23/07/2025
نبطل كسل بقي ونرجع لكلامنا عن الاكل المضر ومفروض ناكل ايه
وتعالوا احكيلكم القصة من الاول
زمان في الخمسينات فيه باحثين في أمريكا واوروبا لاحظوا إن معدلات أمراض القلب والسكتات القلبية كانت اقل كتير جدا في اليونان وايطاليا واسبانيا وجنوب فرنسا عن امريكا وشمال اوروبا رغم إن الناس ال اتعمل عليهم البحث في المناطق دي مكنوش منظمين اكل ولا بيحسبوا سعرات او يمارسوا رياضة بشكل منتظم ..
وده خلي الباحثين يفكروا في ان السبب ورا ده هي نوعية الأكل ومع الدراسة لقيوا ان العادات الغذائية فعلا كانت هي السبب وبدأت تظهر في كتب الطب وخاصة كتب القلب ما يعرف ب "حمية البحر المتوسط" أو "Mediterranean Diet" المستوحاة من العادات الغذائية التقليدية لشعوب منطقة البحر الأبيض المتوسط
شعوب المتوسط كانوا بيعتمدوا في اكلهم علي
زيت الزيتون بدل السمنة و الزبدة
الاسماك أكتر من اللحوم
الخضار والفاكهة طازجة بشكل يومي
وكانوا بيعملوا الخبز من الحبوب الكاملة زي الشوفان والشعير والدرة أو حبة القمح الكاملة مش من الدقيق الابيض
كانت وجباتهم بسيطة بس غنية بالمغذيات وكمان كانوا في المناطق دي بيشاركوا الأكل مع العيلة عايشين حياة نشيطة عكس الامريكان وقتها
طيب يعني ناكل ايه
دي أمثلة للأكل الموجود في النظام ده وحجات كتير منها موجودة ومتوفرة ونقدر نحافظ علي وجودها في اكلنا
🫒 زيت الزيتون
🥗 سلطة فيها خضروات كتير زي الفتوش والتبولة ال بيعملوها حبايبنا في الشام
🐟 السمك المشوي .. طبعا اي سمك مفيد وصحي لكن اكتر اسماك فيها دهون صحية هي السلمون والتونة والسردين والماكريل
🍅 طماطم مع جبنة وزيت زيتون
🍆 بابا غنوج
🥣 حمص مسلوق او مهروس
🍝 مكرونة بقمح كامل
🍞 عيش بني أو عيش بلدي أو خبز الشوفان
🥚 بيض مسلوق أو أومليت بزيت الزيتون
🍆 مسقعة خفيفة من غير قلي
🥬 سبانخ أو ملوخية مطبوخ بزيت الزيتون
🧀 جبنة قليلة الدسم (جبنة بيضا، فيتا، لبنة)
🥜 مكسرات غير مملحة (لوز، جوز، بندق)
🍇 الفاكهة طازة (تفاح، برتقان، توت، عنب، رمان)
🍋 عصير ليمون طبيعي
🥒 خيار، جزر، فلفل
🍲 العدس او شوربة العدس أو شوربة الخضار
🫘 فول مدمس بزيت الزيتون
🥥 زبادي طبيعي
🌿 زعتر + زيت زيتون
🍌 موزة أو تفاحة كوجبة خفيفة
🌰 طحينة على عيش بني
🍗 فراخ مشوية بالأعشاب
🥔 بطاطس أو بطاطا مشوية بزيت زيتون
🌽 ذرة مسلوقة
🫛 فاصوليا أو بسلة أو كوسة أو أي خضار مطبوخ بزيت قليل
الصور من موقع جمعية القلب الأمريكية وهي بتنصح بنوعية الاكل ده
