعد علي تقوية المناعه
**السوايل الدافيه زي اليانسون والنعناع والتيليو و شوربة الفراخ
** عسل النحل من سن سنة
**فيتامين c نقط ٥ نقط مره ف اليوم (سيفيلين)
**البروكلى ممتاز مضاد للاكسدة
**المكسرات بتنشط الجهاز المناعى بس تكون مطحونة ووسط اكل

**نصايح عامة:- 📖📖

**هوي البيت وافتحي الشبابيك 🏡
**غسل اليدين علي الاقل لمدة ١٥ ثانيه بصفة دوريه ع مدار اليوم
**ابعدي كل الالعاب القطنيه عن اولادك ( الفيروسات عايشه ومتقوقعه فيها كمان)
**استخدمي مطهرات في غسيل ارضيات البيت
**علمي ابنك لما يعطس او يكح يستخدم مناديل عشان العدوى ونفس السلوك لما حد يعطس قدامه
**التدخين السلبي مافيش مدخن فالبيت حتى لو فالبلكونة بيدخل بالدخان للطفل فى هدومه ونفسه
**افصلي الطفل اللي تعبان عن اخواته

💊الأدوية بقى؛-

1.-برونكوفاكسوم أكياس من عمر 6 شهور بندى كيس على مية او عصير مرة يوميا لمدة 10 أيام ونريح 20 يوم وندى 10 لمدة 3 شهور من كل سنة حيفرق كتير فمناعة الطفل

2-أميوجارد
دة نفس مكونات لبن السرسوب اللى بينزل للبيبي اول مايتولد عشان يحصنه علبال ما جهازه المناعى يشتغل بيتكون من ايه:-
( الإميو نجلوبيولين و اللكتوفرين و البروتين متعدد الجزيئات والليمفوكينز و الإنترفيرون والإنترليوكنز)
**الجرعة:-
من 6 شهور لسنتين:-
كيس على 50 مل مية فاترة كانت اتغلت وبردت على الريق أو على الاقل قبل الاكل بنص ساعة او بعد الاكل بنص ساعة (لمدة أسبوع)
من سنتين ل 6 سنوات:-
كيسين على100 مل مية فاترة كانت اتغلت وبردت على الريق أو على الاقل قبل الاكل بنص ساعة او بعد الاكل بنص ساعة (لمدة أسبوع)
دة لو وقاية ولتنشيط الجهاز المناعى أما لو الكحة أو البرد موجود والجرعة علاجية بتكون لمدة أسبوع

03/11/2018

ناخد بالنا ⬅️⬅️
الفاكهه الي بتقدمها للطفل
طبعا الافضل ان الطفل ياخد ثمرة الفاكهة زي ما هي يأكلها علي بعضها و لو قشرها بيتاكل يبقي ياكله منقشرهاش 🍎🍐🍏
لو فاكهه زي الجوافة بم ان ده الموسم بتاعها لو الطفل اكل لحمها بس يجيله إسهال و لو أمل البذر بس يجيله إمساك يبقي الصح انه يأكلها كلها علي بعض و ده طبعا عكس الي معظم الأمهات فاكراه ان بذر الجوافة غلط علي قولون الطفل
طيب نيجي لنقطه مهمه جدا 🛎🛎
يبقي نفهم من كده ان كل ما قربنا من الشكل الطبيعي و التكوين الي ربنا خلقه لثمرة الفاكهه او الخضار ده كان أفضل و اصح
نفرض حبينا نعمل عصير و أضفنا لبن ايه الي بيحصل؟؟؟
لو الفاكهه فيها اوكسالات زي الجوافة و المانجو و الفراولة و البرتقال
ساعتها الاوكسالات هتتحد مع الكالسيوم الي في اللبن و تمنع امتصاصه يعني الطفل مش هيستفيد بيه و ثانيا لو الطفل جسمه عنده استعداد لتكوين حصوات ساعتها هيتكون عنده حصوات اوكسالات كالسيوم
يعني اضطرينا نعمل عصيرللطفل يبقي ساده بالميه مش باللبن ❌🥛

29/10/2018

كتير من الأمهات بيقضي وقت طويل في اول سنة من عمر البيبي في محاولة انها تنيمه و تهديه و تبدأ في سلسلة النصائح التي لاتنتهي
ومن أشهر النصايح هي سيبيه يعيط في سريريه لغايه ما هيتعب و ينام لوحده من غير ما تروحيله ولا تحاولي تهديه و هنا يبدأ الطفل في البكاء و الصراخ فتره بعدها يهدأ و يستسلم و ينام
في آراء كتير مختلفة حول الطريقة دي فبعض الأمهار شايف ان دي طريقه صحيحة و بتعويدهم علي النوم لوحدهم ولكن على الجانب الآخر أشارت بعض الدراسات الحديثة إلى إن الطريقة دي تؤثر سلبًا على الحالة النفسية للطفل وشخصيته في المستقبل.
و من الاسباب الي ذكرتها الدراسات تثبت خطأ ترك الطفل يبكي بدون تدخل ::
ان الطفل يولد و ميعرفش طريقة للتعبير عن احتياجاته غير البكاء، هو لا يبكي لمجرد إزعاج المحيطين به، بل إنه يحاول التواصل معهم بطريقته الخاصة، وهنا يأتي دور الأم في محاولة معرفة سبب بكاء طفلها وتلبية رغباته، وفي كل مرة تستجيب الأم لنداء طفلها تتشكل داخله الثقة تجاه أمه التي تُعتبر العالم بالنسبة له.
في حالة لو الام تركت الطفل يبكي دون محاولة تهدئته، فده يوصله إشارة بأنكِ تتجاهلي احتياجاته، و تكرار هذا الأمر نتيجته بتكون هز ثقته بالعالم المحيط به وليس بأمه فقط، ولما بيبطل بكاء، بيكون نتيجة انت تعب او حس بالإجهاد من كتر الصراخ أو لمعرفته بأن مفيش حد هيتواصل معاه و يلبي احتياجاته فليكس باليأس و ينام
وتوصلت بعض الدراسات الحديثة إلى أن ترك الطفل الرضيع يبكي لفترات طويلة يؤدي إلى إفراز هرمون الكورتيزول في جسمه، ما يعمل على انخفاض مستويات هرمونات النمو، ويؤثر سلبًا على النمو السليم للطفل ويعيق تطور الأنسجة العصبية
هل في طرق لمحاوله تنويم الطفل بدون بكاء؟
يحتاج الأطفال الرضع إلى روتين ونمط ثابت لمساعدتهم على النوم، اختاري نمط ليلي و روتين ثابت مريح لكِ ولطفلكِ، والتزمي بتطبيقه كل يوم في الساعة المحددة للنوم، زي تهدئة الإضاءة في الغرفة ثم حمام دافئ لطفلكِ، مع تدليك جسم الطفل بالزيوت التي تساعد على الاسترخاء مثل زيت اللافندر،مع إرضاعه حتى ينام .
في البداية بيكون الموضوع مجهد ى بياخد وقت طويل لغايه ما الطفل يغير عادت نومه ولكن بعد الانتظام في الروتين هيتعود جسمه عليه وتنضبط ساعته البيولوجية، وأوتوماتيك هيفلبه النوم في الوقت الي بيتكرر فيه الروتين اليومي

24/10/2018

يا دكتور ابني ركبته وجعاه 🤷‍♀️
شكوي متكررة في العيادة
و للاسف من اكتر الأخطاء الطبية
هو كميه الاطفال اللي الدكاتره بتكتبلها حقنة البنسلين طويل المفعول شهريا بحجه الحمايه من الحمي الروماتيزميه ... الحقن دي ماساه لانها مؤلمه جدا ومعظم الاطفال اللي بتاخدها.... بتاخدها علي الفاضي وبتكون حالتهم مش مستدعيه
الاول نعرف ايه هي الحمي الروماتيزمية و ازاي بنشخصها ::
الحمي الروماتيزميه هي مرض ليه معايير عالميه حطها العلماء ويحدث نتيجه تكرار الاصابه بالميكروب السبحي اللي بيسبب اللوز عند نسبه كبيره من الاطفال علشان نشخص المرض ده لازم تنطبق والمعايير دي ⬅️⬅️⬅️

اول حاجه المعايير الاساسيه زي :

1- التهاب المفاصل في اكتر من مفصل بالترتيب زي مفصل الركبه والكوع والفخد اللي بييجوا ورا بعض وبيتنقل الالتهاب من مفصل للتاني ... والتهاب المفصل ده يعني ورم جامد في المفصل وعدم قدره علي تحريكه او لمسه بمعني الكلمه ويقعد كده ايام ..يعني مش اي وجع في المفاصل و شويه همدان نتيجة السخونية نقول حمي روماتيزمية و نجري ندي بنسلين

2- التهاب القلب: وده التهاب مش هزار يعني مصيبه كبيره وسخونيه عنيفه ونهجان وظهور اصوات علي القلب بالسماعه وعدم قدره علي المجهود ولخبطه في ضربات القلب ودي اللي بيشخصها الدكتور وغالبنا بتحتاج اشعه تلفزيونيه علي القلب وغالبا بتحتاج حجز في المستشفي...

3- ظهور كتل تحت الجلد : كتل صلبه مبتوجعش وتظهر حوالين المفاصل وبالذات الكوع والركبه وبتقعد ايام وممكن اسابيع

4- طفح جلدي بس له طابع خاص يظهر ببطش كبيره باهته في النصف ويروح علطول ويظهر في مكان تاني وهكذا وبتيجي في الظهر والبطن بالذات وعلي الذراعين

5- حركات لا اراديه نتيجه التهاب المخ : ودي بقي التقيله تلاقي الواد مش علي بعضه وايده ورجليه شغاله حركات ميقدرش يمنعها وبيكون فايق عادي وبتبان اوي علي اللسان لما يطلعه من بقه يقعد يلعب وميقدرش يوقفه وحركات تانيه كتير مميزه وبتتشخص اكتر بواسطه الدكتور.

ثاني حاجه المعايير غير الاساسية ودي حاجات بسيطه وبعضها بيتعمل في المعمل زي :

1- السخونيه
2- الم المفاصل .. اللي هو بيحصل نتيجه الهمدان والسخونيه
3- ارتفاع نسبة تحليل سرعة الترسيب ومعامل العدوي CRPونسبه كرات الدم البيضا وكل ده بيتعمل في المعمل.
.. كده عرفنا المعايير تخيل بقه علشان نشخص الحمي الروماتيزميه صح زي ما العلما قالوا لازم يتوفر اتنين معيار اساسي او معيار اساسي واحد واتنين معيار غير اساسي ...مش بس كده لا ده كمان مع توافر المعايير السابقه لازم يكون في يا اما الميكروب السبحي عالي (ASOT) او مسحه حديثه من الحلق طالع فيها الميكروب السبحي positive .

كل ده لازم يتوفر علشان نشخص الحمي الروماتيزميه وبعدها نكتب البنسلين طويل المفعول
امال ايه المطلوب لو طلع معامل الميكروب السبحي عالي ?? كل المطلوب اننا نقضي علي الميكروب باننا ناخد مضاد حيوي 10 ايام من مجموعه البنسلينات زي الاوجمنتين والهايبيوتيك او 3 ايام من مجموعه الماكروليد زي الزيسروماكس

- ويا ريت اي طفل مصاب بالتهاب الحلق ياخد العلاج مظبوط والمضاد الحيوي يكون شرب عادي مش لازم حقن بس ياخد الفتره المظبوطه وهي 10 ايام للقضاء علي الميكروب السبحي وساعتها التهاب الحلق مش هيتكرر كتير زي ما بيحصل ان كل اسبوع ابنك حلقه يلتهب وهتبقي صحته كويسه جدا ✌✌✌

14/10/2018

حساسية الأنف والصدر🤧

مع بداية فصل الخريف و معاه بداية موسم الدراسه تبدأ معاه الشكوي المتكررة من الرشح و الخنفره الي مش بتخف و بعدها تبدأ الكحة المزمنة و ساعات توصل لضيق في التنفس و نوبات حساسية صدر مع اهمال العلاج او العلاج بطريقة غلط هنتكلم عن أسباب الحساسية و ازاي نتجنبها و نقلل النوبات و. بالتالي تجنب المضاعفات

مسببات ظهور حساسية الصدر:

١- الانفلونزا والتهابات الجهاز التنفسي العلوي
و دي اهم و اشهر الاسباب مع بداية دخول المدارس لأن نسب العدوى بتزيد. مش سهل طبعا الحد من انتشار العدوى بين الأطفال 😷
كمان من الاسباب المهمة حشرة الفراش
و لتجنب الحساسية ممكن ناخد شوية احتياطات:

• التنبيه على الامهات و الآباء ان ابنهم لو مريض او عنده عدوي جهاز تنفسي يبقي يقعد من المدرسة عشان مينشرش العدوي بين زمايله.
• غسل الأيدين بانتظام.
• استخدام المناديل الورقية للتخلص من افرازات الأنف وكمان نعلم الطفل يحطها على فمه وهو بيكح 🤧
• تعليم الطفل عدم الاختلاط بالأطفال المصابة بالعدوى.دي كلها تعليمات لازم أن الطفل يعرفها .
• تطعيم الانفلونزا💉 بيفيد جدا الطفل المصاب بالحساسية وبيقلل من الأزمات التنفسية وتعرضه المستمر لأدوار الأنفلونزا ،،، و يبدأ يتاخد للأطفال فوق سن 6 شهور.

• نخلي الشبابيك والأبواب مقفولة كويس في الوقت ده من السنة
• في كمان أدوية بتقلل من نوبات الحساسية و بتزود مناعة
الجهاز التنفسي للطفل

⬅️طرق الوقاية منها:

• إزالة جميع ألعاب الأطفال من سرير الطفل
• غسل فرش السرير في درجة حرارة أكثر من ٦٠ درجة مئوية أسبوعيًا
• تنضيف حجرة الطفل بالمكنسة الكهربائية بدل من الطرق التقليدية للكنس لان بدورها بتنشر الأتربة مع عدم تواجد الطفل داخل الغرفة وقت التنضيف

كمان من مسببات الحساسية داخل المنزل التعرض للأتربة والروائح النفاذة زي معطر الجو والعطور لأنها تحتوي على حبوب اللقاح التي تزيد فرص ظهور أعراض الحساسية.

و اخيرا لازم متنساش ان طول ما الأنف فيها رشح هيفضل صدر الطفل تعبان يبقي حساسية الأنف لازم السيطرة عليها بمحلول الملح باستمرار و ادويه حساسية الأنف و أهمها البخاخات الموضعيه و مفيش قلق منها و لا الطفل بيتعود عليها

09/10/2018

الانيميا عند الاطفال.📣📣
الأنيميا انواع كتير أسباب مختلفة لكن اهم نوع و أكثرهم انتشار هو أنيميا الحديد
عشان كده لازم نعرف اسبابها و طرق علاجها الي لازم يبدأ بمجرد التشخيص لان مجرد ما بدأت المضاعفات زي ضعف التركيز مثلا ساعتها العلاج مش هيحسن الحالة كتير .

▪الاسباب من ضمنها...

-قلة تناول الأطعمة التي تحتوي على عنصر الحديد.
-عدم قدرة الجسم على امتصاص الحديد.
-فقدان كمية كبيرة من الدم أثناء الدورة الشهرية في الفتيات.
-النمو السريع في فترة المراهقة.
-تناول الأطفال للبن البقري كبديل للبن الأم قبل بلوغهم سنة .
⬅️من اهم الأعراض :
-سرعة الإحساس بالتعب من اقل مجهود.
- شحوب الوجه والشفتين وأسفل العينين.
- ضيق التنفس وتسارع دقات القلب.
- بطء معدل نمو الطفل مقارنة بأقرانه.
- الدوار ودوخه والصداع.
- تشتت الذهن وعدم القدرة علي التركيز.
- تساقط الشعر عند البنات بكميات كبيره
- النوم الكثير .
-فقدان الشهيه ( فقدان الشهية يعمل أنيميا و الأنيميا تعمل فقدان الشهية و نفضل ندور في حلقة مفرغة )

⬅️▪علاج الأنيميا...
الاهتمام بالتغذية السليمه والتي تحتوي علي نسبه عاليه من الحديد ...

▪أطعمة غنيه جداً بالحديد من مصادر حيوانية و طبعا الحديد الي فيها بيكون امتصاصه عالي :
- الكبدة و اللحم الأحمر و الدجاج و الأسماك و البيض و الحليب.

▪أطعمة تحتوى على نسبة عالية من الحديد
-الفواكــــــــه مثل التفاح و التمر و العنب و الزبيب و المانجا.
-الخضراوات مثل الملوخية و السبانخ و الجرجيـــــر.
-البقوليـــــات مثل العدس و الفاصوليا و البازيلاء و الحمص.
-الحبــــوب مثل القمح و الشوفان و الذره

و أفضل حاجة ان مع كل وجبة غنية بالحديد ناخد معاها اطعمه تساعد علي امتصاص الحديد و يبقي ليه اكبر استفادة للجسم زي:
- فواكهه بها فيتامين سي مثل الجوافه والليمون والجريب فروت والبرتقال .
- خضروات مثل الباذنجان الفلفل الاخضر والطماطم .

❌❌من اهم النقاط كمان في حاجات لازم تتمنع لانها لل امتصاص الحديد زي :
-الشاي حتي لو عليه لبن لمدة لا تقل عن ساعتين بعد الوجبة
-الردة ( يعني الافضل ان الطفل يأكل الأطعمة الي فيها حديد بدون عيش )
-عدم الإفراط في تسوية الطعام

💉💉تاني خطوة ان الطفل ياخد حديد علي شكل دوا شراب لمده لا تقل عن ٣ شهور و نرجع نعيد التحليل لمتابعة نسبة الهيموجلوبين
و اخيرا طبعا الوقاية خير من العلاج و التغذية السليمة للطفل تبدا من مرحلة الرضاعة الطبيعية .