Dr/Amal Mohamady

31/12/2025

مع بداية سنة جديدة…
ربنا بيدينا فرصة جديدة.. صفحة بيضا، ومساحة نراجع فيها إحنا بنحب مين وعبّرنا له قد إيه...

التعبير عن المشاعر الإيجابية مش رفاهية… ده احتياج نفسي أساسي.
الكلمة الحلوة، الحضن، رسالة صادقة، نظرة تقدير
كلها بتنشّط هرمونات الأمان والارتباط زي الأوكسيتوسين
اللي بيقوّي العلاقات وبيخلق إحساس بالدفا والانتماء.

السنة الجديدة مش لازم تبدأ بقرارات كبيرة ومعقّدة…
ممكن تبدأ بحاجه بسيطة جدا:
إنك تقرب أكتر من اللي بتحبهم...
وتقول لهم بوضوح:
إنتوا غاليين… وجودكم في حياتي نعمة....
قولها/ قوليها .. لأولادك
لشريك حياتك
لأمك وأبوك
لأخواتك
لأصحابك
ما تقولش “هو عارف”
لأن النفس البشرية محتاجة تسمع وتحس وتتطمن...

إحنا لما نعبر عن مشاعرنا
مش بنخسر كرامة
ولا بنضعف
ولا بنبالغ
بالعكس…
إحنا بنزرع أمان
وبنبني دفء
وبنخلق روابط صحية بتعيش وتكمل.

السنة الجديدة فرصة
نختار فيها إن بيوتنا تبقى أحن....
وعلاقاتنا أصدق....
وقلوبنا أقرب لبعض....
يمكن كلمة منك
تكون سبب في طمأنينة شخص...
أو شفاء وجع...
أو إحساس بالانتماء كان غايب....
ابدأ السنة بحب…
الحب عمره ما كان خسارة
د / أمل محمدي
# رحلة وعي

30/12/2025

مش بنودّع سنة… إحنا بنودّع نسخة من نفسنا.
نسخة تعبت، غلطت، حاولت، وقامت تاني.
سنة عدّت علينا بكل اللي فيها: فرح كملناش فرحتُه، وحزن اتعلّمنا منه غصب عنّا، وتجارب سيبت جوانا أثر… بس كمان سيبت وعِي.

من منظور نفسي وعلمي، استقبال سنة جديدة مش معناه نكتب أمنيات وخلاص،
لكن معناه نراجع، نفهم، ونغلق الدواير المفتوحة جوه نفسنا.

🔹 أول خطوة صح: التقييم بدون جلد ذات
اسأل نفسك:

إيه اللي اتعلمته؟

إيه اللي استنزفني؟

إيه اللي محتاج أكمّله، وإيه لازم أسيبه؟
العقل لا ينمو باللوم، لكنه ينضج بالفهم.

🔹 تاني خطوة: التسامح مع الذات
الشخص اللي بيعرف يسامح نفسه،
بيكون أقدر على التغيير الحقيقي.
سامح نفسك على قرارات اتاخدت وقت ضعف،
وعلى صبر طال أكتر من اللازم،
وعلى سكوت كان المفروض يكون صوت.

🔹 تالت خطوة: تحديد نية
النية اتجاه.....
نية الراحة، نية الاتزان، نية العلاقات الصحية، نية إنك تختار نفسك بدون أنانية.
النية الصح بتخلق قرارات صح طول السنة.

🔹 رابع خطوة: تنظيف الداخل قبل التخطيط للخارج....
مش هينفع سنة جديدة بعقل مزدحم بمخاوف قديمة،
ولا قلب مليان جروح من غير اعتراف.
العلاج النفسي... الوعي....التأمل... أو حتى وقفة صادقة مع النفس....
دي مش رفاهية… دي ضرورة.
✨ وبعد كده اكتب أهدافك ...
الحياة لا تتغير مع بداية سنة جديدة،
لكن الإنسان هو اللي يتغير… فتتغير حياته.
استقبل السنة الجديدة بقلب أهدى،
بعقل أوعى،
وبوعد حقيقي لنفسك:
إنك تكون أحنّ عليها، وأصدق معاها، ومش هتكمّل طريق بيكسّرك... ولا علاقة بتدمرك ...

سنة جديدة …
هي فرصة جديدة للوعي ...
— د. أمل محمدي
استشاري نفسي وأسري
# رحلة وعي
# جلسات نفسية
# جلسات كوتشينج
# سلامك النفسي
# الوعي الذاتي

27/12/2025

كل إنسان فينا نشأ داخل بيئة معينه...
اتزرعت جواه عادات..
وترسخت قيم...
وتكونت مفاهيم...
وتشكل وعيه بنفسه وبالآخر وبالحياة....
الإنسان بيحمل ما يُسمّى ب
المنظومة القيمية والنفسية
واللي بتتحكم في طريقة تفكيره، ردود أفعاله، وتوقعاته من شريك حياته.

علشان كده، لما يحصل ارتباط بين شخصين جايين من بيئات متباعدة جدًا،
الخلاف ما بيبقاش على تفاصيل بسيطة،
لكن بيكون صراع على: معنى الاحترام،
طريقة التعبير عن المشاعر،
دور كل طرف في العلاقة،
إدارة المال،
وتربية الأبناء.

وده لا يعني إن طرف صح وطرف غلط،
لكن يعني إن اللغة النفسية بينهم مختلفة...

الدراسات النفسية بتشير إن التقارب البيئي والقيمي
من أهم عوامل: الاستقرار الزواجي،
تقليل الصراعات المزمنة،
وبناء علاقة آمنة وصحية.

✨ الاختيار الواعي لشريك الحياة مش ضد الحب،
ده بيحميه من الاستنزاف،
ومش تعقيد…
ده نضج ووعي نفسي.

✨ومن هنا تم إعداد
كورس:
✨كيف أختار شريك حياة صح... ✨
الكورس دا مهم لأي حد داخل علي مرحلة الخطوبه والزواج ...
كورس نفسي وأسري واجتماعي ..
هيساعدك: تفهم نفسك واحتياجاتك النفسية،
تميّز بين الانجذاب والتوافق،
تتعرف على أنماط التعلق،
تكتشف العلامات التحذيرية قبل الارتباط،
وتختار شريك يناسب بيئتك وقيمك وحياتك.

الزواج قرار عمر،
والوعي فيه ضرورة مش رفاهية....
د. أمل محمدي
استشاري الصحة النفسية واستشاري أسري.

27/12/2025

سيغموند فرويد:

"نحن لا نكرر العلاقات صدفة، بل نعيد فيها تمثيل جراحنا القديمة بحثًا عن الشفاء."

27/12/2025

إريك فروم:

"الحب ليس شعورًا نعيشه، بل فنّ نتعلّمه ومسؤولية نختارها."

22/12/2025

✨الفرق بين العيوب الشخصية والاضطرابات النفسية
1️⃣ العيوب الشخصية
دي سمات أو أنماط سلوكية مكتسبة:
اتعلمناها من التربية

أو تجارب مؤلمة

أو بيئة غير آمنة
زي:
الخجل الزائد

ضعف الثقة بالنفس

عدم الأمان الاجتماعي

إرضاء الناس

الخوف من الرفض

🔹 بتتحسن بالتوعية، التدريب، تغيير الأفكار، وتنمية المهارات
🔹 الشخص يقدر يتحكم فيها نسبيًا
🔹 مش مرض… ومش تشخيص طبي

2️⃣ الاضطرابات النفسية
دي حالات نفسية لها معايير تشخيصية واضحة:
شدة أعلى...
مدة أطول...
تأثير مباشر على الحياة اليومية....

أحيانًا أعراض جسدية
زي:
الرهاب الاجتماعي

الاكتئاب

اضطرابات القلق

الوسواس القهري

🔹 غالبًا تحتاج علاج نفسي منظم (زي CBT)
🔹 أحيانًا تحتاج دواء
🔹 مش ضعف شخصية ولا عيب

ثانيًا: الخجل / عدم الأمان الاجتماعي

الرهاب الاجتماعي

خلّينا نفصلهم عمليًا:

عدم الأمان الاجتماعي

بخاف من نظرة الناس

بحس إني أقل

بتوتر في الكلام

أقدر أتكلم بس مش مرتاح

لسه بشتغل وبنزل وبقابل ناس

٠ ده نمط نفسي
٠ بيتحسن بالبرامج التطويرية + الوعي + التدريب

الرهاب الاجتماعي

خوف شديد من التقييم

تجنب المواقف الاجتماعية

أعراض جسدية قوية (خفقان، تعرق، ارتجاف)

ممكن أرفض شغل أو دراسة أو علاقات

الخوف مسيطر ومش بإيدي

٠ ده اضطراب نفسي
٠ يحتاج تدخل علاجي متخصص (CBT أو CPT)

ثالثًا: ليه نفس الشخص يسمع تشخيصين مختلفين؟

لأن:
في منطقة رمادي بين الاتنين

عدم الأمان لو ساب نفسه → ممكن يتحول لرهاب

والرهاب ممكن يبدأ أصلاً كعدم أمان

🔹 الفرق الحقيقي مش في الاسم
🔹 الفرق في: درجة الشدة + التأثير على حياتك

رابعًا: البرنامج ينفع ولا لازم CPT؟

الإجابة المهنية الصادقة ..

البرنامج مناسب لو:

لسه بتتعامل

الخوف مش معطلك تمامًا

واعي وبتحاول

محتاج تفهم نفسك وتغير أنماطك

البرنامج يشتغل على:

الجذور

المعتقدات

الصورة الذاتية

الأمان الداخلي

المهارات الاجتماعية

CPT / CBT مطلوب لو:
الخوف مسيطر

بتتجنب ناس وحياة

أعراض جسدية قوية

بقالك سنين ومش بتتحسن

📌 العلاج هنا بيشتغل بشكل علاجي دقيق ومتدرج

الخلاصة المهمة ...

مش كل خوف = رهاب
ومش كل توتر = اضطراب
ومش كل برنامج = علاج
ومش كل علاج = فشل شخصي

أحيانًا: نبدأ ببرنامج → نفهم نفسنا
ولو احتاجنا → نكمّل بعلاج متخصص
د / أمل محمدي
# رحلة وعي

22/12/2025

✨القلق المعمّم ✨
هو مش خوف… القلق المعمّم إنهاك...

هو إن عقلك مايهداش.. حتى وانت في أمان.
إنك تصحى تعبان قبل ما اليوم يبدأ، وتحس إن في حمل تقيل على صدرك من غير سبب واضح.
تفكير زائد، توقّع الأسوأ، توتر مستمر، وإحساس داخلي إن “في حاجة غلط”… رغم إن كل حاجة شكلها طبيعي.

علم النفس بيعرّف القلق المعمم (Generalized Anxiety Disorder)
على إنه قلق مزمن ومستمر، بيستمر شهور او سنين ..وبيكون شامل معظم جوانب الحياة،
مش مرتبط بموقف واحد، ولا مشكلة محددة، لكنه حاضر طول الوقت.

🔹 المصاب بالقلق المعمم:
بيفكر زيادة عن اللزوم...
بيحلّل كل حاجة....
بيتوقع الخطر قبل ما يحصل.....
بيصعب عليه يطمن حتى مع الكلام الإيجابي....
جسمه دايمًا في وضع “استعداد للخطر”....

وده لأن الجهاز العصبي عنده عايش في حالة استثارة دائمة،
وكأن العقل مش عارف يفصل بين الخطر الحقيقي والقلق المتخيل....

🔹 أعراضه مش بس نفسية ... صداع...شد عضلي.... أرق.... خفقان.... اضطرابات معدة....
إرهاق مزمن…
الجسم بيصرخ لأن النفس تعبت....

والأهم…
القلق المعمم مش ضعف شخصية، ولا قلة إيمان، ولا دلع.
هو اضطراب نفسي حقيقي.. ليه جذور بيولوجية ونفسية،
وبيحتاج فهم... واحتواء... وعلاج صحيح....

العلاج النفسي – خصوصا العلاج المعرفي السلوكي –
بيساعد الشخص يفهم أفكاره القلِقة...ويعيد تدريب عقله....
ويعلّم جسمه يرجع لحالة الأمان بدل الطوارئ...

✨ لو بتحس إنك قلقان “من غير سبب”...
اعرف إن السبب موجود… بس جواك...مش ضدك.
ونقطة الوعي هي أول طريق الشفاء....

اطمن… القلق بيتعالج، والراحة ممكنة.
وإنت تستاهل تعيشها.
د / أمل محمدي
# رحلة وعي
لحجز الجلسات والاستشارات تواصل خاص

21/12/2025

السنة الجديدة قرار…
مش مجرد تاريخ..
لو ناوي تبدأها براحة نفسية حقيقية، سلام نفسي ..
وتكسر دايرة الضغط والتكرار... لو عايز تفهم نفسك ..وتحل مشاكلك ..
دلوقتي الفرصة مناسبة...

✨ خصم ٣٠٪ على سعر الجلسات النفسية
بمناسبة قدوم السنة الجديدة....
لفترة محدودة....

استثمر في نفسك…
لأنك الأساس...ونفسيتك اهم من اي حاجة ...

📩 للحجز والاستفسار تواصل معنا على الخاص
01002004859
د / أمل محمدي

20/12/2025

الموضوع دا مهم جدا ومحتاج شرح وتفاصيل كتير بس هجاوبك بإختصار
علشان نربي أولادنا عندهم اكتفاء بنفسهم ووعي ومفيش جواهم فراغ أو هزّة نفسية، ركّزي على دول 👇
٠ حبيهم حب ثابت مش مشروط... بطاعة أو نجاح، الطفل اللي متطمن عاطفيًا بيطلع ثابت من جواه....
٠ اسمعيهم بجد مش نص سمع...خلي إحساسهم مهم ومسموع بالنسبالك...
٠ علّميهم يعتمدوا على نفسهم على قد سنهم... ما نعملش عنهم كل حاجة يقدروا يعملوها...
٠ اسمحي لهم يغلطوا الغلط تعليم مش فشل...
٠ عبري عن مشاعرك صح وعلّميهم يسموا مشاعرهم بدل ما يكبتوها...
٠ قدمي قيمة مش مقارنة ما نقارنهمش بغيرهم... كل طفل له بصمته....
٠ قربيهم من ربنا ..الإيمان بيدي امتلاء داخلي وأمان نفسي...
٠ الطفل اللي بيتربي على الاحتواء...والفهم... والمسؤولية… بيكبر وهو ساند نفسه من جوه ...
د / أمل محمدي
# رحلة وعي
https://whatsapp.com/channel/0029Vb8GkmoC6ZvoIa6cLI3M

Channel • 369 followers‎ • مرحبًا بك في قناتنا، حيث نأخذك في رحلة عميقة داخل النفس البشرية! ✨

هنا تجد محتوى نفسي علمي موثوق ومبسط عن علم النفس والصحة النفسية، بالإضافة إلى نصائح قوية لتنمية الذات وفهم أعمق للعلاقات الإنسانية.

نساعدك على اكتشاف ذاتك، التعامل مع مشاعرك، وتطوير طريقة تفكيرك بشكل صحي وواعٍ.

انضم إلينا، وابدأ رحلتك نحو وعي أعمق وحياة أكثر اتزانًا وسلامًا نفسيًا! 💙
د/ أمل محمدي‎

18/12/2025

✨ العلاقات هي مصدر مهم من مصادر سعادتنا الحقيقي....

كل الدراسات النفسية الحديثة بتؤكد حقيقة واحدة لا خلاف عليها:
جودة علاقاتنا هي العامل الأقوى في شعورنا بالسعادة، الاستقرار، وحتى الصحة النفسية والجسدية.

دراسة هارفارد الطولية عن السعادة – واللي امتدت لأكتر من 80 سنة – أثبتت إن الأشخاص الأكثر سعادة ورضا عن حياتهم مش هم الأكثر مالًا ولا نجاحا،
لكن هم أصحاب العلاقات الآمنة والداعمة.

ومن منظور نفسي، العلاقة الزوجية تحديدًا هي المصدر الأساسي للأمان العاطفي.
الزوجة لما تكون مطمئنة، مسموعة، مُقدَّرة، ده بينعكس مباشرة على:
استقرار البيت
هدوء الزوج النفسي
قدرة الطرفين على العطاء والنجاح....

علم النفس الإيجابي بيؤكد إن المشاعر معدية،
وسعادة الزوجة مش “تفصيلة”،
دي حالة نفسية بتنتقل… لو هي بخير، البيت كله بخير....
عالم النفس جون جوتمان – أحد أهم الباحثين في العلاقات الزوجية – بيقول:
العلاقات الناجحة لا تقوم على غياب الخلاف، بل على وجود الاحترام، التقدير، والاحتواء..
حتي وقت وجود الخلاف...
والقرآن الكريم سبق العلم الحديث لما وصف الزواج بقوله تعالى:
﴿وَمِنْ آيَاتِهِ أَنْ خَلَقَ لَكُم مِّنْ أَنفُسِكُمْ أَزْوَاجًا لِّتَسْكُنُوا إِلَيْهَا﴾
لتسكنوا إليها…
مش لتسيطروا، ولا لتُهملوا، ولا لتؤذوا،
لكن لتسكن القلوب وتطمئن الأرواح...

وقال سبحانه:
﴿وَعَاشِرُوهُنَّ بِالْمَعْرُوفِ﴾
والمعروف نفسيًا هو: احترام، أمان، احتواء، تقدير.....
الزوجة السعيدة ليست امرأة مدللة،
بل امرأة مش مجروحة نفسيًا،
مش مهملة عاطفيا ....
مش محاربة داخل بيتها....

ولما تحافظ على علاقتك بيها …
أنت مش بس بتحافظ على شخص،
أنت بتحافظ على أسرة ...وعلي نفسك، صحتك النفسية، وسلامك الداخلي.

لأن في النهاية…
سعادتك تبدأ من علاقتك... وأقرب علاقة لقلبك هي بيتك....
د/ أمل محمدي
لحجز الجلسات والاستشارات تواصل خاص