عيادة د/ محمود الحسيني أبو المجد للصدر والحساسية PulmoCare Clinic

13/12/2018

أيام و مواعيد العيادات الخارجية لجميع التخصصات بجامعة المنصورة
عيادة الأمراض الصدرية تعمل أيام السبت والاتنين والخميس من كل أسبوع
و ملحق بها عيادة الحساسية لعمل اختبارات الحساسية و الأمصال

MediaFire is a simple to use free service that lets you put all your photos, documents, music, and video in a single place so you can access them anywhere and share them everywhere.

01/11/2018

https://m.facebook.com/story.php?story_fbid=1875727529172051&id=1265854970159313

الشتا جاي و خايفة من الشتا و المدارس و أدوار الشتا 🤔
ابنك عنده حساسيه بالصدر ؟ أو بالأنف ؟؟ 😤
ابنك بيجيله ادوار برد وانفلونزا متكررة ؟ و التهاب متكرر للحلق و اللوز ؟!

طب جهزي نفسك و اقري كويس جدا الكلام ده و استشيري طبيب أطفالك فيه فورا ☝
🔶 رقم ١ :
علمي ابنك يغسل ايديه كويس، قبل الاكل و بعد الاكل و قبل الحمام و بعد الحمام
صدقي او لاتصدقي .. إن ده خط المناعة الاول ضد أمراض الجهاز التنفسي
و بالمناسبة السعيدة دي احب انقلكم خبر انه هيئة الغذاء و الدواء الأمريكية ( FDA) أعلنت من كام يوم انه صابون ديتول ولايف بوي و الحاجات الحلوه دي لا بتقتل جراثيم ولا ليها لازمة "و اي مامي متابعة معايا في العيادة عارفة تماما اني ضد الحسوكة الزيادة في النضافة"
🔶 رقم ٢ :
علمي ابنك يكح ويعطس في كمه عند دراعه، كلمة حط ايدك على بقك و انت بتعطس او بتكح من اكتر الاسباب اللي بتشغل دكتور الأطفال كويس :-)
لأنه ببساطة بينقل الميكروب من مكان في جسمه لمكان تاني وللاسف كذلك المنديل ..
🔶 رقم ٣ :
امنعي البوس
بلاش الحنان والعاطفة المؤذية دي، مش لازم في كل تجمع للعايلة ياختي كميلة و يا اختي صغنن و خالتو و عمتو و طنط اللي معديه جنب القارة الافريقية بالصدفة تنزل بوس و نقل فيروسات و بكتيريا متحورة و مفترية على مناعة الطفل 😇
🔶 رقم ٤ :
طعمي ضد الانفلونزا الموسمية
منظمة الصحة العالمية والأكاديمية الأمريكية لطب الأطفال ..
Center for disease control and prevention ( CDC )
NHS ( حاجة كده زي وزارة الصحة الإنجليزية )، وأفضل مراكز الطب في العالم توصي بإعطاء مصل الانفلونزا سنويا للأطفال و كبار السن و الحوامل و العاملين في القطاع الطبي..
كون انه جارة حضرتك رأيها يتعارض مع المنظمات دي و انها شايفة انه مالوش لازمة و نصباية و سبوبة حلوة للدكاترة فـ ده شئ يرجعلكم الصراحة 😑
المصل أمان من ٦ شهور ..
🔶 رقم 5 :
شوربة الفراخ .. فعلا
زي ما قريتي ، مناعة من البرد و علاج له كمان ، و في ابحاث كتير اتعملت في الموضوع ده :-)
و الابحاث دي و يا للمفاجأة قالت انه فيتامين سي مالوش علاقة نهائيا بالبرد والانفلونزا لا يقلل و لا بيزود !!!
مع العلم انه انا شخصيا لما زورى بيوجعنى أو بيجيلي برد مباخدش غير الليمون و اليوسفي 😅✋
🔶 رقم 6 :
برونكوفاكسوم "Bronchovaxom" ، ده دوا بيزود مناعة الجهاز التنفسي
انا كان اي حد يقولى دوا بيزود المناعة كنت برد اوتوماتيك ده نصب وحوار شركة عاملاه عشان تبيع وخلاص
بس ده لأ .. ده جايب نتايج كويسة من اماكن محترمة جدا ..
استشيري طبيب أطفالك دائما قبل ما تقررى تدي دوا قريته على مقال من النت ☝
🔶 وكلمة أخيرة :
٧٠% من أمراض الجهاز التنفسي في الشتاء فيروسية و مش محتاجة مضاد حيوي نهائي،
احنا بندمر مناعة اطفالنا - حرفيا - بسوء استخدامنا للمضادات الحيوية ، و والله العظيم انا عندي اطفال في العيادة متابعين معايا منذ الولادة و عندهم سنتين وتلات سنين و عمرهم ما خدوا مضاد حيوي في حياتهم و عايشين و كويسين ومبسوطين و صحتهم احسن مليون مرة ..
المهم هو التشخيص الصحيح و المتابعة الجيدة لحالة الطفل ^_^
🔸 متديش مضاد حيوي من نفسك
🔸 ترددي و تناقشي مع طبيبك ( و ده حقك ) في حالة اعطاء مضاد حيوي..
🔸 متديش علاج المرة اللي فاتت من نفسك ، احنا قعدنا سنة طويلة كئيبة في الكلية بندرس علم اسمه الميكروبيولوجي و قعدنا نذاكر المئات من البكتيريا و الفيروسات ( المئات ايه الالوفات ) و كل نوع نشخصه ازاي و نعالجه ازاى 😇
و ربنا يسترها على اولادنا جميعا يا رب

تابعينا هنكلمك عن الانفلونزا والتهاب الحلق .. وكل امراض الشتاء الفترة الجاية باذن الله ^_^
د.وائل أبو الخير

14/05/2018

كتير بيسألونا في المستشفي والعيادات عن الوضع في رمضان. نصوم ولا لاء. الأدوية بتفطر ولا لاء . نعمل ايه ؟

في البوست ده هحاول أجاوب عن معظم الأسئلة دي ان شاء الله.

أولا كده انا من الناس اللي شايف ان مسئولية اجازة الافطار في رمضان دي مسئولية كبيرة وقرار صعب أوي. علشان كده مش هتلاقي دكتور يقولك افطر بقلب جامد. احنا هنساعدك في القرار بمعني أصح. يعني لو الحالة العامة كويس يصوم عادي مفيش مشكلة.

بما ان معظم علاجنا بخاخات اللي هي زي مراهم الجلد كده (علاج موضعي) ف هنتكلم الأول عن البخاخات بالتفصيل شوية .

زي ما قلنا قبل كده ان بخاخات الصدر هي نوعين : بخاخات وقائية واللي معظمها بيستخدم مرتين في اليوم وفي منهم مرة في اليوم . دول مش هيبقي فيهم مشكلة علشان ممكن ناخدهم عند الفطار والسحور . و لو مرة واحدة يبقي عند السحور . و كده يبقي هربنا من اختلافات الفتاوي في حكم البخاخات دي تفطر ولا لاء. وهقولكم كمان شوية الفتاوي بتاعتها.والنوع التاني اللي هي البخاخات المسعفة . و دي بقي عليها كلام .

- النوع الأول من أدوية الشعب الهوائية الموضعية هو بخاخات الغاز اللي زي البرفان كده. و دي علي اختلافات ف أفتت دار الافتاء المصرية بأنها تفطر و السعودية قالت لاء🤔🤨. طبعا هي مش أكل ولا شرب. وبتدخل مع مدخل النفس يعني الي الرئتين مش للمعدة. لكن طبعا وارد يدخل جزء منها للمعدة . لكن جزء بسيييييييييييييييط جدا 😋. ولو دخل فهو أقل من المعفو عنه في المضمضة مثلا. ده في ناس ممكن تشرب شفشق مية وهي بتتمضمض😂😂. بيقولوا لو حطوا في الماء مادة مشعة وواحد اتمضمض بيه هنلاقي جزء منه في المعدة طبعا. لكن ده دون قصد او عمد وكمان لا غني عنه. ولو هي فيها مادة كيميائية و خايفين منها فالسواك مثلا بيبقي فيه حوالي 8 مواد كيميائية😎. طبعا المصريين متشددين شوية . فقالوا لاء اصله بيدخل الجوف. والمشرع محددش الجوف ده يشمل ايه وميشملش ايه. وعلي ان الرئتين هي جزء من الجوف وبيدخلها شيئ عن عمد وفيها بخار ماء كمان فقالوا انها تفطر. انتوا عارفين يا جماعة؟ بخاخة الحساسية دي زي الفنتال و الفياسالمول وغيرهم كلها علي بعضها كده 10 ملل يعني ملو سرنجة 10 سم 😮😮وفيها 200 بخة يعني كل بخة تقريبا شرطتين من السرنجة دي. شوف انت بقي هيوصل اد ايه من الشرطتين دول للمعدة؟ قول شرطة اهو كتير اهو . شرطة السائل دي هي اللي الصائم هيتعمد يستنشقها علشان يروي عطشه ؟؟؟ 🤐🤔ده ممكن يشربله قيمة سرنجتين مية 10 سم وهو بيغسل بقه او بيتمضمض😃

- النوع التاني وهي كبسولات البودرة. رغم اختلاف العلماء عليها انها تفطر ولا لاء علشان اختلاط الدوا بالريق وبينزل المعدة وصعوبة استخدامه عند بعض الناس الا انها مش عاملة مشكلة لاننا زي ما قلنا انها مرتين في اليوم . فطار وسحور وخلاص وهي وقائية مش مسعفة يعني ملهاش لازمة وقت الصيام.

- النوع التالت وهو جهاز النيبولايزر وده في اجماع عليه انه يفطر طبعا علشان بيتحط معاه محلول ملح وبيطلع رذاذ وبخار ماء كتير.

- النوع الرابع وهو الأكسجين. طبعا في مرضي صدر بيستخدموا الاكجسين لفترات طويلة أثناء اليوم ممكن توصل ل 16 ساعة يوميا. وفي رأي انه لا يفطر لانه بيشبه الأكسجين اللي بنستنشقه . لكن نخفف من محلول الماء المقطر اللي بنحطه معاه علشان يرطبه علشان ميفطرش.

كل دي أراء علماء يا جماعة . وارد فيها الصواب ووارد فيها الخطأ. وفي دار افتاء أفتت بشيئ وبعد سنوات غيرته بعد تغيير قناعة معينة.

طبعا هنلاقي واحد لمض يقولي طب مهو كده السجاير متفطرش 🤔🤨 لانها بتدخل الجوف ومش بتدخل المعدة . لكن السجاير حرام شرعا و في بردو لحد النهاردة اختلاف علي الفتوي فيها. لكن دي مش موضوعنا.

هنتكلم بقي عن كل مرض لوحده شوية:
1) حساسية الصدر أو الربو الشعبي ولا بلاش الربو علشان في ناس بتزعل من الكلمة المكعبلة دي. وحساسية الأنف والجيوب الانفية:

- يفضل طبعا عدم الاجهاد أثناء الصيام خصوصا في الحر (الجفاف) علشان ميحصلش لا قدر الله أزمة وتضطر تاخد البخاخات المسعفة علشان كده هتفطر. و نام كويس.

- ابعد عن الأماكن الزحمة واللي تهويتها وحشة. ولو الجو مترب و قالب متخرجش أحسن ولو خرجت البس كمامة أفضل.

- شرب السوايل كتير قبل الصيام . وطبعا بلاش الأكل اللي بيعمل مشاكل في المعدة . لان ارتجاع المرئ والحموضة من الحاجات اللي بتعمل ازمات صدر متكررة ولا تستجيب للعلاج المعتاد . يعني بلاش المحشي اللي مودينا في داهية ده في رمضان😃. وقلل من المأكولات الحارة والمشطشطة والتوابل لانها ساعات بتعلي مادة الهيستامين في الدم واللي ممكن يعفرتك .

- علي ذكر الأكل بقي . قلل كمان من المواد الحافظة والعلب المحفوظة. و كتر من الأكل الغني بفيتامين د زي السمك والتونة والسلمون . و كتر من الخضار والفاكهة الطازة والجزر. و كتر من الأكل الغني بالماغنسيوم زي السبانخ مثلا💪💪. كمان لو انت بتستخدم بخاخات الصدر كتير وارد ان البوتاسيوم عندك يقل من كتر استخدامهم. ف حاول تعوض بالاكل الغني بالبوتاسيوم زي الموز والتين والبلح طبعا. ولو عندك سكر بلاش طبعا. كتر كمان من الأكل الغني بفيتامين سي لأنه مضاد للأكسدة وبيقلل الالتهابات.

- في جوامع بتستخدم البخور بافراط في رمضان. وساعات البخور ده يهيج الصدر ويسبب أزمة . ساعات كمان الجوامع بتغسل السجاجيد في مغسلة أو حاجة و بتستعجل و تفرشهم من غير ما ينشفوا كويس علشان يصلوا عليها . دي ساعات ريحتها بتهيج الصدر. ساعات كمان ناس بترش معطرات جو مادة خام او يحطوا منها علي السجاجيد . و ده بيسبب أزمات حساسية الصدر والأنف كمان. علشان كده يفضل تبعد عن رائحة البخور النفاذة أو رائحة المعطر الخام ده لانه ممكن يسبب أزمة وتفطر لما تاخد البخاخات المسعفة. ولو انت مسئول عن جامع قلل شوية من تبخير الجامع وحافظ علي تهوية المسجد و قلل من تعطيره .

الناس اللي بتاخد مضادات حساسية زي الكلاريتين وغيره دي سهلة هيبقي مرة بعد السحور وخلاص . و كذلك أدوية الزاديتين و السنجيولاير وغيرهم . مرة قبل النوم. عادي. لو هتاخد كورتيزون او موسعات شعب هيبقي وقت الفطار والسحور عادي بردو مفيش مشاكل.

2) التهاب الشعب الهوائية الحاد:
لو الأمور بسيطة والأعراض تحتمل ممكن الصيام ان شاء الله مفيش مشكلة . والدوا يبقي مع الفطار والسحور. لكن لو الاعراض شديدة أوي والأزمات متكررة . ممكن الافطار في حال عدم الاستحمال.

3) التهاب الشعب الهوائية المزمن أو الانسداد المزمن. أو السدة الرئوية:
نفس الكلام بردو ان شاء الله زي حساسية الصدر كده. فرق بسيط بس ان معظم الناس دي بيبقي عندها بلغم كتير و تخين. وفي رمضان مع قلة الشرب ممكن البلغم يزيد و يتخن أكتر . ويعمل لهم ازمات متكررة. علشان كده يفضل شرب سوايل كتير قبل الصيام.

4) البرد و الانفلونزا :
طبعا محدش بيسلم منهم . خصوصا مع الحر والتكييفات وكده . ده عادي بردو الصيام مفيهوش مشكلة ان شاء الله. ومفيش تحذيرات معينة غير الراحة في السرير وشرب السوايل كتير بردو.

5) مرضي التمدد الشعبي :
مشكلة الناس دي في البلغم الكتيييييييير والتخييييين والمتكرر . نشرب سوايل كتيييير طبعا ونحافظ علي العلاج في مواعيده. ونحاول منبلعش البلغم علشان في ناس أفتت انه يفطر.

6) مرضي الدرن الرئوي (النشط طبعا):
مرضي الدرن النشط وخصوصا الحاد عندهم مشكلة ان المناعة ضعيفة. ولازم يتغذي كويس جدا. ولازم طبعا يحافظ علي علاجه و جرعاته بانتظام . كان زمان أدوية الدرن بتبقي كتيرة وعدد أقراص كتير نسبيا . دلوقتي عدد الأقراص أقل و ممكن مرة أو مرتين في اليوم. علي حسب الحالة العامة لو قادر تكمل صيام صوم وخد الثواب ولو مش قادر وتعبان جداااا استشير طبيبك .

7) مرضي التليفات الرئوية:
مفيش جديد يذكر سوا الابتعاد عن المجهود الزائد والاجهاد . وطبعا موضوع الأكسجين زي ما قلنا من شوية.

معلش البوست طويل حبتين لكن حاولت علي أد ما أقدر أجمع جميع استفساراتكم عن الصيام مع أمراض الصدر. ولو في أي استفسار أنا تحت امركم. وكل سنة وحضراتكم جميعا بخير وصحة وسلامة و صوما مقبولا ان شاء الله 😍😍

شير خلي غيرك يستفيد 😃

د/ محمود الحسيني أبو المجد
دكتوراة واستشاري الصدر والحساسية
مدرس الأمراض الصدرية والعناية التنفسية المركزة بكلية الطب - جامعة المنصورة

27/04/2018

نظرة سريعة علي حساسية الصدر

الحساسية ان شاء الله مرض بسيط جداا طالما انت مهتم بيه و بتحترمه . أيوة بتحترمه🧐🧐. انا دايما أقول ان الحساسية زي الضغط والسكر كده. وكلهم عاملين زي الصاحب الرخم . لو احترمته مش هيزعلك . لان زعل الحاجات دي وحش😧😧.

ايه ده؟ يعني الحساسية اللي انت بتقولنا انها بسيطة دي زعلها وحش ؟؟ أه طبعا . و ربنا ما يوري حد زعلها أبدا.

الحساسية بما انها زي الضغط والسكر . يبقي بتعتمد (زيهم) علي حاجتين مهمين : العامل الوراثي والمؤثرات الخارجية. يعني اللي عنده عامل وراثي ميال أكتر ان يجيله حساسية . يعني ممكن ميجيلوش ؟ اه . يعني متفركشوش جوازات علشان لقيتوا بعد الخطوبة ان الاتنين عندهم حساسية والعيال هيطلع عندها حساسية بنسبة 100%😂

هقولك مثال أوضح . لو اتنين توأم لأب وأم عندهم حساسية . واحد بعد ما اتولد صدرناه لأمريكا والتاني في المحلة بالصلاة عالنبي كده🙂 . اللي راح أمريكا طبعا هيجيله حساسية وبتاع المحلة لاء😂😂. طبعا العكس. المحلة لوحدها أجمد من أي عامل وراثي يا جماعة💪 . هيجيلك هيجيلك متفكرش😊. بس ممكن لو عندك حساسية وغيرت مكان المعيشة يعني بمعني أصح قللت التعرض لمؤثرات بيئية بتتعبك ممكن تتحسن . يعني مثلا جيت من المحلة للاسكندرية. رحت تبات عند خالتك في مطروح . كده يعني.

طبعا الحساسية ليها أنواع وأشكال ودرجات كتيييييييرة أوي . بس في الأخر عندنا كام خط علاج كده بنشتغل بيهم . اهمهم طبعا البخاخات لأن زي ما قلنا في بوست قبل كده هي زي مرهم الجلد كده.

البخاخات نوعين : نوع مسعف أو طارئ. موسع للشعب و ده زي الفنتولين والفنتال والفياسالمول كده . وقت ما يحصل أزمة لأي سبب تاخد بختين وبالسلامة . النوع التاني و ده الأدوية الوقائية . يعني اللي بتحميك من الأزمات زي المفلونايد و السمبيكورت و دول أغلبيتهم كورتيزون. أيوة كورتيزون.و ساعات معاهم موسعات شعب كمان. لو حد لحد النهاردة اخترع أو لقي حاجة غير الكورتيزون لعلاج الحساسية بمختلف انواعها يعرفنا يا جماعة والنبي😎. بخاخات الكورتيزون دي مهمتها تشيل الالتهابات اللي في الشعب الهوائية اللي بتسبب أزمات كل شوية. و الكلام الجديد ان الحساسية أو الربو الشعبي عامل زي الجرح. اللي بيحتاج علاج لفترات طويلة نسبيا قد تصل الي 3 شهور حتي لو مش بتشتكي من أعراض.

طبعا في خطوط أخري زي مضادات الهيستامين زي الكلاريتين واخواته و مضادات اللوكترايينز زي السنجيوليير و مثبتات بعض الخلايا اللي ليها دور كبير في الحساسية زي الأليربان واخواته. وفي الأجسام المضادة زي الزوليير وفي البعبع بقي 😨😨الكورتيزون اللي عند طريق الفم او الحقن. و في كمان العلاج بالأمصال.

انتظروا بوست الناس اللي عندها الحساسية مببتخفش. و أسبابها.

انتظروا كمان بوست البخاخات و ان شاء الله جاري تحضير فيديو عن طريقة استخدامهم الصحيحة.

انتظروا كمان البوست المهم عن مرضي الصدر و الصيام في رمضان.

شير خلي غيرك يستفيد

13/04/2018

أنا عارف الكلمة دي مش مشهورة أو شائعة أوي ومش هتسمعوها كتير او مش هتسمعوها أصلا . لكن بما اني بكتب من وحي ما بنشوف في حياتنا العملية . حبيت أكتب عن الموضوع ده.

تعجر الأصابع هو زيادة في سمك الصوابع أو الصوابع بتطخن من الأطراف بمعني أصح. وممكن يبقي ليها كذا شكل . من أول زيادة بس في السمك لحد تقوس ممكن يشبه ساعات منقار البغبغان وممكن يبقي في بعض الحالات المتقدمة شبه العصيان اللي العيال كانوا بيضربوا بيها زمان علي طبلة طابور الصباح دي . معرفش لسه بيعملوا طابور صباح اصلا ولا ايه🤔🤔. علي فكرة التشبيهات دي هي فعلا المسميات الطبية لدرجات الزيادة أو السمك ده.

ساعات يسموها الأصابع المقوسة . او الأصابع المقرعية. وساعات يبقي لونها باهت و في معظم الأحيان بيبقي لونها أزرق . طبعا لنقص الأكسجين.

طب هل هو مرض ؟؟ الاجابة لاء🤗 . انما في معظم الأحيان بيبقي مصاحب لوجود مرض😏 . أنا قلت في معظم الاحيان ليه ؟؟ لأن في حالات بتبقي طبيعية مش مرضية ولا حاجة وفي حالات وراثية أو عائلية عادي . طبعا اللي أنا بتكلم عنه ده هو زيادة في سمك كل صوابع الايدين . وساعات الرجلين وساعات كله . انما ساعات بيبقي في مشكلة في صابع واحد تخليه يطخن شوية . ده مش هنسميه تعجر الأصابع . يعني حادثة قديمة مثلا. . فطريات . أي حاجة.

طب ايه سبب التعجر ده ؟؟؟ محدش عارف لحد دلوقتي 🤨. انما قالوا شوية نظريات منها تسمم الدم ومنها هرمونات . لكن يظل أشهر النظريات دي هو نقص الأكسجين في الدم 😨. علشان كده مشهور أوي مع امراض الصدر . وشوية مع أمراض القلب . لكن لا يمنع وجود التعجر ده مع امراض تانية زي الكبد والجهاز الهضمي مثلا.

انا بردو بكتب البوست ده ليه؟؟ انا شفت حالات كتيرة كانت ماشية علي انها حساسية صدر مثلا أو غيره ومفيش تحسن . ولقيت فيهم تعجر الصوابع ده و طبعا ده بيغير دفة التشخيص بدرجة كبيرة أوي. ساعات تانية واحدة تقولي انا لاحظت ان شكل ضوافري او صوابعي متغير و بحط مونيكير كتير علشان أغطي عليه لاني متضايقة من شكله 🤔. و بيكون سبب فعلا اننا لما ننخور وراها نلاقي حاجة . و ممكن طبعا منلاقيش لاننا اتفقنا ان في شوية منهم وراثي أو عائلي عادي .

أشهر حالات الصدر اللي بيبقي معاها تعجر الأصابع دي هي تليفات الرئة😨😨 والتمدد الشعبي الصديدي و بعض أورام الرئة. انما غير شائع الحدوث أبدا مع حساسية الصدر أو انسداد الشعب المزمن.

أنا مش بكتب البوست ده علشان الناس تتروش و تفضل تبص في ضوافرها وصوابعها طول النهار . لكن لو موجود عندك وبتشتكي من اعراض. ممكن تراجع طبيبك للافادة.

شير خلي غيرك يستفيد 🙂

08/04/2018

الحقيقة انه زي ما شم النسيم هو موسم الشعب المصري لأكل الفسيخ والسردين والحاجات الغريبة دي😁. هو بردو موسم لمستشفيات الطوارئ والعنايات المركزة وأجهزة التنفس الصناعي. و بيبقي في رفع درجة الاستعداد و تاهب و حظر تجوال كمان 😂😂😂.

متستغربش ان الصفحة هي صفحة مختصة بأمراض الصدر وبكتب عن الفسيخ والسردين . هقولك متستغربش ليه . لما بيحصل تسمم من الحاجات دي بيحصل ساعات في الحالات المتقدمة شلل في بعض عضلات الجسم😯 . نتيجة تأثير التسمم ده علي الأعصاب . والشلل ده في بعض الحالات بيصيب عضلات التنفس😮😮 . وبالأخص والأهم الحجاب الحاجز اللي مسئول عن 75 % من التنفس . شوف بقي لو العضلة دي مشتغلتش . هينتهي بالمصاب الحال علي جهاز تنفس صناعي لحد ما ياخد العلاج بين قوسين الغالي و بين قوسين تانيين جدااااا 😁.

المشكلة ان اعراض التسمم ده غامضة شوية . يعني ريقك ناشف هتقول اه اصل الملوحة كانت زيادة شوية . و لسانك تقل اه اصل الفسيخ كان عنيف😁 اذا كان احنا لسانا بيتقل من سندوتشين فول عند البغل😂 . و جسمك همدان وتقيل مع شوية تشنجات بسيطة كده🤨 . اه عادي اصلك تقلت شوية في السردين . وبطنك بتوجعك . لازم يا معلم انت واكل قنبلة نووية . عينك زغللت بقي قلبك رفرف . هتقول ده من فرط اللذة و الحلاوة والجمال . زبدة يا ولاااد😂😂🤗

الصور اللي في البوست دي حقيقية . و من تصويري 😯. لما كنت في الصين و جعت جداااا وزهقت من اكل التونة والجبنة . قلت أروح الفود كورت اشوف حاجة أكلها . ف لقيت المكان كله اكل النوعية اللي في الصورة دي . ف استغربت جدااااا و قلت ازاي الناس دي بتاكل الأشياء دي اللي أنا لحد النهاردة مش عارفها . بس سرعان ما اختفي استغرابي لما افتكرت انه مهو احنا بردو عندنا ناس بتاكل سمك معفن 😉و بيزداد سعره وقيمته كلما زادت عفانته و تعتيقه🤗🤗 . سبحان الله يعني.

طبعا الناس اللي بتحب الفسيخ والحاجات دي ملهاش دعوة بالكلام اللي بقوله ده . عيشوا حياتكم يا جماعة . ربكم بيستر . هي جت عالفسيخ يعني 😂 بس خلوا جنبكم شوية ستربتوكين علي شوية انتينال وفلاجيل حلوين كده لزوم الشغل 🤗🤗

و طبعا اصحاب محلات الفسيخ والسردين يمتنعون عن قراءة البوست ده 😎

شيروا البوست يمكن تلحقوا واحدة قبل ما تحدف حتة الفسيخ علي بقها و تكسبوا فيها ثواب😂

قوم يبني افتحلنا بطن سمكتين معفنين خلينا ناكل ونمذمذ و نطلع عالطوارئ نغسل معدة 😂

02/04/2018

من فضلكم يا جماعة وبالأخص الستات 😊
محدش يقرأ النشرة الداخلية للأدوية . لأنها مش هتعجبك . أبدااااااا😎😎

مفيش دوا مكتوب جواه حلو وجميل وعسل أبيض . لازم مكتوب جواه آثار جانبية . ولو عرفتيها هتجيلك 😯😯. وهتجيلك حتي لو مخدتيش الدوا كمان 😮.

في أدوية مكتوب جواها مضاعفات و آثار جانبية خطيرة . لكن نادرة الحدوث . ف لو قرأنا نشرة كل دوا مش هناخد أدوية في حياتنا . الأسبرين اللي الناس بتخده زي اللبان ده مكتوب جواه بيعمل نزيف في المخ وفشل كلوي وقرحة في المعدة 😥😥.

في مرض مشهور اسمه (Medical Student Syndrome) أو متلازمة طالب الطب . و احنا في الكلية كنا لما نقرأ اعراض مرض كان بيتهيألنا ان المرض ده عندنا 🤔🤔. وكنا بنروح نكشف مقتنعين ان المرض ده هيطلع عندنا . مش عاوز أقولكم عالكبيرة بقي . احنا كطلبة رجالة كنا بنخاف نذاكر مادة النسا والولادة😂😂😂

المخ يا جماعة مسيطر عالجسم كله . هو المايسترو . الكمبيوتر . عارفين لو عندكم اللوحة الأم بايظة في الكمبيوتر هتلاقوا الماوس بيهنج والكيبورد بتهنج والشاشة بتهنج والصوت بيهنج . المخ يا جماعة . لو هنج يعمل أعراض كتير جدااا في الجسم و دي حاجة مشهورة اسمها (Psychosomatic Disorders) أو مشاكل الحالة النفسية والجسم. و مشهورة اوي في الستات . خصوصا لو اجوازهم مزعلينهم 😄😄.

أيها الستات المصريات الأصيلات . من فضلكن 😁. قطعوا النشرات الداخلية للدوا وانتوا خارجين من الصيدلية. علشان متجيش تقوليلي الواد أول ما اخد البخاخة وشه ورم و طخن 15 كيلو أصلي قرأت ان فيها كورتيزون😂😂

و متدخليش عالنت والنبي وتفتحي مقالات عن الحساسية والربو و فوائد العلاج بزيت كبد النسناس الأفريقي 😂😂

لو بتثقي في طبيبك امشي وراه و انتي مغمضة ومتسمعيش كلمة وراه . ولو مش واثقة في طبيبك ولو واحد في المية شوفي غيره علي طول 😁.

و بالنسبة لشركات الأدوية : مهو انتوا بردو محبكينها أوي. حبكت يعني تكتبوا علي دوا حساسية للأطفال مشهور انه يؤدي الي الوفاة ؟!!😯😯😮 م تهمدوا شوية انتوا كمان 😁

26/03/2018

الأوميجا 3 😍😍

أكيلة السمك يمتنعون يا جماعة

شير خلي الكل يستفيد

24/03/2018

الناس اللي عندها حساسية صدر . حساسية أنف. جيوب أنفية . حساسية عين أو رمد ربيعي . او أي حساسية بشكل عام . اليكم بعض النصائح:

1) متخرجوش من البيت النهاردة. الجو فيه تراب كتير و في انخفاض كبير في درجة الحرارة . و ده وارد جداا يسبب زيادة في الحساسية 😯😯.
2) خدوا أي مضاد للحساسية قبل الخروج اذا كان الخروج للضرورة . و كمان أدوية (mast cell stabilizers) زي ألليربان أو زاديتين أو كيتوتي قبل النوم الفترة دي.
3) خدوا بخاخات الأنف و الصدر اللي انتوا ماشيين عليها النهاردة لحد ما فترة التراب تعدي. طبعا بتوع حساسية العين هيستخدموا قطرات العين مش البخاخات 😂😂 .
4) متخرجوش من البيت النهاردة 😎.
5) لو مش هتسمعوا الكلام وهتخرجوا بردو . البسوا ماسك (قناع) و طبعا بالنسبة للستات سهلة هتحطي الطرحة علي بقك ومناخيرك 😃.
6) اغسلوا وشكم كل شوية بالمية . ونضفوا مناخيركم باستمرار من التراب ب منديل مبلول مية .
7) ما قلنا متخرجوش من البيت أحسن 😎
8) لو مخرجتوش من البيت وسمعتوا الكلام . اقفلوا بقي الشبابيك والأبواب . ومحبكش يعني التنضيف النهاردة يعني وكنس . خلوا البيت معفن أحسن 😂😂.
9) خلوا عندكم في البيت دايما أدوية الطوارئ . يعني مثلا حقنة حساسية عند اللزوم لو الدنيا قفلت . او جهاز نيبولايزر (استنشاق جلسات ) لو متوفر علشان جلسات الطوارئ للصدر.
10) سيبكم من كل اللي فوق ومتخرجوش أحسن 😁

23/03/2018

تكريمي العام الماضي من نقيب أطباء الدقهلية الأستاذ الدكتور / ابراهيم الزيات
Ibrahim Elzayat

21/03/2018

كتير بيفكروا ان اول ما الواحد صدره يزيق او يخرفش انه كده بقي عنده حساسية صدر 🤨😗.

الكلام في معني أخر . ان مش كل اللي صدره بيزيق أو بيخرفش يبقي عنده حساسية صدر. بنفس منطق ان مش كل اللي بيرجع عنده التهاب في المعدة . ومش كل اللي عنده اسهال يبقي عنده نزلة معوية .

تزييق الصدر او الخرفشة هي عرض من اعراض الصدر. وبتييجي مع أمراض كتيييييير اوي في الصدر. يعني اللي عنده دور برد ممكن صدره يزيق واللي عنده سدة رئوية ممكن صدرة يزيق واللي عنده تمدد شعبي صدره هيزيق واللي عنده تليفات بالرئة صدره هيزيق واللي عنده الكبد صدره هيزيق واللي عنده القلب صدره هيزيق واللي عنده الكلي صدره ممكن يزيق و اللي عنده جلطة بالشريان الرئوي صدره ممكن يزيق 🤔.

الغريب كمان ان كل دول هيكحوا 😏والاغرب ان لو حد فيهم شم ريحة نفاذة كمان ممكن يكح وصدره يتقفل وكده تبقي الجريمة كاملة وتهمة الحساسية لابسة لابسة😯😯.

أنا بقول الكلام ده ليه ؟؟ لان ده معتقد للأسف مشهور عند ناس كتير وللأسف عند دكاترة كتير كمان من تخصصات تانية بعيدة عن الصدر او الباطنة شوية😊.

بردو بقول الكلام ده ليه ؟؟ بقول كده علشان حضرتك لو صدرك زيق أو خرفش متندهش علي جارك الحاج السيد وتاخد منه جهاز الجلسات تعمل جلسة تفك صدرك 🤨. او تشفطلك شفطتين من بخاخة ابنك اللي عنده حساسية أو تبخ بختين من بخاخة زميلك في الشغل . لان مش كل اللي صدره بيزيق هيتحسن مع موسعات الشعب . لان في حالات ممكن التزييقة أو الخرفشة دي تروح ب مدر للبول مثلا 😎

زي ما ذكرت من شوية ان بعض حالات تزييقة او خرفشة الصدر ممكن تبقي حالات جلطة في الشريان الرئوي 😯😯. و بعضهم كمان مش سببهم صدر خالص و تروح لطبيب الصدر ويقولك روح انف و اذن وحنجرة يظبطلك تزييقة صدرك 😊😏🤔

كتير بنشوف ناس جاية تكشف بعد اسبوعين وشهر وشهرين من الكحة والتزييقة. مينفعش طبعا. زي مهو مينفعش تروح للمستشفي او الدكتور تقوله ماما في البيت وتعبانة ومش قادرة تنزل تكشف وبتكح وصدرها بيزيق. وتطلب منه يوصفلك دوا شرب موسع للشعب وبخاخة حلوة علي زوقك كده😊.

تزييقة الصدر أو الخرفشة عرض وليست مرض . متروحش توسع الشعب وانت مش عارف ايه اللي سبب ضيق الشعب علشان تعالجه.

ربنا يشفي كل مريض .
وكل سنة وامهاتنا جميعا بخير 😍

14/03/2018

كتير سألوا عن علاج الحساسية بالأمصال و طلبوا نتكلم عنها .

العلاج بالأمصال هو خط علاجي بنلجأ له في حالات معينة من مرضي الحساسية سواء حساسية صدر , انف , عين , أو حتي جلد

يعني معني كلامك يا دكتور ان مش كل حالة حساسية نجري نعمل لها اختبار وناخد مصل ؟؟ 🤔🤔. أيوة بالظبط . حالات معينة والطبيب المعالج هو اللي مكلف باختيار الحالات دي.

ايه اللي بيحصل ؟؟ المريض بيروح يعمل اختبار حساسية . بنحط بعض النقط علي ايده و شكة في كل نقطة وبعد مدة بنشوف النقط دي ونحدد المريض عنده حساسية من ايه بالظبط . خلي بالك انك لازم توقف ادوية الحساسية والكورتيزون قبل الاختبار بفترة هيقولك عليها الطبيب المعالج علشان الاختبار ميطلعش سلبي . بس زي ما بنقول سلبي كاذب.

في 3 مجموعات كبيرة من النقط دي . نقط من المثيرات اللي حوالينا . ونقط من الأكل . ونقط من الأدوية . لو حضرتك طلعت ايجابي من بعض انواع الأكل في مجموعة نقط الأكل هنقولك خد بالك منها مش هنقولك وقفها . يعني دي حاجات استرشادية مش الزامية يعني ممكن تطلع عندك حساسية من الموز وتقولي أنا بخلص السوباطة وأنا قاعد ادام مسرح مصر ومش بتعب منها ولا حاجة😂😂 . لكن الوضع يختلف شوية في مجموعة الأدوية . يعني لو طلع عندك حساسية من دواء معين هنقولك بلاش تخده أفضل .

طب افرض طلع عند سيادتك حساسية من بعض المثيرات اللي أشهرها تراب المنزل وحشرة الفراش و بعض الفطريات و كده . هنحضر لسبادتك مصل من اللي انت تعبان منه 😯😯 . أيوة انت قراتها صح. من اللي انت تعبان منه . وتبدا تاخد المصل ده بجرعة خفيفة خالص وبعد شهرين نعلي الجرعة وبعد شهرين نعلي الجرعة كمان مرة.

الفكرة ببساطة ان جهاز المناعة بتاعك لما بيشم المثيرات دي يقوم يتفاعل معاها ويطلع خلايا تعمل لك أعراض الحساسية . لكن بعد فترة من العلاج بالمصل جهازك المناعي يتعود علي المثيرات دي ويتصاحب عليها . ولما يتعرض لها بعد كده ميتعبش منها ومتحصلش أعراض الحساسية تاني.

بس خد بالك احنا مش هنحكم علي مفعول المصل قبل 6 شهر . علشان أول جرعتين خفاف وبنحكم علي الجرعة التالتة المهمة.

الله . طب انت مقلتش ايه هو مفعول المصل ؟؟ يعني أنا هبطل العلاج ؟؟ . لاء😮😥 .
المصل مش بديل عن العلاج ولا هيوقفه . المصل له وظيفتين . يقلل الأزمات . يقلل العلاج.

يعني سيادتك بيجيلك كل شهر دور بيقعد معاك اسبوع . مع المصل هيجيلك كل 3 شهور دول ويقعد معاك 3 أيام 🤗🤗. وضحت ؟؟

يعني هتمشي علي العلاج بردو. بس هيخف ان شاء الله ومش هنحتاج للكورتيزون كتير . ده غير ان ممكن بعد فترة المصل . العلاج يقف خالص زي ما في بعض الحالات مبقتش تحتاجه.
بس انت يا دكتور مقلتش فترة العلاج بالمصل . العلاج بالمصل بياخد من سنتين الي 5 سنين. ومينفعش يقف دون استشارة الطبيب المعالج .

طب الواد سيد جارنا كان اخد المصل وجاله شلل😯😮😥 . و دكتور الاعصاب قالها المصل السبب.

ليس للأمصال أي مضاعفات خطيرة ان شاء الله طالما متحضر من مكان موثوق فيه ومتحضر كويس . ممكن شوية ألم . احمرار . ورم مكان الحقنة في الكتف ويومين بالكتير ويروح.

والنبي ما في حاجة اسمها مصل مستورد 😂😂 . بطلوا همبكة 😃 . انا لسه قايل لك ان فكرة المصل اننا نصاحب جهاز المناعة بتاعك علي اللي انت تعبان منه . يعني اللي موجود حواليك . هو انت كنت تعبت من تراب المانيا لما تاخد مصل متحضر في المانيا ؟؟🤔😂

وحدة الحساسية والامصال عندنا في قسم الصدر جامعة المنصورة . بفضل الله من أقوي وحدات الحساسية علي مستوي مصل ان مكنتش هي الأفضل 💪💪 و بفضل فريق العمل كله وعلي رأسهم أ.د/ امينة عبد المقصود صاحبة الفضل في الحصول علي براءة اختراع العلاج بالأمصال في الحساسية.

اتمني اني أكون أفدت حضراتكم . و أسف علي الاطالة.