09/01/2026
.. الوصاية العشرون للوقاية من القدم السكري في مرض السكر من النوع الثاني خصوصا لان الموضوع نادر الحدوث في النوع الاول من السكر بفضل الله... ملحوظة ممنوع منعا باتا استعمال اي دواء يرد في البوست بدون استشارة طبيب او بصفة عامة ممنوع تناقل ادوية بين اي مرضي بناء علي تجارب سابقة دون استشارة طبية لان دا ممكن يعرض المريض للخطر لا قدر الله لان كل حالة مختلفة عن الاخري.
1.لازم تفهم مريضك اهمية متابعة السكر سواء بعمل جداول تحاليل بااستخدام جهاز قياس السكر العادى اللى لازم يبقى متوفر مع اى مريض سكر وخصوصا لو على انسولين والمريض اللى ماشى على انسولين لازم جدول تحاليل بيحتوى على 7 تحاليل للسكر بالجهاز المنزلي قبل الوجبات وبعدها بساعتين وقياس قبل النوم كل اسبوعين ل 3 اسابيع على اقصى تقدير ومدة تسجيل القياسات 3 ايام متتالية وفى اللى علاجهم بيعتمد على اقراص بنعمل كل اسبوعين صايم وفاطر وبعد الوجبة الرئيسية اللى هى الغدا بساعتين.
2.لازم المريض يعمل سكر تراكمى كل 3 شهور ويكون فى الاطار المنضبط اللى بيتراوح بين 6.5 الى 7 فى المية وممكن نوصل ل 7.5 بالمية في المرضي المعرضين لهبوط السكر وكبار السن ومرضي القلب اما في الشباب بدون مضاعفات افضل يكون التراكمي اقل من 6.5 بالمية خصوصا لَو استطعنا تحقيقه بدون هبوط سكر.
3.لازم يعمل ملف دهون خصوصا تحليل الكوليسترول والاهم منه الدهون منخفضة الكثافة LDL والدهون الثلاثية TGكل سنة علي الاقل او ربما علي فترات زمنية اقل لو في ارتفاع في دهون الدم لان الدراسات الحديثة اثبتت انها سبب رئيسي في كل مضاعفات السكر ولازم تفهم كطبيب ومريض اهدافك كويس فيهم ان الدهون الثلاثية اقل من 150 مجم والدهون الخبيثة منخفضة الكثافة LDL اقل من 100 مجم واقل من 70 مجم في مرضي القلب لا دا ذهبوا لاكتر من كدا لو مريض قلب عنده درجة عالية من الخطورة اقل من 55 مجم واقل كمان والموضوع مع تنظيم الاكل بنستخدم ادوية مخفضة للدهون والتغذية هنا هدفها تقليل الدهون والنشويات لان النشويات وجدوا لها تاثير كبير في ارتفاع الدهون الثلاثية..
4.كل التوصيات العالمية اجمعت ان اى مريض سكر نوع تاني فوق ال 40 سنة لازم يمشى على دواء مخفض للدهون حتي لو ارقام الدهون عنده في الاطار الطبيعي لان النوع الثاني من السكر عامل خطورة في اختلال دهنيات الدم مش فقط كرقم مرتفع ولكن شكل الدهون بيختلف مع السكر لدهون منخفضة الكثافة صغيرة مدببة بتكون السبب الرئيسي في تصلب الشرايين والتاثير علي الشرايين التاجية وشرايين المخ والاطراف وهنا ادوية مخفضات الدهون ايضا تعمل كمضاد للالتهاب ومانع لتكون عوامل الاكسدة المسببة لتصلي الشرايين لا قدر الله اما النوع الاول في حالات محددة مثل عمر اكثر من أربعين عام مع مدة اصابة اكثر من 10 سنوات مع وجود اعتلال في الكلي او اعتلال في القلب او عوامل خطورة كثيرة لامراض القلي والاوعية الدموية وعدم انضباط في ملف الدهون وارتفاع ارقامه وبنستخدم جرعات متوسطة القوة لعالية القوة moderate to high intensity statin تحت اشراف طبي بجرعة 20 ل 40 مجم فى ال atorvastatin او10 مجم ل 20 مجم فى ال rosuvastatin وممكن جرعات اعلي وممكن نضطر لاضافة ezetimibe او PCsK9 inhibitors بمعرفة طبيب .
5.لازم تعلم مريضك يفحص باطن القدم قبل النوم بمراية ويشوف اى جرح او خدش لانه دا ممكن يبقى بداية افة القدم السكرى.
6.لازم يخصص مناديل نضيفة بيتم التخلص منها بعد كدا لتنشيف بين اصابع القدم بعد الوضوء او غسل القدم وبلاش فوطة واحدة لأنها ممكن تبقي وسيلة لنقل العدوي بعد كدا ولو فيه فطريات بينهم لازم يعالجها لانها بتهرى الجلد وبتبقي مدخل للجراثيم وياريت مانستهونش بموضوع الفطر اللي بين اصابع القدم دا لانه في معظم الاحيان للاسف بيبقي بداية القدم السكري.
7.لازم المريض يرطب رجله بفازلين او كريم مرطب عشان القدم الناشفة المشققة مدخل للجراثيم بس بدون افراط عشان ممكن قدمه تنزلق لو وضع كمية كبيرة من المرطب وتحرك.
8.عمد قص اظافره لازم مقص اطفال ويقص بالطول بلاش يعمل انحناءات curve منعا لاى خدش بسيط ممكن يبقى مدخل للبكتيريا.
9.فقدان الاحساس من اسوء الحاجات لمريض السكر فعشان كدا لو المريض مش حاسس برجله او الحذاء بيتخلع منه بدون احساس منه او حاسس انه ماشى على قطن لازم يزور طبيب السكر لاستبعاد التهاب الاعصاب الطرفية والتعامل معاها مبكرا ماينفعش يستنى حدوث مشكلة.
10.ممنوعا منعا باتا ان المريض يمشى حافى بدون حذاء او حتي كروكس او لكلوك حتى لو داخل البيت لان دا ممكن يعرضه لاى شوكة او عضمة او اى حاجة هايفة تدخل رجله وتكون بداية لافة القدم السكرى وزمايلنا جراحين الاوعية ياما شافوا حاجات غريبة داخل اقدام المرضى فى الاشاعات اللي بتتعمل علي قدم المريض .
11.ممنوع ان المريض يلبس حاجة مكشوفة فى رجله وهو خارج الشارع يعنى بلاش الصنادل او الشباشب المفتوحة والشئ اللي مش منطقي او عقلاني ان مريض سكر يتحرك بدون حذاء او اي حاجة لابسها في رجله حتي لو داخل بيته.
12.ممنوع لبس الشرابات اللى من الياف صناعية لانها بتكتم الرجل وبتعمل عرق واحتكاكات ممكن تبقى مدخل البكتيريا وافضل المصنوعة من القطن.
13.لما تجى تشترى shoes حذاء لازم تشتريها بالليل وتكون اوسع من رجلك نمرة لان بالليل بيحصل شوية ورم خفيف فى الرجل والمقاس بيزيد فلازم ناخد بالنا عشان لو الجزمة ضيقة او كاتمة هتعمل عرق واحتكاكات مدخل البكتيريا.
14.لازم المريض يقارن رجله ببعض لو لقى شعر رجل فيهم بيقع او الجلد ناشف او درجة حرارتها اقل من التانية لازم يشوف دكتور اوعية دموية بسرعة مايتاخرش.
15.طبيب الاوعية بيفحص النبض فى الشرايين ولو مش حاسس النبض بيطلب اشعة ملونة على الاوعية duplex بيشوف فيها مقياس مهم اسمه A/B index او ankle to brachial pressure difference ولو اقل من 0.9 يبقى فيه مشكلة .
16.لازم قبل المريض ماياخد شاور وخصوصا لو بمياه سخنة حد يحس حرارة المياه او هو يحسها بكوعه اللى مابيفقدش الاحساس ابدا لتجنب الحروق اللى بتحصل لكبار السن لفقد الاحساس بحرارة المياه.
17.المريض بتاعك فى حالة وجود التهابات اعصاب طرفية سواء شكشكة او تنميل او كهربا فى الرجل محتاج اهم من اي فيتامينات ظبط سكره اولا وثانيا وثالثا مع استبعاد اسباب اخري لالتهاب الاعصاب الطرفية ومن ضمنهم كسل الغدة الدرقية والتهاب الاعصاب المناعي وارتفاع وظايف الكلي ونقص فيتامين ب 12 وادمان الكحوليات وغيرها مش سكر فقط .. ادوية فيتامين ب او غيرها ليست الحل الاساسي في تحسن التهاب الاعصاب الطرفية ولكن لابد من ضبط السكر اولا وثانيا واستبعاد باقي الاسباب الاخري لالتهاب الاعصاب الطرفية. #
18.لو فى الم او وجع للرجل الاساس فى العلاج تظبيط سكره اولا وثانيا وثالثا وبعد كدا عنده اختيارات قوية بترتيب التوصيات العالمية duloxetine الاقوى والافضل بس سعره غالي بجرعة من 30 ل 60 مجم يوميا وراه pregablin اللي بقي جدول بجرعات بين 50 ل 150 مجم ونادرا مابنوصل ل 300 مجم واقلهم في القوة وابطاءهم في ظهور الاثر gabapentin بجرعة من 100 ل 400 مجم وممكن جرعات اعلي كثيرا من 900 ل 1200 مجم وحاليا منه الصيغة ممتدة المفعول 300 و 600 مجم و في كلام عن استخدام بعض الادوية المضادة للاكتئاب TCA زي amitriptylline بجرعة من 25 ل 75 مجم يومي لمدة شهر او شهر ونص لحد مانظبط السكر وممكن فترة اطول بس دايما نبدا جرعة اقل ونزود تدريجي وكله بوصف طبي لتحديد جرعة او مدة.
19.البنات الانسات فى سن الشباب بلاش الكعب العالى فى مريضات السكر لانه بيركز ضغط الساق على كعب القدم وبيحمل عليها ودى الدم الواصل لها قليل اصلا فبيعمل قرح بتبقى مدخل للقدم السكرى neuropathic ulcer..
20.كل فترة متابعة لمريضك ممكن تحتاج تفحص قدمه تنظر بين اصابع القدم لاستبعاد الالتهابات الفطرية وتفحص جيدا لاستبعاد اي قرح او نتواءات او زوايد جلدية مع فحص النبض في شرايين القدم خصوصا ال doraslis pedis وحاول تحس درجة حرارة القدمين وتقارنهم ببعض وتنظر لتوزيع الشعر في الساق وهل في فقدان شعر في قدم عن اخري او تقصف في اظافر القدم او تشققات واعمله فحص اعصاب 10gm monofilament test لو متاح في مكان عملك ممكن تبقى سبب فى المحافظة على قدمه من البتر بفضل الله .. اوعي تنسي ان سلسلة المضاعفات متصلة لو لقيت واحدة وبديت تعالجها دور علي الباقي وامنعه ماتستناش تهاجمك هاجمها.. مثلا المرضي بيتعاملوا مع ضعف الانتصاب المصاحب للسكر انه حاجة جنسية فقط مع انه اول ملامح التهاب الاعصاب ومنها الاعصاب المغذية للاعضاء التناسلية وممكن يبقي انذار لوجود مشاكل بالقلب والاوعية الدمَوية.. اسال مريضك امتي اخر فحص قاع عين عملته واطلبهوله وعلمه يعمله سنويا مايستناش نزيف الشبكية وانفصالها وبصره يروح.. دور وامنع البدايات وعالج الارتشاحات الخفيفة مع طبيب العيون والسكري وتكاملهم سوا.. ماتستناش وظائف الكلي ترتفع عشان تقول مشكلة ونعالج ويتحول لمريض فشل كلوي مزمن علي غسيل كلوي.. اطلبله تحليل بسيط سنويا يتنبا بمشاكل الكلي في بدايتها عينة بول بسيطة لتحديد الزلال الدقيق في البول A/C ratio ولو فيه مشكلة اتاكد بتحليل تاني وصنف مريضك من خلال تحليل متاح حاليا زي ال EGFR خلاص وظائف الكلي العادية المحفوظة serum creat تراجع دوره في تحديد اعتلال الكلي بسبب السكري احنا بندور نمنع قبل ماتحصل المشكلة..انزيمات الكبد اعملها وحدد مشاكل ارتفاع دهنيات الكبد بسبب السكري عشان توجه مريضك يغير نمط حياته ويظبط سكره.
دى معلومات بسيطة محورها المريض تحت اشراف طبي.
د.حمادة الامين
استشاري العلاج الطبيعي والتغذية العلاجية
يتمنى لكم الصحة والسعادة دائما
