29/11/2025
مفيش ست بتبقي باردة فجأة .. في راجل خلاها توصل لمرحلة البرود ده .
{ ركز معاية يا صديقي .. ركزي معاية يا ست الكل . }
الست مبتكونش باردة ولا بتتغير فجأة .
التحول ده ملوش علاقة بالمزاج ولا بتغيير الطبع .
هو نتيجة تراكم نفسي طويل .. أشبه بعملية " انطفاء بطيء " بيبدأ من جوه من غير ما حد ياخد باله .
الست اللي كانت زمان بتتكلم كتير ، وتعاتب كتير ، وتزعل بسرعة ، وتفرح بسرعة - الست دي نفسها ، لما تبطل تشتكي وتبدأ تسكت ..
اعرف إنها خلاص وصلت للمرحلة اللي مفيش بعدها رجوع .
في علم النفس العاطفي ، لما الإنسان يوصل لحالة من " الإرهاق الانفعالي " ، بيبدأ عقله اللاواعي يفصل نفسه عن مصدر الألم كطريقة للحماية .
وده اللي بيحصل بالضبط .
الست مابتبردش ، هي بتحمي نفسها من وجع مش قادره تعالجه .
بتتعلم إزاي توقف الإحساس عشان تقدر تكمل .
كل مرة كانت بتسكت فيها عن حاجة مضايقاها ، كانت بتحط جواها طوبة صغيرة من الجدار اللي فصلها بعد كده .
كل مرة قالت " ماشي مش مشكلة " ، وهي جواها متكسّرة ، كانت بتفقد جزء من الحماس اللي بيخلي العلاقة تعيش .
وكل مرة حاولت تصلّح لوحدها وما لقتش استجابة ، اتعلمت درس جديد في الهدوء البارد اللي بيخليها تحافظ على نفسها بدل ما تحافظ على العلاقة .
كتب لكم Khaled AbdElnaser Elabedi
في العلاقات ، فيه نوعين من الانسحاب :
فيه انسحاب بيحصل فجأة .. وفيه انسحاب بيحصل جوه النفس على مدار شهور وسنين .
وده النوع اللي صعب ترصده .
تفتكرها لسه معاك ، لكن الحقيقة إنها من زمان بطلت تبقى " جوا العلاقة " .
الست لما تبرد ، بتبقى لسه بتتعامل ، بتضحك ، بترد ..
بس المشاعر بقت آلية .
الكلام اتعمل عادة .
الوجود بقى شكلي .
وكل ده عشان خلاص الطاقة العاطفية اللي كانت بتغذي العلاقة خلصت .
وده مش ضعف .. دي غريزة بقاء .
علم النفس بيقول إن الإنسان لما يتعرض لفقد متكرر للأمان العاطفي ، بيبدأ يبني جواه حالة اسمها emotional numbing - خمول أو تخدير للمشاعر .
تبتدي تبطل تحس بالحماس ، والحزن ، و حتى الغيرة .
تبقى بتتفرج على حياتها زي فيلم قديم كانت بطلة فيه زمان ، بس دلوقتي بتتفرج عليه من بعيد .
ولما توصل الست للنقطة دي ، بيبقى صعب جدًا ترجّعها زي الأول .
مش لأنها عنيدة أو متكبرة ، لكن لأنها خلاص " انطفأت " .
النار اللي كانت جواها اتحولت رماد ، ومفيش حاجة تقدر تولع الرماد تاني بنفس اللهيب .
كتب لكم Khaled AbdElnaser Elabedi
كل اللي كانت محتاجاه كان اهتمام بسيط ، كلمة طيبة ، معاملة صادق تطمنها إنها مش لوحدها في العلاقة .
لكن لما فضلت لوحدها وقت طويل ، اضطرت تتعامل مع الوحدة بطريقتها ..
فصاحبت الصمت ، واتعودت على البُعد ، وبقت هي نفسها مصدر أمانها .
في اللحظة دي ، الراجل غالبًا يبدأ يحس إن في حاجة اتغيرت .
يبدأ يسأل : " مالك ؟ متغيرة كده ليه ؟ ”
لكن السؤال ده بييجي متأخر جدًا .
لأن كل اللي ضاع كان ممكن يتلحق لو اتسأل في الوقت الصح .
الست مبتتغيرش فجأة ..
هي بس وصلت لمرحلة استوعبت فيها إن الدفا اللي كانت بتديه ، ماكنش بيولّع غير في نفسها .
فقررت تبطّل تسخّن قلبها لشخص معندوش احساس .
