28/05/2020
صباح الخير
الكلام اللي هقوله ده مش بغرد التجاره, ده كلام علمي من دكتور للناس كلها مش لفئه معينه, عشان كله يبقي فاهم و محدش يضحك عليه
* الكلام هيكون الاول باسلوب علمي عشان نفهم الغرض الاساسي من الماسك طبيا و عليه نقدر نقرر اذا كان النوع اللي معاك ده ليه لازمه و لا بندفع فلوس علي الفاضي.
- مبدايا كده و بسم الله اول و اهم حاجه في الماسك انه يعمل seal و ده معناه بالعربي انه يمنع دخول او خروج اي جزيئات هوا الا من خلاله, يعني ميدخلكش هوا من جنب خدك او من تحت دانك او من بين جوانب الانف , و ان كل الهوا اللي داخل جهازك التنفسي لازم يمر علي الماسك و يتفلتر قبل ميوصل صدرك, و الماسك اللي مش بيعمل كده ده عيب فيه (اللي هوا معظم النوع اللي بنستخدمه).
- النقطه التانيه في الماسك هو نوع الفلتر اللي فيه, الفلتر هوا اللي بيمنع مرور جزيئات الفيروس او البكتريا من خلاله و هنتكلم عن طبيعه الفيرس في نقطه تانيه لاحقا و ده حاجه عشان اكون صادق معاك صعب انك تعرف تفرق بينهم الا لو انت جايبه من شركه اجنبيه ليها اسم زي 3m و هيا كاتبه علي منتجها نوع الفلتر >>>>>انواع الفلاتر اللي ليها لازمه باختصار هما p2 و ده بيفلتر 95% من جزيئات الهوا اللي بتعدي من خلاله و بينزل من شركه 3m باسم n95 و المفروض ان ده هوا الي موجود في الفلتر اللي بيتصنع في مصر في المصانع الي واخده توكيل ..و الفلتر التاني هو ال p3 و ده بيفلتر 99.97% و ده طبعا مش بيتصنع في مصر لانه مش بيكون في صوره ماسك بيكون respirator و ده مش عملي الا للداكتره اللي بتتعامل مباشره مع المرضي زي دكاتره الاسنان.
- نتكلم بقي عن الماسكات الموجوده في السوق و ازاي نفرق بينهم
الماسك اللي موجود معانا كلنا ده اسمه ماسك جراجي (باختلاف لونه اخضر او ازرق).. ايه بقي الكلام اللي بييقوله اي تاجر بييع ماسك لسيادتك ....
يعني ايه 3 طبقات, يعني انت لو قطعت الماسك هتلاقي الطبقه الخارجيه الي بتكون ناحيه الوجه لونها ابيض و الطبقه الخارجيه بتكون ملونه و في طبقه في النص اللي هيا الفلتر اللي هوا الجزء الاهم, و انت مهما كنت خبير مش هتعرف نوع الفلتر ايه, و لا حتي باختبار المايه اللي بقي مشهور دلوقتي , انك لو حطيت في الفلتر مايه مش هتنقط من الناحيه التانيه, المفروض ان ده كده دليل علي الجوده يعني؟؟؟؟
يعني ايه ماسك بدعامه.... الدعامه دي يقصد بيها القطعه المعدنيه او البلاستيكيه اللي بتكون موجوده جوا الماسك و دي وظيفتها انها تاخد شكل الانف و تقفل الماسك عليه فتمنع مرور الهوا من جوانب الانف, عملها بمبدا seal ....
تقفيل الماسك التراسونيك... و ده معناه ان طبقات الماسك لازقه في بعضها بماكينه التراسونيك فبتمنع مرور الهوا من خلال التقفيله (يعني الهوا ميدخلش من عند خياطه الماسك. زي قفله كيس الشيبسي كده)
و اخيرا نوع الاستيك و طريقه لاحامه في الماسك, ممكن الاستيك يكون ماسك في الماسك بلزق شمع او كبس حراري او متدبس التراسونيك مع الطبقات التلاته و دي مش محتاجه شرح و بالنسبالي مش بتفرق اوي بس التجار بيحبوا يبينوا ان منتجهم فظيع يعني :D :D
طبعا انت لو ملاقتش المواصفات دي في الماسك يبقي تقوله غدا القاك و كل عام و انت بخير
تابعونا لمعرفه تفاصيل اكتر ...
البوست الجاي : ازاي تقدر تستفيد اوي من الماسك الجراحي و تستخدمه صح...
شكرا , و حفظ الله الجميع
