27/11/2025
في اليوم العالمي لمناهضة العنف ضد المرأة…
عايزة أكلم كل ست بتقرا الكلام ده دلوقتي…
اللي يمكن شايلة وجع محدش يعرفه،
اللي بتضحك قدّام الناس وبتعيط لوحدها،
اللي اتكسرت مرة أو ألف… وبرضه وقفت.
عايزة أقولّك حاجة من قلبي:
إنتي مش قليلة.
وإنتي مش ضعيفة.
وإنتي مش مطالبة تتحمّلي علشان “البيت” أو “العيال” أو “الناس هتقول”.
العنف مش علامة قوة…
ولا السكوت علامة رضا.
العنف بيقلّل من اللي بيمارسه… مش من اللي بيتعرض له.
وأنا حابة أفكّرك…
إنك تستحقي يُتقالك “متخافيش”،
تستحقي حضن آمن،
تستحقي بيت يطمنك… مش يكسرِك،
تستحقي علاقة فيها احترام… مش وجع،
تستحقي حياة كاملة… مش نص حياة.
ولو انتي واقفة على حافة قرار…
متخليش الخوف يشدّك لورا.
خدي خطوة صغيرة… بس خديها.
إسندي على نفسك، اسندي على اللي بيسمعوكي ويفهموكي… فيه دايمًا حد هيسند.
إرفعي راسك…
إنتي أغلى من أي أذى،
وأقوى من أي حد حاول يقلل منك.
وخلي اليوم ده مش مجرد “ذكرى”…
خليه بداية لقوة جديدة جواكي.
#العنف
