16/11/2025
كريمات التخدير الموضعي مش لعبة..
كريمات التخدير زي Pridocaine (اللي فيه Lidocaine + Prilocaine) فعالة ؟ آه طبعًا.. بس آمنة ؟ مش دايمًا..
ليه ؟ عشان في احتمال خطير جدًا اسمه Methemoglobinemia
دي حالة بتخلي الـ Hemoglobin مش قادر يشيل أكسچين.. يعني الجسم يخنق نفسه وهو مش واخد باله.. وتظهر بعض الاعراض زي ضيق النفس وتلون الجلد باللون الازرق أو الرماد والموضوع ممكن يدخل على مهدد للحياة لو ما اتلحقتش بدري.
فين الكارثة بقى ؟!
- لما حد يفكر إنه "كل ما تدّهن أكتر، يوجع أقل" ويحط الكريم بكميات تكفي عائلة كاملة.
- أو في بعض عيادات التجميل اللي مش تحت إشراف طبي، يستخدموه قبل الليزر أو الـ Microneedling كأنها جلسة مساج مش إجراء طبي.
- أو لما الحوامل يستخدموه لإزالة الشعر بدون ما يسألوا دكتور.. ده مش Wax، ده مخدّر موضعي وله تأثيرات Systemic.
- والأخطر؟ الأطفال.. جلدهم أرفع، جسمهم حساس أكتر، وتخيّل أم بتستخدمه على طفلها "عشان ما يعيّطش" من غير ما تسأل أي حد!
يعني باختصار:
ده مش كريم كوزمو.. ده دواء، وبيتعامل بجرعة محسوبة، وتحت إشراف طبي، خصوصًا مع الفئات الحساسة زي الأطفال والحوامل، أو مرضى الدم، وهسيبلك في الكومنتات كام لينك كده لحالات حصلها بالفعل الكارثة دي..
خد بالك من التفاصيل الصغيرة.. لأنها ساعات بتبقى سببب في مصيبة كبيرة. 💙
