12/10/2025
عارف إن المناخير بايظه الفتره دي
تعالو اقولكم الخلاصه
ابنك اللي اقل من ٦ شهور وعلي طول انفه مسدوده
سببه ٤ عوامل
١- لِسَّه ما اتعودش علي الجو اللي أتوجد فيه فجاءه بعد ماكان عايش برنس في الرحم فالنوز مستغربه فعطول فيها افرازات
خصوصا ان الجو برد ومش بس كده ده مش مستقر بالليل ساقع وبالنهار دافئ فالانف مش عارفة تتأقلم
ودي حاجه اسمها vasomotor instability
٢- مش هيساعدنا انه يتخلص من الإفرازات دي مش هيستنشق او حتي يحاول طردها
٣- النوز لِسَّه صغيره فأقل حاجه بتسدها
٤- ولان الاطفال في اول سنه كل اعتمادهم علي النفس من الأنف ومابيعرفش يتنفس من البق فتبان المشكلة عظيمه
مع ان مافيش حاجه مرضيه كبيره هي مسألة وقت علي مالطفل...>
١- يتعود علي الجو وتقل الإفرازات
٢- يبدأ يقعد وتنزل الإفرازات بالجاذبية
٣- وجهه يكبر وأنف تكبر وتتقبل قليل من الإفرازات بدون ما تقفل
عشان كده الموضوع هيطول خصوصا في الشتا
فلازم ننضف الأنف اول بأول قبل كل رضعه
بالبخاخه أو محلول ملح مع الشفاط
ماتتخيلوش الموضوع ده مهم اد ايه وبيمنع مشاكل كبيره جدا ذي التهاب الشعب الهوائيه والالتهابات الرئوية
د. حسن رجب
مدرس مساعد طب الاطفال
كلية طب - جامعة الازهر
