https://www.facebook.com/276176625868648/

Mataryaaaaat, Cairo (2025)

22/11/2025

كنا دكاتره امتياز مُغتربين في القاهرة في رمضان و اخدنا شقة في حدايق الزيتون و صاحبي يونس هو اللي بيطبخلنا ..
رجعت يوم قبل المغرب بشوية لقيت يونس عنده دور برد و راقد في السرير بس كان عادي نبقى ننزل بعد المغرب نجيب اي حاجة ناكلها بس اتفاجئنا بواحد صاحبنا اتزنق في عزومة لإتنين من قرايبه عندنا ..
المغرب فاضلله ربع ساعة و المحلات كلها قافلة و فيه 8 افراد في الشقة منهم اتنين ضيوف هيفطروا إيه!!
هوبّا استخدمت ذكائي الفطري🤣

و قولت ليونس انا عندي حل تعالى معايا...قالي هنعمل إيه؟
قولتله ثق فِيا بس...
في آخر شارعنا كان فيه مائدة رحمن .. يونس طبعا سابني و دخلت انا للراجل اللي ماسك المائدة

- ممكن كلمة على جنب يا حاج؟
= قاللي خير يا ابني قولتله احنا دكاترة مُغتربين جنبك هنا و اتورطنا في عزومة و اللي بيطبخلنا تعبان ممكن اجيبلك الحلل فاضية و أملاها من عندك دليفري و ناخدها نرجع بيها للي عازمينهم كإننا احنا اللي طابخينهم؟؟

- ايوة يابني تحت امرك مفيهاش حاجه
= فهمتني بذمتك؟
عيب عليك يابني فهمتك هو انا عبيط!!
- الله يكرمك يا حاج بس من غير شوشرة بالله عليك...

روحنا جيبنا الحلل و رجعنا طبعا يونس سابني وقالي هستناك أنا هنا و إتدّارى و انا دخلت عالراجل من بعيد شافني جاي
لاقيته بعلو صوته "وسّع للضُكتور يابني وسع للضُكتور...
لا ياحااااااج لاااا استرني ما يفضحك ربنا 😬🤣

لاقيت كل الناس بتبص عليا.. رجليا اتثبتت مكاني و حطيت حلة على وشي من الناحيه دي و حلة من الناحيه دي بداري وشي😄
لاقيته نزل من على المنصة و بيتاخر الناس في الطابور و بيشدني تعالى يا ضوكتور الضكتر جاي ياخد اكل للدكاترة من عندنا و هات الحلة آهو احلى رز لأحلى ضُكتر...
كفااااية ابوس إيدك ياحج ...كفاية إيه كفاية رز يا ضكتور؟

- لا كفاية يا ضوكتور دي...
= يا ضوكتر عيب عليك ..دانت لسة هتروح عند صلاح يا صلاااااح كتر لحمة للضُكتور يا صلاح ... لحمة حمرة للضُكتور يا صلاح..احنا تحت أمرك يا ضكتر عيب عليك.

لاقيت الشعب حواليا اتجمع و انا ماسك حلة في إيد و حلة في إيد و كل واحد بيحط التاتش بتاعته و لاقيت واحد ملالي ازازة شوربة و حطها تحت باطي و واحد ملالي ازازة تمر هندي تحت باطي التاني..😂
= دا احنا نخدمك بعينينا يا ضكتر .

خرجت لاقيت يونس ميت من الضحك و ماشي أدامي يضحك في الشارع يقول لكل حد يقابله وسع للضُكتور يابني 😂😂

وده كان شكل الضكتور 👇

15/11/2025

طفل دخل عندي الحضان بصفرا إتحجز يومين و بقى كويس كتبتله على خروج و متابعة بعد 3 أيام
الولد كان خارج كويس جدا و الصفرا نزلت بس كنا لاحظنا فى الحضانة بالفحص إن فى ناحية الخصية مش محسوسة غالبا خصية معلقة أو فى البطن ودا أمر وارد عادي يعني و مش طوارىء خالص وممكن تفصل فترة كبيرة كدا وكتبتلهم دا في كارت المتابعة وقلت هنبلغهم بيه لما يجولنا بعد 3 أيام في المتابعة ونعرضهم وقتها علي دكتور المسالك عشان يتابعوا معاه و منخضش الأهل وهما لسه مش ناقصين يعني

لقيت الأهل رجعوا بعد 3 ساعات من الخروج بالولد كان الوقت بليل متأخر عشان أمه قعدت تفتش فيه من فوق لتحت بعد خروجه من الحضان و لقت فى ناحية الخصية مش موجودة
فهمت الأب إن دى غالبا خصية معلقة هتحتاج إن الولد يتابع على طبيب مسالك و مفيش قلق و مش طوارىء خالص و غالبا مبتحتاجش أى تدخل و كنا ممكن عادى نستنى المتابعة بعد 3 أيام وأنا كتبلك كدا في التقرير اللي معاك أهو وهنعملكم اللازم ونعرفكم تعملوا إيه إن شاء الله لما تيجوا
الأب مكانش مصدق الكلام ده و مصمم إن الولد قبل ما يدخل الحضانة كانت الخصية موجودة و أنا مصدقه لانها لو خصية معلقة هتظهر و تختفى عادى و عمال أفهم فيه وهو اللى فى دماغه إننا سرقنا خصية الولد فى الحضانة

وجايب أهل البلد كلهم وقالهم الدكاتره سرقوا خصيه الواد عشان يبيعوها وكل واحد جاي سخنان بكلمه ويقول أنا شايفهم بيسرقوا الخصاوي ع النت
أقلهم ياجماعهم طب فرضاً أنا سرقتها فين مكان الجرح ؟
يقولك اكيد خطيتها بخيط سحري !

قلتلهم لأ إحنا نروح القسم بقى
بس لما فكرت لقيت إن أنا الخسران ، قضايا سرقة الاعضاء دلوقتى واخدة حجم كبير إعلاميا و الدكاترة بتتحبس و هى بتحاول تساعد المريض
المهم حولت الطفل لدكتور مسالك و قلت للأب هو هيفهمك الخصية راحت فين و قعدت منتظر قرار الضبط و الإحضار بتهمة تزعم خلية لسرقة خصاوي الأطفال 😥
بس الحمدلله الموضوع عدي علي خير ودكتور المسالك فهمهم بعد صعوبة ، كل اللي كان شاغل بالي وقتها هاقولهم إيه لما أدخل السجن ؟ جاي في خصية ! 😂
شفت منكو حجات تحير ..عيب عليكوا أنا مش صغير

15/11/2025

حاله النهارده طفل عمره 10 أيام مامته جايباه للإطمئنان عشان إصفر شويه بعد الولادة وطلع عنده نزيف علي المخ بسبب الاهل !

الصفرا اللي بتبدأ من بعد أول يوم دي إحنا بنسميها صفرا فسيولوجية ، بتبقي غالبا نتيجة إن البيبي مرضعش كويس أو كمية اللبن عند الأم قليلة .
بدأنا نفحص الطفل الفحص الروتيني بتاعنا ، الطفل مستوى الوعي عنده منخفض والرضاعه بتاعته سيئه جدا ومش مستجيب معانا للتنبيه والمؤشرات الحيويه بتاعته كلها نازله سواء تشبع الدم بالاكسجين أو النبض و ضغطه ودرجة حرارته قليله مع شحوب بالوجه وبرودة بالاطراف ملحوظة جدا ؛ يعني الموضوع بيدي إحتمال حاجه أكبر من الصفرا او الولد دخل في صدمه بسبب ميكروب بالدم مثلا لكن مبدئيا خلينا نحافظ علي حياته لحد ما يتم التشخيص الدقيق
بدأنا سريعا ندي أدويه الصدمة مع الأكسجين وأدوية معينه بتمنع هبوط الدوره الدموية ،الطفل إلى حد ما بدأ يفوق معانا وبدأنا رحلة البحث عن التشخيص وبعدها العلاج ، في الحالات اللي زي كده بنفكر في أسباب زي نقص في الصفائح الدموية أو نزيف داخلي او انيميا تكسيريه أو ارتفاع سيولة الدم نتيجة نقص عوامل التجلط في الدم وده بيكون غالبا في البيبيهات ناقصي النمو أو ممكن لأسباب وراثية ..

فحصنا الولد تاني وسألنا الأهل هل حصل نزيف من أي مكان أو الولد رجع دم مثلا او فيه تغيير في لون البول أو البراز ، والأهل اجابوا بالنفي ..
طلبت من الممرضة لما تغيرله البامبرز توريني الحمام بتاعه وللأسف زي ما توقعنا كان فيه دم كتير ف البراز ..
سحبنا للبيبي صوره دم و تحاليل كامله طلعت الانيميا وصلت نسبة الهيموجلوبين ل 6 مع ميكروب بالدم ..
بسرعة طلبنا للولد دم وبلازما عشان نصلح الأنيميا والميكروب اللي في دمه وبدأنا نفكر في السيناريو المحتمل الأسوأ (نزيف في المخ )

طلبنا اشعه مقطعيه على المخ وقبل ما الاهل يروحوا يعملوها الطفل بدأ يتشنج مع الأسف وده ييأكد بنسبة كبيرة احتمالية النزيف ودي فعلا كانت نتيجة الاشعه المقطعيه لما طلعت، بس بفضل ربنا إن النزيف مكانش واخد مساحه كبيره في المخ و بدانا نسأل نفسنا إيه اللي يخلي طفل في العمر دا يجي بنزيف في المخ اكيد موقعش من السطح مثلا ! ولو كان وقع من إيد أهله كانوا هيعرفونا وكانوا يجوا بيه جري في وقتها !!
المهم دلوقتي إن التشخيص تم تأكيده shaken baby syndrome أو" متلازمه الطفل المهزوز " نتيجه الغربله او الهشتكه العنيفه في عمر أيام دي المهم بدأنا نتحرك سريعا في اتجاهين أولا التعامل مع النزيف بحيث يبدأ حجمه يقل ، و ف نفس الوقت نصلح السيولة العاليه ف الدم عشان ميحصلش نزيف أكتر والطفل يمو.ت مننا فجأه .

بدأنا ندي للطفل محلول اسمه مانيتول وده بيستخدم للتعامل مع بعض حالات النزيف بالمخ وبيقلل حجمه ، في نفس الوقت اللي كنا بندي الدم والبلازما والمضادات الحيويه والمحاليل وعلاجات التشنجات وبنتابع العلامات الحيويه كل ساعة ..
بلغنا استشاري المخ والأعصاب وطلب نكمل على نفس البروتوكول اللي ماشيين عليه مع وضعه تحت الملاحظة المستمرة ..

الولد بعد 5 ايام معانا بدأ يستقر ، والتشنجات وقفت والانيما والسيولة اتصلحوا والعلامات الحيوية اتظبطت وبدأ الرضاعة والتنفس الطبيعي طلبنا اشعه مقطعيه جديده وبفضل الله مفيهاش حاجه ، وبعدها بيومين الأهل جم عشان يستلموه من الحضان
كان أول سؤال سألناه للأهل لما جم : انتوا عملتوله سبوع ؟
وبكل سرور وانشراح قالوا ايوه طبعا عملنا سبوع، ده أول طفل لينا ولازم نفرح بيه ..
وطبعا حطيتوه في الغربال وغربلتوه ؟
وبانشكاح أكبر من الاولاني : طبعا غربلناه عشان يطلع قلبه جامد !!

طيب يا جماعة اللي انتوا عملتوه ده أقذر حاجه ممكن تتعمل للبيبي اللي لسه مولود وده كان السبب إن الولد يحصل عنده تكسير في كرات الدم الحمرا والصفايح واحتمالات كبيره للنزيف ، من اخطرها نزيف المخ لأن البيبي بتبقى الأوعية الدموية للمخ عنده بتبقى هشه جدا وعرضه للتمزق والنزف بسهولة جدا ..وكان ممكن الولد ده يعيش باعاقه بدنيه أو ذهنية أو الاتنين مع بعض طول عمره بسبب الحركة دي ..
الشاهد من القصه : رجاء حار من الأهل بلاش تغربلوا ولادكم وهما
هيطلعوا إن شاء الله قلبهم جامد وحلوين وطعمين من غير غربله
شير للبوست للتوعيه عشان الناس تاخد بالها
حرفيا ممكن تمنعوا كارثه انها تتكرر مع طفل تاني

15/11/2025

عيان congested
Creatinine 10
فقررت تديله ٢٠ مج لازكس
ورحت تسمع صدره اخر اليوم

13/11/2025

من اسبوعين دخل حالة فالطوارئ بنت 21 سنة.. والدة من اقل من 48 ساعة قيصري، جاية ب غيبوبة درجة وعي 7/15، ضغط 70/40 اكسجين 33٪ ،نبض 190
المريضة عاملة اشعة علي الصدر ظاهرة التهاب رئوي عنيف جدا
المريضة دخلت الرعاية مباشرة.. زميل لينا استقبلها فور دخولها الرعاية اتوقفت عضلة القلب.. اشتغل عليها بسرعة جدا.. رجعت بعد حوالي دقيقة ونص اتحطت علي جهاز تنفس صناعي، ركب قسطرة وريدية عوضها محاليل وأدوية ترفع الضغط، حالة البنت كانت سيئة جدا جدا
اول ما شكينا فيه كان جلطة رئوية بعد الولادة
حالتها مكتتش تسمح ابدا بانها تعمل اشعة مقطعية علي الصدر بالصبغة للتشخيص.. ودا يعتبر اهم عامل في تشخيص جلطات الاوردة الرئوية
اعتمدنا عالتحاليل االي طلعت ان الD-dimer كان 15
الferritin كان 5 أضعاف معدلة الطبيعي
بدانا فورا ادوية سيولة ومضادات حيوية لان كان في التهاب رئوي قوي لانها شرقت بافرازاتها، كنا بنبات معاها فالاوضة ومقعدين تمريض كل دوره انه قاعد جنبها عالاجهزة
مكنتش في درجة وعي تحتاج مخدر انها تنام وهي علي جهاز التنفس الصناعي
كنا كلنا بنكلم بعض نتطمن عليها ونسال هي عاملة ايه ولو احتاجت حاجة نجيبهالها
جوزها وابوها وامها كانو هيتجننو عليها
بنتها اللي ولدتها مشافتهاش، اهتمينا معاها بكل تفصيلة.. بكل نقطة بكل حركة.. مكناش بنسيب فرصة لاحتمالية واحد فالمية لحاجة لدرجة ان ابوها قالي فمرة
يادكتور بنتي لو ماتت حتي انا هاجي اشكركو لاني معرفش انا عملت ايه ف حياتي يوقفلي ناس زيكو خصوصا د. عادل (اخصائي اليوم اللي استقبل الحالة).. البنت دي روحت النهاردة بيتها وهي شايلة بنتها علي دراعها
روحت بعد ما قلبها توقف دقيقة ونص
وكانت جاية بضغط شبه مش مسموع وجلطة فالرئة
روحت علشان تقعد مع بنتها لاول مرة ف بيتهم وتاخدها ف حضنها
المنظر والموقف دا مفيش حد فالدنيا ممكن يقدر يجازي حد ماديا بقدر الاحساس اللي حسيناه ساعتها.

13/11/2025

فقدت الإنسانية
وفقدت مصر
وفقدت جامعة الأزهر العريقة
وفقدت كلية طب الأزهرالعتيدة
و قسم القلب العظيم
عبقرية إنسانية
وقيمة أخلاقية وعلمية
د محمود الجبالي
لسه ما لحقش يفرح بالترقية لدرجة مدرس بعد نجاحه بتفوق
في الدكتوراة
علي مثل دكتور الجبالي فلتبك البواكي

12/11/2025

"يا دكتور… أنا بقيت بخاف أضحك!" 😢😢

الجملة دي قالها شاب في التلاتينات أول ما دخل عندي العيادة من ٣ شهور فاتت ...

استغربت، وسألته: "ليه؟"
قال وهو بيحاول يفتح بقه بالعافية:
"كل ما أضحك أو آكل حاجة سخنة، القُرح تولّع في بقي! بقت حياتي كلها وجع والله يا دكتور!"

تخيل شاب في عز شبابه... ضحكته بتوجعه! 💔
مشكلته كانت تبدو بسيطة: قُرح فم متكررة، لدرجة إنه بقى بيخاف ياكل أي حاجة سخنة، أو حتى يفتح بقه عشان ميتألمش.

كان باين عليه التعب، مش بس من القرح، لكن من اللف…
لف على دكاترة باطنة وجهاز هضمي وأسنان، وكل واحد قاله حاجة شكل ....

بيقول: "خدت مضادات حيوية، أدوية معدة، مضمضات… كل مرة أفتكر خلاص هرتاح والقُرح تبدأ تقل… ألاقي القُرح راجعة!"

قعدت أسمعه بهدوء، وأنا حاسس إن القصة دي فيها أكتر من مجرد قُرح فم.
اللي قدامي مش مريض عادي… ده لغز!
قُرح فم متكررة، ألم بعد الأكل، إسهال متكرر، إرهاق…
الخيوط بدأت تتشابك.

سألته كده فجأة سؤالين مهمين أوي بالنسبة لي في الوصول للتشخيص:
** "بتجيلك قرح في أماكن تانية في جسمك؟"
قال: "أيوه يا دكتور، ساعات تحت كمان، بس بتبقى بسيطة ومش بقول لحد!"

** "هل العين حصل فيها احمرار شديد أو وجع بدون سبب واضح الفترة اللي فاتت؟"
قال: "مرتين كده من غير سبب واضح!"

ساعتها حسّيت إن الصورة بتترسم قدامي بوضوح.
كل الأعراض دي بتقول بصوت واحد:
مرض بهجت – Behçet’s Disease.

قلتله بهدوء:
"بُص يا سيدي، اللي عندك ده مرض مناعي، يعني جهاز المناعة بدل ما يحميك… بيهاجمك!
وده اللي مسبب القُرح اللي في الفم و القُرح اللي بتيجي تحت، والإلتهابات في العين والجهاز الهضمي."

صدقني التشخيص ما بيجيش بالحظ،
لكن لما كل حاجة تركب في مكانها الصح.
قرح متكررة في الفم (٣ مرات أو أكتر في السنة)،
وقرح في الأعضاء التناسلية،
والتهاب في العين (Uveitis)،
وحبوب مؤلمة في الجلد،
واختبار بسيط بنعمله اسمه Pathergy test .

طلبتله تحاليل ESR وCRP، وطلعوا عاليين.
فحص العين أثبت التهاب قزحية.
تحاليل البراز والمنظار وضّحوا التهابات فعلاََ في الجهاز الهضمي.

الصورة كملت.
التشخيص: مرض بهجت.

العلاج بدأ بخطة دقيقة على مدار أسابيع.

وبعد أسابيع قليله، رجع نفس الشاب… لكن المرة دي كان مختلف.
وشه راجع له لونه، ابتسامته حقيقية،
وقاللي وهو بيضحك:
"يا دكتور… أول مرة أضحك من غير ما أتوجع!"

النهاية:
فيه مريض بيجيلك عايز دوا،
وفيه مريض بيجيلك عايز حد يشخصه صح ويفهم إيه بالضبط سبب معاناته.
والفرق بين الاتنين… هو اللي بيصنع الطب الحقيقي.

التحليل ممكن يقول رقم…
لكن السؤال الصح، والنظرة الصح، والتفكير المختلف،
همه اللي بيحولوا الحيرة لتشخيص، والمعاناة لراحة.
"الطب مش علاج وخلاص … الطب فهم."

12/11/2025

من اسبوعين روحت الصبح استلم الرعايه الدكتور اللي بيسلمني الرعايه قالي هسلمك حاله اغرب مما تخيل فاكر الحاله اللي كانت جايه arrest
واشتغلتوا عليها اكتر من نص ساعه ورجع وبقي كويس وروح بيته قولتله اه طبعا فاكر قالي اهو دي حاله اغرب وبدا يقولي التاريخ المرضي للمريض واللي ملخصه انه شاب في التلاتينات عنده مشاكل في صمامات القلب وتمدد في الشريان الاورطي ودخل عملية قلب مفتوح Bentall operation
وبعدها نزل الرعايه علي جهاز تنفس صناعي وبعد ما نزل بشويه حصل توقف في عضلة القلب في وجود استشاريين الحاله بسبب عدم انتظام في ضربات القلب arrested on VF
اشتغلوا عليه انعاش قلبي رئوي متقدم واستخدموا جهاز الصدمات اكتر من مره لعند ما المريض رجع تاني والقلب اشتغل تاني مفيش دقيقتين وحصل توقف تاني لعضلة القلب اشتغلو انعاش قلب تاني شويه ورجع نبض القلب تاني شويه جصل توقف تالت لعضلة القلب واشتغلوا ورجعت نبضات القلب تالت مره وفضلوا هكذا القلب يقف ويشتغلوا فالقلب يرجع وهكذا لاكثر من 45دقيقه لعند ما ف الاخر توقف القلب ويشتغلوا عليه ومرجعش تاني واستخدموا خلال الفتره دي جهاز الصدمات اكتر من عشر مرات ودا رقم كبير لكن في اخر مره خلاص القلب وقف مرجعش تاني ECG Flat line
هنا وقفوا إنعاش القلب معتبرين المريض توفي خلاص ووصلوا المريض علي جهاز التنفس تاني (ودا العادي اللي بنعمله لما المريض يتوفي بنسيبه علي جهاز التنفس الصناعي لمده قد تصل لساعتين )
بعدها بدقائق محدوده لقوا في ضربات للقلب علي المونيتور قالو يمكن PEA
PEA هي نبضات كاذبه يعني يظهر علي المونيتور نبضات للقلب بس القلب نفسه مش شغال وكنا شرحناها في بوست قبل كده
فالمهم لما لقوا نبضات قلب ع المونيتور قالو ممكن تكون PEA راحوا بيحسو النبض لقوه شغال وكويس اي في اي ؟ المريض رجع والنبض رجع ؟! اينعم المريض رجع والقلب رجع لوحده بعد ما وقفنا CPR
اينعم العلامات الحيويه مكانتش مستقره واتحط المريض علي دواعم لعضلة القلب وروافع لضغط الدم بجرعات كبيره جدا Maximum vasopressors support
لكن القلب رجع والمريض رجع ومحصلش توقف تاني لعضلة القلب
طبعا وعلي الرغم من اللي شوفته في عالم الحالات الحرجه من أمور وأحداث اعتبرها خارقه للعاده لكن برضو كنت بسمع وانا مذهول انا كنت متوقع بعد كل دا يقولي خلاص المريض مات لكن لا عايش وفايق وكمان فصلوه من التنفس الصاناعي ودا كله خلال 24 ساعه بس والمريض فاق ورجع لكامل وعيه نعم ؟! هنا انا قومت وروحت شوفت المريض بنفسي واوراقه وفعلا كل دا صحيح والمريض قدامي بساله ازيك اخبارك ايه بيرد عليا وعارف كل حاجه
مدير الرعايه وهو بيمر وبنحكي اللي حصل قال its a miracle وقالي يادكتور حسونه احنا شوفنا حالات كتيره جدا لو حكيتلك شويه منها هتقول علينا دراويش قولت لا محنا شوفنا عجب العجاب مع استاذنا الدكتور الالفي فمتقلقش لا وفعلا في حالات استاذنا كان بيقولي يا محمد لو طلعنا وقولناها للناس محدش هيصدق وهيقولو دي ناس بتخرف وقد كان 😅

وللناس اللي كانت بتسال المريض دا بعد ما رجع كان معاه
Fixed irreactive pupils to light with complete bilateral loss of corneal reflex ومرجعوش غير ع اخر اليوم عشان الناس تاخد بالها ان الحاجات دي
reversible if early the cause istreated
المهم انا فضلت متابع المريض لعند ما الحمدلله تم فصله من كل دواعم القلب وروافع الضغط( ودي كانت اخطر مرحله لان فصله كان صعب جدا )
والمريض قومته من سريره وخليته يتمشي معايا في الرعايه وبقي زي الفل وانا اللي خرجته من الرعايه وكتبتله اوراقه بايدي وفضل كويس لعند ما الحمد لله روح بيته بسلام وامان.

وانا بجهزه للخروج نادي عليا ومسك ايدي وقالي قرب شويه بعد اذنك فبقرب لقيته بيهم وبيشد ايدي فانا شديت ايدي قالي سيبها انا عاوز ابوس ايدك قولتله يعم العفو الله يكرمك احنا معملناش اي حاجه
وانا واقف باصصله كده وعمال اقول سبحان الله
(تَبَٰرَكَ ٱلَّذِي بِيَدِهِ ٱلۡمُلۡكُ وَهُوَ عَلَىٰ كُلِّ شَيۡءٖ قَدِيرٌ (1) ٱلَّذِي خَلَقَ ٱلۡمَوۡتَ وَٱلۡحَيَوٰةَ)
فسبحان الله لا يعجزه شيء
لكن فضلت شويه كده واقف عمال افكر في ايه ؟اي اللي حصل ؟طاب اي اللي رجعه؟ طاب رجع لوحده ازاي ؟ طاب اي في اي ؟

اسئله كتير ملهاش غير اجابه واحده وهي متسالش عشان هتتعب ومش هتلاقي اجابه ومش هتلاقي حل غير التسليم لامر الله واليقين بانك لا تعلم شيئا فجل ما نعرفه عن النفس البشريه وعن الموت وعن الحياة ضئيل جدا جدا لا يساوي ذرة في علم هذه الاشياء فالروح قد حجب الله علمها عن خلقه اجمعين واختص بها لنفسه
فالتفكير فيها فلن يفضيك الا حيرة وتشكيكا اما الايمان بها فلن يزيدك الا ثقة ويقينا
يقول الله تعالي
﴿ وَمَا كَانَ لِنَفْسٍ أَن تَمُوتَ إِلَّا بِإِذْنِ اللَّهِ كِتَابًا مُّؤَجَّلًا ۗ﴾
فلو كتب الله لنفس الحياة فسوف تنجو ولو اجتمعت كل اسباب موتها وهلاكها
وفي الاخر احب اشكر كل الطاقم الطبي اللي اشرف علي المهمه العظيمه دي تمريض واطباء وكل من ساهم في شفاء المريض وربنا يحفظ اهلنا اجمعين ولا أراكم الله مكروها في عزيز لديكم ❤️❤️

Mataryaaaaat

22/11/2025

15/11/2025

15/11/2025

15/11/2025

13/11/2025

13/11/2025

12/11/2025

12/11/2025

Address

Website

Alerts

Contact The Practice

Shortcuts

Share

Category