What are the opening hours?

Monday 11am - 11pm Tuesday 11am - 11pm Wednesday 11am - 11pm Saturday 11am - 11pm Sunday 11am - 11pm

دكتور عمرو حـسن الحسنى

Home
Egypt
Cairo
دكتور عمرو حـسن الحسنى

Board member of chapters of Multiple sclerosis, Pediatric
Neurology and Headache at the Egyptian Society for
Neurology, Psychiatry and Neurosurgery.

استشاري و أستاذ و دكتوراه أمراض المخ و الاعصاب- طب قـصر
- العيني- جامعة القاهرة
Consultant and Professor of Neurology
Kasr Al Ainy Faculty of Medicine
Cairo University- Cairo- Egypt استشارى و استاذ أمراض المخ و الاعصاب بكلية طب قصر العيني-
دكتوراة أمراض المخ و الاعصـاب -مـاجـستير الأمراض العصبية والنفـسـية -
عضو الجمعــية المصـرية للامـراض النفسية والعصـبيةوجراحة الاعصاب -
عضو الجـمعية المـصرية لابحاث الخلايا الجذعية

Dr. Amr Hassan MD,FEBN
Consultant and Professor of Neurology
Kasr Al Ainy Faculty of Medicine
Cairo University- Cairo- Egypt
Fellow of European Board of Neurology

Membership of Scientific
Societies & Committees:

Fellow of European board of Neurology
Member of European Society of Pediatric Neurology
Board member of the National Egyptian Neurology Board. Member of Egyptian Society of Neurology, Psychiatry and
Neurosurgery

29/11/2025

قمت بحمد الله و توفيقه برفع محاضرة جديدة على اليوتيوب عن
MOGAD
المرض الجديد اللي شبه ال MS
محاضرة ٤٥ دقيقة فيها الموضوع من ساسه لراسه
و ال Diagnostic criteria
الجديدة
يارب تكون مفيدة ليكم

لينك المحاضرة في أول تعليق

21/11/2025

الدايت و الجنة والنار🤔
طول عمري عندي عندي قناعة إن في سعرات حرارية "حلال" و سعرات حرام🤨

مش معناه مين الصحي اكتر
بس معناه متاكلش حاجات بسعرات حرارية عاليه و هي trash 😏

يعني مثلاً:
الشيبسي و البيبسي و المولتو و الباتيه و البسكوت
سعرات حراريه عاليه علي الفاضي
حرام تضيع يومك عليهم لأن مفيش فايدة ولا شبع ولا صحة.
دي سعرات حرام🤮
لكن مثلا
رز يلبن بالمكسرات – بسبوسة بالقشطة – مكرونة بشاميل
سعراتهم أعلى بكتير…
بس حلال فيها السعرات لأنك بتاخد مزاج عالي و رشه دوبامين و سيروتونين مزدوجه.😋😋
ومع الوقت بدأ الموضوع يوسع عندي لدرجة خلّتني أشوف علاقة عجيبة بين الدايت و فكرة الجنة والتحكم في الشهوات.😍

في الدين… الجنة مش بتجي لأنك مش قادر تعمل الشهوة.
بتجي لأنك تقدر… لكن بتمنع نفسك لأن عندك هدف أعلى.😍

ونفس الفكرة بالظبط في الدنيا…
إنت تقدر تاكل أي حاجة نفسك فيها:
بيتزا، شوكولاتة، مولتو، حلويات…
والشهوة موجودة… والقدرة موجودة.
بس إنت بتحرم نفسك بإرادتك…
مش لأن الأكل ممنوع،
لكن لأن عندك هدف أبعد:
صحتك، شكل جسمك، ثقتك، راحتك، ونسختك الأفضل.💪

والدايت؟
مش نظام أكل…
ده تدريب يومي على “طريق الجنة”:
تأجيل المتعة اللحظية…
عشان متعة أكبر، وصحة أحسن، وراحة أعمق.💪
وبنفس المبدأ…
لما بتضعف قدام كل أكلة تعجبك، وكل حاجة نفسك فيها، وتقول: “هي مرة وخلاص”…
أيوه، هتستمتع.
ومتعة الأكل لحظية… وهي فعلاً لحظة قمر و عسل

بس متعة الأكلة بتنتهي أول ما اللقمة الأخيرة تنزل.

إنما أثرها؟
لظاليظ.. ترهلات ..هدوم مش داخله ..كورسيه مش عارف يلم ايه و لا ايه ..كرش مصاحبك طول الوقت كتوأم ملتصق🐘

المتعة لحظة…
والثمن غالبًا عمر.

ونفس فكرة الذنوب بالضبط…
لأن أي معصية ليها متعة لحظية.
ومجرد ما اللحظة تخلص… المتعة بتختفي.

لكن أثرها؟
يظل مكتوب في صحيفتك، يثقل قلبك، ويعيش معاك حتى بعد موتك ..لحد ما تتوب وترجع
تتوب بقي بعمليه بحقن مونجارو بتدبيس بدايت ..المهم انك تتوب🙏

زي ما الأكلة بتخلص ومتعتها بتروح…لكن دهونها وترهلاتها بتفضل.

وكذلك الذنب…متعته لحظة،
وأثره قد يمتد لعمر كامل.

حتى مفهوم اليوم الفري…
اللي بتتحرر فيه من القيود وتسيب نفسك تاكل كل اللي نفسك فيه…
ناس كتير من خبراء الدايت بيعترضوا عليه لأنه بيثبّت إنك محروم، ومعلق بالأكل😵‍💫.
وده معنى إن عقلك لسه مربوط بالشهوة،لسه مشتاق،لسه مستني اللحظة دي.وده يخليك أكثر عرضة ترجع للعادات القديمة.

لكن الأصل
إنك تحرّر نفسك من الشهوة دي أصلاً،لحد ما تبقى بعيدة…ومش طايقها…ومش عايزها.

وده نفس فكرة اللي بيقول:
“هعمل الذنب ده دلوقتي… وبعدها هتوب.” غالبًا ما بيتوبش.
لأنه سيب باب الضعف مفتوح.
ربط نفسه بالذنب… وربط المتعة باللحظة.

التحرر الحقيقي…
إنك تقفل الباب ده تمامًا.
تبعد… لحد ما المتعة تفقد قيمتها،
والشهوة تصغر…وترجع إنت أكبر منها.
عشان كده القرآن قفل الباب ب
" لا تقربوا"
عشان كده
زي ما مفيش يوم فري في الزنا و لا الرشوة و السرقة
مفيش يوم فري في الدايت

معلش عكننت عليكم يوم الجمعة و انتو رايحين تضربوا الغدا الجامد

اضربوا الغدا الجامد
و ابدأوا من السبت
معروفه مفيش حاجه ينفع تبدأ وسط الأسبوع او يوم اجازه 😂

20/11/2025

لو طفلك مطلع عينك في المذاكرة و تحصيله الدراسي ضعيف و المدرسين بيشتكوا منه
يبقي لازم تسمعي الحلقة الجديدة من الموسم الرابع

الحلقه دي مجمعه الأسباب و الفحوصات المطلوبه و الحلول الفعاله لتحسين التحصيل الدراسي لطفلك

علي فكرة تنفع برضه لطفلك الكبير أوي اللي في الجامعة 😂

لينك الحلقة في أول كومنت

17/11/2025

كلمات بسيطة كفيلة أن تنسيك كل متاعب هذة المهنه
لمثل هذة الكلمات يعشق الطب

«إلى
د. عمرو حسن
شكرًا لك من أعماق قلبي لأنك لست فقط طبيب أعصاب رائع، بل إنسانًا طيبًا، مخلصًا وملهمًا.
رعايتك وحكمتك وتعاطفك صنعوا كل الفرق.
أنت بلا شك أفضل طبيب أعصاب عرفته في حياتي.
وسأظل دائمًا ممتنّة لكل ما قدمته.
مع خالص الاحترام والتقدير… شهد
24/6/2025»

شكرا للصغيرة شهد علي الامتنان و العرفان
و باعتذرلك عن التأخر في الشكر اللي أكيد تستحقي أكتر منه بكتير

16/11/2025

قمت بحمد برفع محاضرة جديدة على اليوتيوب عن
Classification of Headache
ده الجزء الأول
هيشمل
Classification of migraine

فيه تفاصيل اكلينيكيه مهمه
زي مثلا ازاي نفرق
بين
Retinal migraine and visual aura

ايه هي انواع aura السته
و
امتي اشخص
Migrainous infarction

و تفاصيل و تكات تانيه كتير

اللينك في أول كومنت

#محاضرة

14/11/2025

رغم أنني لا أحبه ولا أؤمن بقدراته الصحفية و لكنه كتب منذ سنوات مقالًا بعنوان "دولة كأن" وأراه تعبيرًا عبقريًا لم أجد أدقّ منه للتعبير عمّا يحدث في الانتخابات النيابية المصرية.😉

فبعد أن كتبتُ الأسبوع قبل الماضي عن حضارة السبعة آلاف سنة والمتحف المصري الكبير، ثم الأسبوع الماضي كتبت عن الاستحقاق الانتخابي الحقيقي الذي جاء بزوهران ممدّاني رغم أنّ في الأوغاد، كان من الطبيعي أن يكون هذا الأسبوع عن الانتخابات النيابية لدولة السبعة آلاف سنة؛ انتخابات من المفترض أن تكون عرسًا تنافسيًا بين أحزاب لها أفكار وإيديولوجيات تتنافس لتعبر عن مصالح الشعب. و حقوقه.

لكن للأسف، حتى مفهوم الأحزاب الكرتونية الذي طالما سخرنا منه في العقود الماضية لم يعد موجودًا؛ فقد ذاب تمامًا، وحلّت محلّه هياكل جوفاء لا معنى لها. بل إن اختيار اسماء الاحزاب نفسه بقي عجيب الشكل ..تلاقي حزب يستخدم كلمة "وطن" نكرة، وكأنه يتحدث عن أي وطن، وربما كان ذلك تمهيدًا لاحتراف العمل الحزبي في أي مكان آخر… مدغشقر مثلًا أو موزمبيق.
وحزب آخر يسمّي نفسه "حماة"
حضرتك بتحمي مين و من إيه
و لا انت قصدك "حَمّاة" بمعنى الاستحمام و لا تقصد "حَمَاة"
اللي هي أم مرات الوطن😂

نظام الانتخاب بالقوائم فتحوّل إلى قائمة واحدة تتشارك فيها جميع الأحزاب في جوّ «عائلي بهيج»😂 حضره ممثلو كل الأحزاب كأنهم في مناسبة اجتماعية. بدلًا من أن يكون نظام القوائم ساحة تتنافس فيها الأحزاب ببرامج وأيديولوجيات حقيقية تعبّر عن مصالح الشعب🤨

نظام الفردي بقي حدّث ولا حرج "نظام أبجني تجدني ..او شخلل يا بلدينا عشان تعدي "😏
خليط من الاعتبارات العائلية والمصالح والولاءات، لا علاقة له بالسياسة أو التنافس على خدمة الناس.😏
أصبحت لا أثق ولا أحب ولا أأتمن من يرشّح نفسه في هذه الانتخابات حتى لو كان حسن السمعة أو قريبًا مني.🤨
فمجرد المشاركة في هذا المشهد المسرحي الكرتوني الهزيل أمر غير مقبول في حد ذاته، ولا أرى ما يبرر الاشتراك فيه مهما كانت النوايا أو العلاقات.
طبعا أنا كتبتُ هذا البوست بعد أن انتهى «العرس الانتخابي» و«الاستحقاق الديمقراطي» أحسن كلامي يؤثر علي إرادة السادة الناخبين🫣 لا سمح الله او يأثر علي طوابير الانتخابين المحشودة حشد و المدفوعة دفع.

طب هل معنى كده إنّي عايز بقى انتخابات وديمقراطية وأحزاب وبرامج ووجع دماغ من ده ؟
لا والله… أنت فاهمني غلط.
أنا أبسط من كده بكتير😂.
كل اللي عايزه—ببساطة شديدة—الصدق، والأمانة، وإنك تجيي معايا سِكّة. كلنا عارفين اللي فيها و من أين يأتي القرار، ونعرف الدور الحقيقي لهؤلاء النوّاب الذين لا يحصدون إلا بدلات لا تُعد ولا تُحصى، بينما دورهم الفعلي لا يتجاوز الإيماء بالموافقة.🤔
عشان كده كل اللي عايزه إلغاء هذه المجالس النيابية والعودة إلى عصر الملكية أو الدكتاتورية ذات الفرد الواحد؛ شخص واحد يصدر القوانين وخلاص. أهون ألف مرة من هذه المشاهد المسرحية الهزلية في "دولة كأن".😔
وبكده نبقى ماشين مع بعض سكة واحدة… بلا تمثيل ولا ديكور ولا ديمقراطية و لا يحزنون😘.

11/11/2025

سعدت جدا الحمد لله بنشر أحدث شغل ليا في مجلة Cephalalgia Reports بالتعاون مع الزميلة والأخت العزيزة من المغرب د. خديجة الصغير 💚🇪🇬🤝🇲🇦

الموضوع المرة دي يمكن يكون مختلف شوية… مش عن علاج جديد ولا جهاز ولا دواء، لكن عن الكلمات اللي بنستخدمها لتشخيص “الشقيقة/الصداع النصفي” عند المرضى العرب!

بما إني من عاشقي اللغة العربية
اكتشفنا إن في خلط كبير بيحصل بسبب اختلاف المصطلحات بين:
🔸 "الشقيقة"
🔸 "الصداع النصفي"

وده أحيانًا بيؤدي لـ:
❗تشخيص غلط
❗لخبطة عند المرضى
❗اختلاف في نتائج الدراسات ونسب انتشار المرض بين الدول العربية

في بحثنا، وضّحنا الأصل التاريخي واللغوي للكلمة، من اليوناني لـ اللاتيني ثم للفرنسي… وصولًا لجذورها العربية اللي استخدمها الأطباء المسلمين من القرن التاسع، زي ابن سينا والزهراوي 👨‍⚕️📜

وخلصنا إن استخدام كلمة "الشقيقة" أدق وأسهل للفهم بين العرب من كلمة “الصداع النصفي”، اللي ساعات بتلخبط الناس لإن مش كل مريض شقيقة بيكون الصداع عنده في ناحية واحدة من الرأس.

سعيد إن الشغل ده اتنشر علشان يساعد الأطباء والباحثين على توحيد المصطلحات، ويخلّي التواصل مع المرضى أوضح وأسهل 🙏

من هنا و رايح اسمه "الشقيقة " ..ماشي يا يا شقيقي

لينك البحث في أول تعليق

09/11/2025

بفضل الله و توفيقه🎥 محاضرة جديدة على اليوتيوب عن أحدث تطورات علاج الصداع!

محاضرة الزتونه 😂لخّصت فيها أهم التطورات في مجال الصداع خلال آخر سنتين بشكل بسيط وسهل.

هتلاقوا فيها:

✅ أحدث التحديثات في الإرشادات والعلاج
🧠 Guidelines
🧬 كل الجديد عن علاج الـ CGRP
⚙️ أجهزة وتقنيات جديدة لعلاج الصداع والMigraine
📊 أبرز الدراسات الإكلينيكية الجديدة وتأثيرها على العلاج
📰 أهم الأخبار من النشرات العلمية المتخصصة

لو بتتعامل مع حالات صداع أو حابب تواكب الجديد… المحاضرة دي هتفيدك جدًا 👇

🔗 اللـينك في أول تعليق

07/11/2025

لم أشاهد مثل زوهران ممداني من قبل
هو أفضل متحدث و خطابي رأيته في حياتي
درست و حاليا أدرس فنون الإلقاء و الخطابة و أكاد أزعم أن زهران ممداني هو الأفضل موهبة و مهارة
خطابه قوي نبرة واثقة لا يقرأ من ورق لا يوجد تأتأه و لا verbal fillers
حماسي جمله قصيرة واضحه و بمخارج حروف مثالية 💪

فوز زوهران في انتخابات عمدة مدينة نيويورك هو زلزال سياسي بلاشك
شاب مسلم شيعي ولد في كمبالا بأوغندا لأب أوغندي مسلم و أم هنديه و متزوج من سورية
و هاجر الي أمريكا و استقر في استوريا كوينز ب نيويورك
😍
هذة التوليفه لا يمكن أن تحكم نيويورك

و قبل ان تعتقد ان نيويورك ولايه عاديه او انها محافظة زي أي محافظة عندنا في مصر
😂
اقتصاد ولاية نيويورك يُعد من الأكبر في العالم
الناتج المحلي الإجمالي لولاية نيويورك يتجاوز حوالي 2 تريليون دولار سنويًا (أحدث التقديرات تقارب 2.1–2.2 تريليون دولار)، ولو كانت ولاية مستقلة لكانت ضمن أكبر 10 اقتصادات في العالم، متقدمة على دول مثل كندا وكوريا الجنوبية
😉
المعلومة الأهم بكتير

عدد الي.هود في ولاية نيويورك بحوالي 1.7 إلى 1.8 ملييون شخص و دة أكبر تجمع يه.ودي في العالم خارج زفتة الطين
🤨
منافسه كان واخد دعم لا محدود من اللوبي و من ترامب نفسه

ثم يأتي هذا الشاب ذو ٣٤ عام المسلم المناصر ل.غ.زة و المناهض لسياسات النتن و ترامب
المهاجر ذو الأصول الافريقيه الهنديه المسلم
و بحملة انتخابية ضعيفة جدا مصادر تمويلها النيوريروكيين نفسهم
يتحدي الشي.طان الأعظم و ينتصر عليه بل و ينتخبه غالبية الشباب الي.هودي

قصة ملحميه و لا في الخيال
"و ما يعلم جنود ربك إلا هو "
🙏
خطاب انتصار زوهران خطاب ملحمي لو سمعته سيتغير مزاجك اليوم حتما للأفضل ..ستشعر انك ضربت كومبو دوبامين و سيروتونين و ادرينالين في آن واحد
👏👏
و لكن إحقاقا للحق
انا كمواطن عربي أصيل لم أتخيل ان زوهران سينجح في الانتخابات
تخيلت انه سيستبعد في اللحظة الأخيرة لانه مثلا لم يؤدي الخدمة العسكرية او لقينا عليه قضية كمبيالات من ساعة ما كان في كمبالا او مدام هيلاري اللي في الدور الرابع في الشهر العقاري في وول ستريت رفضت تعمل التوكيلات لأنصاره
او انه هيتمسك في قضيه ترامادول و هو سايق علي الدائري
😂
او لو حتي بعد ما يدخل الانتخابات يوم الفرز تيجي عربية نص نقل بالليل فيها صناديق من اياها
😂
اي حاجه من الزمن إياه الوسطي الجميل ده

لكن أتي من اختاره الشعب رغما عن عين الرئيس نفسه
في استحقاق انتخابي حقيقي

مبروك زوهران
مبروك انك عكننت علي النتن و الطرمبة

05/11/2025

من شهر و نص بالضبط
منظمة الدواء و الأغذية العالميه اعتمدت دواء جديد لمرض نادر هو مرض Neurofibromatosis Type 1
اسمه Selumetinib
بفضل الله عملت محاضرة جديدة خفيفة خاصة عن الموضوع ده 👇

المحاضرة فيها آخر المستجدات عن:
• المرض ونبذة بسيطة عنه
• إمتى نفكر في تشخيصه
و ازاي بيتشخص
• الحالات اللي بيتم فيها استخدام العلاج الجديد

بالمناسبة العلاج معتمد من ٢٠٢٠
بس الجديد
انه اعتمد في ٢٠٢٥ للأطفال من عمر سنة
و انه متاح حاليا في مصر🥰🌹
لينك المحاضرة في أول تعليق
#

04/11/2025

سعدت جدا بتلبية الدعوة الكريمة من أخي العزيز د. أحمد عليوش، رئيس جمعية أطباء الأعصاب في الجزائر لحضور المؤتمر السنوي لطب الأعصاب وتقديم محاضرة عن حقن علاج الصداع ومعايا الزميلة العزيزة د. مني حسين، والأخت الفاضلة د. داريا أولودز من تركيا.

المؤتمر كان شيّك ومحترم لأقصى درجة… حضور قوي، علم تقيل، ونقاشات جامده بجد.

وزي ما اتعودنا من أهل الجزائر، الاستقبال كان على أعلى مستوى… كرم وحفاوة وذوق يخلوك تحس إنك وسط أهلك، ومع الهدايا الحلوة اللي فرّحتنا من القلب ❤️
و التكريم في ختام المؤتمر كان أحلي لقطه

سعدت جدًا بردود الأفعال على المحاضرة، وبالكلام الطيب والتعليقات الجميلة اللي وصلتني من الإخوة الجزائريين… شهادة بعتز بيها ومن قلبي بشكركم عليها 🙏

وبصراحة… قسنطينة دي بلد عربي بجمال أوروبي!
بلد ليها روح وطابع يخطِفك من أول دقيقة… يعني لازم تعشقها غصب عنك 😍

شكر كبير لكل اللي شارك ونظّم… وإن شاء الله دايمًا تجمعنا مناسبات علمية حلوة بين مصر والجزائر 🇪🇬🇩🇿

Address

87 El Maniel Street
Cairo
11553

Opening Hours

Monday	11am - 11pm
Tuesday	11am - 11pm
Wednesday	11am - 11pm
Saturday	11am - 11pm
Sunday	11am - 11pm

Telephone

+201016668886

Website

http://www.AmrHasanNeuro.com/

Alerts

Be the first to know and let us send you an email when دكتور عمرو حـسن الحسنى posts news and promotions. Your email address will not be used for any other purpose, and you can unsubscribe at any time.