د . مها الجوهري أخصائي طب الأطفال والتغذية العلاجيه

21/09/2025

سنه جديدة سعيدة علينا جميعا وعلي ولادنا 🙏🏼❤️

26/08/2025

07/08/2025

من حوالي أسبوع دخل عليا العيادة ولد جميل عنده ١٤ سنه عنده سوء تغذيه طوله ووزنه متأثرين وعصبي جدا بيجز علي سنانه مش متقبل اي كلام مش عاوز يسمع بينفخ ويتعصب علي اي كلمه رافض يبصلي ويهبد علي مكانه وكل ما اطلب منه حاجه رافضها
وانا باخد الهيستوري من الأم لاحظت انها شكوي متكررة منه وأنه عنيد ومش بيسمع كلامها عكس اخوه ..مش بياكل عكس اخوه ..وكل حاجه بتقولها عنه لازم تقول عكس اخوه

قولتلها لا خالص انا متاكده أنه ولد جميل وشاطر وهيسمع كلامي وطلبت من الأم أنها تقعد معايا لوحدنا شويه واتكلمت معاها أن المشكله مش في الولد المشكله فيكي وفي اخوه بطلي تقولي كلام سلبي ليه عشان هيعند معاكي اكتر واكتر بطلي تقارني بينه وبين اخوه لأن ده مش تحفيز ده هيخليه اسوء وقولي كلام إيجابي وحلو ومدح واحضنيه واسمعيه وهتلاقي فرق كبير

وقد كان ❤️❤️❤️

النهاردة دخل عليا هادي لطيف بيضحك مبتسم عمل كل اللي قولته وكل اللي بقوله بيقولي حاضر وكأنه اتبدل لطفل تاني حتي مع الام والبيت ❤️❤️ والحمدلله زايد في الوزن 💪🏼❤️

الموضوع ده للأسف بشوفه كتير جدا في العيادة وبيكون سبب مهم جدا لسوء التغذيه عند الطفل ولما بنحل العامل النفسي مشاكلنا كلها بتتحل 🙂🙂

عشان كده من فضلكم
بلاش مقارنات
بلاش تهدوا ولادكم
بلاش كلام سلبي
الولاد محتاجين اهتمام فبيعندوا معاكم لما مش بيلقوه
شجعوهم وقولوا كلام حلو وإيجابي واحضنوهم كتير هتحسوا بفرق كبير

وربنا يحفظ أولادنا جميعا يارب العالمين ❤️❤️

17/07/2025

سجده السكره من اقرب حالاتي لقلبي ❤️❤️ واكثرهم لماضه 😂 واكتر واحده بتتفاوض معايا كام حاجه حلوه اما بتيجي ملتزمه 😂❤️

وزننا كان زايد شويه بس الحمدلله مع تعديل السلوك الغذائي والالتزام بالنظام الغذائي الصحي مقاستنا قلت كتير ووزننا 💪🏼💪🏼قرب الطبيعي

ربنا يبارك فيها ويحفظها ويبارك في مامتها ويخليهالها ❤️

03/07/2025

كيان ❤️
بنوته جميله من حالات العياده جاتلي عندها سنه ونص وزنها ثابت من سن السنه علي ٨ كيلو وده عمل سوء تغذيه مزمن دخلها في قصر قامه
الحمدلله بدأنا رحلتنا سوا وعالجنا المشاكل الصحيه وحطينا نظام غذائي متوازن مناسب ليها والحمدلله رب العالمين النهاردة وصلنا الطول والوزن الطبيعين لسنها علي منحني النمو ❤️❤️
كل ده مكنتش هعرف أوصله من غير دعم الام وصبرها معايا لحد ما عدينا المشكله سوا 💪🏼💪🏼
شكرا يا ندا علي كلامك الجميل وربنا يباركلك في كيان ويفرحك بيها يارب العالمين ❤️❤️💪🏼

01/07/2025

رغوده السكره في حفله تخرجها من الحضانة ❤️ بعتتلي الصور عشان انزلهالها معايا والفيديو العسل بتاعها في اول كومنت ❤️❤️
حاله من حالاتي الجميله اللي بحبها جدا والحمدلله وزننا وطولنا قرب الطبيعي ولسه مكملين سوا ❤️💪🏼
ربنا يحفظك ويبارك فيكي يا احلي رغوده ❤️❤️

15/05/2025

"تغذية الطفل مش بس أكل... دي أسلوب حياة!" ❤️💪🏼

يسعدني أشارككم بحصولي على شهادة عن
" Life style medicine and food as a medicine course "
From
American Board of Lifestyle Medicine – ABLM

"أساسيات الطب النمطي والغذاء كدواء" من البورد الامريكي لطب نمط الحياة

واللي بتمثل خطوة مهمة في رحلتي لتقديم رعاية شاملة ومبنية على العلم الحديث لأطفالنا ❤️❤️

من خلال هذا التخصص، بقدر أساعد الطفل مش بس في تنظيم أكله، لكن كمان في تحسين نومه، نشاطه، مناعته، ومزاجه، وكل ده من خلال أسلوب حياة صحي وغذاء مناسب لكل حالة.

في عيادتنا، هدفنا مش بس علاج، لكن بناء نمط حياة صحي ومستدام لطفلك من البداية ❤️💪🏼

اللهم علما بما ينفعنا وانفعنا بما علمتنا ❤️❤️

30/04/2025

"الأم... جيش ابنها الأول ضد التحرش" ❤️💪🏼

في اللحظة اللي الطفل لسه مش بيعرف يعبر أو يدافع عن نفسه،
ربنا رزقه بأم... تكون له درع وسيف، حصن وأمان.

الأم الواعية هي خط الدفاع الأول ضد التحرش.
هي اللي بتعلّمه إن جسمه ليه حدود،
إنه مينفعش حد يلمسه من غير إذنه،
وإنه لما يحس بأي خوف أو قلق... يلجأ لها، يحكي، وميسكتش.

التربية الوقائية مش رفاهية...
دي حماية حقيقية بتبدأ من البيت، ومن حضن الأم اللي بتسمع وبتطمن وبتوعي وتفهم أن الخطر ممكن يكون من القريب قبل البعيد 😐

رسالة لكل أم:
انتي جيش ابنك الأول، ما تستنيش المعركة علشان تجهزيه.
ابدأي من دلوقتي... بالحب، بالوعي، وبالثقة. ❤️❤️

رسالة لأم ياسين : شكرا ..انتي بطله ❤️💪🏼💪🏼