03/10/2025
من خمس سنين كشفت على بنوتة كانت في 2 اعدادي
وكانت بتسئلني أسئلة ف الكشف، تدل على رجاحة عقلها عن سنها، قولتلها تحبي تطلعي ايه اما تكبري ؟!
قالتلي .. دكتورة
مسكت الروشتة وضفت قبل اسمها .. دكتورة / اسراء
وحكتلها قصة قصيرة ..عارفه لما كنت ف عمرك، كنت بكشف عند دكتور وسئلني نفس السؤال، ولما رديت نفس ردك، كتبلي ع الروشتة دكتور / عبد الله ..
و قالي حطها قدامك، كل ما تذاكر عشان توصل لها و قد كان و ما زلت أحتفظ بهذه الروشتة بعد كل هذه السنوات ويتكرر نفس السيناريو اليوم ..
جاتلي اسراء بعد غياب خمس سنوات وبتفكرني بالقصة وبتطلعلي روشتتي القديمة وعليها .. دكتورة / اسراء
وبتقولي الحمد لله يا دكتور خلصت ثانوية ودخلت الكلية !!
وقتها كنت مبسوط جدا وحسيت قيمه الكلمه في حياة شخص ممكن يكون واخدك قدوه لية وأن أد ايه حاجة بسيطة زي دي ممكن تكون سبب إلهام لشخص انه يحقق هدف يتمناه زي ما حصل معايا.. قاطعتني إسراء :
بس دخلت كلية تجارة انا اصلا لا بتاع طب ولا تعليم، و روشتة حضرتك لقتها بالصدفة وانا بقلب تحت السرير ف كرتونة قديمة، قولت اجيبها افكرك حضرتك بحالتي اللي كنت بشتكي منها من خمس سنين يمكن تفيد بحالتي دلوقتي
وقتلت اسراء جوايا كل معاني الإلهام والتنمية البشرية و أحدثت بداخلي صدمة نفسية لن أتعافى منها طول العمر
شكرا يا إسراء ...
Dr Abdallah_Rabeia
