22/03/2020
علشان تصاب بفيروس الكورونا لازم يدخل من ال 3 منافذ دول ،
غير كده مش هيدخل
يعني إيه ؟
يعني الفيروس مبيتنقلش من الجو ، مبيتشمش ،
مفيش كائن هلامي في الهوا هنشمه ويموتنا ،
دي شائعات ،
الفيروس كمان مبيخترقش الجلد
يعني من الآخر علشان تصاب بالفيروس ،
لازم تكون خالطت مريض عن قرب وتعرضت للرذاذ الصادر منه
وأيضاً لازم تكون لمست/قبلت/ عانقت شخص ( أو جسم صلب ) عليه الفيروس ،
وبعدها رفعت إيدك لأنفك أو فمك أو عينيك ،
وبعدها الفيروس بيبدأ يخش لجهازك التنفسي علشان يهاجم جسمك ...
من هنا فكل الكلام اللي جاي ده لو التزمت بيه بنسبة كبيرة ،
فأنت هتحفظ نفسك من الإصابة بالفيروس بنسبة كبيرة ،
ومش بس بتحفظ نفسك وإنما بتحقظ آلاف وربما ملايين البشر
1- متحطش إيدك خالص على بوقك أو مناخيرك أو عينيك ،
ولو مبتقدرش تتحكم في ده انتقل لرقم 2
2- اغسل إيدك بالماية والصابون لمدة 20 ثانية على الأقل ،
حك إيديك الاتنين جامد بحيث تزيل أي جراثيم عليهم ،
دول متوفرين عند أي حد ،
مش لازم ديتول ، مش لازم كحول ، ( لو وُجد فأهلا وسهلاً )
لكن الماء والصابون كافيين جدآ
3- بلاش سلام ولا تقبيل ،
طاب لو سلمت أو قبلت ؟
متحطش بعدها إيدك على عينيك أو بوقك أو أنفك ،
اغسلها 20 ثانية الأول
4- بلاش خروج من البيت ،
ولو خرجت بلاش تلمس أجسام غريبة ،
حافة كرسي المترو ، ماكينة التذاكر ، متسندش إيدك على السلم الكهربا ، متحطش إيدك على السنّادات اللي فوق ،
بص من الآخر ،
أول ما تخرج من بيتك حط إيدك في جيبك ومتخرجهاش إلا للضرورة القصوى ،
أظن بسيطة دي
5- متعطسش غير في منديل وبعدين ارميه على طول ،
معاكش منديل ... يبقى اعطس في كمك ،
آه متتكسفش ،
حط وشك في كوعك على الهدوم واعطس فيه ،
بس اوعى تعطس أو تكح في إيدك ... دي أسرع وأخطر وسيلة لنقل الفيروس
6- الكمامات ملهاش لازمة لو أنت مش عامل في المجال الطبي ،
المناديل ومطهر كحول ( تركيز 70% على الأقل ) هتكون أفيد ،
متشجعش جشع تجار الأزمات وتشتري كمامات بأضعاف تمنها الأصلي
7- لو حسيت بأعراض الفيروس ،
واللي هيا ارتفاع درجة الحرارة ، السعال ( الكحة الناشفة المستمرة ) ، الرشح ، وأعراض الإنفلونزا التانية ،
يبقى اعزل نفسك ،
وبلاش سلام ولا خروج من البيت خالص
8- لو عملت كل اللي فات ده الفيروس مش هيهزمك بإذن الله ،
ولو حصل وأصبت بالفيروس فالإحصاءات لحد دلوقتي بتقول إن نسبة الشفاء منه عالية
9- ابني أو بنتي صغيرين أعملهم ايه ؟
بعد قرار وقف الدراسة وقفوا الدروس كلها والسناتر والتجمعات والخروجات ،
وخليني هنا أطمنك علشان متقلقش ،
لحد دلوقتي نسبة الوفيات من سن سنة ل 9 سنين 0 % ،
ومن سن 10 لحد 40 سنة النسبة 0.2 % ،
وبعدين بتزيد في المرضى مسبقًا بأمراض مزمنة زي الضغط والسكر وخصوصاً المدخنين
لو فتحت السوشيال ميديا هتحس إن العالم نهايته قربت ،
وهتلاقي أجواء من الرعب والخوف ودول ضررهم أكبر بكتير من الفيروس نفسه ،
الناس في أمريكا وأوروبا والعالم كله نزلوا يخلصوا على كل المنتجات في السوبر ماركت بسبب سيطرة الذعر عليهم ،
ده مش صحيح
إحنا في معركة مع الوقت ،
بنحاول نكسب وقت لصالح البشرية ،
هنلاقي علاج أو لقاح بإذن الله ،
لكن لحد ما ده يحصل ...
فدورنا هو ...
تقليل عدد الإصابات لأدنى حد ممكن من خلال اتباع الإجراءات اللي فاتت دي
دمتم سالمين
حفظكم الله من كل مكروه وسوء
