02/04/2023
لقطة إخراجية متميزة جداً
فى مسلسل الهرشة السابعة …
بعد نقاش و مصارحة بين الزوجين ..
بيحاسبوا بعض على مشاكل متراكمة لمدة ٧ سنوات
و قرروا الانفصال … لأن محدش منهم شايف أن التانى مهتم بيه أو باقى عليه
نظر الزوج للغسالة المكتوب عليها " العمر الافتراضى ٧ سنوات" و كأن دى رسالة بتأكد عليه ، إنتهاء صلاحية زواجه
بعد مرور ٧ سنوات زواج
لو هنكلم على غسالتى الاوتوماتيك القديمة … عاشت معايا ١٥ سنة شغل شاق … لا تكل و لا تمل من الحمولة و تعدد البرامج و طول الساعات ..
و لما غيرتها … كان مش لأن عندى مشكلة معاها …. بس لأنى كنت عايزة سعة أكبر و اوبشن مختلف
و لما جبت الجديدة … حسيت اد ايه القديمة كانت أقوى و صبورة و أصيلة عن الجديدة
دا بالنسبة لعالم الغسالات…
نيجى للعلاقات…
العلاقات ليس لها عمر افتراضى
لأنها مش آله و برنامج software
بعد وقت يقدم و لازم يتغير او يتم التخلى التام عنه ..
العلاقات زى النخل … جذوره بتحتاج كمية كبيرة من المياة .. تصل لمرحلة الإثمار بعد حوالى ٤ سنوات
و قمة الإنتاج بعد ١٠-١٥ سنة
و يصل عمرها ل١٠٠-٢٠٠ سنة .. و قمة عطائها ٥٠ سنة بعد بداية الإثمار
( كل دى معلومات تقريبيه عامة من النت)
عشان النخلة تتوقف عن إثمارها و هى فى فترة نموها و عزها .. بيكون ذلك عن طريق حد هو اللى قرر يقتلعها أو يفصلها عن جذورها فيحرمها فرصة الاستمرار و الإثمار …
هو دا اللى بيحصل حالياً لزواج … الجيل الجديد بيتعامل مع الزواج بفكرة برامج software … كتالوج و خطوات تشغيل … نتفرج عليه و نفهم أخره بسرعة …
و لو مش عجبنا و فيه version أحدث … نحاول نحدثه و لو ما منفعش نسيبه و نشوف غيره..
نقلوا فكر التكنولوجيا لحياتهم … فتحولوا ل robots حتى فى مشاعرهم .. عايزين يدوا اوردر … و يكون فى إجابات متوقعة نموذجية .. ليس فيها حسابات مشاعر البشر ..
اللى ممكن يقول كلام بمشاعره .. غير الحقيقى فى عقله
اللى لسانه ممكن يسبق منطق تفكيره
اللى ممكن يقول للى بيحبه مش طايقك و هو من جواه ميقدرش على بعده و مهم فى حياته
اللى جسمه و هرموناته و احتياجاته و سنه بيأثروا على مشاعره و منطق تفكيره
هو دا قانون المشاعر الانسانية السامية
اللى الإنسان بس هو اللى يملكها و عمر الذكاء الإصطناعى لآخر العمر ما هيوصل لها حتى نهاية الزمن على الأرض
عشان كده ربنا قال أساس العلاقة بين الزوجين المودة و الرحمة مش الحب … الحب بيكون نتيجة و مكافأة لمزيج المودة و الرحمة سنين
الثمار الطيبة الغنية محتاجة رعاية سنين و صبر عشان تطلع أجمل ثمار … بتتحمل رياح و تقلبات جوية كتير لغاية ما تصل لثبات و الأستقرار…
أكبر مشكلة بتعصف بنخلة الزواج و هو لسه فسيلة
التوقعات expectation..كل واحد داخل بتوقعات بانى عليها حساباته…. وكل ما يخيب توقع … الرصيد يقل
لغاية ما قائمة التوقعات تخلص و الرصيد ينفذ
و يعلقوا السبب على العمر الإفتراضى
الزواج اللى زى النخلة فى رعايته و الصبر عليه
بيكون عامل زى كلام كاظم الساهر فى أغنيته
" كل ما تكبر تحلى .. وتصير أحلى و أحلى "
هى دى المودة و الرحمة اللى بتؤدى لحسن و حلاوة العشرة
مش بالحب و المعرفة سنين طويلة قبل الزواج
عن حب أو صالونات …. المودة و الرحمة مش الحب هم الأساس
✅✅قولوا و علموا أولادكم الصغارو الشباب كل يوم
“ الجواز نخلة مش سوفت وير "
يومكم مودة و رحمة 🥰
