د.محمد كامل-Dr.Mohamed Kamel

02/12/2025

مهما كان عندك مضاعفات للسكر مينفعش توقف العلاج لأي سبب حافظ على صحتك

02/12/2025

أنا عندي اقتراح كل الشركات اللي عاملة أنسولين على مستوى العالم يقعدوا مع بعض و يوحدوا تصميم ال cartilage و ميصنعوش اقلام أصلا و الأقلام الناس تشتريها لوحدها من اي مكان عشان بصراحة موضوع القلم المجاني ده فاشل ! قلم الأنسولين مينفعش يبقى BRAND و كل شركة تصمم قلم عشان ال LOGO بتاعها و أصلا مش موجود !
و فكرة السرنجة دي تتلغي أصلا احنا في 2025!

27/11/2025

علاج #الكوليسترول #الزهايمر

26/11/2025

نعتذر عن استقبال المرضى من يوم الأربعاء 26 نوفمبر و نستأنف العمل ان شاء الله من يوم الأحد 30 نوفمبر للمشاركة في فاعليات مؤتمر السكر في #بيرلين 🇩🇪

17/11/2025

حتى لا ننسى !
كسل الغدة الدرقية بدون علاج!
يزيد من خطورة جلطات القلب و ضعف عضلة القلب و ارتشاح غشاء القلب
سواء كان كسل حقيقي او خفي

07/11/2025

أنا عارف اني صادم إلى حد ما
لكن سامحوني أنا قررت اني أشارك العلم الذي يعلمه الأطباء و ليس ما شاع على الفيس بوك و غيره !
فيتامين يعمل بخصائص الهرمون و ان قل او انخفض هيكون ليه اثر حقيقي على العظام ممكن توصل لهشاشة العظام و قصر القامة و ضعف العضلات لدرجة تصل إلى السقوط أثناء المشي و احداث كسور عظمية

،،،،،،،، بس كدا !!!☝️

مفيش اي حاجة تتوقع إنها تحصل !
زي انك لما تعوضه هتعالج الاكتئاب او التقلبات المزاجية او نقص المناعه او انك تكون اقل عرضى للفيروسات و الباكتيريا و الأورام الخبيثة
لو حضرتك وصلت لحد هنا و مقتنع بالكلام ده تقدر تتفضل
،، لكن لو محتاج ادلة علمية اكتر اهلًا بيك 😀

◾️في دراسات على مجموعات مصابة بـ COVID-19 الدراسات اللي كانت بتراجع سنوات الوباء و تطور الحالات و تحاليل فيتامين د ،، الدراسات لم تثبت بشكل واضح و متكرر إن المرضى اللي مستوى الفيتامين أقل من 20 اكثر عرضى للعدوى او المضاعفات و ان تعويضه قد يفيد في تحسن المريض !

◾️على الرغم من إن انخفاض مستوى فيتامين د منتشر في مجموعات المصابين بالاكتئاب، إلا إن تجارب قليلة جدًا قيّمت بشكل منهجي ما إذا كان تصحيح النقص بيحسن المزاج. و لم تظهر فايدة واضحة على أعراض الاكتئاب في تعويضه كمان وجدوا عدد كبير من مرضى اكتئاب فيتامين د عندهم طبيعي !

◾️ في تحليل مجمع حديث (2023) (أكثر من 100 ألف شخص)، وجدوا ان تناول مكملات فيتامين د لم يخفض بشكل كبير الوفيات الناتجة عن السرطان.

◾️ نتائج دراسة اسمها VITAL (أكثر من 25 ألف شخص)، تناول 2000 وحدة من يوميًا لم يقلل بشكل كبير العدد الكلي لحالات السرطان الجديدة.

خلاصة القول فيتامين د مهم للعظام و العضلات جدا لكن باقي التوقعات نظرية فقط و غير عملية !

د/محمد كامل
أخصائي الغدد الصماء و السكر

31/10/2025

مين محتاج علاج لل #هاشيموتو

26/10/2025

مريضة قررت تمنع ال #جلوتين لعلاج ال #هاشيموتو التهاب المناعي !

23/10/2025

بعد ما أجاوبك على الاسئلة دي هتحس ان حد اخدك من إيدك و انت تايه في بلد غريبة عليك و وصلك لحد بيتك🤍

حالة التردد اللي انت عايش فيها؟

سببها ٣ اسئلة رئيسية
اولاً أنا عندي سكر و لا ده مجرد سكر عارض ؟

ثانيا اشمعنى أنا جالي سكر ؟

ثالثا انا قوي و هقدر أسيطر على السكر من غير علاج ؟

🔵اولاً انا عندي سكر بجد و لا ده مجرد سكر عارض ؟
مفيش حاجة اسمها سكر عارض لكن في حاجة اسمها سكر ثانوي يعني في سبب اولي هو اللي سبب السكر زي مثلا ارتفاع الكورتيزول قي الدم او هرمون النمو و غيرها لكن هل دي أسباب شائعة الإجابة لأ نادرة جدا جدا جدا،،
اصل السكر مش بييجي فجأة زي مانت متخيل السكر قبل ما ييجي بتعيش 5 سنوات في مرحلة اسمها ما قبل السكر و 5 سنوات تانيين في مرض السكر قبل اكتشافه بالأعراض عند اغلب المرضى
فالزعل و الأكل و التوتر كل ده بيعلي السكر عند مريض السكر و لا يسببه

🔵هنا ننتقل للسؤال الثاني : ليه انا جالي سكر ؟
طالما سالت السؤال ده يبقى انت قربت كتير من الحقيقة حضرتك فعلا عندك حاجة مميزة جعلتك مريض سكر و هي العوامل الوراثية و ده ثابت في اغلب الحالات
مينفيش ان العوامل البيئية و نظام حياتك ليه دور كبير في الوقاية من السكر و حدوثه لكن أقوى سبب و أقوى عامل في السكر من النوع الثاني بالذات هو العامل الوراثي و ده بيفسر تكرار مرض السكر في أفراد و اجيال العائلة الواحدة

🔵المشكلة بقى في شخصنة المرض و تحويله إلى تحدي و مواجهة لازم تنتصر فيها و تقول لنفسك أنا أقوى و هقدر أسيطر على السكر من غير علاج ؟
أتمنى من كل قلبي انك لا تستغرق فيها وقت كبير لان للأسف ده بيستهلكك نفسيا و جسديا
هو ليه أصلا السكر بيعلى عشان البانكرياس مش بيطلع إنسولين كفاية و الكبد بيخرج جلوكوز اكتر من اللازم و الكلى بتقلل طموحها في التخلص من السكر و الانسولين القليل اللي بتنتجه كفاءته ضعيفة جدا على الخلايا حتى مركز الشبع عندك لا يشبع و يدفعك للمزيد من السكر

انت كل اللي هتعمله انه توقف او تمنع كل حاجة فيها سكر او كارب و ده مهم أكيد انك تعمل نظام غذائي
لكن أعضاء جسمك اللي بتحارب انتظام السكر هتعمل فيها ايه؟
هنا بييجي دور العلاج انه يعكس المشكلة الموجودة في كل عضو و عندنا أدوية موجهه للكبد و البانكرياس و الكلى و كفاءة الانسولين و حتى يصل تأثيرها لتحسين حساسية مراكز الشبع في المخ
لكن للأسف اغلب الادوية لا يتعدى نطاق عملها 24 ساعه و عشان كدا لازم تاخد علاجك بصفة يومية
يوم من غير علاج !!
يعني يوم سايب فيه جسمك بدون تحكم في السكر !!
يعني حتى لو سكرك سليم بالحمية فقط فده مجرد تحسن رقمي لا يعكس شفاء او علاج نهائي
الخطورة مش في علاج السكر أبدا!!
الخطورة في انك تسيب السكر من غير علاج و تسمح بمضاعفاته أنها تحدث باختيارك و عنادك
بلاش أعاند نفسك و تعاتبها و تعاقبها
خد علاجك بانتظام و ظبط أكلك و حياتك هتكون اسعد من الأول و اهدأ بدون اي مضاعفات 🤍

دمتم بصحة و سعادة
د/محمد كامل
أخصائي الغدد الصماء و السكر

22/10/2025

قديما كان في اعتقاد عام للكثير من أطباء الغدد الصماء

ان استخدام هرمون الغدة الدرقية بجرعات ضئيلة او متوسطة 25mcg-50mcg بدون وجود خمول واضح في الغدة الدرقية ممكن يساعد على علاج تضخم الغدة الدرقية الناتج عن نقص اليود
Nontoxic Nodular Goitre
او يقلل من حجم العقيدات المتكونة و اللي في الغالب بتكون Hyperplastic nodules و يمكن وصفها بانها مجرد تكاثر حميد في الخلايا
الحقيقة ان الدراسات الأخيرة اثبتت ان استخدام العلاج ممكن يساعد في تصغير تضخم الغدة في الأطفال لكن مالوش اي قيمة في البالغين بالعكس ده هيسبب negative feedback على انتاج الغدة النخامية لل TSH و يقلل الإنتاج الذاتي لهرمون الغدة الدرقية ,, علاوة على كدا هيسبب هشاشة في العظام بسبب ال
‏Cortical bone loss
طيب هل في علاج غير جراحي لتضخم الغدة الدرقية؟!
الحقيقة ان في علاج بس مش هوصفه لحضرتك !
في بعض دول الاتحاد الأوروبي و الأمريكا اللاتينية تم استخدام اليود المشع Radio Active Iodine بجرعات عالية و فعلا بيقلل من 50-60٪؜ من حجم الغدة الدرقية
إلا ان هذا العلاج في هذه الحالة غير معتمد في امريكا و لا يعمل به في مصر و الشرق الأوسط و اليود المشع يستخدم فقط في علاج نشاط الغدة الدرقية او سرطان الغدة الدرقية لأسباب نظرية تتعلق بأضرار محتملة من اليود المشع ،،
و مازالت الجراحة أو التردد الحراري هو العلاج المتاح حسب توصية الجمعية الأمريكية للغدة الدرقية ATA!

دمتم بصحة و عافية
د/محمد كامل
اخصائي الغدد الصماء و السكر

21/10/2025

21/10/2025

خايف يفقد #الكلى بسبب #السكري