Psychology -Sara Maher

06/11/2024

مستحيل يستمر الحب بين زوجين .. بين صديقين ..
بين أم وأولادها.. بين اب وعائلته..
بين أى علاقة إنسانية على وجه الأرض،
من غير كلام جميل ايجابي يفتح النفس ..
يوصف أحلى ما فيك، يشجعك .. يقويك .. يرجعلك ثقتك بنفسك .. كلمات بترمم الشروخ اللي جواك ..
تخليك تنظر لنفسك نظرة تانيه

يخليك تتغاضى عن نواقص كتير فى العلاقة، و فى حياتك، و مع باقى البشر المصابين بمرض الكلام الدبش .
كلام يطبطب و يجبر الكسر و الخاطر، في ظل ضغوطات الحياة الكتيرة.

فيه ناس معانا على الكوكب ممكن تكتئب و توصل للإنتحار بسبب حدة الإنتقاد و الكلام اللي يسم البدن.
الناس دي محتاجين "احتواء بالكلام الطيب"

ما هو لما ربنا يؤمرك إنك لازم تقول للناس حسنا قبل ما يؤمرك تصلي ..
يبقي الموضوع مهم جدا أكبر من كونه مجرد ذوقيات ..
هذه أساسيات التعامل السوي و بديهيات الصحة النفسية.

" و قولوا للناس حسناً و أقيموا الصلاة "
و قال رسول الله صل الله عليه و سلم «وَ الْكَلِمَةُ الطَّيِّبَةُ صَدَقَةٌ»
💖g.y💖

22/12/2022

الحالة النفسية مهم جدا أننا نهتم بيها لأنها بتأثر علي كل حاجة في حياتنا وهي عامله زى الشعره حاجة كده ضعيفة جدا بتتأثر بالافعال والكلام بسرعة غير عاديه عشان كده لازم يكون في وعي للكلام الي بيتقال سواء كان بهزار أو بجد عشان الكلمه دى ممكن تهدم انسان من جواه
ربنا يجعلنا من جابرين الخواطر

25/09/2022

كل انسان بيواجه مشاكل في حياته أزمات كبيرة ومشاكل صغيرة
الفرق بس في الوقت يعني مفيش انسان بيفضل عنده مشاكل وهموم وأزمات كبيرة وصعبه وغيره طول الوقت مشكلاته بسيطه هو بيبقي ترتيب من عند ربنا وكله هيمر بنفس التجارب ،في الوقت الي انت معندكش في مشكله غيرك عنده كون انك تحلل وتوصف حجم مشكله كل واحد وتقارنها بأزمتك ده يخليك طول الوقت حاسس انك تعبان علي طول ومضغوط

بلاش وقت الازمه نوقف كل تفكيرنا عليها ونربط كل احداث حياتنا بيها لأنها كلها تجارب بنمر بيها ونطلع منها بحاجة نتعلمها وده كله بيكون تمهيد بس للحياه الابديه انك تنجح في اختبار ربنا وتثق أنه دايما يفعل الخير حتى لو في الم بس في الاخر هتفضل حكمه ربنا اقوى واكبر شىء اكتر حاجة بتأذى بجد الإنسان مش المشكله الي وقع فيها لا الحاله النفسيه الي بتسيطر علي الواحد وقتها هي السبب
وعشان تقدر تتغلب عليها انك تعرف تواجه صح مش انك تنسي لانها مش بتتنسي انت المفروض انك تعرف الحاجات الي بتحسن حالتك النفسيه وتبدأ تعملها وكل ما كنت اقرب من ربنا كل ما كنت اقوى

02/09/2022

مواقف معينه هتجيلك في حياتك هتعرفك قيمة الي حواليك ومكانتك عندهم وقتها هتحس بالصدمة ناس كنت بتشوفهم قريبين هيبعدوا وناس تانيين كنت بتشوفهم بعيد هيقربوا والله اعلم بما في القلوب
بس الي بيمثل مش هيعرف طول الوقت يمثل هيقع في حاجات
وعلينا أن ندرك أن لكل شخص طريقه تعبير مختلفة في المواقف ، بشرط انك تميز بين الي مش حابب يقف معاك والي عايز توجيه للحاجات الي هيعملها
مفيش حد ممرش عليه مواقف صعبه بس قد ايه هي بتعلم فينا اكيد ربنا له حكمه في كل شىء وكل حاجة محسوبة

علشان متتعبش نفسك
- لما تمر بموقف معين متتوقعش حاجة من حد
-اتصرف علي حسب نفسك ومتتأثرش بكلام حد سواء سلبي او ايجابي
-متعملش حاجة لحد مش مقدرك بنيه انك بتعمل الخير عشان ربنا .لا اعمل خير ب 100 طريقه تانيه لربنا
-الي اتعلمتوا من حياتكم علموه لعيالكم يمكن صداماتهم تبقي أقل
-ابني لنفسك اسلوب تعايش يريحك خرج منه كل حاجة تعبتك بس اتاكد انك مش بتتعب نفسك انت

25/07/2022

التربية مش بس انك تعلم ابنك الغلط والصح وتقف علي كده
التربية مدارس ومناهج كتيرة
التنشئة السليمة انك تختار منهج الفهم وانت بتعرفه الغلط والصح والحلال والحرام تكون فاهم هو حرام وغلط ليه عشان يبقي عنده قناعة بلي بينفذه
متتكسفوش انكم حافظين الحلال والحرام من غير فهم عندكم فرصه دايما للفهم والمراجعة 💌 الي يكسف بجد انك تكون مستكبر تبان مش فاهم
اشتركوا مع ولادكم في البحث عن السبب وجمعوا اراء وتفسيرات كتيرة والي تلاقيه بيفسر من القرآن اتاكد أنه صح
اخلقوا جيل ليه رأى وشخصيه مبني علي الفهم هتلاقي اختياراته في حياته صح

20/07/2022

الاهتمام مش بيطلب ❎
الاهتمام بيطلب ✅
الاهتمام ليه صور واشكال كتيره ومختلفه من وجهه نظر كل شخص عن التاني مثلا
1_ #الاصحاب بيبقي مطلوب منهم اهتمام متبادل بين بعض يعني أن انا لو عندى ظروف طبيعي أن الصديق دوره أنه يسأل عن صديقة يكون جمبه قبل ما يطلب منه ويساعد بالطريقه الي هيقدر عليها طبعا ده لو صداقة قويه بين الطرفين هنا بيكون في اهتمام ولو مكنش موجود والصداقة قويه مفيهاش تقليل منك لما تعاتب الطرف الآخر ده من حقوق وواجبات الصداقة بينكم بشرط أن يكون الطرف التاني ده تصرف غير معتاد منه وقتها الصداقه بينا بتحتم عليا اتكلم معاه واقدر اميز الكلام والأشخاص الي تستاهل عتاب أو لا
2_ #الاسرة طبيعي أنك تلاقي الاب أو الأم أو احد الاخوات عنده مشكله معينه تجاه الطرف الآخر والمشكلة دى بتكون بسبب قله اهتمام لطرف بأختلاف صوره فطبيعي أن الطرف الي واقع عليه المشكله يتكلم مع أسرته ويوضح إحساسه ومشاعره وطبيعي علي الاسره أنها تحترم إحساسه ونراجع نفسنا في تصرفاتنا ايه الي سبب المشكله دى عند ابني وأبدأ احط خطه علاجيه للموضوع / طب ليه ههتم بكلامه واحطه في اعتبارى وأبدأ اغير اسلوبي لأن ده ابني فا سواء إن كان الأم أو الأب معندهمش استعداد يشوفوا ابنهم أو بنتهم في مشكله ما وممكن المشكله تأثر علي علاقتهم بيا وهيسكت ويقول الاهتمام مش بيطلب لا طبعا الاهتمام بيطلب ولازم يطلب باختلاف أشكاله ده رابط أسرى بيتبني عليه كل حاجة في حياه كل فرد داخل الأسرة

3_ #الزوجين الاهتمام بين الزوجين ٱمر طبيعي ومطلوب
يعني الزوج اكيد بيطلب اهتمام من زوجته باختلاف صورة علي حسب طريقه تفكير كل شخص يعني اكيد هيكون عايز منها تقدره وتحترم كلامه وتطيع أوامره وتحبه وتقوم بطلبات الاسرة وتهتم بيها وتحافظ علي شكل علاقتهم وتفهم طبع جوزها وتريحه طب هل دى كلها مش اشكال مختلفه للاهتمام تحت مسمي آخر طب هل لو الزوجه مش بتعمل حاجة من الحاجات دى الزوج مش هيتكلم هيتنازل عن أنها تكون مهمته بى وبالولاد والبيت وتسمع كلامة وتحترمه اكيد طبعا لا وهيطلب منها أنها تخلي بالها عشان في تقصير طب ماهو كده اهو طلب اهتمام يعني معني كده أنه بيطلب
طب بالنسبه للزوجة اكيد محتاجة تقدير واحترام وموده ورحمه وحب وغيرة ويكون سند وظهر حمايه ليها وتحس أنه ملجأها ومشاعر جميله وتحس منه أنه مستعد يعملها اى حاجة ويكون فاهم طبعها ومش بيتعمد يظلمها أو يزعلها وحياه أسرية تكون سعيده ليهم ولولادهم كل دى برضو صور مختلفة من الاهتمام واكيد لو مش موجوده هتطلبها وقتها مينفعش نقول الاهتمام مش بيطلب عشان ترجمه كلمه اهتمام مختلفه من شخص لآخر بس كلهم قريبين لبعض ولازم يطلب لحد هنا كده تمام
- طب ليه الزوج بيدى نفسه الحق أنه يطالب بالاهتمام ومش بيدى الزوجه الحق ده او العكس ؟

اولا كل طرف ليه طبع مختلف عن الطرف التاني فا طبيعي أن يكون تفكير ومنظور كل واحد للأشياء مختلف عن التاني يعني الزوج بيشوف الأمور من خلال تقديره هو لحجم الاشياء فا مينفعش لما (الزوج &الزوجة )تطلب شىء معين ياخد القرار بناء علي نظرته للحاجة دى علي انها مش مهمه أو صغيره لا لازم أنه يهتم بالطلب ده ويعرف أن في فروق فرديه بينهم وان طالما هي طلبت ده فا اكيد هو شىء مهم بالنسبه ليها والطبيعي أنهم بيكونوا اسره سوية ليهم ولولادهم فا واجب عليا أن انا ابدأ افكر في الطلب بجدية واحاول اعمله زى لما اتكلمنا عن الأسرة وقولنا أن لو ابني جه طلب مني اهتمام من ناحيه معينه وده حاجة غير طبيعتي اكيد ههتم وهحاول اهتم عشان ده ابني طب ماهي كمان مراتك وهو كمان جوزك
ودى حقوق وواجبات أساسية بينكم

✍️ فا الخلاصة هنا أن مفيش انسان كامل علي وجه الأرض وأن محدش هيقدر يقدم كل أشكال الاهتمام دى منغير ما يقع منه حاجة ومطالبه كل واحد بحاجة بيدل علي أهميتها بالنسبه ليه ومش بيلغي حاجة من الحاجات الموجودة
ومع اختلاف الاطباع بتختلف صور الاهتمام
بس لو الشخص الي قدامك حد مهم ليك ليه طبع وانت ليك طبع تاني وفي نقط مفقوده بينكم هتحاولوا تهتموا بالنقط دى عشان بعض ❤️ طلب الاهتمام بيدل علي المحبه وانك ليك قيمه مهمه عند التاني ......

25/06/2022

ولادنا محتاجين يبعدوا شويه عن سيطرتنا عشان يعرفوا يبنوا فكر خاص بيهم ويختاروا طريقهم عن اقتناع مش شرط أنهم يمشوا علي نفس نمط اهاليهم ويتبعوا نفس الطريق سيبوهم يقرروا هدفهم لوحدهم وشكل حياتهم .....

بس مهم قبل المرحله دى انا كأم واى اب يغرزوا فيهم من صغرهم الحلال والحرام والصح والغلط والفكر الديني السليم مش المعقد ونوسع دايره أفكارهم ونخليهم يبحثوا عن المعلومات دايما بطرق آمنه طبعا وهو طفل صغير الام والاب والمدرسين هما مصدر المعلومات لكن بعد كده هيكبر وهيتعرف علي ناس تانيه وفي صحاب سوء كتير ومش هينفع نفضل نتعامل معاهم علي أنهم اطفال كل سن ليه طريقه تعامله
عشان كده ضرورى ضرورى انكم تبنوا طفوله صح عشان لما يجي وقت أنه يختار طريقه وشكل حياته تضمن نتيجه مبهره وده محتاج تشجيع منكم

23/06/2022

كنت بتفرج علي فيديو لشخصيه مشهورة كانت بتبكي وبتقول أنها اكتشفت بعد وقت أنها ملهاش حد ولا صحاب ولا قرايب وقت لما وقعت في ازمه 😢

عايزة بس اوضح حاجة احنا كلنا ربنا خالق كل واحد مختلف عن التاني في كل حاجة فاطبيعي تفكيرى في الأزمة يختلف عن تفكير غيرى يعني في أشخاص بتكون معندهاش حلول تطرحها ليكي أو مش بتقدر تواجه مشكله او مش بتعرف تتصرف ازاى وقت المشكله لكن مش قله اصل منهم هما مش قاصدين بس هما اصلا طبيعتهم مش بيعرفوا يتصرفوا حتي في ازماتهم هما دول محتاجين توعيه بس مش اكتر
واى شخص واقع في ازمه ميستناش أنه عايز رد فعل معين فا هيلاقيه بالظبط زى ماهو في خياله
كل واحد ليه طريقته في وقت الأزمة 🤔طب معني كده ايه اني اتعامل مع قليل الاصل زى الي عنده اصل واقول ماهو مش عارف يتصرف لا طبعا 👊
الفرق بين الاصيل وقليل الاصل
الاصيل ❤️ هتلاقيه معاك مش بينسحب حتي لو مش عارف يقول ايه هيعبر عن الي جواه بطريقته الي هي ممكن تكون غير ما انت متخيل المهم أنه معاك ومش هيتخلي عنك واكيد بحكم علاقتكم ببعض انت بتشوف ردود أفعاله في أزماته
قليل الاصل هتلاقيه بينسحب ومش شاغل باله بيك هو بيكون معاك وقت لما هو يكون محتاجك لكن الأدوار تتبدل لا هيهرب وده هتلاقيه في اى موقف يخصه بيقف 10/10

انت بقي 🫵 اتعامل مع الي اودامك بطريقتك انت الي هيريح ضميرك اعمله لوجه الله بس ابعد عن قليل الاصل عشان ده التعامل معاه هيتعبك انت
بنحدد بقي درجه قرب الي حوالينا سواء أصحاب أو قرايب من خلال تصرفاتهم في كل المواقف مش في الأزمة بس عشان في ناس بتعرف تظهر بدور الي ساندك وفي ضهرك وهو اصلا فرحان فيك وبيمثل الدور 😈

16/06/2022

ده احسن تشبيه. الموضوع بقي علني ومنتهي البجاحة وطبعا مناسبه دخول العيد
هتلاقي المناظر دى منتشرة في الشوارع لدرجة أن الواحد بيكره الخروج بسبب المناظر دى واغلبهم عيال صغيره هو واخد مصروفه من أهله ونازل يتفرج علي بنات الناس والي تيجي بقي . وهي واخده شرف وسمعه أهلها وثقتهم ونازله تستعرض نفسها زى اى سلعه رخيصة حاجة تحزن والله تعب الأهل علي ولادهم وسعيهم علي توفير احسن معيشه ليهم في ظل صعوبه الزمن ده وغلاء كل حاجة
وتلاقي ولادهم ولا حاسين بحاجة
اتقوا الله في نفسكوا قبل اى حاجة واعملوا حساب رد الدين
والله كل حاجة بتقعد
طب ليه متبقاش راجل وتحترم كرامتك وتشغل نفسك بمستقبلك وبعد كده دور علي الي تناسبك
والبنت ليه بتقلل من نفسها انا طبعا عارفه ان في مرحله المراهقه بيكون تفكير كل واحد مختلف عن تفكيره بعد المرحله دى . فكروا هتعملوا ايه مع ولادكم كويس في مرحله تكوين الشخصيه وازرعوا جواهم سعيهم لمستقبلهم بلاش كل كلام الأهل للبنت علي الجواز لأنها هتركز علي الموضوع قبل أوانه وتلاقي تفكيرها كله في الجواز وتبدأ تستجيب للمؤثرات الخارجيه من اى حد وعلموهم أنهم اغلي من اى حاجة وبالنسبه للولد التعامل معاه علي أنه صاحب وكبير ويتقي الله في أعراض الناس وبلاش فكر أن الراجل ميعيبوش حاجة ونصقط العيب علي البنت لوحدها لانه مشترك بينهم والأهل ليهم دور في ده الاب أو الأم الي بيشوفوا الغلط من عيالهم ويسكتوا عليه يستاهلوا الي بيعملوه فيهم لازم يكون عندنا ثقافة التعامل مع كل مرحله في تفكير ولادنا وربنا يرزقنا ببرهم ويقوينا علي تربيتهم دول امانه هنتسأل عليها واحنا المسؤولين عن اى حاجة اتزرعت فيهم لحد يوم القيامة

02/06/2022