طفلي مع دكتور أحمد عرفه

23/01/2022

18/12/2021

بالنسبة للناس اللى بتسأل عن حملة تطعيم شلل الأطفال .

* إمتا هتبدأ ؟

هتبدأ من الأحد ١٩ ديسمبر و لمدة ٥ أيام .

* إيه فايدته ؟

استمرار مصر خاليه من مرض شلل الأطفال اللى بيعمل شلل خلال ساعات لأيام من العدوى ربنا يحفظ أولادنا .

* مين لازم ياخدها ؟.

أى طفل من سن يوم لسن ٥ سنوات .

* حتى لو إبنى واخد تطعيم الصحه قبلها بيوم ؟

آه حتى لو قبلها بيوم ، لإن الهدف تطعيم "مجموعة كبيره جدا من الأطفال دفعه واحده لاستمرار المناعه المجتمعية " Mass immunization.

* حتى لو إبنى عنده برد ؟

حتى لو عنده برد .

* حتى لو لسه خافف من دور كورونا ؟

حتى لو لسه خافف .

* حتى لو لسه واخد أى تطعيم إضافى ؟

حتى لو لسه واخد أى تطعيم إضافى .

* إمتا مينفعش ياخد التطعيم ؟

لو حراره عاليه جدا > ٣٨،٥-٣٩ ، أو عنده مرض نقص مناعة شديد SCID (أمراض مناعه نادره وخطيرة)

* الحمله دى نوع التطعيم إيه ؟

نقط بالفم (سابين).

بس كده …

08/12/2021

ازاي نعدي الشتا بسلام

١. اقفلوا الشبابيك وانتو نايمين وخلوا لبس الأطفال مناسب لعادة "رفس الغطاء" المتأصلة فى الطفل المصرى💂🏿.

٢ . كوباية ينسون قبل النوم ،، كوباية موز باللبن -عليها ڤيتامينات اليوم - قبل النزول للمدرسه ،، علبة زبادى ،، صدقنى هى كل ما أتمنى لطفلى فى ذلك العالم المتوحش😥😥

٣. ڤيتامينات اليوم :
(بدون الحاجة تحاليل)
ڤيتامين "د" ربع قطارة ڤى دروب لكل الأطفال (٧٠٠ وحدة) للأبد ، حديد -ربع قطارة هيدروفرين يومياً من ٦ شهور لسن سنتين .

٤. الصبح ،، اغسلى وشّه بمياه بارده ،، شَرَّبيه كوباية مياه فاتره ، كوفيّه عشان الهوا الساقع ، وصيه يقفل شباك الباص او العربيه ، سواقين العربيات أو المدرسين لازم يفتحوا الشبابيك اللى جنبهم نص فتحة عشان نهوى الباص أو الفصل ونجدد الهوا .

٥. وصايا لابنك مفهاش هزار -الغلطة بعدوىٰ- :

ماسكك في إيدك ، سنداوتشاتك فى جيبك ،، كوبايتك في شنطتك ،، اللى يقولك سلفنى حاجة من دول قطّعُه 😂

٦. مفيش حاجة يا مس اسمها بوسو بعض يلا عشان تصالحوا بعض - انا ابنى يبقى مبلطج ع المدرسه كلها وبصحته احسن ما كل المدرسه تكون بتحبه وهوا مرمى في السرير سخن مولع وعنده برد!

٧. مفيش حاجة اسمها مدرسه وابنك سخن ، مفيش مدرسه وابنك بيكح طول الليل ، مفيش مدرسه وانتى عارفه ان الجو مليان تراب وابنك بيتعب في الجو دا - متغامريش بصحة ابنك.

٨. البرد ماهو الا ڤيروس -غالباً- بيقفل الأنف ويبدأ بخنفرة ويكمل برشح ،، قدامك ٤ سيناريوهات ،، ينزل على الصدر يعمل كحة ،، ينزل على المعده يخليه يرجع ،، يقفل الودان -قناة استاكيوس- يعمل التهاب اذن وسطى وحرارة ،، يقفل الجيوب الأنفية يعمل التهاب وحرارة وصداع ويبقى الرشح أصفر- أو يخف من غير ما يعمل حاجة من دول بين قوسين ابقى قابلنى 😊.

أيوا يعنى عاوز ايه ؟؟

الحق البرد ف أوله بسوايل وتسليك أنف قبل ما نلبس كلنا فى الحيط.

٩. الحساسية ما هى إلا برد متكرر مع هرش أنف وعطس .

١٠. الرشح له تسليك وتنضيف ، والكحة ليها سوايل دافية وقفل التكيف ، والاذن عمرها ما تتعب والأنف نضيف ،، والجيوب الأنفية البكتيرية ما بتهزرش ،غالباً لازم انتى بيوتك عنيف!

١١. حساسية يعنى طفل حساس - وحاجة بتعمل له تحسس ،، لو قدرنا نخدّر تحسّس الطفل (بأدوية الحساسية) ،، أو نبعد عن الحاجة اللى بتعمل تحسس (بنعرفها بالتحاليل لحالات معينه) .. يبقى بدأنا نعالج الطفل صح بإذن الله.

١٢. "٨٨٪" من حالات حساسية الصدر طلع معاها حساسية أنف واحنا مش عارفين ،، يعنى ٨٨٪ من اسباب الكحة غالباً ذاك العضو القابع فى أعلى ولا ينفك يلقى علينا بقاذوراته! .


١٣. مش معقول يبقا ابنك كل تغيير فصول او "دخلة شتا" بيجيلوا زكام ، رشح ، خنفرة ، هرش أنف ، عطس ، كحة ليلية .. وتبقى مش عارفه ان دى أعراض حساسية الأنف وان علاجها بسيط جداً .... اقفل الحنفية .

١٤. قاعدة بسيطة للتعامل مع الكحة لإخواتى الدكاترة :

اول ما تلاقى معاها رشح او زكام اعرف ان الحنفية فتحت والبلغم نزل عالصدر ،، نعالج الحنفية.
لو الكحة قلبت بنهجان ، صفير صدر (تزييق)
يبقى بدأت تقفل الشعب الهوائية وهنحتاج موسع شعب حتماً .
لو اتكرر موضوع الحنفية مع هرش وعطس >> لازم تفكر ف حساسية انف .
لو اتكرر موضوع النهجان والتزييق > حساسية صدر .
لو الاتنين اتكرروا >> حساسية انف وصدر .

١٥. البخاخات (انف وصدر) أحدث علاج في العالم للحساسية ، اقل تكلفة ، أأمن فى الآثار الجانبية ، أسرع فى النتيجة - لكنكم تحبون الأنتى بيوتك 😢.

١٦. الأنتى بيوتك بشكل عام مش علاج للحساسية.

١٧. "لو الرشح أصفر والحرارة عالية (٣٩) ٣ ايام ،، أو الزكام والرشح والكحة مستمرين بلا توقف ١٠ ايام(حتى بدون حرارة) ، دى علامات التهاب الجيوب الأنفية الحادّ وهنحتاج غالباً انتى بيوتك !"
‏Nelson 2015 - الأكاديمية الأمريكية للأنف والأذن

١٨. حالات حساسية الأنف والصدر - فائقة التحسس ،، هنحتاج تحاليل حساسية Specefic Ige للمشمومات تحت اشراف طبيب عشان نحدد ايه اللى بيتعبكم ونتجنبه - او نعالجه بالأمصال.

١٩. قاعدة بسيطة للتعامل مع الكحة لإخواتى غير الدكاترة :

السوايل الدافية احسن مذيب للبلغم ، العسل باللمون ممتاز ،، حلة مياه مغليه واستنشاق البخار اللى طالع منها احسن مرطب للحنجرة والاحبال الصوتيه ،، البرد كده كده هياخد دورته اللى علينا نخفف اعراضه ومنزودوش بأدويه تتعبه،، السجاير اكبر سبب مساعد لاستمرار كحة ابنك ،، نبطل بأه!

٢٠. بعض مفاتيح الكحة المختفية :

كحة الارتجاع >> ارتجاع سوايل المعده من المرئ للصدر في الاطفال اقل من سنة معاها غالباً تقويسه فى الضهر ورفض رضاعه وعلاجها مضادات ارتجاع مش اى دوا كحة !

كحة الخنَّاق >> صوت غليظ كالنباح سببها التهاب حنجرة واحبال صوتية وعلاجها جلسات ادرينالين وكورتيزون مش اى دوا كحة !

كحة السعال الديكى >> نوبات كحة متتالية خلال زفير واحد بعدها شهيق طويييل Whoop وعلاجه مضاد حيوى ومهدئ سهال مش أى دوا كحة !

الكحة الليلية او بعد استيقاظ النوم مع عطس وهرش>> غالباً حساسية أنف .!

الكحة والنهجان والصفير مع المجهود او اللعب او الرياضه >> غالباً حساسية صدر ..!

الكحة مع أنواع معينة من الروائح أو ريش او قطط أو زرع >> حساسية مشمومات و logic يعنى نمنعها تماماً.

الكحة الغير مفسرة >> نتطمن على القلب ، نستبعد اى حاجة ضاغطة على الرئتين ،، الارتجاع الداخلي ،، حساسية الانف الصامته ، وبعض الامراض النادرة . ومننساش الكحة الهستيرية فى بعض الاطفال.!

٢١. التعامل مع الحرارة بالترتيب :

قيسي الحرارة تحت الابط وزودى نص درجة ،
لو فوق ٣٨ خففى الهدوم و هوى الأوضه ،،
فوق ٣٨،٥ ادى سيتال -او بروفين لعمر فوق ٦ شهور وحميه بمياه فاتره فوراً ربع ساعه مغمور تماما ،،
فوق ٣٩ خافض تانى كل ٤ ساعات ، حموم تانى كل ساعه، وبالتأكيد اكشفى فوراً .

٢٢. مفيش حاجة اسمها غطى الواد عشان بيترعش - انتى كده بتزودي الحرارة والعرق وده بيبهدل الطفل الصح نقلعه ونحميه ، اه نحميه وهوا بيترعش بمياه فاتره عادى والمصحف😡 !

٢٣. التعامل مع ترجيع الشتا بالترتيب :

ريح المعده وبلاش نأكل بعد الترجيع ٢-٤ ساعات. لو في رشح او برد عالجه غالباً هوا السبب بينزل عالمعده فالطفل يرجع .
الترجيع مستمر؟ ابرة ترجيع عضل وكشف فوراً.
متتخمش فى الإسهال البسيط او الحمام السايل غالبا سببه افرازات الانف - العلاج فوق مش تحت!

٢٤. نصايح ذهبية للتخلص من مثيرات الكحة و الحساسية!

إخراج السجاجيد من اوض النوم ، كنس التراب ومسحه بعناية من الزوايا والاركان ، البعد عن كل ماله علاقة بالفرو والريش (دباديب ، قطط ، كلاب ، طيور)، غلى الملايات و اكياس المخدات واغطية الفراش على درجة حرارة ٧٠ كل ٣ ايام ، التخلص من الحشرات والصراصير والفئران ورمى القمامة بشكل يومى ، التخلص من الرطوبة بتتشيف السجاد وتعريضها للشمس و تنشيف المياه المتجمعه تحت الاحواض ورطوبة الجدران باصلاح المواسير ،، البعد عن التراب و الدخان واماكن حرق القش او الروايح النفاذة ، البعد عن السجاير والحشيش ،، نخف الحشيش شوية ياخوانّا 😂

٢٥. الكورتيزون مش سم ، ومش قاتل ، ومش بانجو ، ومش عفريت تترعب لما تعرف ان ابنك بياخده ،، انا اديت ابنى ال ٣ شهور كورتيزون ، وال٣ سنين كورتيزون ، بس بحساب و بعلم ،، وهوا اقوى علاج لنوبات الحساسية الشديدة ، ولكحة الخنّاق-الحنجرية- ، وأأمن علاج بخاخ وأحسنه لحساسية الانف والصدر .
احنا آسفين يا كورتى 😥

٢٦. عاوزه تزودى مناعة طفلك ؟؟؟

نام كويس ٨-١٠ ساعات ؟؟ أكل فاكهة يوميا - موز او كيوى او فراولة او بطيخ او مانجا-؟؟ لعب رياضة طويلة النفس زى السباحة ؟؟ فيتامين سي ولمون او برتقال يومياً ؟؟

٢٧. عاوزه تزودى مناعة طفلك ؟

اديتى ڤيتامين د وحديد بشكل مستمر وبجرعات كافية ؟؟
اديتى مصل الانفلونزا من ٦ شهور وانتى طالعه ؟
اديتى مصل المكورات الرئوية من شهر ونص ل ٥ سنين؟

مش معقول عملتى كل ده ومحصنتيش أطفالك كل يوم ب "أعوذ بكلمات الله التامة من كل شيطانٍ وهامّه ومن كل عينٍ لامّه" زى ما النبى ﷺ كان بيحصن الحسن والحسين !

‎🙌حفظ الله أطفالنا من كل سوء🙌

‎✅ منقول للافاده ،، لو استفدت من البوست اعمل منشن وشير لغيرك علشان يستفيد💝

‎✅ واعمل اعجاب بالصفحه علشان يوصلك كل جديد وكل ما يهم صحة طفلك ...

‎🩺 عيادة طب الأطفال وحديثى الولادة وحساسية الصدر .. د أحمد عرفه

‎العنوان : تفتيش كفر سعد أمام مدرسة التجريبية
٠١٠٦٠٣٣٠٠٢٧

07/08/2021

😰القواعد العشرون للجوّ الحرّ ده😰

الأطفال أكثر عرضة الجفاف 😦

١. متخرجوش الولاد أبوس أيديكم 😢

٢. اقعدوا في التكييف ،، ولو في مروحة شغلوها ،، ولو هنضطر نفتح الشباك يبقى فوط أو قماش مبلول على السلك عشان الهوا يبرد شويه..

٣. حمّوا الأطفال ولو مش سخنين ،،، ومياه وسوايل وعصير طول اليوم ،، ونخفف اللبس لقطعة واحده ،، أو نقعد البيبيهات بالبامبرز بس 😆.

٤. ثلاث أكواب مياه بارده قليلاً صباحاً وعصراً ممكن يعوضوا كمية الفقد من المياه مع الحرارة العالية.

٥.متخرجوش ولادكم من البيت او الحضانة الصبح☝

٦. الأطفال هم أكثر الفئات عرضة للجفاف -لأسباب كتير جداً- المهم ،، الحرارة العالية أخطر عليهم من غيرهم،، عشان كده خلينا ف البيت بكرة

٧. لو مضطرين نخرج اولادنا ، يبقى بعد المغرب ،، ولو قبله يبقى معانا زجاجة أو ببرونة مياه ساقعه ،، نمشى في الظل ،، كل شوية نشرب البيبي أو الطفل "رشفة" ،، اللبس يبقى أبيض أو ألوان فاتحة ،، كاب أو برنيطة ،، نرجع بسرعة وناخد دش!

٨. علامات الجفاف :

الضعف العام ، العطش الشديد ، النوم وقلة النشاط، دخول العينين ، قلة التبول ، الزنّ المستمر مع اللهفة على الماء .
لو لقيتى حاجه منهم ،، نشترى محلول جفاف ونحل الكيس على ٢٠٠ مل ونشرب واحده واحدة لغاية ما الطفل يشبع ويتحسن.

٩. متخرجوش في الحر من غير كاب او شمسية.

١٠. الحرارة ممكن توصل ل ٤٩-٥٠ ،، واحتمالات "إرهاق الحرارة" و"ضربة الشمس" بيزيد جداً وأول الأعراض دى ارتفاع درجة حرارة الجسم > ٣٨ ،، الفكرة ان قياس الحرارة بالفم والإبط وحتى الأذن مش هيبقى دقيق ،، لازم نقيس الحرارة عن طريق الشرج ،، ونطرح نصف درجة .

١١. متخرجوش من غير شمسية . صحتك انت كمان مهمة

١٢. "الإجهاد الحرارى Heat exhaustion"

لو طنشنا الموضوع والطفل قعد فترة في الحر الشديد ،،، بيبدأ بدرجة حرارة بين ٣٨-٤٠ ،، وبييجى بإسهال !! آه ،، إسهال بدون نزلة معوية ،، دوخه او دوار ،، ضعف ، صداع ، ترجيع ، وساعات شد عضلى !!لو لقيتى الحاجات دى وابنك مأكلش حاجة من بره وريحة البراز مش سيئة للغاية ،، أرجوكى متتلخبطيش وتدى أنتينال وسمكتا ونانازوكسيد ،، لأ ،، انقلى الطفل لمكان بارد ، سوايل كتير ومياه بأه ومحلول جفاف ،، وطبعاً دش بارد..!

١٣. متخرجوش من غير استعمال واقي شمس 😱

١٤. " ضربة شمس Heat stroke "

لو الموضوع زاد ،، الحرارة بتعلى فوق ٤٠ ،، الطفل فاقد الوعى او بادئ في إغماء ،، بالبلدى كده "مفرفر" ،، هلوسه ، صداع ، ترجيع !! فوراً نحطه تماما ف مياة بارده جداً ،، او كمادات مياة باردة ،، مع خوافض حرارة ،، ننقل مستشفى ونعلق محلول صوديوم وريدى !!

١٥. التمارين و الألعاب الحركية ممنوعة تماماً في الحر الشديد ،، لانها بتفقد السوايل عن طريق العرق ،، وده للأسف بيساعد على الجفاف وضربة الحرارة Exertional heat stroke،،
محبكتش النادى يا حبيبي دلوقتى نبقى نروح بالليل😁

١٦. متخرجوش من غير ما تشربوا مياه 😂

١٧. المشكلة الكبيرة لو ابنك أصلاً عنده جفاف -عشان نزلة معوية- مع الجو الصعب ده ،، ساعتها هنضطر نزود جرعات محلول الجفاف ،، ونزود السوايل بشكل عام ،، وأول ما تحس بان ابنك "مدروخ " أو " نايم " أو " سخن جامد" او بيرجع كل حاجة " ،، عالمستشفى فوراً 😰

١٨ . متخرجوش من غير ما تأخذوا دش ساقع 😂😁

١٩. خوافض الحرارة :

سيتال آمن من عمر يوم ،، بروفين من ٦ شهور ،، في لبوس سيتال وابيمول كبديل .

٢٠. نأجل المواعيد اللى ممكن تتأجل ،، حتى زيارات الطبيب لو ممكن نتعامل في البيت بلاش نروح( ما عدا العيادة بتاعتى طبعاً عشان في تكييف😂😂) ،، ومنقلقش خالص يعنى ،، يوم زى أى يوم بس حرّ شوية ،، ناخد قزازة مياه ساقعة نديها للغلبان اللى بيكنس الشارع😭 ،، والتعبان اللى واقف ع الإشارة😭 ،، وأى بنى آدم تقابله ف وشك بكرة في الجوّ ده صدقنى غلبان😭 ،، وهيفرح بالمياه دى جداً ،، وهتاخد ثواب إرواء

🙌حفظ الله أطفالنا من كل سوء🙌

✅ منقول للافاده ،، لو استفدت من البوست اعمل منشن وشير لغيرك علشان يستفيد💝

✅ واعمل اعجاب بالصفحه علشان يوصلك كل جديد وكل ما يهم صحة طفلك ...

🩺 عيادة طب الأطفال وحديثى الولادة وحساسية الصدر .. د أحمد عرفه

العنوان : تفتيش كفر سعد - شارع مدرسة التجارة - أمام مدرسة التجريبية
٠١٠٦٠٣٣٠٠٢٧

10/05/2021



بما إن الاعداد بدأت تزيد ……
إليكم .....

القواعد الاربعين في التعامل الشخصي مع وباء
الكورونا..

١- خليك واعي باي حاجة تلمسها ايدك..
٢- اغسل ايدك بعد لمس اي حاجة غريبة عنك لو انت برا البيت او استخدم الكحول..
٣- متلبسش جوانتي عمال علي بطال..
٤- متلمسش وشك يايدك.. صعب.. بس ممكن.. و لو حصل اتاكد ان ايدك كانت نضيفة قبل ما تعمل كدا..
٥- متلبسش جوانتي عمال علي بطال..
٦- لو تلبس جوانتي يبقي تلبسه عشان تعمل بيه حاجة واحدة بس و تكون غسلت ايدك قبل ما تلبسه و تغسلها بعد ما تقلعه..
٧- بالرغم ان مفيش دليل قوي علي الماسك القماش بس الاحتياط بيقول اننا مش خسرانين حاجة لو استخدمناه برا البيت و دول كتير بالفعل بدات تنصح بيه.. البس ماسك قماش..
٨- التطعيم أهم حاجة ….
٩- اهم من انك تلبس الماسك انك تاخد بالك ان المسافة بينك و بين اي حد في او وقت متقلب عن ٢ متر
١٠- عندك اعراض اعزل نفسك ٧ ايام كاملة او يومين زيادة من وقت اختفاء كل الاعراض لو عايش لوحدك
١١- عندك اعراض و عايش مع عيلة.. العيلة كلها تتعزل ١٤ يوم في البيت.. و حد من القرايب او الاصدقاء يجيب ليكو الحاجات الاساسية..
١٢- التطعيم أهم حاجة ....
١٣- مفيش داعي تروح مستشفي الا لو الاعراض بتزيد او مش قادر تتعامل معاها في البيت او الفترة زادت عن ٧ ايام..
١٥- متنزلش من البيت الا للضرورة القصوي.. ممكن تكون الضرورة القصوي اكل العيش طبعا.. مفيش مشاكل.. بس انزل و انت واخد كل احتياطاتك زي ما ذكرنا و بنشرح في البوست دا
١٦- متسلمش علي حد بالايد و بلاش بوس و احضان
١٧- القهوة و الخروجات و الزيارات العائلية ملهاش لزوم في الوقت دا.. وسائل التواصل مخليتش حد بعيد..
١٨- اتغذي كويس.. خضار و فاكهة و اكل صحي..
١٩- اغسل ايدك..
٢٠- لو عندك اعراض و عايش مع عيلة حاول تعزل نفسك عن باقي افراد العيلة علي اد ما تقدر.. اكلك لواحدك.. تدخل الحمام في وقت لواحدك و يتنضف كويس و يتهوي بعد ما تخرج منه..
٢١- اتعامل مع اي حد علي انه مصاب بالفعل بالمرض..
٢٢- اقلع الجوانتي و متستخدموش الا لحاجة واحدة بس
٢٣- المستشفيات من اخطر الاماكن في الاوقات العادية تخيل لو كمان في وباء.. متروحش الا لو محتاج بجد..
٢٤- متخبيش علي الاطباء اي اعراض.. هما اصلا شغلهم انهم يساعدوك..
٢٥- استغل وقتك الفاضي في حاجة مفيدة.. كورس.. قراية.. برنامج مفيد.. تامل.. عبادة.. ترفيه.. متنساش ترفه عن نفسك..
٢٦- التطعيم أهم حاجة ....
٢٧- الاصابة بالفيروس مش عار و لا عيب و ممكن تتعامل مع مصاب بس تكون واخد كل الاحتياطات من ماسك جراحي مش قماش و حاجة مغطي بيها هدومك و جوانتي.. و طبعا بتتخلص من كل الحاجات دي بعد ما بتتعامل مع المصاب..
٢٨- الماسك الواقي N95 ملوش اي فايدة ليك.. لو عندك روح وديهم مستشفي.. الدكاترة محتاجينهم اكتر عشان هما بيتعاملو مع مرضي ايجاببين و بيعملو حاجات عالية الخطورة لان بينتج عنها رذاذ
٢٩- اغسل ايدك..
٣٠- لازم تفتكر ان المرض بنسبة ٨٠٪ مرض خفيف و بيخف لواحده.. ملوش لزوم ابدا تخاف او تهلع لو عندك اعراض..
٣١- مفيش اي علاج معين محتاج تخزنه او تجيبه احتياطي.. هو باراسيتامول و سوائل و خلاص..
٣٢- التطعيم أهم حاجة ....
٣٣- متقربش من اي حد و خلي المسافة بينك و بين اقرب حد ٢ متر..
٣٤- اعطس او كح في منديل و ارميه فورا لو في كوعك.. مش في ايدك..
٣٥- حاول تحتار اوقات فاضية تشتري فيها حاجتك الاساسية و متنزلش في وقت فيه زحام
٣٦- اي مصلحة ممكن تتاجل اجلها
٣٧- مطلوب تشم هوا برده و تشوف الدنيا.. ممكن تنزل تتمشي في الاوقات اللي الدنيا فيها فاضية..
٣٨- لو ينفعل تشتغل من البيت.. طبعا اشتغل من البيت..
٣٩- اغسل ايدك..
٤٠- التطعيم أهم حاجة ....

حفظ الله أطفالنا من كل سوء🙌

✅ لو استفدت من البوست اعمل منشن وشير لغيرك علشان يستفيد💝

✅ واعمل اعجاب بالصفحه علشان يوصلك كل جديد وكل ما يهم صحة طفلك ...

🩺 عيادة طب الأطفال وحديثى الولادة وحساسية الصدر .. د أحمد عرفه

تفتيش كفر سعد شارع مدرسة التجارة امام مدرسة التجريبية
٠١٠٦٠٣٣٠٠٢٧

08/05/2021

لازم ناخد بالنا كويس جدا اليومين دول

ليه يا دوك .. ممكن كورونا تيجى للاطفال ؟؟
ايوه ممكن ...

ايه الاعراض يا دوكتور ...

ممكن بدون أعراض
سخونيه
كحة ناشفة
التهاب فى الحلق
اجهاد وتعب
ممكن احتقان بالأنف
إحمرار بالعين
بعض الأطفال
آلام بالبطن ،، غثيان ،، ترجيع ،، إسهال ،، طفح جلدى
الاعراض ممكن تبقى خفيفة .... و ممكن توصل لالتهاب رئوي

ايه ده يا دكتور ابنى كان سخن وبيكح من يومين ،، كده يبقى عنده كورونا ...

مش شرط خالص .. مش اى طفل عنده اعراض محتاج تحاليل او اشعات

لازم طبيب اطفال يفحص الطفل وممكن بعد الفحص ..بعد الفحص.. بعد الفحص يطلب تحاليل و اشعه ....

تحاليل فى الدم ... واشعه عاديه او مقطعيه على الصدر حسب ما الطبيب يشوف

امته نقلق يا دكتور ...

معظم الاطفال الاعراض بتخف لوحدها ...
راحه وسوائل واكل صحى و معالجة الاعراض فقط

نقلق لو الاعراض شديده ،،،
الاعراض متواصله مبتخفش بعد اسبوع ،،
نهجان (صدره طالع نازل) ،،
كحه متواصلة مبتفصلش ،،،
اضطراب فى درجة الوعى ،،،،
تشنجات ،،،
بقع حمرا (نزيف) تحت الجلد .... لازم مستشفى وحجز

اطمنوا ... نسبة الوفيات فى الاطفال قليله جدا جدا جدا بس موجودة فلازم ناخد بالنا ....

وطبعا الوقايه احسن من العلاج

نعمل ايه يادكتور ...

✔️سوائل كتير
✔️اكل صحى ... خضار وفاكهه
✔️ممنوع التجمعات او الزيارات
✔️لبس الكمامة وقت الخروج ،، أحسن بلاش خروج من البيت الا للضرورة القصوى
✔️غسل الايدى باستمرار بالماء والصابون
✔️تنظيف وتطهير المنزل … التركيز على تنظيف الأسطح يوميًا في الأماكن المشتركة التي تُلمَس بشكل متكرر، مثل الطاولات ومقابض الأبواب والأثاث والكراسي ومفاتيح الإنارة وأجهزة التحكم عن بعد والإلكترونيات والمكاتب والمراحيض والأحواض
✔️بلاش بوس واحضان 💋💋

🙌حفظ الله أطفالنا من كل سوء🙌

✅ لو استفدت من البوست اعمل شير واعمل اعجاب بالصفحه علشان يوصلك كل جديد وكل ما يهم صحة طفلك ...

🩺 عيادة طب الأطفال وحديثى الولادة وحساسية الصدر .. د أحمد عرفه

العنوان : تفتيش كفر سعد شارع مدرسة التجارة امام مدرسة التجريبية
٠١٠٦٠٣٣٠٠٢٧

29/04/2021

28/04/2021

يا دكتور انا قلقانة .... ابنى سرته طالعة لبرة!😥
يا دكتور .... انا مبخليش ابنى يعيط لاحسن يجيله فتاق!
يا دكتور ...بنتى عندها فتاق فى السرة وجارتى شارت عليا اربط عليها حزام... هل ده صح⁉️
يا دكتور 🤶 بنتى مهملة وبتسيب الواد يعيط وعشان كده سرته طلعت لبرة😡

كلكم سمعتم الكلام ده قبل كدا؟
سمعتم اراء كتير فيه؟
لو الاجابة (اه) تعالوا نشوف كل حاجة عن الفتق السرى فى الرضع.....
(الفتق السرى فى الرضع)
اعرف منين ان ابنى عنده فتق؟
👨‍⚕️الفتق السرى يظهر كإنتفاخ فى منطقة السرة.

وده سببه ايه؟
👨‍⚕️مفيش سبب معروف يؤدي إلى حدوث الفتاق السري، ولكن في أكثر الحالات يكون الحبل السري سميكًا ويتأخر انغلاق الفتحة التي بين عضلات البطن في مكان خروج الحبل السري من بطن الطفل، فيخرج الفتاق من خلال هذه الفتحة.
👨‍⚕️وقد يحدث أيضًا لوجود عيب خلقي في تكوين جدار البطن في منطقة السرة أو ضعف في النسيج الذي يسد فتحة السرة وهو أمر وراثي غالبًا.
👨‍⚕️كذلك الولادة المبكرة قد تؤدى الى زيادة فرص حدوث الفتاق السرى.

وإيه اعراضه بقه؟
👨‍⚕️بيظهر كبروز فى منطقة السرة فى عمر اسبوع او اتنين وبيزيد ظهوره مع البكاء او الحزق او الكحة، لكن ،، خلى بالك مش البكاء اللى بيسببه واعرفى برضه انه مبيسببش اى ألم ولا مغص للطفل.

طيب انا هربط عليه حزام للسرة عشان يدخل😊
👨‍⚕️لأ اوعى تعملى كده ده غلط ومبيساعدش فى تحسن الحالة، وكمان ممكن يسبب تقرحات وآلام شديدة للطفل.
واعرفى كمان ان برضه وضع لازقة او جنيه على السرة هيضر اكتر ما هيفيد.

أمال بقى نعالجه ازاى؟
👨‍⚕️معظم الحالات بتتحسن لواحدها لما عضلات البطن بتكبر وتقفل الفتحة اللى خرج منها الفتق وده بيكون على عمر سنة فى معظم الحالات.
👨‍⚕️حالات قليلة الفتاق مبيقفلش وبتحتاج عملية صغيرة كدا والكلام لو الامور متحسنتش والفتاق كان بيكبر مع الوقت

🙌حفظ الله أطفالنا من كل سوء🙌

✅ منقول للافاده ،، لو استفدت من البوست اعمل منشن وشير لغيرك علشان يستفيد💝

✅ واعمل اعجاب بالصفحه علشان يوصلك كل جديد وكل ما يهم صحة طفلك ...

🩺 عيادة طب الأطفال وحديثى الولادة وحساسية الصدر .. د أحمد عرفه

العنوان : تفتيش كفر سعد - شارع مدرسة التجارة - أمام مدرسة التجريبية
٠١٠٦٠٣٣٠٠٢٧

19/04/2021

نزلة معوية🤮💩

ابني يا دكتور كان زي الفل ،، لغايه امبارح بالليل

ليه ايه اللي حصل ؟؟😲
اسهال يا دكتور مبيقفش ،، مش ملاحقة على الحمام !!

ممممم ،،، طيب الريحه،، واللون ،، و ماسك نفسه ولا لأ ؟🤔🤔
الريحه قبر و اللون عادي وميه يادكتور ميه😷

طيب انزل اكشفى يا مدام عند اقرب دكتور ...👩‍⚕️

الدنيا ساقعه و جوزي متجوز عليا و النهارده يومها و محدش ساكن معانا و احنا اصلا في حته مقطوعه وفي حظر تجول و التليفونات مقطوعه 📞
يا سلام ،، يعني التليفونات مقطوعه والنت شغال و بتكلميني على الواتس المهم ،،

👈 ركزي معايا و اعملي اللي بقولك عليه بالترتيب :🧐

علامات الجفاف 💡

١- شوفى الواد بيعيط ولا مدروخ هيغمى عليه 😵
٢- حاولي تشربيه ميه و شوفي ملهوف ولا ( لأ) مش قادر يشرب( من كتر الدوخه ) ؟💧💧
٣- عينه داخله لجوه (غائره) ولا داخله أوى ؟؟👀
٤- اقرصى جلد بطنه شوفى هيرجع ببطء و(لا) بطىء أوى

🔹لو ولا حاجه من الاربعه حصلت يبقى معندوش جفاف !

ولو بيرضع زودى الرضاعه وقت وعدد ،، لو بياكل مش هوصيكى بأه بالسوايل و المياه والشوربه والعصاير !🍹🍹

وهتشترى كيس محلول جفاف اسمه "هيدروسيف" او "لوهيدران " تدوبي فى ٢٠٠ سم ميه و تديه واحده واحده بالسرنجه او القطاره او المعلقه او الببرونه ٥ سم كل ثلاث دقايق ونعوض كل مره اسهال بنص كوبايه محلول جفاف ،، تمام ؟؟💉

🔹طيب ولو حاجه من الاربعه حصلت ؟؟

👈لو لاقيتي حاجتين فاكتر من اللي بعد (ولا) ؟؟
يعني مدروخ (دايخ) و مش قادر يشرب من كتر الدوخه وعينه داخله لجوه جدا يبقى جفاف شديد وحالا على المستشفى ولازم يتعلق له محاليل !!! 🏥🏥

👈طيب ولو حاجتين من اللي قبل (ولا) ؟؟
لو لقيتي حاجتين فاكتر من اللي قبل (ولا) يعني مثلا
١- بيعيط 😭،، ٢- و عينه داخله لجوه⁦👁️⁩ ،، ٣- و ملهوف عالميه ساعتها يبقى جفاف متوسط ممكن تعالجيه فى البيت بس مش هيكفي تعوض الاسهال اللي جاي وخلاص ،، لأ لازم كمان تعالى الجفاف وتعوضى نسبه المياه اللي راحت في الاسهال اللي فات ،، تمام👍
وده بقى بتضربي ٥٠ في الوزن يعني لو ١٠ كيلو هيحتاج ٥٠٠ مللي (سم) محلول جفاف!!!📏

دكتور انا اصلا ادبي وكنت ساقطه حساب معنديش آله حاسبه و جوزي متجو......📱

👈 خلاص خلاص ،، انسى اللي قلته اول ما ابنك يسهل ،، اديله محلول جفاف لغايه ما يشبعو عينه ترجع لطبيعتها ويبقى هادي ،، وكل أما يسهل تانى اديله نص كوبايه وخلاص !!!!

طيب مفيش مضاد يفرفشه ولا محاليل تنعنشه💉
👈 لا المضاد ممكن يبهدل الدنيا ومش بنديه إلا لو في دم في الاسهال ،، وده لان معظم النزلات فيروسيه ،، ادي بس نانازوكسيد شراب لمده 5 ايام وده مطهر معوي اقوى من الفلاجيل ،، وادي سلفو زنك او زنك اوريجين ١٠ ايام ، بيقلل الاسهال ،،
اما كابكت و سمكتا ممنوعين تماما❌
عشان ملهمش تاثير و اثارهم الجانبيه⁦❇️⁩

مممممم ،،،، عملت كده و الاسهال لسه شغال ما وقفش وعدى ٥ ايام🙄
👈 ومين قال ان الهدف نوقف الاسهال ،، الهدف نعوض الاسهال من فوق محلول جفاف ،، و طول ما الطفل مش بيرجع و بيشرب المحلول ما فيش اي قلق 👍
عندك لغايه 14 يوم ،، بعدها نفكر في حساسيه لبن او لاكتوزاو بكتيريا او جيارديا !!!!👾

طيب وبالنسبه للترجيع بأه اعمل ايه ؟؟!!🤔🤔
👈 مبدأيا ٤/٣ امهات مصر بيتعاملوا مع الترجيع علي انه نزله معويه و ٩٩,٩ ٪ منهم بيدي انتينال مع ان الترجيع طالما مش معاه اسهال او الاسهال بسيط بيكون غالبا ان سببه ارتجاع و اكل زياده او التهابات اذن وسطى أو شويه التهابات برد في المعده ناهيك عن مشاكل الجراحه والانسداد المعوي و الزايده ،،🙁
وصدقيني لو ريحتى المعده ٦ ل ٨ ساعات وسبتيه نايم هيصحى كويس باذن الله ،،، لو الترجيع بأه مستمر هنجيب ابره دانسيت او زوفران و الجرعه ٤/٣ لكل ١٠ كيلو 💉

تمام ،،، عاوز اعلق للواد ابنى محاليل تفوقه كده
👈 ما بنعلقش محاليل الا في الجفاف الشديد او رفض محلول الجفاف تماما أو الترجيع المستمر ،، او لو الام مش عارفه تتعامل ،،، غير كده ،،، يبقى شغل مايرضيش ربنا قولا واحدا❌

في اكل معين ممنوع مع الاسهال طاه⁦☹️⁩
👈 ما عدا السكريات مفيش حاجه ممنوعه🍬🍨

🔹🔹نصائح سريعه بأه يا دوك عشان الاسهال مالي البلد اليومين دول

١- تطعيمم الروتا💉
👈بالصلاه على النبي بيقلل من الاصابه بنسبه ٨٠٪ او اكثر
👈في نوعين روتاتك ثلاث جرعات و روتاريكس جرعتين
👈اول معاد لاول جرعه شهر ونصف و اخر معاد لاخر جرعه ٨ شهور
👈عن نفسي بفضل روتاريكس عشان جرعتين بس ،، و عشان اخر معاد لاول جرعه ممتد لسن خمس شهور
👈اما روتاتك لو طفل عدى ٣ شهور و ٣ اسابيع خلاص راحت عليه⁦3️⃣
⁩
٢- غسل اليدين بالصابون والماء الفاتر قبل و بعد الاكل و الحمام ،، و للامهات بعد تغيير الحفاضات💩

٣- غسيل الخضروات والفواكه بعنايه🍊

٤- تجنب الاكل في نفس الطبق لفرد الاسره المريض⁦🕳️⁩🍵
٥- محلول الجفاف اهم من المضاد الحيوي💊
٦- تعليق المحاليل اخر حل نلجأ اليه ومشاكله كتير 🏮
٧- لاكتيول فورت اكياس وكبسولات مفيده ولا بأس بها على الاطلاق⁦◼️⁩
٨- ارتفاع الحراره لا يعني ابدا نزله معويه بكتيريه عادي خالص و نفس العلاج اللي فوق شغال🌡️

🔹🔹 الاسهال اللي بيطول 🤔🤔🤔
لو ابنك عنده اسهال ١٠-١٤ يوم
حاجه من الاربعه الاشهر 4️⃣

١- حساسيه اللاكتوز
📌و ده معناه ان الالتهاب دمر مخزون الامعاء من الانزيم اللي بيكسر سكر اللبن (اللاكتوز ) فالسكر ببساطه بينزل من غير ما يتهضم و يشد معاه كوووول الاكل على هيئة اسهال حمضى عنيف و غالبا بيعمل تسلخات ...
٢- ميكروب زى الجيارديا ...
٣- ميكروبات متكاثره في الامعاء ودي المزرعه بتلقطها على طول وعلاجها حسب مزرعه البراز ..
٤- حساسيه لبن ...
🔹 طيب ماننساش حساسيه القمح والجلوتين ،، امراض خطيره زي القولون المتقرح و كرونز ،،، اسباب اخرى ...
وساعتها لازم دكتور للتقييم والاطمئنان

🙌حفظ الله أطفالنا من كل سوء🙌

✅ منقول للافاده ،، لو استفدت من البوست اعمل منشن وشير لغيرك علشان يستفيد💝

✅ واعمل اعجاب بالصفحه علشان يوصلك كل جديد وكل ما يهم صحة طفلك ...

🩺 عيادة طب الأطفال وحديثى الولادة وحساسية الصدر .. د أحمد عرفه

العنوان : تفتيش كفر سعد شارع مدرسة التجارة أمام مدرسة التجريبية
٠١٠٦٠٣٣٠٠٢٧

15/04/2021

غذاء الطفل فى العام الأول يأكل امتى و يبتدى ازاى و الفيتامينات و الحديد ؟؟

❗دكتور إيه الأكل المناسب لإبني أول ٤ شهور🤔 ؟

لبن الام هو الغذاء الأمثل للطفل أول ٤ شهور و في حال تعزر الرضاعة الطبيعية يعطى لبن صناعى رقم ١ و يعطى الماء من أول أسبوع للأطفال اللى بترضع صناعى أما اللى بيرضعو طبيعى مش محتاجين يدخلو مياه إلا فى الحر الشديد !!

❗ومن ٤ ل ٦ أشهر 🤔؟؟

ماسبق مع إدخال سيريلاك الحبوب ذات النوع الواحد ذي (الأرز - القمح- الذرة ) و بتتعمل باللبن اللى الطفل بيشربه أو بالماء .ممكن ادخال الزبادى و الجبن القريش ( بشروط) و عصير الطماطم و الجزر المسلوق

❗من ٦ ل ٨ أشهر 🤔؟؟

ماسبق مع إدخال الفواكه المهروسة أو سهلة المضغ بعد غسلها جيداً مثل ( الموز - التفاح - المشمش - الكمثرى) وذلك عن طريق سلقها ثم ضربها في الخلاط حتى تصبح طرية بما فيه الكفاية لطفلك

بنفس الطريقة السابقة يتم ادخال الخضروات المهروسة أو سهلة المضغ بعد غسلها جيداً مثل ( الكوسه - الجزر- البسلة- البطاطس) وذلك عن طريق سلقها ثم هرسها في الخلاط حتى تصبح طرية بما فيه الكفاية لطفلك واضيفي بعض اللبن إليها ( لبن الثدي أو الصناعي أو الماء)

ابدأي بإدخال قطع صغيرة جدا من الدجاج أو اللحوم أو الأسماك منزوعة الشوك والعدس بأنواعه المختلفه كمصادر غنية بالبروتينات والحديد. الأرز و المكرونة

❗من ٨ ل ١٠ أشهر🤔؟؟

ماسبق مع إدخال صفار البيض المسلوق . فول مهروس جيدا - لحم أحمر مفروم أو سمك مشوي - تقديم الوجبات في صورة ثلاث وجبات رئيسية تتخللها الرضعات كوجبات بينية

❗من ١٠ ل ١٢ شهر 🤔 ؟؟

طفلك الآن يستطيع أن يأكل كل أنواع الأكل الذي تأكلين منه مع مراعاة تقطيع الأكل إلى قطع صغيرة مناسبة للمضغ والبلع و تجنب إعطاء الأكلات الحادة التي ممكن أن تقف في حلق طفلك وتسبب له الاختناق.

❗طيب إمتى ابدأ أدى فيتامينات وايه هي 🤔؟؟

لبن الأم كافي تماما لحد ٦ شهور ما عدا ڤيتامين( د) اضيفيه لطفلك من الأيام الأولى في العمر حتى سن المراهقة ( ٤٠٠ وحدة دولية ودي موجودة في ٤ نقط ڤي دروب او 10 نقط بيبى فيت) .

❗امتى ادي حديد 🤔؟؟

نظريا الطفل عنده مخزون يكفيه حتى سن ٦ أشهر و في حالات ذي الأطفال المبتسرين (مولودين قبل ميعادهم ) أو اذا كانت الأم بتعانى من انيميا بالحمل يكون المخزون أقل و يبدأ الحديد من الشهر الرابع أفضل .
يعطى الحديد من الشهر الرابع الى السادس بجرعة 10 مجم يوميا ( خمس نقط انريتش
أو هيدروفرين )
بعد ٦ أشهر من الممكن إضافة الحبوب المزودة بالحديد ك ( سيريلاك مثلا) .
بعد الشهر السابع زيادة الأكلات الغنية بالحديد مثل حبوب القمح والعدس وصفار البيض واللحوم والكبده .

❗وڤيتامين أ 🤔؟؟

توصى منظمة الصحة العالمية بإعطاء الطفل ١٠٠،٠٠٠ وحدة دولية من فيتامين أ تُعطى مرة واحدة عند 9 اشهر ودي موجودة في كبسولتين ( أ ڤيتون) يذاب في ماء ويعطى للطفل بالفم او بالتنقيط على اللسان ، أما بعد عمر سنة و فيعطى ٤ كبسولات كل ٦ أشهر حتى سن خمس سنوات.

❗طيب و باقي الڤيتامينات 🤔؟؟

الغذاء المتوازن الصحى هو افضل وقاية لنقص الفيتامينات و الطبيب المعالج بيحدد الطفل محتاج فيتامينات ولا لأ .

❗الملح والسكر ايه نظامهم 🤔 ؟؟

السكر مشكلته انه ب"يحلى" الأكل في فم الطفل ف ممكن يسيب الرضعه و يرفض الأكل أما الملح فمشكلته بس مع الكميات الكبيرة ممكن يعمل ضغط على الكلى الغير ناضجة تماما يعنى بلاش أحسن
إدخالهم بعد ٩ شهور

❗و العسل 🤔 ؟؟

الاكاديمية الامريكية لطب الأطفال مانعة العسل قبل سن السنة وذلك للخوف من احتمالية الإصابة بميكروب نادر جدا تؤدي للإصابة بمرض التسمم المعوي ( Clostridium Botulinum).
وان كانت الإصابة دى عمرى ماشوفتها و لا سمعت عنها حصلت لطفل من أكل العسل و الدراسات دى قديمة جدا (1978) و علماء كتير بيعتبرو ان التحذير ده مبالغ فيه
قناعتى انك ممكن تدى العسل بامان بعد تسع شهور .

❗ الدكتور برده مانع ابني من السمك 🐟 والبيض 🐣ومنتجات الألبان🍶 و الفراوله 🍓 والقمح 🌾 أول سنة ... اعمل إيه🤔🤔؟؟؟

الكلام ده قديم وتم تحديثه من قبل الأكاديمية الأمريكية لطب الأطفال منذ ٢٠٠٨ وحتى الآن .. والتي أوصت بعدم منع الطفل من كل ما سبق أبداً إلا إذا كان هناك تاريخ مرضي قوي في العائلة للإصابة بالحساسية من هذه الأصناف.

☑ شروط ادخال منتجات الألبان من الشهر الرابع : عدم وجود حساسية من الألبان لدى الطفل أو تاريخ مرضى لها بالأسرة و عدم وجود اكزيما جلدية ويوصى الا تتجاوز كمية الزبادى عن ٤٠ جرام .

مصادر
‏https://health.usnews.com/health-news/blogs/eat-run/2013/03/19/how-and-why-to-introduce-allergens-to-your-infant

🙌حفظ الله أطفالنا من كل سوء🙌

✅ منقول للافاده ،، لو استفدت من البوست اعمل منشن وشير لغيرك علشان يستفيد💝

✅ واعمل اعجاب بالصفحه علشان يوصلك كل جديد وكل ما يهم صحة طفلك ...

🩺 عيادة طب الأطفال وحديثى الولادة وحساسية الصدر .. د أحمد عرفه

العنوان : تفتيش كفر سعد - شارع مدرسة التجارة - أمام مدرسة التجريبية
٠١٠٦٠٣٣٠٠٢٧

07/04/2021

رمضان كريم

07/04/2021

القواعد العشرون لتخفيف الهدوم..😁😁

♦أولا ً الجو لسة مش مستقر ..حار بارد صباحا ً⛅☀ بارد حار مساء😁 عشان كدة ولا نزود اللبس اوي ولا نخففه اوي..

♦يعني لا طواقي و لا شرابات👢🎩 ..ولا كت و لا حمالات🎽👗

♦يعني في الفترة دي نلبس قطنيات👕..

♦المدام اللي لسة ملبسة صوف و دفايات سمعاني⁉..بقول قطنيااااااات👚

♦طب ايه عدد الطبقات⁉
لو لبستي ابنك كت ونص كم وكم وعليهم بيجامة قطن كدة ممتاز جدا

♦ولو الجو قلب وعمل حركات..
تشيلي طبقة كم أو نص كم لو الجو بقى حر
و ترجعيها تاني لو الجو بقى برد من سكات😒

♦خدعوكي فقالوا❌❌..لو خففتي هدوم ابنك ما ينفعش ترجعي تزوديها تاني أو العكس😡
♦طبعا كلام غلط ..لو الجو حر هتخففي قطعة من الملابس ولو برد جدا ⛄❄ مش معقول تسيبيه بردان بالساعات😉

♦يبقى في الجو دة نلبس القطع اللي اتفقنا عليها بحيث نزود قطعة أو نقللها بأمان بدون تخوفات✔

♦الأمهات المستعجلة على تلبيس فساتين منفوشة وكت ودلع للبنوتات..💃
♦أنا معاكى أنهم بيبقوا عسلات شرباتات قمرات😍😍
♦بس اصبري شوية يا ست الستات🚺
♦اصبري لغاية ما الجو يستقر جدا ويبقى حر ونشيل البطاطين ونغسلها ونقول كدة فعلا الجو مش هيعمل تاني اي حركات👌

♦ما ننساش لو طالعين بالليل🌙 لازم نحط في الشنطة جاكيت أو بطانية خفيفة لأن أساسي الجو بالليل بيبرد ساعات..

♦لو الجو حر☀ نفتح الشبابيك وبس
♦المروحة بتعرض الطفل لتيار هوا مباشر عشان كدة نأجلها اد ما نقدر
♦لو فيه مكيف يبقى احسن من المروحة ونشغله بدرجة 26 ويفضل مش دلوقتي برضه💁 عشان التقلبات..

♦لو فيه تراب نحط قماش قطن مبلول على الشباك ونرش عليها مية باستمرار ببخاخة فيها مية💦💦..هتحمينا من التراب وتنعش الجو🌈🌊☀
و في الجو التراب دة مننساش نعلم اولادنا👈 اتيكيت السعال

♦طب لو الجو استقر خلاص وبقى حر علطول??
♦يعني من أول شهر 5 كدة نبدأ ندي شاور ونخفف قطعة كل أسبوع بعد الشاور وندعو الله بالثبات😂

اللي استفاد من البوست يعمل لايكات
ويعمل مشاركة لو عجبته الكلمات
ماتنسوش المنشن للأمهات المحتارات

🙌حفظ الله أطفالنا من كل سوء🙌

✅ منقول للافاده ،، لو استفدت من البوست اعمل منشن وشير لغيرك علشان يستفيد💝

✅ واعمل اعجاب بالصفحه علشان يوصلك كل جديد وكل ما يهم صحة طفلك ...

🩺 عيادة طب الأطفال وحديثى الولادة وحساسية الصدر .. د أحمد عرفه

العنوان : تفتيش كفر سعد - شارع مدرسة التجارة - أمام مدرسة التجريبية
٠١٠٦٠٣٣٠٠٢٧