Psych Tube

08/12/2025

البدايات الجديدة بتحب النظافة
نظافة على المستوى النفسي
نظافة على المستوى المادى
نظافة على المستوى الروحى
كل ما فضيت مساحة هتستقبل اكتر

من ترك ملك فعلا

20/11/2025

لما بتقول إنك مش معندكش المؤهلات الكفاية عشان تعمل حاجة انت حاببها وعاوز تجربها
الحقيقة بتكون إنك خايف من المحاولة
خايف تقول خايف اجرب وافشل
فبستخبى جوة عباية الكمالية.
وتركب قطر التسويف وتستنى

خد خطوة دلوقتى وشوف الخوف وخده ف ايدك واتحرك بيه

واعمل اللى تقدر عليه وبس .

19/11/2025

14/10/2025

كنت فاكرة دايمًا إن اللى بيذاكر كتير، أو بيهتم بصحته،

أوبيطور من نفسه، دا شخص ناجح ومثالى ومتحكم ف حياته.
كنت بشوف نفسى ف الحتة دى، وبفتخر إنى دايمًا بسعى وبشتغل وبدى من قلبى.
بس اللى ماكنتش شايفاه إن ساعات “الحماس” اللى بيبان من بره...
بيكون جواه خوف كبير.

اكتشفت إن فى أيام كنت بذاكر بجنون مش عشان بحب المذاكرة،
لكن عشان بحاول أهرب من إحساس جوّاي بيقولى "إنتِ قليلة، ولازم تثبتى العكس".
وساعات التزامى بالتمرين والاكل الصح مش كان حب للحياة الصحية،
كان خوف من شكلى لو اتغير، أو من كلمة تتقال عليا.
وحتى الشغل بالساعات اللى الناس كانت بتشوفه "طموح"،
أنا كنت بشوفه طريقة أنسى بيها وجع جوايا مش عارفة أتعامل معاه.

فى وقتها ماكنتش واخدة بالى إن الخوف ممكن يلبس وش " #الإنجاز"،
وإنك تبان قوى من بره بس من جوه مرهق ومتوجع.

عشان كده بقيت أسأل نفسى دايمًا:
أنا عاملة كده ليه؟ الدافع حب ولا خوف؟

ولو هتسأل نفسك النهارده سؤال واحد بس،
اسألها كده بصدق:
"اللى بعمله دا نابع من حب ولا من خوف؟"
مابقتش بسأل نفسي انا بعمل ايه بقي السؤال الأصح انا عاملة ازاى
عاملة ازاى وانا بعمل دايت !
عاملة ازاى وانا بشتغل كتير !
السؤال لوحده نبهنى لاحتياجاتى الحقيقية

نبهنى انى اشحن طول الوقت قبل ما اشحط جاز واوقف
نبهنى وفكرنى بالنية اللى بنسىاها لما بناخد خطوات ونقابل تحديات .

احكولى ف الكومنتات 👇
إيه أكتر سلوك فى حياتكم اكتشفتوا إن وراه خوف مش حب؟
#الخوف

08/10/2025

عمرى ما كنت أتخيل إن كباية رز ممكن تكشفلى كل ده عن نفسى! 🍚

كنت من غير أكل طول اليوم، وجيت أطبخ وأنا جعانة.
وأنا بعاير مقدار الرز، لقيت صوتين بيتخانقوا جوايا 👂
صوت بيقولى:
زودى رز عشان تشبعى..
وصوت تانى بيهمس:
خليكى فاكرة إنك عاملة دايت وخدى بالك من نفسك.

مليت الكباية اللى متعودة عليها، ولقيت إيدى رايحة لوحدها على التانية 😅
سألت نفسى: ليه؟
وطلعت الإجابة من جوا جِسمى مش من عقلى —
خوف قديم... خوف إن اللى موجود ما يكفيش.
خوف من الندرة والمحدودية.
ساعتها وقفت.
ابتسمت للخوف، شكرته، وقلتله بهدوء:

أنا دلوقتى بأمان، والأكل كفاية ❤️
افتكرت الآية
إن هذا لرزقنا ما له من نفاذ
صدق الله العظيم
ما زودتش الرز.
والأجمل؟ الدايت ما باظش،
لكن اللى اتغير فعلاً إنّى سمعت بوضوح
وسمعت جِسمى بيقولى هو محتاج إيه بصدق.

كتبت كل ده فى نوتتى،
عشان أعرف أشتغل على جذور الخوف ده .

✨ من المرات اللى حسّيت فيها إن الوعى مش بس بيساعدنى أتحكم،
لكن كمان بيخلينى أتعامل مع نفسى بحب مش بعقاب.
💬 قولولى بقى،

إنتوا حصل معاكم قبل كده موقف بسيط،
اكتشفتوا من وراه خوف قديم جواكم؟

07/10/2025

بتسيب المذاكرة لليل الامتحان؟ وبترتاح بس لما تكون مزنوق 😬📚

أنا كنت زيك — مِستنية اتزنق عشان أبدأ. مذاكرة ليلة الامتحان كانت #عادة مؤلمة: #ضغط، نسيان، ذنب، ورجعنا نأجل لحد ما نتزنق تاني.
لحد ما دخلت جلسات ، واللي قلبت الدنيا معايا.
وهقولك مثال عملى حصل معايا فعلا قبل العلاج وبعده بقيت عاملة ازاى '
قبل: أستنى آخر لحظة، أبقى محشورة، أذاكر بسرعة من غير استمتاع، وأنام وأنا خايفة من النتيجة.

بعد: فهمت إن اللي بيخليني أأجل هو خوف مش #الكسل — خوف من #الفشل، من النقد، من إنى مش كفاية. لما طلعت المشاعر دي وسيبتها تتكلم، لقيت نفسي ببدأ قبل، وبقعد أذاكر أحسن، وبحس بمتعة حتى في الحاجات الجدّية.
إزّاي جلسات تحرير المشاعر ساعدتني أخلّي المذاكرة عادة ممتعة:

فهم أصل الخوف — مش مجرد “كسل”؛ خوف من النتيجة أو خوف من الحكم. لما تفهم الجذر بتقل حدة رد الفعل.
تقبّل المشاعر — بدل ما أحارب الخوف، اتعلمت أسمعه وأريح نفسي من الحكاية دي. الخوف أقل سيطرة لما تتعامل معاه.
تفريغ وشرح الأفكار — جلسة واحدة ممكن تخلي فكرة «أنا لازم أجيب امتياز ولا أنا فاشل» تتحول لعبارة واقعية زى انا هعمل كل اللى اقدر عليه.
إعادة بناء عادات صغيرة ممتعة — روتين 25 دقيقة مذاكرة + مكافأة صغيرة، ومش لازم يكون كله تربيح أو كلّه قلق.
انا مسؤولية عن #الجهد مش عن النتيجة — اتعلمت أخد مسؤوليتي في المذاكرة (أشتغل بضمير) بس ما أحملش نفسي نتيجة مش محسوبة طول الوقت. الحرية دي بتخلي المذاكرة أقل رهبة وأكتر متعة.
نتايج حسّيتها بنفسي:
بديت أذاكر باستمرار مش بس لما أتزنق.
حاجة اسمها تركيز وبقاء المعلومات بقيت أسهل.
وبالعكس، الخوف دلوقتي بيبقى مؤشر أقراه وبستغله بدل ما يخليني أتجمد.
لو حابب تخوض التجربة: سيبى كومنت "عايزة" وهنرد عليكى أو ابعتلنا DM على لحجز جلسة تعريفية.
لو عجبك البوست، شاركه مع حد دايمًا بيسيب المذاكرة لليلة الامتحان، وتاجي لشخص بتحبه عشان نكبر مجتمعنا الداعم. 💙

#مذاكرة #خوف #امتحانات
#انتاجية

07/10/2025

كنت فاكرة إني بخاف عشان بحافظ على نفسي

بس مع الوقت اكتشفت إن الخوف عمره ما بيحافظ.. الخوف بيحبسنا وجواه ويوهمنا اننا ف امان.
عملتها كتير قبل كده —
ما رحتش الامتحان عشان خايفة أسقط.
ما رديتش على حد عشان خايفة الناس تهاجمني.
سكت واتنازلت وجيت على نفسي عشان المركب تمشي.
ذاكرت عشان ما أسقطش، مش عشان بحب أتعلم.
اهتميت بصحتي عشان خايفة أتخن، مش عشان بحب نفسي.
اشتغلت واتحملت فوق طاقتي عشان خايفة أخسر الشغل، مش عشان حابة اللي بعمله.

كنت فاكرة إن عكس الخوف هو #الأمان..
بس الحقيقة؟ عكس #الخوف هو #الحب. 💛

الحب هو اللي بيخليني أذاكر لأني بحب أتعلم.
ألعب رياضة لأني بحب جسمي وبقدّره.
أنزل شغلي وأحاول أستمتع بيه بطريقتي، واخلق الحب من خلال تفاصيل زي إني أتعرض للشمس وأنا رايحة،
أتعامل مع ناس جديدة وأتعرف على نفسي أكتر من خلالهم.

بقيت لما أعمل أي حاجة، أسأل نفسي:
"أنا بعملها ليه؟
من #خوف ولا من #حب؟"

يمكن السؤال ده بسيط،
بس هو اللي بدأ يغيّر كل حاجة جوايا.

وانت؟
الحاجة اللي بتعملها اليومين دول…
بتعملها خوفًا ولا حبًا؟ 💭

05/10/2025

واحدة بتقولى😨

: "أنا #لازم أكون من الأوائل"
واحد بيقولى: " #الست لازم تقعد في البيت"
واحدة تانية: "لازم أجيب التلاجة الفلانية علشان الناس"
واحد بيقول: "لو ما جبتش النيش الجوازة مش هتتم!"
واحدة مصممة تعمل فرح ضخم عشان "مايصحش قدام عمّها و بنت خالتها"
واحد بيقول: "مديري لازم يعاملني بطريقة معينة وإلا هسيب الشغل"
واحدة بتزعل وتقول: "أنا اتقمصت عشان المفروض يعمل كذا"😮‍💨
كل "لازم" و"مفروض" وراها خوف مستخبي…
خوف من الشكل قدام الناس
خوف من #الرفض
خوف من #اللوم
خوف من إننا نبان مش كفاية

بس الحقيقة إن كلمة "لازم" واحدة من أخطر #التشوهات #المعرفية اللى بنعيش بيها.
بنخلق لأنفسنا قوانين مش بتاعتنا…
بنعيش على مقاييس ناس تانية مش على مقاييس قلوبنا.

جرب كده أول ما تلمح نفسك بتقول:
#المفروض أعمل كذا"
"لازم أتصرف كده"
اسأل نفسك:
مين قال؟
هو المجتمع؟ الناس؟
طب هو الناس اجتمعوا على إيه أصلًا؟
وانت؟
ظروفك سامحة بإيه؟
ونفسك بتحب إيه؟

💭
يمكن لما تبتدي تجاوب، تكتشف إنك كنت بتعيش بمنهجية خوف مش منهجية حب.


إيه أكتر "لازم" أو "مفروض" اكتشفت إنها كانت خوف مش حقيقة؟