https://www.facebook.com/591619454277651/

Muhammad Fayeq - محمد فايق, Cairo (2026)

02/04/2026

بعد انتهاء فترة حلب الـAI،
هتلاقي رسايل تسويق بتقول:
(هذا المنتج مصنوع بشريًا 🥰)
والرسايل دي غالبًا هتنجح تسويقيًا بعد ملل الناس من سخافة النتايج المصنوعة بمعادلات الترانزيستور واشتياقهم لأصالة ديفوهات الصناعة البشرية المنمنمة الدافئة..

27/03/2026

في جملة كليشيه كوميدية كده بتتقال كل عيد أو مناسبة، فيما معناه:
هتجيلك مكالمة/رسالة/معايدة من الإكس، ماتردش عليها عشان هتبوظ كل العلاج وتضيع مجهود الصيرابيست وكده 😔

وعلى الرغم من تقديري واحترامي لعنصر الـ هاها الموجود في هذا الكليشيه،
إلا إنه بيحمل مضمون خاطيء
احنا مش بنتعالج من علاقة

نعم؟!!
يعني ايه الكلام ده؟!
لا ماتقولش كده بليز🥹
ده احنا بندفع فلوس كتير اوي عشان نتعالج من العلاقات والإكسات😭

هقولك..

لو الطرف التاني ف العلاقة حاول يرجع، ف حضرتك ضعفت وغلبك الشوق والحنين ونوستالجيا ضيق التنفس، ورديت بتجاوب؟ يبقى أنت ماتعالجتش أصلًا

أنت كنت بتدفع فلوس للصيرابست عشان تشتري صديق لطيف ومتقبل ومتفهم ومتوجدن، تعيط على كتفه ويطبطب عليك ويحقنك مخدرات وجدانية ف قلبك عشان تهدى وتتوهم إنك بتموڤ أون وبتاع

ايه ده امال احنا بنروح نتعالج من إيه؟

خد عندك يا سيدي:
١- بتتعالج من عدم فهمك للأسباب والظروف والخبرات والاحتياجات اللي خلتك تدخل ف العلاقة دي أساسًا

٢- وبتفهم الاحتياجات دي اتكونت جواك ازاي؟ وإيه فيها ممكن يتغير وايه لأ؟ وإيه الرابط بين احتياجاتك وبين العلاقة دي بحيث إنها بانت ليك حلوة أو مُشبعة أو جذابة في وقت ما

٣- بتعرف الطرف التاني ده كان بيقدم إيه أو جذاب ازاي بحيث خلاك تستمر ف العلاقة

٤- لو مكانش الطرف التاني بيقدم حاجة، طب ايه اللي منعك تنهيها بسرعة؟ خوف؟ تعلق؟ تعود؟ كسل؟

٥- بتشوف الأذى اللي حصلك كان ليه وازاي؟ وكان إيه دورك ف تسهيل الأذى ده؟ (بشكل محدد وموضوعي مش مجرد صعبانيات بلا مضمون ولا هدف)

٦- وازاي تتخلص من نمط الاحتياجات اللي بتوقعك ف النوع ده من العلاقات والنوع ده من الأشخاص

٧- وأهم وأجمل وأجرأ وأشيك فقرة اللي أنا بحبها أوي بقى: هل أنت كمان كنت مؤذي بشكل ما؟ وبأي درجة؟ وليه؟ وتحسن من نفسك ازاي؟ تبقى موضوعي مع نفسك وتقدر تشوف أخطائك ازاي؟

بس كده يا سيدي
ألف مبروك
كده انت اتعالجت
وبعدها مش محتاج تقلق لو الإكس أو أي أطياف من علاقات سابقة خبطت على بابك مرة تانية أو تالتة أو عاشرة، سواء برسالة أو معايدة أو مكالمة..

لأن الأساس أصلا اتغير

وأنت مابقتش خلاص الشخص اللي علاقة زي دي -أو شخص زي ده- تكون مغرية أو جذابة بالنسباله…
شكرًا

23/03/2026

-احمد ممكن اسألك سؤال؟

*طب هاتي الشاحن من جنبك عشان الموبايل هيفصل

-سيبك بس م الشاحن دلوقتي.. عايزة اسألك سؤال

*سؤال ايه يا حبيبتي؟

-اوعدني الاول تجاوب بصراحة

*اكيد هجاوب بصراحة، هاتي الشاحن بقى

-سيب الموبايل و الشاحن دلوقتي بس عشان خاطري و اوعدني تجاوب بصراحة!

*حاضر يا اسراء أوعدك هجاوب بصراحة..

-ماشي اما نشوف!.. هو انت حبيت كام بنت قبلي؟

*نعم؟!!

-ايه ماسمعتش؟!

*لا سمعت عادي.. بس أصل السؤال فاجأني شوية!

-مممم.. طب يللا جاوب

*مابلاش الأسئلة اللي مالهاش فايدة دي يا اسراء!

-معلش عايزة اعرف..

*هتقلب بخناقة!

-لا متخافش.. وعد مش هتخانق

*(نفس عميق): ماشي.. عايزة تعرفي ايه؟

-مانا قلتلك.. حبيت كام بنت ف حياتك قبلي؟

*عايزة اجابة عامة ولا اجابة دقيقة؟

-اجابة دقيقة ياريت!

*تمام، عايزة البنات اللي حبيتهم بصدق يعني ولا مشاعر عابرة؟

-مشاعر عابرة؟!!

*اه يعني افتتان سريع كده

-ااااه.. مممممم.. لا حب بصدق يا احمد!

*قبل ماعدي ال ٢٥ ولا بعد ال ٢٥؟

-نعم؟! هي تفرق؟

*طبعا!.. بعد ال ٢٥ بيكون في نضج كده ف المشاعر يا اسراء!

-ااااه.... لا يا سيدي اللي حبيتهم بعد ال ٢٥..

*طب اللي دخلت معاهم ف علاقة حب صريحة ولا حب من بعيد لبعيد؟

-من بعيد لبعيد ازاي يعني؟!

*يعني حب نظرات و تلميحات بس ماتطورش لعلاقة حب صريحة

-ممممم.. وده انت بتسميه حب؟!

*اه طبعا!

-تمام.. لا اللي دخلت معاهم ف علاقة صريحة يا احمد!

*ممممم.. طب اللي كان ينفع اتجوزهم ولا اللي مكانش ينفع؟

-هو في كده أصلا؟!

*طبعا!.. مش كل بنت حبيتها كان ينفع نتجوز!

-لا يا احمد اللي كان ينفع تتجوزهم!

*طب اللي الظروف فرقت بينا ولا اللي سيبتهم بمزاجي؟

-هو في سيبتهم بمزاجك؟!

*اه عادي اكتشفت ان طباعنا مش متوافقة بعد شوية

-مممممم.. لا اللي سيبتهم بمزاجك!

*طب اللي صارحتهم بالحقيقة ولا اللي اختفيت و قطعت معاهم فجأة من غير تفسيرات؟

-ايه ده؟! هو انت ممكن تقطع مع بنت بتحبها فجأة؟!

*طبعا!.. في بنات دراميين و مالهمش ف المصارحات و الحاجات الجميلة دي.. دول كنت بختفي طبعا!

-و عادي متصالح مع نفسك انك بتعمل كده؟؟

*اوي اوي

-ماشي يا احمد، البنات اللي صارحتهم!

*البيض ولا الخمريات؟

-نعم؟!!!

*ايه مالك؟

-انت بدأت تستهبل صح؟؟

*لا خالص عايز أجاوبك بدقة بس

-ماشي يا احمد،، الخمريات!

*اللي طولهم كان فوق ١٦٥ ولا تحت ١٦٥؟

-احمد!!!!

*في ايه؟

-خلاص مش عايزة اعرف!

*ايه ده ليه؟

-ولا حاجة خلاص مش عايزة اعرف!

*طب مقموصة ولا مش مقموصة؟؟

-لا مش مقموصة

*بجد ولا بتهزري؟

-بجد مش مقموصة

*بتقوليلي كده وخلاص ولا فعلا بجد مش مقموصة؟؟

-خلاص يا احمد!! انا غلطانة اني سألت!!

*طب هاتي الشاحن من جنبك بقى😁

21/03/2026

بعيد عن الأحداث اللي كلنا متابعينها،
الشباب المحللين ماشاءالله مش مخليين أي إضافة ممكن حد يضيفها😄
فهتكلم ف موضوع تاني ساخن برضو

في قاعدتين عامتين في الجواز سواء صح أو غلط،
سواء نتفق عليهم أو لا نتفق، سواء بيجرحوا أو مش بيجرحوا،
فهما موجودين وبنشوفهم كل يوم (بس مش بنقول) وغالبًا هيفضلوا موجودين إلى أن يشاء الله:

١- الراجل "الغني" القوي الكاريزما ذو الحيثية والمنصب والتحقق؟ له قواعد مختلفة لا تنطبق على متوسط الرجالة..
-يعني هتلاقيه مسموحله التعدد بشكل أكبر من العادي وهيتعرض لمقاومة وهجوم أقل..
-مسموحله فرق السن بينه وبين مراته يبقى كبير برضو..
-مسموحله يختار ويرفض بدون نقد لاذع من الستات..
-وف الغالب بياخد "مسامحة زواجية" وتُغفر له غلطاته بشكل أكبر من أي راجل متوسط..
-لا تفرط فيه الست -غالبًا بدون تعميم- إلا لو كانت نفس مستواه أو قريبة من مستواه من الجاذبية الزواجية

٢- الست الصغيرة والحلوة والنغشة واللي شايفة نفسها (تنكة سيكا يعني) والذكية اجتماعيا، بمقاييس مجتمعاتنا؟ لها قواعد مختلفة عن متوسط الستات برضو..
-يعني هتلاقي العديد من الريد بيل والبلاك بيل عاوزينها ومستعدين ويدفعوا فيها اللي وراهم واللي ادامهم لو هي توافق..
-هتلاقي مهرها غالي عادي بدون صياح..
-قليل اللي هيدور هي فلوسها ايه ولا شهاداتها ايه
-قليل برضو اللي هيسألها الأسئلة بتاعت هتشاركي ف مصروف البيت ولا لأ، وهتخدمي أهلي ولا لأ … إلخ
-جوزها -غالبًا- بيفوتلها حاجات أكتر من زوجة عادية
-لما هي اللي تهدد بالطلاق (سواء عندها حق أو مفترية)، الزوج -غالبًا- بيرتدع ويبوس الأيادي
-لو حصل واتطلقت؟ بتتجوز تاني بسهولة حتى لو معاها أطفال
-بتتشاف كانتصار لبعض الرجالة، فمش بيستخسر فيها غالبًا

وعشان الغنى والحيثية والجمال أشياء تقديرية ونسبية؟ بنلاقي في تفاوت كبير بين كل حالة وحالة..
يعني ايه؟
يعني لو جبت ١٠٠ راجل و١٠٠ ست فقط من المجتمع المليوني بتاعنا عشوائيًا؟ مش هتلاقي نصايح موحدة تنفعهم كلهم بنفس الكفاءة..

وعشان كده لما بشوف أي صياح طائفي بين الرجالة والستات، بسأل دايمًا: هما الصائحين والصائحات دول بيكلموا مين؟
بيكلموا المتوسطين؟ ولا تحت المتوسطين؟ ولا فوق المتوسطين؟ ولا السوبر؟ ولا اللي بين الطبقات اللانهائية دي؟

ندي مثال:
واحد بيصيح: الزوجة المصرية بنت تيت عشان كذا وكذا!!
حبيبي أنهو زوجة مصرية؟
الزوجة المصرية دي درجات وفئات كتير أوي..

وكذلك لما واحدة تصيح: الزوج المصري فيه كل العبر وكذا وكذا!
أختي الفاضلة، أنهو زوج مصري بالظبط؟

ويشاء العلي القدير،
إني شوفت وبشوف رجالة ملأت الدنيا صياحًا -مثلًا- على طلبات الست المبالغ فيها، والاقيه عينه نورت على واحدة بعينها وممكن يبيع لباسـ* عشان يتجوزها..
شوفت وبشوف واحدة -مثلًا- قادت حملات صليبية مقدسة ضد التعدد، وبعدين هوب زوجة تانية وتالتة ورابعة لأحدهم ذي المال والجاه عادي..

فبراحة يا جماعة😒
الحزء والصياح (غير إنه ملوش لازمة لأنه مستحيل ينطبق غير على قلة قليلة) بيشحن الناس ضد بعضها..
وده مش كلام حكم
ده كلام من قلب أسرار الناس
يبقى زوج وزوجة ولاد ناس وزي الفل،
بس سخنوا على بعض وتصادموا صدامات تافهة ولكنها دموية، بسبب بوستات صياح تسخيني من ناس سناجل أصلًا ولكنهم يملؤون الدنيا من حولنا صياحًا..
شكرًا

19/03/2026

بحترم جدًا قدرات الشباب الأصحاء اللي بيعرفوا يناموا بدري في ليلة العيد..
بغض النظر عن هما ليه قرروا يناموا بدري، فكلامي هنا عن القدرة 🫰

ماشاءالله وربنا يباركلهم يعني،

ده معناه جهاز عصبي قليل الاستثارة

أو عقل صباحي النشاط لا يرى ف حياة الناس البومة الليليين مايستحق كل هذا الصخب

أو معارف وأهل وأصدقاء هادئيين -صباحيين برضو- لا يغوونهم بالسهر

ولو كانوا متجوزين؟ فقد منعهم الله خناقة العيد اللي تطير النوم من العين

وكل ده معناه مستويات كورتيزول وأدرينالين تقترب من الصفر😁

فهنيئًا لهم على راحة
وتاني، ربنا يباركلهم ويرزقنا هذه المستويات الرائعة من السكينة الليلية 🥳
كل سنة وانتوا طيبين

17/03/2026

رحم الله امرأة اتعزمت عند حماتها فقامت من نفسها غسلت معاهم المواعين في هدوء وسكينة من غير ما تحس نفسها بطلة أولمبياد أو شهيدة حرب

ورحم الله رجلًا جاله فلوس فأدخل السرور على قلب امرأته وجابلها غويشتين عيار ٢١ من سكات بدون مايطلع مع أستاذة منى الشاذلي ويطالب بدرع الزوج المثالي🫶

13/03/2026

لو سُئلتُ عن أكثر مهارات حل الخلافات جمالاً وأدباً وتأثيراً، فسوف أقول هي الإنصات.
وليس الإنصات -فقط- هو الاستماع في صمت.
بل الإنصات أن تعي ما يُقال حرفاً، ويخلو عقلك وقتها من تجهيز الردود الدفاعية والتأفف والأحكام، والتشتت والمقاطعة،، حتى يتوقف المتكلم من تلقاءِ نفسِه.
فبإنصاتك للآخر، قد قطعت نصف مسافة الوصول إليه بأن أشعرته أنه يُستمع له بأُذُنٍ مهتمة.

12/03/2026

البوست ده 👇كتبته من ٦ سنين..
انهاردة بيحصل وحصل عادي🫶

#أوجمنتين

-صباح الخير

*صباح النور..

-أنا آسف للتطفل، لو مش هعطلك، حضرتك تعرفي الباسورد بتاع الواي فاي هنا؟

*مافتكرش الواي فاي مفتوح لاستخدام الزباين.. بس ممكن حضرتك تسأل حد من المكان..

-بعتذر لحضرتك.. بس اللي خلاني أسألك أنـ.......

*بلاش

-مش فاهم؟ بلاش إيه؟

*بلاش تحاول تتعرف عليا

-آسف للتطفل مرة تانية، بس ممكن أعرف ليه؟

*خلينا نعتبر الموقف ماحصلش ونقفل الموضوع على كده..

-بس أنا عايز أعرف بلاش ليه لو مش هيضايقك.. مجرد فضول بس

*(صمت)

-(باستغراب) هو حضرتك سرحتي مني ولا إيه؟

*لا أبدًا معاك.. حضرتك مُصر يعني؟

-ده بعد إذنك

*تمام.. شوف حضرتك .. دلوقتي أنت جاي تتعرف على بنت قاعدة لوحدها بسلام ف كافيه وتقتحم حدودها الآمنة وده شيء غير أخلاقي بالمرة.. بس مش دي المشكلة خالص دلوقتي..

-آسف للمرة التالتة ماقصدتش أتـ........

*صدقني مش مشكلة تطفل ولا شقط رخيص خالص.. الموضوع أكبر من كده وأنا حقيقي خايفة عليك

-أفندم؟!

*مستغرب وفضولك زاد ومش مصدقني صح؟

-كلامك غريب بصراحة.. خايفة عليا من إيه؟؟ هتجيبي حد يضربني مثلًا؟!

*لا خالص.. في حاجات تخوف أكتر من كده

-أمممم.. ممكن أعرفها الحاجات دي؟

*طيب أنا عايزة حضرتك تفتكر بس إني من الأول خالص قلتلك بلاش

-لا مفيش مشكلة فاكر كويس

*صمت*

-حضرتك سرحتي مني تاني!

*لا أبدًا معاك.. حضرتك إسمك حاتم الجمّال صح؟

-(بتهكم) كده أبهرتيني يعني؟

*(صمت)

-هو حضرتك بتسرحي كتير كده ليه؟؟

*خريج تجارة عين شمس سنة ٢٠٠٨ وكنت بتشتغل خدمة عملا ف بنك (.....) وحاليًا بتشتغل مدير مبيعات ف شركة (.....)

-(بتوتر) انتي مين وتعرفيني منين؟!

*متجوز وعندك بنتين -ميرال وجنى- والمدام إسمها ميار عبدالمحسن

-(بتوتر شديد) إنتي صاحبة ميار؟؟ هي اللي متفقة معاكي تعملي كده؟؟

*أرجوك ماتخليش التوتر يفقدك المنطق ف التفكير.. حضرتك اللي جيت تتعرف عليا بصورة عشوائية مش أنا اللي حاولت أتعرف عليك..

-امال انتي مين؟؟!

*عندك عربية رينو لوجان ورقمها (......)، رقم موبايلك (.......)، تحب أقولك رقم المدام كمان؟

-(بذهول) إنتي مين؟؟ مخاوية جن؟

*قلتلك بلاش تفقد التفكير المنطقي.. جن إيه اللي هيعرف عنك كل ده؟ جن إيه اللي هيعرف إنك عامل أكونت فيك على فيسبوك والبلاوي اللي بتعملها بيه؟

*علامات ذهول وتوتر وخوف بدون أي كلام*

*أنا آسفة إني تسببتلك ف كمية الخوف دي.. بس أنا قلتلك بلاش.. عن إذنك
*بتخرج من الكافيه*
——————————————

طبعًا معظم اللي قرأ البوست، استحضر قبعة الفكاكة الذكية وقعد يحط احتمالات يا ترى البنت عرفت كل ده عن حاتم أزاي؟🤔

كومبو المعلومات ده ممكن يتعرف عن شخص ازاي بالسرعة دي من مجرد لقاء بدون سابق معرفة؟
مراته مسلطاها؟
تعرفه من على النت؟
بتنتقم لصاحبتها؟
ممكن تبقى مخاوية جن بجد؟
ولا تكون هي نفسها جنية 😳؟
إلى آخر التكهنات اللي هرسناها مع بعض قبل كده دي..
الحقيقة إن الموضوع علمي بحت وأهلًا بيكم في عصر الـAugmented Reality
الaugmented reality يعني الواقع المدعوم..
مدعوم بإيه؟
مدعوم بالتكنولوجيا طبعًا..
ممكن بنت زي بطلة قصتنا كده تلبس نضارة نظر عادية المظهر لكنها عبارة عن جهاز متصل بالإنترنت ويقدر يرص معلومات عن أي شيء بتشوفه كأنها بتعمل عليه سيرش على الإنترنت..
وفي حالة الأشخاص، ممكن من صورة وجهه تعرف الأكونتات بتاعته من على السوشيال ميديا وتقدر تعرف عنه معلومات كتير جدًا حسب مهاراتها الرقمية وقدرتها على التنقيب الشبكي وجودة البرنامج المستخدم ف البحث والتنقيب وربط النتايج ببعض..
الكلام ده مش جديد وفكرة الواقع المدعوم موجودة من عشرات السنين.. لكن التطبيق التجاري لها هو اللي كان شبه مستحيل.. بس مع التقدم التقني حاليًا، أصبح الموضوع قابل للتنفيذ التجاري بسهولة.. وممكن قريبًا نلاقي نضارات أو عدسات جوجل للفضائح بتتباع بالقسط ف كارفور عادي 😎
ثانك يو

03/03/2026

-قال الزوج لمعالجه النفسي: كنا ف دولة خليجية..

*تمام.. و بعدين؟

-ف الفترة دي مراتي كانت حامل ف طفلنا التالت.. و كانت دايما بتتخانق معايا..

*(بهدوء) كانت بتتخانق معاك ليه؟

-(تنهيدة): كانت عايزة تنزل تولد ف مصر..

*تمام.. فين سبب الخناق؟

(لحظة صمت)

-(بمرارة): لأَنِّي ماكنتش موافق انها تنزل تولد ف مصر..

*ليه؟

-التأمين الطبي بتاع الشغل كان هيغطي تكاليف الولادة كلها من غير مادفع ولا مليم..
إنما لو نزلت تولد ف مصر، التذاكر وتكاليف المستشفى هتبقى كتير..

*وهي مش فاهمة كده؟

-فاهمة طبعا..

*امال ايه المشكلة؟

-(تنهيدة): كانت بتقول انها حاسة انها هتموت!

(لحظة صمت)

-(الزوج مستطردًا): كان عندها شعور غريب انها هتموت.. كانت بتردد الكلمة كتير جدا طول فترة الحمل..
وقالت انها عايزة تموت وسط اهلها..

*وانت كان ردّك ايه؟

-الزوج: كنت بتريق عليها وواخد الموضوع باستخفاف وشايف إنها أوڤر!!.. كنت بقولها بهزار إن الفلوس اللي هوفرها مع التأمين، هبقى أتصدق بيها على روحها لو ماتت احسنلها!

*وهي كان رد فعلها ايه؟

-الزوج: كانت بتعيط وتقولي انها بجد حاسة انها هتموت... وان ده يمكن يبقى آخر طلب تطلبه مني..

*وانت استجبت؟

-الزوج (بيهز راسه ببطء): لأ

*ماستجبتش ليه؟.. عشان الفلوس بس؟

-الزوج (بعد لحظة من الصمت): بردو لأ

*طيب ممكن تقولي الأسباب؟

-الزوج: كنت معتبر طلبها ده دلع... هي مش لِسَّه عروسة جديدة و دي اول ولادة!.. ده الطفل التالت!.. يعني المفروض تجمد شوية!
ايه يعني أهلها يكونوا معاها؟؟ هيعملولها ايه يعني؟!

*اممممم.. طب هي عموما كان طبعها دلوعة وليها طلبات مش منطقية؟

-الزوج: لا.. بالعكس..

*مجاش ف مخك ان نزولها مصر فعلا هيريح قلبها؟

-الزوج: بصراحة لأ.. ساعتها كنت بقول لنفسي: هدفع التكاليف دي كلها عشان هي بس تكون مرتاحة نفسيا؟!.. ده هبل!

*طب تمام.. ايه اللي حصل بعد كدة؟

-الزوج: طبعا انا اصريت أنها ماتنزلش مصر وتولد ف البلد اللي كنّا فيها..
وف الاخر هي استسلمت..

*وبعدين؟

-الزوج (تهدج خفيف ف صوته): انا فاكر كويس اوي اليوم ده.. يوم الولادة..
روحنا الصبح بدري على المستشفى انا وهي والعيال.. بنت عندها ٩ سنين وولد عنده ٥ سنين..
ودخلنا كلنا الاوضة بتاعت المستشفى.. بعد شوية جات الممرضة -وكانت من جنسية غير عربية- جابتلها البتاعة المفتوحة اللي بيلبسوها دي..

*ايوة Gawn

-الزوج: ايوة الجاون.. مراتي كانت بتبكي طول الوقت وتبوس ف العيال وتحضن فيهم...

*وانت كنت بتعمل ايه؟

-الزوج: كنت واخد الموضوع عادي وبلعب جيمز على الموبايل!

*و كنت حاسس بإيه ساعتها؟

-الزوج: ولا حاجة.. عادي.. كأني قاعد مستني دوري ف السنترال عشان ادفع فاتورة التليفون!.. كنت حاسس بملل وزهق وعايز أخلص عشان كنت واخد أجازة اضطراري من الشغل أسبوع عشان أقعد بالعيال وأشوف أمورها وأمور البيت لحد ماتبقى كويسة..

*وهي؟.. كان شعورك ايه من ناحيتها ف الوقت ده؟ و كان بيجيلها طلق؟

-الزوج: ولا حاجة بردو.. كنت شايف انها مأفوراها اوي عمالة تبوس ف العيال زي ماتكون مش هتشوفهم تاني.. و مراتي مش بيجيلها طلق.. ف الولادتين اللي قبل كدة مكانش بيجيلها طلق.. عشان كدة الدكتورة كانت بتحددلها معاد الولادة قيصري..

*طب ممكن أسألك، انت بتحكيلي الحكاية دي دلوقتي ليه؟

-الزوج: عايز احكيلك عشان لازم احكي لحد.. اليوم بتاع الولادة ده محفور ف ذهني كأنه حصل امبارح.. كل ما أبص ف وش بنتي الكبيرة أعيشه من اول وجديد..
ومش عاوز منك تعليق حتى يا.. انا بس عاوز احكي...
-------------

**يوم الولادة- في المستشفى**

الزوجة: خلي بالك من العيال..

الزوج: ماتعيشيش ف الدور بقى وبطلي محن!

الزوجة (بتعيط): والله العظيم مش محن... انا حاسة اني مش هطلع من أوضة العمليات... وكان نفسي ابويا وامي كمان يكونوا جنبي... مش عايزة اموت لوحدي جوة وانا عارفة ان مفيش حد من اهلي موجود معايا برة...

الزوج: وهتفرق معاكي ايه يا ناصحة؟!.. هيقولوا لملك الموت استنى شوية مثلا؟!..

الزوجة (لِسَّه بتعيط): هتفرق اني اعرف اني مش لوحدي... عايزة أموت وسط اهلي... عايزة احس ب........ مش عارفة اوصفهالك.... عمرك ما هتحسها.... ده حتى الممرضات مش بيتكلموا عربي!.. عندي شعور رهيب بالوحدة..

الزوج: اساسا خلاص انتي متاكدة انك هتموتي يعني؟!.. يا بنتي كل دي هرمونات بس!.. الحالة العاطفية اللي انتي فيها دي وهم!.. بطلي هبل بقى!!!

الزوجة (بتعيط و مش بترد)

**الممرضات جابوا التروللي عشان ياخدوها أوضة العمليات**

الزوجة (بتعيط و هي نايمة على التروللي بتبوس ف عيالها و الزوج ماشي جنبهم): خلي بالكوا من بعض.. و انت يا شريف خلى بالك من العيال...

الزوج: يوووووه.. يا ستي بطلي الكلام ده بقى!..

الزوجة مابتردش وبصوت خافت بتردد الشهادتين...

وآخر حاجة محفورة ف وجدان وعقل الزوج قبل ما الممرضات ياخدوا التروللي ويختفوا ورا باب أوضة العمليات، هي منظر شفايف مراته وهي بتمتم بالشهادتين مرارا ودموعها وهي نازلة على جنب خدها اليمين...
--------------

الزوجة عاشت ولله الحمد وربنا رزقهم بولد جميل...

بس فضلت فترة طويلة مش ناسية إحساسها بالوحدة الرهيبة وهي داخلة أوضة العمليات ودموعها نازلة على خدها وقلبها بيتنفض ف صدرها من الخوف...

جوزها اتعلَّم وحس لما بنته كبرت... وعرف يعني ايه حرقة قلب أب على بنته... وفهم أخيرًا ليه مراته كانت مصرة على وجود أهلها..
وعلى لسانه، فهم كمان إنه لو كان أخد كلامها بجدية وتعاطف معاها واحتواها وطمنها كانت هتفرق معاها كتير..

مهما الزوجة بانت قوية وبتتصرف ومستقلة وجامدة آخر حاجة، تأكد تمامًا انها ف لحظة هتبقى هشة خالص زي المولتن لافا كيك...

(القصة حقيقية و نشرتها بعد استئذان صاحبها)

27/02/2026

توقعاتنا لما نروح لطبيب عضوي، إننا:
١- نفهم منه تشخيص أو سبب لشكوتنا،
٢- وناخد روشتة أدوية..
نبلع الأدوية
أو نشربها
أو نحقنها
إلخ
فنلاقي -بإذن الله الشافي- نتيجة وتحسن

ملناش دعوة الدوا ده اشتغل ازاي
ملناش دعوة ميكانيكة تفاعل جزيئات الدوا مع خلايانا وأجهزة جسمنا
حتى لو حد فاهمها من الناحية النظرية، فبرضو ملوش دعوة ولا له دور بتشتغل ازاي..
احنا بنتعاطى الدوا من سكات
وندعو الله بالشفاء
وبس
دورنا سلبي
بنسيب الدوا يشتغل ف الكواليس بدون تدخل مننا

نيجي بقى احنا نفس الناس (أو بعض منا يعني)، نروح لثيرابست،
بنتوقع فهم أو تشخيص للمعاناة زي الطبيب العضوي،
وبنتوقع برضو حاجة شبه الروشتة كده ف فلسفتها..

أيها الثيرابست الجميل،
قولي خطوات محددة وواضحة أعملها، فاتحسن أو ألاقي نتيجة إيجابية..
مليش دعوة بقى مش أنت ثيرابست؟
اديني روشتة
طريقة
وصفة
خريطة
خطوات
برنامج
إلخ…
المهم ألاقي تحسن
وأنا هسمع كلامك متخافش

طبعًا فلسفة "الروشتة" ماتنفعش معانا في الثيرابي اللي بدون أدوية
ليه طيب؟
ليه ماينفعش يبقى في خطوات أعملها وأنا ساكت فلاقي تحسن ومليش دعوة بتشتغل ازاي؟

وده سؤال جميل ومهم..
هو التحسن ف علم النفس بيحصل ازاي أصلًا؟
أقولك باختصار مخل،
التحسن -بإذن الله- بيحصل لبعض أو كل الأسباب التالية: (دي أمثلة غير حصرية)
١- تفهم هو ده حصل أصلًا ليه (الاستبصار)
٢- تفهم أنت مين وجيت هنا ازاي وتاريخك كله (وعي بالذات)
٣- تغير أفكار وقناعات مشوهة عن نفسك وعن العالم وعن الآخرين (العلاج المعرفي وما شابهه)
٤- تغير سلوكيات بتجرجرك لورا وتخليك محبوس ف نفس دايرة المعاناة (العلاج السلوكي وما شابهه)
٥- تصلح علاقات، تنهي علاقات، تعمل علاقات جديدة
٦- تتعلم مهارات اجتماعية معينة متفصلة على مقاسك وكانت ناقصاك
٧- تتعلم تفكر، وتفهم، وتحلل تصرفاتك وتصرفات اللي حواليك بشكل موضوعي
٨- تُنشىء نظام دعم اجتماعي من دايرتك
٩- تتقبل وجدانيًا أشياء معينة في ماضيك وحاضرك وف نفس الوقت تسعى تغيرها بالتدريج
١٠- ماتخافش من التغيير وماتخافش من الحقيقة وماتستخباش من الواقع
١١- تتعلم كبح جماح انفعالاتك بأساليب مختلفة وماتخليهاش تسيطر على قراراتك
١٢- تتعلم بعض أساليب التحكم في الرابط بين النفس والجسم

شايف الحاجات دي؟
أنت اللي هتعملها كلها صح؟
يعني مش ملكش دعوة زي الدوا كده
لأ، ده سيادتك اللي هتشتغل وتبذل مجهود..

امال الثيرابيست هيعمل إيه يا دكترة لما أنا هحارب لوحدي!

ده برضو سؤال لطيف
الثيرابست يا عيون الدكترة هيساعدك تلاقي صحبة مُبصرة ف الطريق الطويل ده
وهيدلك تمشي منين وازاي وعلى فين وبمعدل أد إيه
ولما تعطل؟ هيشرحلك عطلت ليه ويقولك تعمل إيه
وهيديك الأدوات اللي تساعدك تحقق الحاجات دي..
مثال: أنت عاوز تعمل كرسي خشب..
الثيرابست هيقولك تتعلم النجارة فين
وهيقولك تشتري الخشب الكويس منين
وهيديك المنشار والشاكوش والمسامير

لكن مين اللي هيتعلم النجارة ويشتري الخشب ويمسك الشاكوش والمنشار والمسامير ويعمل الكرسي؟
حضرتك

شكرًا ☺️

22/02/2026

🇺🇸: The final version of the file
🇸🇦: النسخة النهائية من الملف
🇪🇬: النسخة النهائية١
النسخة النهائية٢
النسخة النهائية النهائية
النسخة النهائية.أحمد
النسخة النهائية.يوم الخميس
النسخة النهائية الأخيرة
النسخة النهائية المعدلة
النسخة النهائية.المشرف
النسخة النهائية بجد

20/02/2026

مين هي -أو هو- اللي بنقول عليهم أو بيقولوا على نفسهم "شخصية حساسة"؟
عبارة عن إيه يعني الشخصية الحساسة دي؟

الشخصية الحساسة هي الشخصية اللي بتتأثر وتتفاعل بدرجة أشد وأعمق من الآخرين بالمؤثرات المختلفة..
المؤثرات دي ممكن تكون جسدية (يعني بيتأثروا بالألم الجسدي بدرجة أعلى) أو الأصوات أو الروائح أو حتى الإضاءة..
وطبعاً بيتأثروا بالمواقف الانفعالية والعاطفية بطريقة أشد وأعمق من الآخرين..

الإنطباع العام إن الشخص الحساس هو اللي بيتأثر سلباً بس.. وده مش صحيح..
مهم أوي إننا نفهم إن الأشخاص الحساسين بيتأثروا بالمواقف السلبية والمواقف الإيجابية كمان.. يعني ممكن يبكوا من الفرحة بنفس قدر الحساسية اللي ممكن يبكيهم من الحزن..

طيب إيه هي علامات الشخصيات الحساسة؟

-سهل جداً أنهم يتأثروا لدرجة البكاء من موقف مؤثر ف فيلم أو رواية على سبيل المثال..
-بيتعاطفوا مع الآخرين ويحسوا بيهم بدرجة أعلى.. وفي حتى ناس منهم بيكون إحساسهم بالآخرين عالي لدرجة إنهم ممكن يحسوا بأي اختلاف ف نبرة الصوت أو تعبيرات الوجه ويعرفوا إن الشخص اللي بيكلمهم ده متغير حتى لو الشخص ده عايز يخبي..
-بيتأثروا نفسياً وانفعالياً بسهولة وده بينعكس عليهم جسدياً بدرجة أعلى من الناس.. يعني ممكن يجيلهم صداع أو آلام ف المعدة مثلاً من موقف عادي..
-ممكن حدث واحد بسيط ف يومهم يأثر على أكلهم ونومهم ويقلب حالتهم المزاجية..
-بيقلقوا ويتوتروا أكتر وأعمق من متوسط الناس..
-بيخافوا جداً من الرفض أو الإحراج حتى ف المواقف البسيطة لأنهم بيتأثروا بيها جامد..
-جلد الذات ولوم النفس عندهم عالي..
-ممكن فكرة واحدة تفضل تلف جوة دماغهم فترة طويلة جداً بلا داعي..
-بيتجرحوا بسهولة..
-بيفرق معاهم جداً رأي الناس فيهم وبسهولة يتأثروا بالنقد أو المدح..
-صعبين جداً ف النسيان.. مش بينسوا الإساءة بسهولة أبداً..
-بيحتفظوا بمشاعرهم السلبية جواهم بدرجة أكبر من الآخرين..
-لأنهم حساسين، ممكن بسهولة يفهموا موقف غلط ويتأثروا بيه ويكبر معاهم..
-في العلاقات العاطفية، بيهتموا جداً بكل تفصيلة لدرجة مذهلة.. ويهمهم جداً رأي الطرف الآخر فيهم.. مجرد الإشتباه ف غلطة واحدة (ريحة البوء مثلاً) أو شيء مش المفروض يحصل ممكن يخليهم مش عارفين يناموا من التفكير..
-طبعاً رومانسيين بدرجة أعلى من المتوسط..
-الأخبار السيئة ف الجرايد والمواقع ممكن تتسبب لهم ف حزن حقيقي حتى لو ماتخصهمش بصورة مباشرة..

طب الكلام ده علمي؟
آه علمي..
في سايكولوجيست اسمه آرثر أرون ومراته إلين أرون عملوا أبحاث عن الشخصية الحساسة ف تسعينيات القرن الماضي وسموها: Sensory Processing Sensitivity
وعملوا ليها استبيان اسمه Highly Sensitive Person Scale

آرثر وإلين بيقولوا إن الحساسية في الشخصية مش عيب ولا اضطراب.. دي سمة ف الشخصية عادي زيها زي الـIntrovert كده مثلاً..
وبيقولوا كمان إن من %15 لـ %20 من الناس حساسين..

سببها إيه؟
على الأرجح سببها استجابة زيادة للجهاز العصبي للإنسان الحساس..
وكمان إدراك عقلي أعلى من المتوسط للمواقف والأحداث وبالتالي تأثر وتفاعل أكبر..

نتعامل ازاي مع الشخصية الحساسة؟

1-بالوضوح والصراحة معاهم دايماً لتجنب الفهم الخاطيء..
الشخص الحساس ممكن بسهولة أوي يزعل منك وأنت ماتعرفش أساساً.. ومن حاجة مستحيل كنت تركز فيها.. فنكون واضحين مع بعض..
الشخص الحساس دماغه شغالة بأفكار طول الوقت.. تصرف واحد منك ممكن يبانله مبهم، هيخليه حرفياً ماينامش بالليل.. يبقى نكون إيه؟ نكون واضحين مع بعض..

2-هزار البوابين بلاش منه مع الشخصيات الحساسة.. عشان هياخدوه بجد..

3-لا تستخف أو تهزأ أو تسخر من حساسيتهم.. عشان هي بالنسبالهم طبيعية جداً وأسلوب حياة مش مجرد دلع أو أفورة..

4-وعي الشخص الحساس بنفسه مهم جداً في تفهمه لردود أفعال الآخرين.. زي ما الحساسية شيء طبيعي في بعض الناس، برضو "عدم الحساسية" شيء طبيعي في البعض الآخر.. كلُ ميسر لما خُلق له.. الحساس مش أوفر،، واللي مش حساس مش جلنف..

شكراً
رمضان مبارك

Muhammad Fayeq - محمد فايق

02/04/2026

27/03/2026

23/03/2026

21/03/2026

19/03/2026

17/03/2026

13/03/2026

12/03/2026

03/03/2026

27/02/2026

22/02/2026

20/02/2026

Address

Website

Alerts

Contact The Practice

Shortcuts

Share

Category