What are the opening hours?

Monday 7am - 2am Tuesday 7am - 2am Wednesday 7am - 2am Thursday 7am - 2am Friday 7am - 2am Saturday 7am - 2am Sunday 7am - 2am

http://Www.omarelmokhtarpharmacy.com/

OMAR EL_mokhtar pharmacy, 7 omar elmokhtar school Street, Cairo (2026)

23/06/2020

تعلن الصيدلية عن توفير اسطوانات أكسجين مجاناً للحالات الحرجة التي تحتاج اليها وقام بتوفيرها أخوة من أهل البر والفضل.
أدعوا الله أن يجعل ذلك في ميزان حسناتهم.

31/05/2020

الأصل في لبس الكمامة العادية، حاجتين..

الاولي هي حماية الغير يعني هيقلل من انتقال العدوي من المصاب الي الشخص السليم..

التانية هي تقليل انتقال الفيروس من والي..

أنا بقول الكلام دا ليه؟ علشان حاجتين بردو

الاولي لو اعتمدت ع الكمامة، انك لابس وتدخل بقلب جامد ف الزحمة خاصة لو ناس من غير كمامة،. ساعتها بسهولة هينتقل ليك الفيروس ، وبالتالي التباعد مهم جدا حتي وانت لابس كمامة..

التانية ان الكمامة القماش يعتبر الفايدة بتاعتها تكاد تكون منعدمة، هي فقط قد تقلل من الرذاذ اللي هيخرج من المريض، يعني لو انت شخص سليم فهي لن تحميك مطلقا، ولكن لو انت مصاب قد تقلل بصورة ضئيلة جدا انتقال الرذاذ ولكن ف حالة الكحة أو العطس سوف ينتقل الفيروس بكل سهولة طبعا.

وبالتالي مهم جدا لبس الكمامة الجراحية، والحفاظ علي مسافة بينك وبين من تتعامل معه..

01/05/2020

الاطفال والكورونا

خلينا متفقين ان من رحمة ربنا بينا أن الأطفال فى أمان من المضاعفات الموضوع لا يتعدى فى اسوء حالاته فى كل الحالات المسجله عالميا دور برد بسيط والحالات القليله اللى توفت كانت بسبب عيوب خلقيه او مشاكل صحيه خطيره او امراض السرطان فى الاطفال غير كده هما فى امان

طيب مشكله الاطفال فى ايه ؟؟
-العامل النفسي للطفل المصاب مش هتقدر تفهمه انه لازم يقعد اسبوعين بعيد عن كل حاجه واحتمال كمان بعيد عنك وهتاثر فى نفسيته لفتره طويله جدا وهيبقى صعب ينساها

-الطفل مصدر مرعب لنشر العدوى ان اصاب بيها لانه مش هيلتزم باى تعليمات ولا هيأمن نفسه ولا هيأمنك ومش هتعرف انه مصاب ويعدى الكبار اللى حوليه.

فرجاءا خافوا على اطفالكم
- بلاش نزول ليهم لتجمعات مش وقتها وخصصوا وقت تلعبوا معاهم وتخففوا عنهم قعدة البيت.
- ادوا لاطفالكم وقت تشرحولهم فيه ان اللى بيحصل ده عادى وان طول ماحنا فى بيوتنا امان لينا
-عودوهم على الاجراءات الصحيه البسيطه اللى بتساعد فى تقليل انتشار العدوى لانها هتحميهم من ميكروبات وفيروسات كتيره غير الكورونا
- امنعوا عنهم الاخبار المرعبه لان اغلبها خاطئ علشان الطفل مش هيستوعبها اذا كان الكبار مش مستوعبينها
- بلاش تلقوا باللوم على حد او حاجه فى سبب الجائحه اللى احنا فيه قدام الاطفال لانها هتخلى عقله يكون فكره عنصريه عن الوضع بانه مثلا يلقى اللوم على كل الاسيويين لما يكبر هيبقى عنصرى تجاههم
- اللى ينزل يكون فاهم هو هيعمل ايه فى الشارع ويحافظ على نفسه ازاى علشان مياخدش العدوى لاهله جوا البيت .

دمتم بأمان وهتعدى ان شاء الله

01/05/2020

هذا الكلام ليس لتخويف الناس ... احنا بننقل الواقع والحقيقه ... وكمان علشان لما تروح الحميات وتطلع ايجابي والدكتور يقولك روح واعزل نفسك في بيتك تبقي عارف ان ده مش قراره ده قرار الوزاره ....

وزاره الصحه قررت النهارده انها مش هتحجز اي حالات كورونا معندهاش اعراض شديده ... يعني اي حاله ايجابيه هتروح البيت تعزل نفسها ١٤ يوم وحطت بروتوكول للعزل المنزلي في الصور اللي تحت ... ده معناه اننا دخلنا في مرحله متاخره والاعداد بتزيد والمستشفيات مش هتاخد الا العيانين التعبانين جامد ... النهارده عدد الحالات ٣٥٨ حاله ..... كده كل واحد ومناعته ونصيبه ...

30/04/2020

في اجتماع هام بين رئيس الوزراء والمحافظين اليوم

تم التشديد علي تطبيق الحظر في اوقات الحظر وعدم التهاون
وكذلك منع اي زحام او تكدس خلال المواعيد ما قبل الحظر
حيث اكد رئيس الوزراء ان معدل الاصابات المرتفع هذه الايام نتيجة الزحام والتكدس الشديد ايام ما قبل رمضان

ووجه بتشديد الاجراءات الايام المقبلة للسيطرة علي زيادة اعداد الاصابات وتقليل الزحام قدر المستطاع
وذلك بالتنسيق مع مديريات الامن
تم التشديد علي ضرورة ازالة كل مخالفات البناء بالكامل

30/04/2020

الدول اللى بتتسارع لعمل مسحات مش من فراغ ولا بتصرف فلوس على الفاضي.
لو فى مخيلتك انك تفك الحظر من غير ما تعمل مسحات لاكبر عدد ممكن دى مصيبه
لانك لما تعمل مسحات وعرفت المصاب وعزلته هتقدر تتعايش اطول فتره ممكنه بدون اصابات لكن فك حظر ومفيش مسحات هتبتدى مما بدأت به ايطاليا
ولازم اعاده النظر فى اسلوب مكافحه العدوى لأن العامليين فى المجال الطبي نسبه اصابتهم عاليه

30/04/2020

الحديث الغالب دلوقتي بقى التعايش مع مرض الكورونا، بدل مكافحة المرض.

✅خلاص العالم عرف إن الفيروس مش حيختفي خلال أسابيع، و حل إنك تقفل البلد مبقاش ينفع.

✅الفيروس ملوش علاج، و ملوش تطعيم.

⬅️و حتى لو العلماء في أوروبا و أمريكا عرفوا يوصلوا لتطعيم، حياخد سنين علشان يعرفوا يصنعوا منه ملايين الجرعات.

⬅️لازم كلنا نبتدي نجهز لمرحلة الحياة مع الفيروس.
و دا ملهوش غير معنى واحد هو الوعي.

✅إن الناس تعرف أهمية التباعد الشخصي، مفيش حاجة إسمها أحضان و بوس، مفيش سلام بالإيد.
✅التعامل الشخصي لازم يكون من على مسافة ٢ متر على الأقل بين أى شخصين.
✅مفيش زيارات عائلية و لا عزومات.
✅غسيل الأيد و النضافة الشخصية
✅لبس الماسك ٢٤ ساعة في اليوم، و مفيش خروج من غيره.

⬅️الحكومة عليها إنها تنشر الوعى ده،
بدل إعلانات السمنة البلدي و التبرع ، يعملوا حملات توعية في التيليفزيون.
⬅️إغسل إيدك بالمياه و الصايون، و خد معاك زجاجة كحول صغيرة في الشارع.

⬅️المترو و وسائل النقل العام لازم تزيد علشان نقلل فرص التزاحم.

⬅️المدارس و الجامعات ممكن يفضلوا قافلين السنة دي، و يكملوا الدراسة أونلاين.

✅الموضوع مطول يا جماعة، و درجة الحرارة طلعت مبتموتش الفيروس زى ما كانت الناس مستنية........

🧶 وغالبا مصر هتطبق الكلام ده وهتفتح البلد وتلغي الحظر وترجع الشغل مع الاخذ بالاحتياطات وده هيتطبق في العالم كله لان مش هينفع نستمر بنفس الطريقه باستمرار الي ما لا نهايه ....

د/خالد عبدالتواب
دكتوراه طب الاطفال جامعة القاهرة

29/04/2020

لكل اب و ام 😍😍😍 ... بمناسبه الصيف ... ازاي تدربي ابنك يقلع البامبرز ويدخل الحمام 🤗🤗🤗 ... كله يجمع هنا.....

يا دكتور انا مش عارفه اقلع ابني البامبرز وخلاص زهقت وقطعت عليه خمس شباشب👡👡👡 ومفيش فايده اعمل ايه يا دكتور .... ياه خمس شباشب طيب لسه في شباشب في البيت ؟؟ ... قصدي ده مينفعش وعمر ما كان العنف حل 😂😂😂😂 انا هقولك دلوقتي ازاي نقلع الواد البامبرز ونعوده علي الحمام بس ركزي معايا اوي :

1- اول حاجه اي ام هتكون متخيله ان ده موضوع مستحيل😢😢😢 وان ابنها عمره ما هيقعد علي الحمام😭😭 وده مش حقيقي ... هيقعد وهتبقي زي الفل 😍😍😍😍...

2- السن المناسبه لبدايه الموضوع ده هي من سنتين لسنتين ونصف تقريبا وفي اطفال ممكن نبدا معاهم قبل كده واطفال بعد كده بس لازم نسال نفسنا سؤال مهم هل طفلك ممكن يستوعب كلامك ويفهم انتي بتقوليله ايه بصفه عامه ؟؟ وهل بيستوعب كلامك وينفذه يعني مثلا لما تقوليله هات كذا بيروح يجيبها ؟؟ وبلاش بقه شغل الامهات المكتئبات بتاع انا الواد عنده 9 شهور ويئست منه يا دكتور 😂😂😂😂

3- لازم نعرف ان سن التحكم الكامل في البول 5 سنوات وفي البراز 4 سنوات وغالبا طبعا الطفل بيضبط موضوع البراز قبل البول بفتره وطبعا الحمد لله 👐👐👐علشان الريحه بتبقي فظيعه 😂😂😂😂

4- ممنوع منعا باتا استخدام الضرب والتهديد والوعيد لاننا ممكن نسبب مشكلات نفسيه بعد كده للطفل زي التبول اللاارادي واضطراب الكلام😇😇😇 ... وده ايه ميزه مهمه ان الشباشب هتعيش والدنيا غليت ومش ناقصه تشتري شبشب كل يومين 😂😂😂😂😂

5- السؤال الدايم اعوده علي قعده الحمام 🚽🚽ولا البوتي ؟؟ حسب تقبل طفلك في اطفال بتقبل الحمام واطفال تانيه بتفضل البوتي بس يفضل نحاول نعوده علي قعده الحمام الاول وفي قطعه بلاستك بتركب علي القعده علشان حجمها يكون مناسب لطفل صغير ..... وحتي لو رفض وهتستخدمي البوتي يفضل تحطيها في الحمام برضو علشان يتعلم اداب دخول الحمام والكسوف وميعملش قدام حد ويفهم العيب ... وكمان علشان يحس انه بقي كبير وزيه زي الكبار👍👍👍👍 ....

6- هنتوكل علي الله وهنقلعه البامبرز ونلبسه ملابس داخليه عادي ... هندخله الحمام يقعد عليه 4 مرات يوميا بالنهار حتي لو مطلبش ونصبر عليه😢😢😢😢 ...

7- كل ام بتعرف الحركات اللي ابنها بيعملها لما يكون عايز يدخل الحمام 🤔🤔🤔 مثلا يمسك بطنه او يحط ايده تحت او تعبيرات علي وشه او انه يروح في جنب في البيت يستخبي فيه .... واول ما يعمل الحركات دي نوديه علي الحمام علطول حتي لو مطلبش ...

8- بعد كده نحاول ندربه انه يقول عايز اروح الحمام باننا نقعد نقول بيبي وهو بيعمل وواحنا واخدينه علي الحمام نفضل نكرر الكلمه بيبي ... عايز بيبي ... طيب يالله نروح نعمل بيبي .... خلصت بيبي ... كمل بيبي ... ولما يعمل الحركات اياها نقعد نقوله عايز بيبي ؟؟ طيب يالله نروح نعمل بيبي ... ومعلش هتقولي بيبي 2 مليون مره 😂😂😂

9- نيجي للزتونه بالليل هندخله الحمام قبل النوم ومنلبسوش بامبرز بالليل وممكن نفرش مشمع تحت الملايه لانه لو لبسه هيحس بالاطمئنان وهيعمل فيه وهتلاقيه رجع يقاوم دخول الحمام تاني😩😩😩 ... هو طبعا موضوع متعب لانه هيعملها علي نفسه في الاول بس ده موضوع ضروري ... ومهم نصحيه في وسط النوم مره وندخله الحمام وبعد كده هو اللي هيصحيكي ✔✔✔...

10 - كل مره يعمل فيها في الحمام نقعد نهلل ونصقف ونقوله شاطر شطوره اكنه جاب 99 في الثانويه العامه 😂😂😂 علشان نشجعه ونعمله تحفيز نفسي 😇😇😇..

11- لو عملها علي نفسه ممنوع الضرب🔨🔨🔨 او الزعيق🔫🔫 نتحمل ونمسح اللي عمله ونغيرله ونكلمه بجديه ان ده غلط وعيب كده ومقولتش ليه عايز بيبي ....

12- طبعا المكافات مهمه جدا ... زي مثلا نديله حاجه حلوه او نقوله لو قولت بيبي هتاخد كذا 🤗🤗 .....

13- مهم جدا طرق التحفيز زي مثلا نحكي قصه عن الطفل فيزو اللي دخل الحمام وكان شاطر وقدر ينقذ العالم بالبيبي بتاعه 😂😂😂😂 ... او اننا نزين الحمام بصور وملصقات اطفال ... وممكن نجيب الوان صناعيه فاقعه وننقط نقطتين في التواليت وكل مره نعمل لون شكل ... بودي هيعمل ايه المره دي ؟؟ ازرق ولا بمبي ؟؟ 😂😂😂 ....

14- خليه يشوفك وانتي بتنضفي الحمام وراه وبتشدي السيفون 🚽🚽😅علشان يفهم اننا لازم ننضف ورانا ... وعلشان ترحمي البشريه من اللي هيعمله فيها بعد كده لو مشدش السيفون لما يكبر 😂😂😂😂

15- الصبر ثم الصبر ثم الصبر الموضوع مش سهل ويارب يعين كل ام علي اللي هي فيه 😂😂😂😂 ....

واعمل شير علشان نوصل لكل الناس ...

واعمل اعجاب بالصفحه علشان يصلك كل جديد ...

د خالد عبدالتواب
دكتوراة طب الأطفال جامعة القاهرة

27/11/2019

- آخر سنتين قابلت شاب صغير بيلعب فى الجيم وبيربى عضلات وخلافه وكان عنده ارتفاع فى انزيمات الكبد والصفرا ، الكابتن اللى بيدربه بيوصفله مكملات غذائية وبروتينات ، مش كده وبس ده الكابتن بيتابع وظائف الكبد والكلى

- ولما انزيمات الكبد ارتفعت بدأ الكابتن يوصف للمريض دواء اسمه سليمارين ، أم الولد لما قلقت أخدت ابنها وراحت تكشف عليه ، اللى بيعمله الكابتن ده اسمه جريمة ، والممارسات دى متواجدة بكثرة والشباب اللى عايز يبنى عضلات بتكون عنده ثقة فى الكابتن أكتر من أبوه وأمه ، مشاكل كتير فى الكلى كمان بنشوفها من المكملات الغذائية

- بعض الكباتن كمان بيعطوا حقن اندروجن لبعض الابطال لتكبير العضلات ، حقن الاندروجن بتزود كرات الدم الحمراء وممكن تؤدى لجلطات القلب .

- نصيحتى لكل شاب بيحاول يبنى عضلاته أو يظهر بمظهر حلو :مارس الرياضة بطريقة طبيعية معتدلة ، بناء العضلات بالطريقة المبالغ فيها دى وشراء الوهم سيكون خطر كبير على صحتك

ياريت نعمل شير علشان كل لم تعرف وتلحق ابنها ...

د خالد عبدالتواب

24/08/2019

هوا شرب الميه ينفع للأطفال في الجو ده
سؤال مهم جدا
طبقا لاحدث التوصيات والدراسات ان شرب المياه للرضع وحديثي الولاده تحت عمر ٦شهور ثبت علميا انه بيعمل نقص في صوديوم الدم
وده خطر على الطفل
وبالتالي فإن لبن الام هوا انسب تغذيه ربانيه للطفل
وفي الحر ده بنعوض الأطفال بعدد رضعات زياده حيث أن لبن الام معظمه ماء رباني خالي من الأضرار مع التهويه والاستحمام

د/عزت سمير صالح

29/06/2019

البوست ده للأمهات الجدد و الجدات كمان

السؤال اللي ضيع الرضاعة في مصر

ندي ايه للطفل اول يوم علي ما ينزل لبن 🤔🤔🤔🤔

اول يوم ده يوم صعب اوي علي الطفل و علي الام

ده اول يوم ليه علي كوكب الارض

و بيكون عنده توتر و قلق و خوف مش طبيعي

الحاجة الفعالة اللي محتاجها الطفل هي الملامسة و الشعور بالام

بس

حتي لو رضع من الام مش بياخد حاجة تذكر

لان لبن السرسوب مجرد سائل لزج مفيش فيه ميه و لا سكر

و لكن المصة الاولي اثناء انفصال المشيمة هي أقوي مدر للبن معروف حتي الآن

طب الواد الغلبان اللي وقع تحت ايد استشاريين الرضاعة المفتريين اللي مش معترفين ببروتوكلات الجدات الأصيلة يعمل ايه ؟😋😋😋😋

ربنا سبحانه و تعالي أمن له اليات البقاء من قبل ما يتولد

يعني ايه ؟؟؟

اول حاجة الطفل بينزل عنده ١٠٪؜ من وزنه ماء زيادة بين الخلايا
عارفين الكيس اللي بيطرقع ده اللي بيتلف فيه الحاجات القابلة للكسر

أهو كل خلية من جسم الطفل حواليها ميه زيادة بتأمن خروجه سالما و بتحميه من الجفاف لمده تصل الي ٤٨ ساعة يعني يومين

تاني حاجة الطفل بينزل متغطي بطبقة شمعية بتحمي جلده من تبخر الماء و حدوث جفاف
يعني اوي تحمي الطفل بشامبو اول يوم
الطبقة دي مش بس بتحميه لأ دي كمان بتحتفظ بريحة الرحم اللي هو كان متعود يشمها و ده بيقلل التوتر

معدة الطفل مش فاضية
فيها كمية محترمة من السائل الامنيوسي اللي كان حول الطفل في الرحم
و السائل ده يعتبر غذاء متكامل للطفل
و السائل ده مالي المعدة و الأمعاء
يعني صعب الطفل يجوع قبل ٢٤ ساعة

اخر حاجة و هي ان السرسوب خالي تقريبا من السكر
و ده بينشط الكبد يصنع سكر ذاتيا و ده بياخد وقت نسبيا و لكن بيحافظ علي مستوي السكر في الدم ثابت مدة طويلة
و الالية دي بالذات بتتعطل لوالطفل اخد اي سكريات مباشرة حتي لو كان لبن ام اخري
🍌🍇🍉🍶🍯🥤🥜🌰🍪🍭🍬🍫🍩🍮🍧

الطفل مش محتاج اكل و لا شرب اول يوم

محتاج يمص لان المص من الممارسات اللي بتهدي الطفل جدا و بتحسسه بالشبع

افضل حاجة طبعا ح**ة الام
او إصبع الام لانه شبه الح**ة
بشرط تكون الاظافر مقصوصة و الايدي مغسولة

و طبعا اتفقنا ان الطفل ياخد المصة الاولي فور خروجه اثناء خروج المشيمة
د/إيناس شربيني
استشاري الرضاعة الطبيعية

27/06/2019

- إمتى هتحتاج تستشير دكتور متخصص أمراض كلى ؟
=============================

الإجابة :
1️⃣ مريض سكر أو ضغط من فترة طويلة خصوصاً لو مش متظبط

2️⃣ مريض بياخد مسكنات كتير و لفترة طويلة

3️⃣ الأمراض المناعية مثل الذئبة الحمراء وغيرها من الأمراض التى تحتاج مثبطات للمناعة

4️⃣ لو في تغيير ملحوظ في كمية البول او لونه

5️⃣ لو في مشاكل في البروستاتا عند الرجال فوق سن 50 وبدأت تعمل قصور كلوي

6️⃣ لو في حد في العائلة بيتعالج من قصور الكلي المزمن او الأمراض المناعية المسببة له

7️⃣كبار السن فوق 70 سنة و خصوصاً في حالة نقص شرب الماء او التعرض للجفاف لأي سبب

8️⃣ السيدات في حالة تسمم الحمل

9️⃣قبل عمل أشعة بالصبغة لأي سبب

🔟لو في أمراض وراثية في الكلي عند الأقارب من الدرجة الأولى خصوصاً مرض (تكيسات الكلي)

أ.د محمود عمارة
أستاذ الباطنة العامة والسكر والكلى
رئيس وحدة الكلى
كلية الطب جامعة المنوفية

OMAR EL_mokhtar pharmacy

23/06/2020

31/05/2020

01/05/2020

01/05/2020

30/04/2020

30/04/2020

30/04/2020

29/04/2020

27/11/2019

24/08/2019

29/06/2019

27/06/2019

Address

Opening Hours

Telephone

Website

Alerts

Shortcuts

Share

Monday	7am - 2am
Tuesday	7am - 2am
Wednesday	7am - 2am
Thursday	7am - 2am
Friday	7am - 2am
Saturday	7am - 2am
Sunday	7am - 2am