19/07/2025
إزاي تكتشفي إنه مناسب و مش مخادع ؟
لما بندخل في علاقة جديدة، كلنا بنتمنى إن اللي قدامنا يكون صادق وواضح. بس أحيانًا الكلام الحلو ممكن يخدعنا و علشان تسلكي رحلة الوعي صح خدي بالك من اللي جاي:
1. شوفي أفعاله مش كلامه وبس
كتير بنسمع كلام جميل زي "أنا بحب النقاش والحوارلكن هل الأفعال بتطابق الكلام ده؟ هل بيقاطعك كتير وأول ما تختلفوا بيتعصب؟
ولو حد بيقول إنه بيحترم الخصوصية، هل بيلح عليكي يعرف حاجات إنتِ مش جاهزة تحكيها؟؟ الصدق الحقيقي بيبان لما تلاقي إن أفعاله بتعكس كلامه بالظبط.
2. اسألي أسئلة تكشف طريقة تفكيره
بدل ما تعتمدي على الإجابات المثالية، اسألي أسئلة عملية وبسيطة تبينلك طريقة تفكيره الحقيقية. ممكن تسألي: "لو اختلفنا في الرأي، بتتصرف إزاي؟" أو "إيه أكتر حاجة ممكن نتخانق عليها في المستقبل؟" الشخص الناضج والصادق هيرد بصراحة وهيبينلك إنه بيفكر بعمق في المشاكل وازاي يتعامل معاها. أما اللي بيحاول يرسم صورة مثالية لنفسه، غالبًا هيكون بيحاول يبان ملاك.
3. الوقت بيكشف المستور
العجلة ممكن تخلينا منشوفش الصورة الكاملة. أي حد بيحاول يلبس قناع مش هيقدر يحافظ عليه للأبد. مع الوقت، هتشوفي شخصيته الحقيقية تحت الضغط، وقت الزعل، وقت غيرته، وحتى لما تبدأي تعيشي حياتك بطريقتك وتحددي أولوياتك. هل هيدعمك ويشجعك ولا هيتضايق من استقلاليتك؟ الوقت كفيل إنه يكشف كل حاجة. بس المهم ركزي
4. خلي بالك من المبالغة في المشاعر
لما تلاقيه بيقولك كلام مبالغ فيه زي "عمري ما أزعلك أبدًا" أو "أنتِ كل حياتي"، ده ممكن يكون بيقولك اللي هو فاكر إنك عايزة تسمعيه. ده مش معناه إنه مش صادق، لكن ممكن يكون بيحاول يرضيكي بزيادة و ده مش منطقي، اسأليه أسئلة تخليه يفكر في جوانب أقل مثالية في العلاقة، زي "إيه أكتر حاجة تتوقع ممكن نختلف عليها؟" إجابته الصادقة هنا هتبينلك إنه شخص بيفكر بعمق وواقعية.
5. استشيري آراء محايدة وموثوقة
لو عندك الفرصة تسألي حد ناضج ومحايد يعرفه كويس، زي أخته أو صديق مقرب أو حتى زميل شغل، ده ممكن يديكي رؤية مختلفة. كمان، خدي رأي حد فاهمك كويس ومرّ بتجارب سابقة، بس اختاري شخص مش بيحكم على الناس بسرعة وبيقدر يشوف الأمور من زوايا مختلفة. الآراء دي ممكن تكون مفيدة جدًا عشان تاخدي قرار سليم.
قاعدة ذهبية:
الحب الحقيقي مش مجرد كلمات حلوة، الحب بيبان وقت الخلاف. هل فيه احترام متبادل وقت لما تختلفوا؟ هل فيه سعي للتفاهم والاحتواء؟ ولا أول ما تختلفوا، بتتحولي لشخص غريب عنه؟ فكري في النقطة دي كويس جدًا.
يا ترى إيه أكتر نقطة من دول حاسة إنها مهمة ليكي لما بتتعرفي على حد جديد؟
#احكي مع و #علاقات #حب #زواج #خطوبة
