02/01/2026
جالي رسالة من أب بيسألني عن طريقة التعامل الصحيحة مع الأولاد الصغار بعد الطلاق،
فكتبت له التالي (بشرط إن الأب والأم ناس يميلوا للسواء - لو الأب أو الأم أو كليهما غير أسوياء؟ فهذه النقاط هتتغير):
١-يخرجهم بشكل منتظم ويشتري ليهم حاجات ولبس مثلًا ويواظب على ده عشان ترسيخ مبدأ إن الإنفاق مسؤولية الأب
٢-يتكلم معاهم ويسمع منهم ويوجههم (عشان يكون متواجد ف حياتهم بشكل فاعل مش مجرد فلوس بس)
٣-يشترك معاهم ف اكبر قدر من الأنشطة تسمح بيه الظروف (زي التمارين والدروس و و ) ورفع راسهم أمام أصحابهم وأقرانهم إن أبوهم مش راميهم
٤-مرة بعد مرة من تواجد الأب النفسي مع أولاده، هيتعلموا إنهم يلجأوله وقت اللزوم وإنه سندهم فعليًا مش شكليًا
٥-يحرص على بياتهم معاه أحيانًا وعلى تواجدهم ف المناسبات معاه ومع أهله بالتنسيق مع الأم
٦-عدم استخدام الأطفال كسلاح في أي صراعات.. ودي محتاجة ضبط نفس لإعادة توجيه الغضب من الطلاق (إن وُجد) ف اتجاه تاني غير الأولاد - وطبعًا ده ينطبق على الأم كمان مش محتاجة كلام
٧-تقديم مصلحة الأولاد على الإيجو الشخصي للأب والأم والحفاظ على علاقة طيبة وتعامل محترم مع الأم وأهلها (ومهم نقطة أهلها دي عشان يبقوا وسايل اتصال ف حالة أي خلاف)
٨-تجنب تسميم نفسية الأولاد تجاه الأم أو تجاه الأب (بمعنى محدش يشتم ف الطرف التاني أبدا ادام الأولاد لأن ده مؤذي بشكل كبير ليهم خصوصًا الأهل)
٩-إظهار الرقي ف التعامل بين الأب والأم أمام الأولاد والتأكيد على حب الأب والأم ليهم
١٠-شرح مبدأ الطلاق بطريقة تتناسب مع سن الأولاد مع شرح وافي إن الطلاق هم ملهمش دعوة بيه، ولا هم سبب فيه (مهمة النقطة دي عشان أحيانًا الأولاد بيحسوا إنهم هم السبب)، ولا هيأثر عليهم وإنه شيء طبيعي ف الحياة
شكرًا
