25/04/2026
أحذروا نظام السلامات، فهو قادم بقوة بعد الطيبات، انا حذرت أهو علشان ماحدش يقولى ماحذرتش ليه من بدرى !
"خليها هنا للذكرى " ...
نفس صراع أيام الكفتة، كفتة عبد العاطى، كان تأييد شعبى رهيب وخرس لكل الأصوات وقتها، سيبوا الناس تهيص وتظيط بانتصارات وهمية، سيبوا الناس تملى فرغها بأحلام وردية !
وراحت الكفتة ، فين الكفتة ؟! ترارتا تات تارا ، أكلوا الكفتة ...
ثم الكوركومين، ثم بطل العالم فى البروستاتا وعسل سم النحل، ثم الطيبات، ثم السلامات ... ولسة، لأن الناس عندنا مادة خصبة للنصب والدجل، يموتوا فى أى حاجة ضد العلم والطب علشان الجهل والفقر تفشى فى كل مكان وبقى صعب مجابهته، شوف الأغاني وكلماتها، الأفلام والصريخ والشتايم والايحاءات، البنات وشكل الميكب بتاعهم ولبسهم ،الشباب وحلاقتهم وشكل دماغهم !
العالم بيتسابق فى علوم الطب وصناعة الدواء والسلاح، وأه معلش أسمح لى أحطلك "صناعة الدواء" جانب "صناعة السلاح " ، لان الإثنين أمن قومى، يعنى من غير سلاح هتتاكل ، ومن غير أطباء ودواء بردو هتتاكل !
لانك مع دور عبيط زى كورونا لو ماعندكش علم وطب ودواء ومستشفيات ممكن يروح منك ملايين البشر، زى بظبط اى سلاح نووى، واديك شايف بعينيك الفرق بين لبنان " بلد الأفلام والأغانى" وإيران " بلد العلماء والنووى " مثلا !
هاقولك حاجة هتزعلك أوى >>> السنين اللى جاية مافيش دواء جديد هينزلك رخيص، جو شريط البرشام ابو ٥٠ جنية دة مش هتشوفه تانى، انساه يا إبراهيم!
ويلا بقى خد واسمع عن مافيا الأدوية اللى بتحب تسمع عنها، العلماء فى العالم بيتسابقوا دلوقتى من أجل العلم وتصنيع الدواء وتطوير الجراحات بأدوات متناهية الصغر، زى بظبط السباق الحالى بين الاهلى والزمالك وبيراميدز على قمة الدورى بنفس حماسك وانت بتتفرج عليهم، واللى بيسبق بأختراعاته _ بعد اثباتها علميا بالدراسات والابحاث _ بيبيع علمه وتكلفة الدواء بأضعاف أضعاف ثمنها لدول العالم الثالث !!! ، اللى هو انت على القهوة بنفس حماسك !!!
تعرف لو حد من أهلك جاله ضيق شديد بالصمام الأورطي ومحتاج يتعمل تغير للصمام بالقسطرة "عملية حديثة اسمها TAVI " بتتكلف كام ؟!! يعنى قول كدة حسبة مليون جنية والصمام مستورد من برة بقفلته !!!
بلاش نتكلم فى ثمن إصلاح الصمام الميترالى والثلاثى بالقسطرة علشان دى فوق طاقة البنى ادمين ، أه يادكاترة ياجزارين، خلينا فى السمنة ، مرض السمنة انتشار فى العالم وفى كل بيت، فظهر حقن التخسيس العالمية المعروفة، وبقت تحقق مبيعات بمليارات الدولارات فى العالم زى السلاح بظبط، هل انت تقدر تصنعها ؟؟؟
طبعا لأ ، أخرك شيتوكال وحب الغزال، علشان فى حقوق ملكية فكرية لشركة الدواء المصنعة العالمية، فأنت ماتقدرش تعمل حاجه غير انك تشتريها وبالسعر اللى هم يحددوه لك !
ومش هينفع تقولى كبلد مش هشتريها لان فى مرضى كتير محتاجينها ويقدروا يشتروها، وفعلا الحقن اثبتت نتائج رائعة، فلازم هتشتريها غصب عنك وإلا هتجيلك متهربة وكذلك العمليات بالأدوات الحديثة لو ماتعملتش عندك هتعملها برة ب ١٠ أضعاف ثمنها فالافضل تدفع وتشترى بالدولار وتوفرها هنا !!!
ماكلمتكش لسة عن حقن الكوليسترول الجديدة، ولا حقن خفض الضغط الجديدة اللى لسة تحت الدراسة، ولا ولا ، وانت لا تملك رفاهية انك تقول لأ لدواء ، زى بظبط إنك لا تملك رفاهية انك تقول لأ لتسليح ... فاهمنى يا إبراهيم؟!!!
فالطريق اللى الناس ماشيه فيه الفترة دى من تقديس الجهل ورفض العلم ماهو إلا محاولة دفاعية نفسية ل " كفاية إختراعات مش لاقين ناكل ! ، لسة هنشترى علاج كمان !!! " ، بس مخفية ومستترة وحزينة ومكبوتة تحت شعارات مافيا الادوية وجشع الدكاترة، لكن فى الحقيقة هو سقوط علمى واجتماعى واخلاقى ونفسى وتوتا توتا خلصت الحدوتة ،حلوة ولا ملتوتة ؟!!!
حدوتة تخوف ومرعبة برشا ...
