20/04/2026
انتشر الفترة الى فاتت فى المجال الرياضى الoutsourcing و هو بكل بساطة ان المدرب عايز يريح دماغه او مبقاش قادر على عدد معين من العملاء فا بيجيب شركة تانية تعمله الدايت و التمرين !!
طيب معلش هو العميل مشترك معاك انت ليه ؟ مدام حد تانى و شركة تانية هو الى هيتابع كل حاجة و ياخد فلوس كمان ؟! مش شايف ان ده تغفيل و نصب على العميل ؟ هل انت معرف العميل ان انت ملكش اى علاقة بالدايت و التمرين ؟!
جاوب مع نفسك كدة و اقعد و هتعرف الصح من الغلط 😅 وبلاش الفلوس تعميك و بص على الشغل الصح مش الشغل الى بيتكروت .. و افهم ان اسمك فى السوق انك تبنيه اهم من الفلوس السريعة الى هتهد شغلك كله
طيب اعمل ايه يا ماجد ؟ عندى عملاء كتير .. او مسحول فى كذا شغل و معنديش وقت ..
بكل بساطة ابدأ فى توظيف ناس و انا ممكن اساعدك من انى اجيبلك مدربين واخدين معايا الكورسات تعملهم انترفيو و تختار الاشطر
و تبدأ تعلمهم باسلوبك و يعملوا الحاجة بطريقتك و فى الاخر انت تراجع عليهم و تبعت الحاجة للعميل
او تبقى مشرف على كل حاجة هما بيعملوها و تبقى بالظبط الQuality control
فا من الاخر ده بيضمن ان كل حاجة خارجة من تحت ايدك
وضامن ان الجودة زى ما انت عايز و تقدر تحتسب الى بيغلط
لكن فكرة تجيب حد يعملك شغلك و انت تحاسب دى مش صح .. و حقيقى انا اسهل حد ممكن يعمل outsourcing و يكسب من وراها اد كدة
الحمد لله فى الاف من الطلاب واخدين معايا كورسات و ناس فعلا شاطرة جدا اقدر اوظفها من بكرة و اقدر استقبل عملاء اكتر
بس انا قررت انى ابذل مجهود و اساعد المدرب فى تكبير و تأسيس شغله و هو يبقى الى بيعمل كل حاجة او هو المراقب على جودة شغله و لا انى اعمل لحد الشغل بتاعه و احنا الاتنين مغفلين العميل
و ارجع اقولك تانى .. لو الى انت بتعمله ده صح .. تقدر تقول للعميل الى جى يشترك معاك قبل ما يدفع فلوس ان بعد ما هيشترك معاك ان مدرب تانى هيعمل الشغل مش انا ؟ لو العميل وافق يبقى ليك الكلام بس صدقنى وقتها مفيش واحد هيشترك معاك
الناس بتشترك معاك عشان بتحبك و بتديلك الامان على اهم حاجتين ( صحتهم و فلوسهم ) بلاش تبقى كدة .. و اتقى الله ❤️🙏🏻 و شكرا
مش كل الناس هتفهم الكلام ده بس هعرف مدى الوعى من الكومنتات
