13/11/2025
🩵🩷💜
🧪 القصة دي حصلت فعلاً مع واحدة صاحبتي... وعايزة أقولك ازاي اختارت المعمل الغلط!
كانت “منى” تعبانة بقالها كام يوم، راحت أول معمل قابلها في الشارع، شكله حلو، الديكور شيك، والحيطة مليانة شهادات... قالت خلاص، ده شكله مضمون 👌
دخلت سحبت العينة في دقيقتين بالظبط، لا حد سألها عن أدوية بتاخدها، ولا عن سبب التحليل، ولا حتى عن هل كانت صايمة ولا لأ!
بعد ساعتين، استلمت النتيجة…
رحت بيها للدكتور، بصّ فيها كده وقال:
"النتايج دي مش من معمل بيشتغل كويس خالص!"
وهنا بدأت “منى” تفهم يعني إيه اختيار المعمل الصح مش بالشكل ولا بالاسم الكبير!
📍المعمل اللي بيطلع نتائج دقيقة لازم يكون ماشي على نظام Quality Control يعني مراقبة جودة حقيقية في كل خطوة:
من أول استقبال المريض، لحد ما التقرير يطلع بإمضاء مسؤول التحاليل.
يعني إيه؟
يعني لما تدخل المعمل، الموظف يسألك كل حاجة تخص التحليل:
هل صايم؟ بتاخد علاج معين؟ عندك أمراض مزمنة؟ عملت تحاليل قبل كده؟
ده مش فضول، دي أسئلة بتمنع إن نتيجتك تطلع غلط.
أما المعمل اللي يدخل المريض على غرفة السحب من أول الباب، من غير أي أسئلة... يبقى ده معمل بيشتغل "أي كلام"!
💡 كمان خُد بالك من نقطتين مهمين جدًا:
1️⃣ النضافة مش في دهان الريسبشن ولا المكاتب، النضافة الحقيقية بتبان في المعمل نفسه والـtoilet، لأن لو المكان ده مش متعقم، يبقى العيِّنات ممكن تتلوث بسهولة!
2️⃣ مفيش حاجة اسمها نتيجة تحليل في 5 دقايق، التحاليل الدقيقة بتحتاج وقت، ومعامل الجودة بتراجع النتائج أكتر من مرة قبل الاعتماد.
ولو المعمل كلّمك بعد ساعات وقالك:
"يا فندم ممكن نعيد سحب العينة؟ النتيجة مش مطمئنة"
فده معمل محترم 👏 مش بيشتغل أى كلام ولا يخاف يواجه لو فيه حاجه شاكك فيها
ده دليل إن عندهم ضمير وما بيطلّعوش أي رقم وخلاص.
وفيه كمان فرق بين:
🔹 معمل عنده أجهزة حقيقية بيشتغل بيها التحاليل بنفسه.
🔹 ومعمل تاني مجرد مكتب بيجمع عينات ويرسلها لمعمل تاني يعملها!
الأول بيصرف على أجهزة وكيماويات وبيتابع الجودة بنفسه،
التاني غالبًا هدفه لم فلوس 💸
لما تختار معمل، ما تبصش عالاسم ولا الديكور، بص على الضمير اللي ورا التقرير!
شاركنا فى التعليقات هل تعمل بمعمل يطبق معايير الجوده
https://www.facebook.com/share/p/14MqLqiKRCe/
شارك البوست لتعم الفائده 🥰
ولو أول مره تشوف بوست ليا
أنا نورهان الشريف
اخصائيه تحاليل طبيه
مهتمه بتبسيط الطب المعملى
ووكيل لكتب القمة للتحاليل الطبية
المجموعة الأقوى والأشمل والاشهر فى مصر والوطن العربي بفضل الله
منقول.. ✋
